KORINTUS 2 4:7 - Alkitab Singog In Mongondow Masa In Tanaa

⁷ Táe kaoyúonan inta mopia nongkon soroga tua in ná bí kon bonu in awak nami inta inaidan nongkon butá ḷamentong, sinbá moniatadon kon ropot moḷoben kon inami naa in nongkon i Allahbí, deemanbí nongkon inami tontaní.

KORINTUS 2 4:7 Mawu Ofanana

AYUB 10:9

Toropdon kon nongkon butá ḷamentong Pinomia-Mu in akuoi! Umpaka yo baḻíon-Mu bui in akuoi ḷobud?

AYUB 33:6

Sin kon i Allah, iko bo akuoi in diábí in yoposinea nongkon butá ḷamentong pinomia-Nea in kitada.

AYUB 4:19

Apapa doman mahaḷuk nongkon butá ḷamentong mahaḷuk ḷobud inta motaau romputon naonda bo sisik!

OMBAḶ 4:2

Dungkuḷmai ede mita in tayowmobiag in Kotá in Sion naonda bo buḷawan inta koboḻi, táe tanaa in pinomiadon mako naonda bo kuyon butá.

MATIUS 13:44

“Aka ki Allah momarenta, yo naonda: Bo kapunyaan inta noiḷobong kon gobá inta nouḻí in intau, bodongka iḷobongnea bui. Popisí in pia in ginanea, dá minayádon in sia bo nopotaḷui in bayongan kapunyaannea bo sinaḷuineadon in gobá tatua.”

MATIUS 13:52

Dá ki Yesus in noguman kon i monia, “Pomuḷoi in intau inta monotaau totok kon atorang i Musa bo notarima kon totundú kon naonda in ki Allah momarenta tua, yo sia in naonda bo ki togi baḷoi inta nopoḷuai in pakakatnea nobagu bo inta nokoyongan nongkon tampat inta pinotagúannea.”

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

KORINTUS 1 1:28

Ki Allah in nomiḻí kon inta inanggap noompá, nohina, andeka inta inanggap diá moponting in dunia naa.

KORINTUS 2 10:10

Sin oyúon intau noguman nanaa, “Bonu in surat mita i Paulus tua in motogat bo mokobangkaḷ, táe aka siadon tontaní in kon yua-yuak naton, yo moyangkodon in sia bo singognea mita tua in diádon in mangaḻenea!”

KORINTUS 2 13:4

Totuubí, kon wakutu in Sia pinopopakú kon kayu pinoyotaḻempang, noḻemé in Sia, táe tanaa in biniagdon bui i Allah in Sia takin kawasa-Nea. Kami in diábí doman moropot kon bonu in kobiagan nami inta notobatúdon i Kristus, táe aka kami moyogintayowdon monimu, yo kami in mobaḻí bidon moropot moyotakin i Kristus lantaran kawasa i Allah.

KORINTUS 2 4:1

Kami nogaid kon oaidan tanaa popisíbí in totabi i Allah. Tuamai in diábí moḻia-ḻiaw in gina nami.

KORINTUS 2 5:1

Sin kinotaauanbí nami kon aka baḷoi – makusudnea awak naton – inta pinogutunan naton kon dunia naa bo rumbunon, yo posadiaanbí i Allah in kita kon baḷoi inta kon soroga. Tampat inta pinomia i Allah tontaní bo inta diá mogogu-goguyaat.

KORINTUS 2 6:10

Umpakabí pinokuyang monia in gina nami, táe umuranbí moḷunganga in gina nami. Kami in koontongan nobiag nobogá, táe nobayongdon intau in binaḻí nami nooyúon. Koontongan kami diá kon onu bo onu, táe sabanarnea bayongan rupa-rupa oyúonbí kon i nami.

EPESUS 2:5

sahingga in kon wakutu in rohani naton minatoipa, sin popisí in kita diá dinumudui kon ibog i Allah, biniag-Neadon bui in kita noyotakin i Kristus. Tuamai in tongábí lantaran kinopopia in gina i Allah, dá pinosaḷamat-Nea in moiko.

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

KOLOSE 1:27

Kon umat-Nea tatua ki Allah in moibog moponiata kon totokbí in mopia bo moḷoben in onu in binuni kon intau mita ibanea. Naa inta binuni tatua: Ki Kristus tua in nionbí kon i monimu, bo tua in mangaḻenea, kon moiko in moitakin doman mokorasa kon kamuliaan i Allah.

KOLOSE 2:12

Sin kon wakutu in moiko binaptis, moiko in iḷobongdon noyotakin i Kristus; bo takin doman baptisan tatua, moiko in noitakin doman biagon bui moyotakin i Kristus popisí in moiko mopirisaya kon kawasa i Allah inta ain nomiag kon i Kristus nongkon kinopatoian.

KOLOSE 2:3

Ki Kristusbí tua in mobuká kon bayongan pandoi bo pongotahuan i Allah inta koḻipod noibunipa.

TESALONIKA 1 1:5

Sin kami in nopoyaput in Habar Mopia kon i monimu deemanbí pinodoyon kon pandoi nami, táe pinodoyonbí kon kawasa in Roho i Allah inta umuran kotaki-takin nami. Bo totokbí iyakin nami kon totuubí in Habar Mopia tatua. Kinotaauan bidon monimu in kobobiag nami wakutu in kotaki-takinpa monimu. Kami in umuran noramuji in nogaid sin kopontingan monimu.

TESALONIKA 1 4:4

Pomuḷoi in ḷoḷaki kon sigad monimu in musti monotaau kon naonda in mobiag mokosanang kon gina i Tuhan bo gina in bayongan intau takin i buḷoinea.

TIMOTIUS 2 2:20

Kon bonu in baḷoi moḷoben norupa-rupamaidon in pakakat, oyúon in nongkon saḷaka, nongkon buḷawan, oyúon doman in nongkon kayu bo nongkon butá. Oyúon in pinogaid kon oaidan inta mopia totok, táe oyúon doman in pinogaid kon oaidan inta diá totok in moponting.

HAKIM MITA 7:2

Ki Tuhan noguman kon i Gideon, “Intaumu mita noiḻiudon in antó. Doíbí in Akuoi mopountung kon i monia nongkon intau in Midian, sin dikabo mosia morai kon nountung in mosia sin ropotbí monia tontaní, dá doí in mosia modayow kon i-Nakó.