KORINTUS 1 16:13 - Alkitab Singog In Mongondow Masa In Tanaa

¹³ Umuran mokopoingat! Sindog kotorindog kon bonu in pirisayamu saḷaku intau Keresten. Mokopobarani bo mokoporopot!

KORINTUS 1 16:13 Mawu Ofanana

SAMUEL 2 10:12

Mokoporoton kon gina! Koḻigai kita mokopobarani in moḷongasi sin kopontingan in bangusa naton bo kopontingan in kotá mita i Allah naton. Igumon mako ki Allah in mogaid kon onu in koibog-Nea.”

DATU MITA IMITÁNEA 2:2

“Wakutukudon matoi in naa. Pokoyakin bo pokobarani in iko.

TAWARIKH 1 19:13

Pokorigon in gina! Koḻigai in kita moḷongasi takin mokopobarani sin kasaḷamatan in bangusa naton bo kasaḷamatan in kotá mita i Allah. Igumon mako ki Tuhan in mogaid kon onu inta kinoibog-Nea.”

TAWARIKH 1 28:10

Toropdon kopira kon ki Tuhan in nomiḻídon kon inimu sin moposindog in baḷoi inta ain sinantú kon i-Nia. Dá tanaa in aidaidon intua takin ibog moḷoben.”

MAZMUR 27:14

Pongamangdon kon i Tuhan, iropotai bo irotonai in ginamu; oo, pongamangdon kon i Tuhan!

MAZMUR 31:24

Kotabibí in ki Tuhan, ei bayongan in umat-Nea, Ki Tuhan in moḷukadbí kon intau inta mosatia. Táe intau moḷoḷatú in hukumon-Nea takin diá in ukuran.

YESAYA 35:4

Poguman kon i monia inta mointok in gina, “Korigon in ginamu, dika moondok, ki Allahmu in mamangoi mohukum kon musung, Sia in mamangoi sin moposaḷamat kon i monimu.”

DANIEL 10:19

Sia in noguman, “Ki Allah in notabi kon inimu, tuamai dikadon moḻia-ḻiaw in gina andeka moondok, yo, koropotdon!” Kon dodai in sia noguman natua, kinorasaanku kon nodugangdon bui in ropotku bo noguman, “Posingogdon, Tuangku. Ki Tuang in nodugangdon kon ropotku.”

DANIEL 11:32

Dá takin tompobaḻiknea ki datu tatua nodondouḷug kon intau mita inta ain nonaḷámai kon agama monia, sinbá moibog motuḷung kon inia. Táe intau mita inta motoindudui kon i Allah in nobaranibí in noḷawang kon inia.

HAGAI 2:4

Tongá, donaaidon moinggamá in kamang, ei moiko komintan! Ingguputaidon in oaidan tatua, sin Akuoi in umuranbí motuḷung kon i monimu.

ZAKHARIA 8:13

Ei intau in Yohuda bo Israel! Kon tungkuḷ intua, aka intau ango-angoi mosikutukandon, yo mosia in moguman, ‘Igumon mako bodito inta noiuma kon Yohuda bo israel in moiuma doman kon inimu!’ Táe Akuoi in moposaḷamatbí kon i monimu, dá intau mita ango-angoi tatua in mosigumanan, ‘Igumon mako barakat inta moiponag kon Yohuda bo Israel, moiponag doman kon inimu!’ Tuamai in koropotdon in ginamu bo dika moondok!”

ZAKHARIA 8:9

Ki Tuhan in noguman kon umat-Nea, “Koropot in ginamu! Tanaa moiko in nokodongogdon kon tosingogon mita inta ain doman siningog in nabi kon dodai in dodatoḷan inukat, sin moposindog bui in Baḷoi-Ku.

MATIUS 25:13

Bo pangabisannea ki Yesus in noguman, “Manangka intua umuran kiḷuka-ḷukadmai, sin diábí kotaauan monimu in singgai bo wakutunea.”

MATIUS 26:41

Umuran poḷukad bo posambayang sinbá moiko in diá mokorasa kon sobaan, sin kinotaauan-Ku bidon in moiko, moiko in moibogbí mogaid kon inta kinoibog i Allah, táe moiko in tongábí intau moyangkó.”

LUKAS 21:36

Tuamai in umuran kiḷuka-ḷukadmai bo posambayang sinbá umuran moropot in moiko bo mokobaḻí simindog kon tayowon Adí Intau.”

KORINTUS 1 14:20

Utatku mita! Dika ná pororai in mongoadí. Aka kon soaḷ mita inta mongoromú, dá musti ná pororai in mongoadí in moiko. Táe aka kon soaḷ pororai, yo poraibí ná intau inta nogurangdon.

KORINTUS 1 15:58

Tuamai uḻe utatku mita inta kinotabiku, mokoporopot bo kotorindog. Umuran totu-totuu pogundoi kon i Tuhan, sin kinotaauanbí monimu kon bayongan inta inaidan monimu kon i Tuhan, komintanbí baraguna.

KORINTUS 2 1:24

Akuoi in diábí momakisa kon i monimu kon soaḷ onu inta musti pirisayaan monimu, sin moiko in totokdon nopirisaya kon i Kristus. Akuoi in tongábí mogaid moyotakin monimu sinbá modugang pia in gina monimu.

GALATIA 5:1

Tanaa kita totu-totuudon nobebas, sin ki Kristus tontaní in nopobebas kon i naton! Tuamai tantúdon ḷukadai in kabebasanmu, bo donaai in moibog bui tonggataan.

