KORINTUS 1 12:13 - Alkitab Singog In Mongondow Masa In Tanaa

¹³ Natua doman in kita komintan, intau in Yahudi ande deeman, ata ande deeman; kita komintan ain bidon binaptis in Roho inta kotangoianmai naa, sinbá motobatúdon in kita kon awak i Kristus bo mokorasa doman kon Roho inta notongkai doman tatua.

KORINTUS 1 12:13 Mawu Ofanana

DONDONG MOḶANTUD 5:1

Akuoi in namangoi in gobáku, batoḷ in dodobku, buḷoiku, sinipunku in taḷong mobondu bo toyokayuku mita; kinaanku in ḻipú in pasukan bo bilukku, ininumku in susu bo tubig in anggurku. Pongaan bo ponginumdon yobayat mita, ponginumdon modapot in moḷoḷangu in totabian.

YESAYA 55:1

KI Tuhan in noguman, “Igaidon in moiko komintan inta morogang, ponginumdon, tubig in sinadiadon. Angoidon in moiko inta diá kodoit, tarimadon in gandum inta diábí uboḻian, bo kaandon! Anggur bo susu in sinadiadon, tarimadon mako diábí uboḻian.

YOËL 2:29

Kon dodai intua roho-Ku in ogoi-Kudon doman kon mogogundoi mita ḷoḷaki bo bobay.”

MATIUS 3:11

Akuoi mopobaptis in tubig kon i monimu, saḷaku bukti kon moiko aindon mogogai in mogaid kon inta diá mopia, táe Sia inta mamangoi moiduduimai kon inakó naa, kawasa-Nea moiḻiu totok kon inakó, sedang tongá mobuka kon togot in sapatu-Nea yo diá patus in akuoi. Sia in mopobaptis kon i monimu in Roho i Allah bo tuḷu.

LUKAS 3:16

Tuamai in ki Yohanes noguman kon i monia komintan, nanaa, “Akuoi in Mopobaptis kon i monimu in tubig, táe moiangoibí in intau inta moḷobe-ḷoben nongkon inakó. Umpaka tongá mobuká kon togot in sapatunea yo diá kobaḻí in akuoi. Sia tua in mopobaptis kon i monimu in Roho i Allah bo tuḷu.

YOHANES 1:16

Moḷoben totok in tabi-Nea; diá in gogainea Sia in momarakat kon i naton.

YOHANES 1:33

Tungkuḷ intua diápabí kinotaauanku mongo ki ine in Sia. Táe ki Allah inta nopotabá kon inakó mopobaptis in tubig nogumandon kon inakó nanaa, ‘Aka mokoontong in iko kon Roho i Allah moponag bo mogutun kon intau tobatú, yo intaubí tatuata inta mopobaptis in Roho i Allah.’

YOHANES 3:5

Ki Yesus in notubag, “Totuubí in singog-Ku tanaa: aka intau bo diá polahiron nongkon tubig bo nongkon Roho i Allah, yo intau tatua in diábí motaau in mobaḻí umat i Allah.

YOHANES 4:10

Ki Yesus in notubag, “Aka kuma bo kinotaauanmu in totabi i Allah bo kinotaauanmu in ki ine in noigum kon inumon kon inimu, yo nopasti bidon kon iko tontaní in moigumbí kon tubig inumon kon i-Nia tua. Bo ogoian-Neabí iko in tubig kobiagan tatua.”

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

YOHANES 6:63

Rohobí i Allah in nobogoi in kobiagan kon intau. Ropot in intau naa diá baragunanea. Singog mita inta pinosingog-Ku kon i monimu naa in singogbí mita in Roho i Allah bo singogbí inta mobogoi in kobiagan.

OUMAN IN RASUL MITA 1:5

Sin ki Yohanes in nopobaptis in tubig, táe diádon moonggot in moiko baptison in Roho i Allah.”

