KORINTUS 2 12:2 - Alkitab Singog In Mongondow Masa In Tanaa

² Kon bonu in oontongon tatua, kinotaauanku in intau inta noibingkat monik kon soroga tatua, mopuḷúbí bo opat notaong inta noitaḻibdon. (Diá doman notarangku totok mongo takin awaknea in noibingkat tatua mongo tongábí noiḷabot magí kon mataku – tongábí ki Allah in nonotaau kon tua.)

KORINTUS 2 12:2 Mawu Ofanana

DATU MITA IMITÁNEA 18:12

Aka akuoi mayá nongkon naa, Roho i Tuhan in dika bo modia kon i Amá mayá in tampat inta diá kinotaauanku! Bo aka potaauku kon i Ahab kon ki Amá in kon naa, bo moiduduimai kon tua diá moyodungkuḷnea in ki Amá, yo notantú bidon kon ḻimodonneabí in akuoi. Pokotaaudon, Amá, akuoi naa in totu-totuubí mosumba kon i Tuhan nongkon nointokanpamai!

DATU MITA IMITÁNEA 8:27

Tongá, o Allah, totuu degá kon Iko in mogutun kon butá naa? Umpaka ḷangit inta námai tua in kobanat bo kooḷadnea yo diábí tugatan kon ini-Mu, apapa doman baḷoi inta pinosindogku tanaa!

DATU MITA 2 2:16

bo noguman, “Kami in ḻima nopuḷú in naa, komintan mongoropot. Tuamai, koḻigai in kita mayá motayak kon i Elia ki tuangmu tua. Degá bo Roho i Tuhan in nodiadon kon inia pinobayá in buḷud andeka kon ḷopá, bo sinaḷáan kon tua.” “Dikadon!” tubag i Elisa.

MAZMUR 148:4

Dayowdon in Sia, ei ḷangit inta totok in moḷantud, dayowdon in Sia, ei tubig kon ḻimonikan in ḷangit!

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

YEHEZKIEL 11:24

Kon bonu in oontongon tatua, Roho i Allah nobingkat kon inakó bo dinia bui pinobayá kon intau mita intau iḷumbú kon Babel. Onda intua diádon inontong in oontongon tatua.

YEHEZKIEL 43:5

Roho i Tuhan nobingkat kon inakó bo dinianea in akuoi kon dangkuḷon dotá in bonunea; kon tua inontongku in Baḷoi Tuhan inta kinawasa in sindar kinoangoian i Tuhan.

LUKAS 24:51

Koyogotpa in Sia nomarakat, indoianmai yo noibingkatdon in Sia minayá in soroga, bo noitondídon in Sia kon i monia.

YOHANES 6:56

Intau inta mokaan kon awak-Ku bo monginum kon dugú-Ku, umuranbí in Sia motobatú takin-Ku, bo Akuoi i motobatúnea doman.

OUMAN IN RASUL MITA 14:6

Táe kinotaauan i Paulus bo i Barnabas in tomayá monia tatua, dá minayá in taya dua bo sinimí kon Listra bo Derbe.

OUMAN IN RASUL MITA 22:17

“Naonda in akuoi nobuidon kon Yerusalem bo wakutu in akuoi yogot in nosambayang kon bonu in Baḷoi Tuhan akuoi in kinawasadon in Roho i Tuhan.

SURAT I PAULUS KON JAMAAT RUM 16:10

Salam kon i Apeles. Kotoinduduinea kon i Kristus aindon nouji. Salam doman kon motoḷuadí i Aristobulus,

SURAT I PAULUS KON JAMAAT RUM 16:3

Poyaputpa in salamku kon i Priskila bo kon i Akwila, bo kon yobayatku mita inta tumpaḷa nogaid kon oaidan i Kristus.

