KORINTUS 1 12:10 - Alkitab Singog In Mongondow Masa In Tanaa

¹⁰ Intau tobatú inogoian totabi mogaid kon soaḷ mita inta mokoherang, yo ibanea inogoian in totabi mopotaau in tomayá mita i Allah. Bo ibanea doman inogoian in komampuan motaau mopoyoposi onda in totabi inta nongkon Roho i Allah bo onda in deeman. Oyúon inogoian in komampuan mosingog kon bonu in bahasa inta mokoherang, bo oyúon doman inogoian in komampuan moginsilang kon mangaḻe in singog mita tatua.

KORINTUS 1 12:10 Mawu Ofanana

YOËL 2:28

“Kon singgai moiduduimai bayongan in intau in ogoian-Kudon in roho-Ku. Dá ki adímu ḷoḷaki bo bobay in mopotaaudon in koyow-Ku mita; intau mita inta noguyangdon mita kon yuakmu in tumogoindopdon oontongon in ogoidon kon tayowmobiag bo mongodeaga.

MARKUS 16:17

Naa in tanda mita inta moyotakin kon i monia inta mopirisaya, mosia in moguntun kon dimukud mita moraat podoyon kon tangoi-Ku; mosia in mosingog kon bonu in bahasa inta diá kinotaauan monia.

MARKUS 16:20

Dá murí-Nea mita minayá nopotaa-taau mako in habar nongkon i Allah. Bo mosia in sinakinan i Tuhan kon bonu in binaya-bayáan mako monia. Tua pinoniata i Tuhan kon oaid mita inta mokoherang kon totuubí in pinotaau monia tua.] [

LUKAS 24:49

Sin onu inta ain pinodandi i Amá kon i monimu, Akuoibí in mobogoi. Táe moiko in musti umuran mogoḷat kon kotá tanaa modapot ogoiandon i Allah in kawasa in moiko.”

YOHANES 14:12

Poguman-Kudon kon i monimu: Intau inta mopirisaya kon i-Nakó, mogaidbí kon onu inta ain inaidan-Ku, modapot in moiḻiubí kon tua in aidannea, sin Akuoi in mayá kon i Amá.

YOHANES 16:13

Táe aka Roho tatua mamangoi, ki Inta moponiata in kobobanar soaḷ ki Allah, yo diaan-Neabí in moiko bo tundúon monotaau kon bayongan kobobanar tatua. Sin Sia in diábí mosingog podudui in ibog-Nea tontaní, táe mogumanbí kon onu in dinongog-Nea, bo poguman-Neabí kon inimu onu in mobaḻí kon singgai moiduduimai.

OUMAN IN RASUL MITA 1:8

Tongá moiko in mokouḻíbí kon kawasa, aka Roho i Allah mamangoidon kon i monimu bo moikodon nion in mobaḻí sakusi-Ku kon Yerusalem, kon bayongan butá in Yudea, kon Samaria, bo modapot in popod in dunia.”

OUMAN IN RASUL MITA 11:27

Wakutu intua oyúon in tongonumai in nabi in namangoi nongkon Yerusalem mopobayá in Antiokhia.

OUMAN IN RASUL MITA 11:28

Kon sigad monia tua oyúon in ki Agabus in tangoinea. Sia in kinawasa in Roho i Allah bo sinimindog nopotaau kon mobaḻí in malarat moḷoben kon dunia naa. (Bo totuubí nobaḻí kon sempo ki Kaisar Klaudius in nomarenta.)

OUMAN IN RASUL MITA 19:6

Nopaḷut mako kon tua binarakatandon i Paulus in intau mita tatua, bo Roho i Allah in nongawasadon kon i monia, dá mulaidon in mosia nongonguman kon bonu in bahasa inta mokoherang bo nopotaau in habar mita nongkon i Allah.

OUMAN IN RASUL MITA 5:3

Dá ki Petrus in noḻibó kon inia, “Ananias nongonu sin pomayámubí mako in Ibilis mongawasa kon ginamu, modapot in iko monguboḷ kon Roho i Allah, takin umuni-uni mako motagú kon boḻi in butá ibanea sin pakéonmu tontaní?

SURAT I PAULUS KON JAMAAT RUM 12:6

Kita in inogoianbí in totabi inta noyo-noyoposi. Totabi mita tatua in inogoi i Allah kon i naton pinoduduibí kon ibog-Nea. Manangka intua onu inta pinonotabi tatua in mustibí pakéon naton. Intau inta nokouḻí kon totabi mopohabar in habar nongkon i Allah, mustibí mopohabar in habar nongkon i Allah podudui in komampuannea.

SURAT I PAULUS KON JAMAAT RUM 15:19

inta mokoherang totok kon intau bo diá in poporupaan. Tua mita in nobaḻí sin kawasa in Roho i Allah. Habar Mopia soaḷ ki Kristus aindon pinohabarku komintan kon intau mita, pinangkoipamai kon Yerusalem nodapot in Ilirikum.

KORINTUS 1 11:4

Ḷoḷaki inta mosambayang ande inta mopoyaput in Habar Mopia nongkon i Allah kon tayowon intau mobarong bo mogi koḷob in uḷu, yo tua in mangaḻenea moningkuḻe kon i Kristus in sia.

KORINTUS 1 13:8

Diábí in wakutu kon diá mositabian. Sin masa in tanaa oyúon in intau mopandoi mopoyaput in habar nongkon i Allah, táe koonggotannea mogogai in sia. Masa in tanaa oyúon doman intau mopandoi in mosingog kon bonu in bahasa inta mokoherang, táe koonggotannea mogogai domandon in sia. Masa in tanaa nobarong doman intau in nonotaau kon bayongan yagi-yagi, táe koonggotannea yo koḻionganneabí intua komintan.

KORINTUS 1 14:13

Tuamai, ki ine in mosingog kon bahasa inta mokoherang, yo musti doman in sia moramuji mopoigum kon i Allah sinbá motaau doman mopomangaḻe kon onu inta siningog tatua.

KORINTUS 1 14:39

Tuamai uḻe utatku mita, poramuji mopoyaput in habar nongkon i Allah, bo dika molarang kon intau inta mosingog kon bonu in bahasa inta mokoherang.

GALATIA 3:5

Ki Allah ain nobogoi in Roho-Nea kon i monimu bo ain nogaid kon soaḷ mita inta mokoherang kon sigad monimu. Yo degá inaidan i Allah intua sin moiko in dinumudui kon hukum i Musa? Andeka moiko in nokidongog kon Habar Mopia tatua bo nopirisaya kon i Kristus?

TESALONIKA 1 5:20

Bo donaaibí anggapon monimu kon diá in mangaḻe in habar mita inta inogoi in Roho i Allah kon i monimu.

IBRANI 2:4

Koḻikud intua, iniropotan doman i Allah in bayongan inta ain inouman in intau mita tatua takin nopoontong in noyagi-yagimai aid inta mokoherang totok kon intau bo soaḷ mita inta diá in poḻiuan bo poḷat nosila-silai mako kon onu inta pinonotabi in Roho i Allah podudui in ibog-Nea tontaní.

YOHANES 1 4:1

Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.

WAHYU 2:2

Kinotaauan-Kubí onu inaidan monimu. Moiko in morajing totok in mogaid bo totok doman mosabar. Kinotaauan-Kubí doman kon kinodoíbí monimu in mosia inta moraat. Bo intau mita inta dumuí rasul bokaka deemanbí totuu rasul, aindon inuji monimu bo kinokadapatan monimu kon mosia tua in intaubí mita inta mongouboḷ.