EPESUS 3:16

Mosambayang in akuoi sinbá ki Allah inta totok in momulia tua in moibog moginrigon kon batinmu takin Roho-Nea.

EPESUS 6:10

Naa in singogku pangabisan, paké in ropot inta nouḻí monimu nongkon kawasa i Tuhan, sin moiko in notobatúdon takin-Nea.

PILIPI 1:27

Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

PILIPI 4:1

Tuamai, Utatku mita inta kinotabiku, kobiagbí in moiko takin totu-totuu mopirisaya kon i Tuhan. Totok in akuoi mokotanob kon i monimu! Moiko nion inta totok mokoḷunganga kon ginaku.

PILIPI 4:13

Kawasa inta inogoi i Kristus kon inakó umuran mobogoi in ropot kon inakó in tumayow kon kaadaan noyagi-yagimai.

KOLOSE 1:23

Manangka intua, moiko in musti umuran mosatia in mopirisaya bo umuran doman kumadai mokoporopot kon onu inta ain pinirisaya monimu. Dika modapot in ukatan monimu harapan inta ain inogoi kon i monimu wakutu in moiko notarimadon kon Habar Mopia nongkon i Allah. Habar Mopia tatua ain pinotaau kon bayongan intau kon dunia naa. Bo popisíbí in tuata, akuoi ki Paulus in nobaḻí mogogaid kon oaidan i Allah.

KOLOSE 4:12

Salam doman nongkon i Epapras. Sia naa intau doman nongkon sigad monimu. Mosia naa in mogogaid doman kon oaidan i Kristus inta umuran mosatia in mosambayang sin kopontingan monimu. Sia totok in mopoigum kon i Allah sinbá mobaḻídon moropot in koyakinan monimu, bo totu-totuudon moguyang in moiko sinbá totu-totuu domandon dumudui kon ibog i Allah.

KOLOSE 4:2

Umuran mokoporajing in mosambayang bo umuran pobasadia, dika mokoḻiong in mosukur kon i Allah.

TESALONIKA 1 3:8

habar tatua in nokodugang kon rigon in gina nami, asaḷ bo tantú koroton in sosindog monimu bo umuran motobatú i Tuhan.

TESALONIKA 1 5:6

Tuamai kita in donaai tongá umuran mosiug mako ná intau mita ibanea, táe umuran koratakon in raian bo tantú kiḷuka-ḷukadmai.

TESALONIKA 2 2:15

Tuamai, utat mita, sindogdon koroton bo umuran kadaiai in totundú mita inta mobanar inta ain pinoyaput nami kon i monimu, pinomayá inouman ande inta pinais.

TIMOTIUS 1 6:12

Poramujidon totu-totuu mobiag saḷaku intau inta mopirisaya kon i Kristus. Mobiag mobanar bá mouḻímu in kobiagan mononoi. Sin tuabí in mangaḻe in pinogoinían i Allah kon inimu bo tua doman komintan inta umuran inakumu kon tayowon in intau moantó.

TIMOTIUS 2 2:1

Uḻe Timotius adíku! Totabi inta inogoi kon i naton sin notobatúdon i Kristus in kita, baḻí intua dodoyonan inta mokoroton kon inimu.

TIMOTIUS 2 4:5

Manangka intua uḻe kawasaai in ginamu, onukabí in mobaḻí. Mokoposabar aka koantugan in yoyiga, umurai aidai in oaidanmu saḷaku intau inta mopopotaau in Habar Mopia tatua. Kopirabí totok in mogaid kon oaidan inta ain inogoi i Tuhan kon inimu.

TIMOTIUS 2 4:7

Aka ná motanding yo akuoi in dinumuduidon totok kon pinotandingan nodapot kon bares pangabisan. Bo umuran in akuoi notoindudui kon i Kristus Yesus nodapot in pangabisan.

YOSUA 1:18

Bayongan in intau inta doí dumudui kon parentamu bo doí mokidongog kon tosingogonmu, in hukumon matoi. Pokoyakin bo pokobarani in iko!”

YOSUA 1:9

Pokotorop, Akuoi ain nomarenta kon inimu sinbá totu-totuudon in iko moyakin bo mobarani! Dika in iko moondok ande mogagawang, sin Akuoi ki Tuhan Allahmu in umuranbí kotaki-takinmu kon ondakabí in bayáanmu.”

PETRUS 1 4:7

Kopaḷutan in yagi-yagi motoyongdon. Tuamai ḷukadaidon kopira in awak monimu bo umuran mokopoonow kon raian sinbá moiko in motaau mosambayang.

PETRUS 1 5:8

Mokopoingatdon bo umuran pobasadia in moiko! Sin Ibilis inta saturumu in maya-mayá mako naonda bo singa inta sindaḷan moganggor motayak kon onu inta motaaunea kaanon.

WAHYU 16:15

“Indongogaidon! Akuoi in mamangoi ná mononakow! Mosanangdon totok in intau inta umuran mobasadia bo inta umuran monarukiramai kon pakeangnea, simbá diá mopilang in sia in maya-mayá mako, bo koontongan intau moantó in dodiaannea!”

SAMUEL 1 4:9

Korigon in ginamu, ei intau mita in Pilistin! Poparangdon ná ḷoḷaki, aka diá yo moiko in mobaḻídon ata in intau mita in Ibrani tatua, ná koḻipod mosia nobaḻí ki ata monimu. Tuamai in poparangdon takin kotorindog bo kobarani!”