IḶUAIAN 34:16 - Alkitab Singog In Mongondow Masa In Tanaa

¹⁶ Aka ki adí mita monimu motonibuḷoi in bobay mita ango-angoi, yo mosia in dondouḷugandon in bobay mita tatua sinbá monaḷámaidon kon i-Nakó bo mosumbadon kon ilah mita monia.

IḶUAIAN 34:16 Mawu Ofanana

KINOBAḺIAN 24:3

Pongibotdon podoyon kon i Tuhan, Allah inta nongawasa kon ḷangit bo butá, kon iko in diábí motayak kon bobay inta pobuḷoion i Ishak ki adíku nongkon sigad in intau mita in Kanaan tanaa.

DATU MITA IMITÁNEA 11:1

Ki Datu Salomo in nongibog kon mobayong in bobay nongkon butá ibanea. Koḻikud in adí bobay i datu in Mesir, ki Salomo in notonibuḷoi doman takin bobay mita in Het, Moab, Amon, Edom bo Sidon.

DATU MITA IMITÁNEA 21:25

Diábí kon dodai in onda in intau inta takin ḻimbatú in gina mogaid kon inta moraat kon tayowon i Tuhan ná inta pinomia i Ahab. Bayongan in aid moraat tatua in inaidannea sin umuran tundúdanmai i Izebel ki buḷoinea.

TAWARIKH 2 21:11

Nodapotbí in sia noposindog in tampat mita pososumbaan kon berhala kon butá in buḷud in Yohuda, bo nokopopisí kon rayat in Yohuda bo Yerusalem binaradosa kon i Tuhan.

EZRA 9:12

Nabi mita tatua in nogimaḷow kon inami sinbá diá motonibuḷoi in intau mita tatua, andeka mobantung kon i monia sinbá mobiag mooyúon bo motompia. Aka kami in motoindudui, kami in mobaḻídon moropot bo mokaandon kon bungai in pinomuḷa kon butá tatua bo mobogoi kon buí nami modapot in mononoi.

EZRA 9:2

Intau ḷoḷaki in Yahudi notonibuḷoidon in bobay in bangusa ibanea, dá umat inta sinondídon kon i Tuhan in diádon notapis. Nodapotbí inta muna-munamai nomia kon natua in intaubí mita inta sinon itoi bo pojabat in Israel.

NEHEMIA 10:30

Kami in nongibot kon diábí mobuḷoi takin bangusa mita ibanea inta nogutun kon butá nami.

NEHEMIA 10:31

Aka oyúon in bangusa ibanea in mopotaḷui in gandum andeka onuka kon inami kon singgai in Sabat andeka singgai motusi ibanea, yo diábí intua taḷuion nami. Kon pomuḷoi in taong impitunea, diábí tonggobaan nami in gobá bo diábí moigum kon boḻi.

NEHEMIA 13:23

Kon tungkuḷ intua inontongku doman kon nobayong intau in Yahudi in notonibuḷoidon in bobay mita nongkon bangusa in Asdod, Amon bo Moab.

NEHEMIA 13:25

Sinoboḷowku bo inodi-odianku in mosia. Oyúon in binongkugku bo oyúon in irabutku in buok monia. Onda intua pinoki pongibotanku in mosia pinodoyon kon tangoi i Allah kon mosia takin ki adí mita monia in diá bidon motonibuḷoi takin bobay ibanea.

MAZMUR 106:39

Popisí in aid mita monia tatua dá mosia in nonajisdon, bo diá notoḷutui kon i Allah.

HOSEA 1:2

Kon dodai in ki Tuhan dungkuḷ totok nosingog kon bangusa in Israel pinongin inakó, ki Tuhan in noguman, “Hosea, tonibuḷoidon in bobay tobatú inta sundaḷ, bo ki adímu mita doman in moidayan kon inia. Umat-Ku in notongkai ná ki buḷoimu tatua; mosia in diá motoḷutui kon i-Nakó, bo nonaḷámai kon i-Nakó.”

IMAMAT 21:15

Aka sia ḻimimpat kon atorang tatua, dá ki adínea mita inta sabanarnea motusi, mobaḻídon nonajis. Akuoi in ki Tuhan bo Akuoi nopotondídon kon inia nobaḻí Imang Moḷoben.”

YOSUA 23:12

Aka moiko bo diá mosatia bo moyobaukdon in bangusa mita inta nogutunpa kon sigad monimu, bo moiko in motonibuḷoi monia,

YOSUA 23:13

yo torop, kon notantú bidon kon ki Tuhan Allahmu in diábí mopoguntun in bangusa mita tatua sin kopiaan monimu. Sedang bo mosia tua in totokbí in mokobahaya kon i monimu, sin mosia tua in mobaḻídon naonda bo poyogaḷap kon i monimu. Pororigaandon totok monia in moiko; sin mosia in mobaḻídon naonda bo sambok kon ḻikudmu ande naonda bo dugi kon bonu in matamu. Moiko in umurandon mororiga modapot in diádon intau tobatúmai in kon sigad monimu in kotaḷáan kon butá inta mopia naa inta inogoi i Tuhan Allahmu kon inimu.

HAKIM MITA 14:3

Táe guranganea noguman, “Nongonu sin mustibí mayá motayak kon buḷoi intau in Pilistin, bokaka mosia tua in deemanbí umat i Tuhan! Eta degá diádon in kon inanakan naton tontaní ande kon sigad in bayongan in bangusa naton diádon in mongodeaga inta moitugat kon ginamu?” Tubag i Simson kon i amánea, “Tongá mongodeagabí in Pilistin tatua in koibogku. Bo haraponku mako tua ki amá moibog mayá moguman kon inia kon pobuḷoionku.”

HAKIM MITA 3:5

Tuamai intau mita in Kanaan, Het, Amori, Peris, Hewi bo Yebus umuranpa nogutun mako kon butá tatua noyotakin in umat in Israel.

HAKIM MITA 3:6

Umat in Israel noyobuḷoidon magí-mako in bangusa mita tatua, bo sinumakindon nosumba kon dewa mita monia.

HAKIM MITA 8:27

Nongkon buḷawan mita tatua, ki Gideon nomia kon patong berhala, bo pinosindognea kon ḻipúnea inta kon Opra. Bayongan in intau in Israel minayá intua sin nosumba kon patong berhala tatua, nodapot in mosia diádon noindoimai kon i Allah. Bo soaḷ tatua in nobaḻí naonda bo poyogaḷap tobatú kon i Gideon bo motoḷuadínea.