SURAT I PAULUS KON JAMAAT RUM 3:22

kon ki Allah in noibogbí noyopia bui takin intau, táe tua in nointotoibí kon pirisaya kon i Yesus Kristus. Tua inaidan i Allah kon bayongan intau inta mopirisaya kon i Kristus, sin Sia in diábí mopoyoposi kon intan:

SURAT I PAULUS KON JAMAAT RUM 3:29

Andeka degá ki Allah tua in tongábí ki Allah intau in Yahudi? Deemanbí Sia tua in ki Allah in bayongan intau? Totuu, Sia tua in ki Allahbí doman in bayongan intau!

SURAT I PAULUS KON JAMAAT RUM 4:11

Sia in sinunat bambí noiduduimai, tongá sunatnea tatua in tongábí saḷaku tanda kon sia ain sinarima i Allah saḷaku intau inta mokosanang kon gina-Nea, popisí in mopirisaya kon i Allah. Sia in sinarima i Allah kon wakutu in diápa dinumudui kon atorang in sunat tatua. Bo ki Abraham in nobaḻí guyanga in bayongan intau inta mopirisaya kon i Allah, bo popisí intua, dá sia sinarimadon i Allah saḷaku intau inta mokosanang kon gina-Nea, umpakabí mosia in diá sinunat.

KORINTUS 1 10:2

Sinbá mobaḻí dumodudui i Musa, dá mosia komintan in binaptis kon bonu in goḷom bo kon bonu in dagat tatua.

GALATIA 3:23

Wakutu in kita diápa mopirisaya kon i Kristus kita in umuranpabí nokadai kon hukum i Musa; kita naonda bo kinurung modapot in pirisaya naton tatua pinoniata.

GALATIA 3:28

Tuamai intau in Yahudi andeka intau in Yunani, diá bidon in yoposinea bo diábí domandon in sinangoian ata andeka intau nobebas, ḷoḷaki andeka bobay. Moiko komintan ain bidon notobatú takin i Kristus Yesus.

EPESUS 3:6

Naabí inta noibuni tatua: Pinongin Habar Mopia tatua, intau deeman Yahudi in moitakin domandon mokorasa kon barakat mita i Allah inta koḻipod tongá sinadia kon intau mita in Yahudi. Intau mita inta deeman Yahudi in nobaḻídon toawakan in awak inta tobatú tua, bo moitakin doman motarima kon onu inta pinodandi i Allah pinongin i Kristus Yesus.

EPESUS 4:5

Tongábí doman tobatú in Tuhan, tobatú in pirisaya, tobatú in baptisan,

EPESUS 5:26

Inaidan i Kristus intua sinbá motaau-Nea daritan in jamaat tatua takin totundú-Nea bo takin tubig inta pobaptis, sinbá motaaudon posarakan-Nea kon i Allah.

EPESUS 6:8

Pokotoropdon, pomuḷoi in intau inta nobiag ata andeka intau inta nobebas, motarimabí kon tontuḻínea nongkon i Tuhan kon bayongan inta mopia inta ain inaidannea.

KOLOSE 1:27

Kon umat-Nea tatua ki Allah in moibog moponiata kon totokbí in mopia bo moḷoben in onu in binuni kon intau mita ibanea. Naa inta binuni tatua: Ki Kristus tua in nionbí kon i monimu, bo tua in mangaḻenea, kon moiko in moitakin doman mokorasa kon kamuliaan i Allah.

KOLOSE 3:11

Sahingga in diádon yoposi in intau Yahudi bo deeman Yahudi, intau sinunat bo inta diá sinunat. Bo diá domandon yoposi in intau mokokiangoi bo intau moromú, intau inta nobaḻí ata bo intau inta deeman ata, sin ki Kristus tua in Tuhanbí in bayongan yagi-yagi, bo Sia ain notobatú intua komintan!

PETRUS 1 3:21

Dá bá kotaauandon monimu kon onu inta nobaḻídon tatua nobaḻí oḻinow in baptisan inta nokosaḷamat kon i monimu tanaa. Baptisan tatua in deeman tobatú upacara pondaritan kon bayongan inta nokotor kon awak, táe tua in dodandianbí kon i Allah inta nongkon bonu in ginamu inta mopia. Baptisan tatua in mokosaḷamat kon i monimu sin ki Yesus Kristus ain nobiag bui nongkon kinopatoian,