SURAT I PAULUS KON JAMAAT RUM 16:7

Poyaputpa doman in salamku kon i Andronikus bo kon i Yunias. Mosia tua in toḻipúanku bo nokoimontandon in sinumuot kon ponjara takinku. Wakutu in akuoi diápa nopirisaya kon i Kristus mosia in munadon nopirisaya. Tangoi monia tua in kinotaauan bidon totok in rasul mita.

SURAT I PAULUS KON JAMAAT RUM 16:9

Poyaputpa in horomatku kon i Urbanus, yobayat topogaidan naton sin kopontingan i Kristus. Bo horomatku doman kon i Stakhis inta kinotabiku.

SURAT I PAULUS KON JAMAAT RUM 8:1

Tanaa in diá bidon in hukuman kon i monia inta nobiag notobatú i Kristus Yesus.

KORINTUS 1 1:30

Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

KORINTUS 2 11:11

Eta nongonubí sin mosingogbí in akuoi kon natua? Degá diá motabi in akuoi kon i monimu? Kinotaauanbí i Allah in tabiku kon i monimu!

KORINTUS 2 13:5

Tungkuḷaika uji in pirisaya monimu mongo totu-totuudon noidoyon kon pirisaya kon i Kristus! Taridiai kopia! Degá moiko in diápabí mopirisaya totok kon ki Kristus Yesus in oyúondon kon bonu in gina monimu! – sin aka diá natua yo moiko in diápabí monahang kon totungkuḷ.

KORINTUS 2 5:17

Intau inta notobatúdon i Kristus in totu-totuu bidon sinoimbagu. Inta ain nokoyongan in diá bidon, komintan bidon sinoimbagu.

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

GALATIA 1:22

Táe wakutu intua jamaat mita inta kon Yudea, diápabí nonotaau kon inakó, sin diápa inontong monia.

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

EPESUS 4:10

Bo Sia inta ain noponag tua, Sia doman tua inta ain noponik nodapot in tampat inta moḷantu-ḷantud nongkon ḷangit sahingga kon ondakabí in Sia oyúonbí kon dunia naa.

ULANGAN 10:14

Ki Tuhan Allahmu in ki togi ḷangit inta totok in moḷantud; bo butá in tanaa in Siabí doman in kitogi takin bayongan inta kon bonunea.

TESALONIKA 1 4:17

Mopaḷut mako kon tua kita inta nobiagpa naa, bingkatondon moyotakin monia mamonik in ḷangit moyodungkuḷ i Tuhan. Bain kon tuata bo mogutundon in kita takin i Tuhan.

IBRANI 4:14

Manangka intua, musti umuran in kita kumadai kon onu inta ain ináku bo pinirisaya naton sin oyúondon in Imang naton momulia bo inta moḷoben. Sia ain sinumuot dapot kon tayowon i Allah, Sia tuata in ki Yesus ki Adí i Allah.

IBRANI 9:24

Sin ki Kristus in diábí sinumuot kon Yuang Motusi inta pinomia in intau, inta nobaḻí lambang in yuang Motusi inta totokea. Ki Kristusbí tontaní in sinumuot kon soroga; tanaa Sia in minayá kon tayowon i Allah sin lantaran kopontingan naton.

WAHYU 1:10

Kon Singgai i Tuhan, akuoi in kinawasaan in Roho i Allah, bodongka nokodongog in akuoi kon singog moropot – naonda bo singog in torompet – nosingog kon tumikumai.

WAHYU 12:5

Bo bobay tatua in nopononggadídon in tobatú adí ḷoḷaki inta momarenta kon bayongan intau kon dunia naa takin tungkud uatoi, táe adí tatua baḷú bo inagow nongkon i inánea bo dinia kon i Allah kon tayowon pomomarentaan-Nea.

WAHYU 4:2

Baḷúdon in akuoi kinawasaan in Roho i Allah. Bo inontongku kon soroga oyúon in tobatú tampat pomomarentaan, bo oyúon doman in tobatú intau iḻimitú kon tampat pomomarentaan tatua.