IḶUAIAN 34:15 - Alkitab Singog In Mongondow Masa In Tanaa

¹⁵ Dika momia kon dodandian takin bangusa kon butá tatua, sin kon dodai in mosia mosumba bo moposumba in kuruban kon ilah mita monia, mosia in monongganutbí kon i monimu, bo moiko in dumuduibí.

IḶUAIAN 34:15 Mawu Ofanana

TAWARIKH 1 5:25

Intau in Israel diá mosatia kon i Allah inta sinumba in mogoguyang monia. Mosia in nonaḷámai kon i-Nia bo nosumba kon dewa mita in bangusa mita inta pinoguntun i Allah nongkon butá in Kanaan.

EZRA 6:9

Koḻikud intua onukabí in paraḷuon podudui inta pinoguman in imang mita kon Yerusalem, ná umpamanea sapi koḷakian inta noguodpa, domba koḷakian bo ki adí in domba sin pakéon kuruban posumba kon i Allah inta nongawasa kon soroga, gandum doman, simuton, anggur bo ḷana zaitun, musti ogoi kon i monia pomuḷoi in singgai diábí in taḻiban.

EZRA 9:12

Nabi mita tatua in nogimaḷow kon inami sinbá diá motonibuḷoi in intau mita tatua, andeka mobantung kon i monia sinbá mobiag mooyúon bo motompia. Aka kami in motoindudui, kami in mobaḻídon moropot bo mokaandon kon bungai in pinomuḷa kon butá tatua bo mobogoi kon buí nami modapot in mononoi.

MAZMUR 106:28

Onda intua kon Peor nosumba in mosia kon Baal, bo nokaan kon onu inta pinosumba kon dewa mita.

MAZMUR 73:27

Intau inta monaḷámai kon ini-Mu in moboditobí, Iyopú-Mu in intau inta diá motoḷutui kon ini-Mu.

IḶUAIAN 22:19

Intau inta mongibog kon mahaḷuk musti ḻimodon.

IḶUAIAN 22:20

Ki ine in moposumba in kuruban kon inta ilah mita ibanea mako koḻikud in kon i-Nakó, inta Tuhan, yo musti hukumon matoi.

IḶUAIAN 23:32

Dika mogaid kon dodandian takin intau mita tatua ande takin ilah mita monia.

IḶUAIAN 32:8

Mosia ain sinumabat kon parenta-Ku mita. Mosia nomiadon kon patong sapi nongkon buḷawan, bo sinumba monia poḷat inogoian monia in kuruban. Mosia ain noguman kon tuata in ilah monia inta nodia kon i monia iḷumuai nongkon Mesir.

IḶUAIAN 34:10

Ki Tuhan noguman kon i Musa, “Tanaa mako Akuoi momiadon kon dodandian takin bangusa Israel. Kon tayowon mata monia Akuoi mogaid kon inta mokoherang mita inta diápa dodai onda inaidan kon sigad in bangusa inta kon ondaka in kon dunia naa. Bayongan bangusa in mokoontong kon soaḷ mita mokoherang inta pomiaan-Ku, sin Akuoi, ki Tuhan in momiabí kon tobatú oaidan inta motoyang kon i monimu.

IḶUAIAN 34:12

Dika momia kon dodandian takin intau mita kon butá inta kobayáan monimu, sin tua in mobaḻídon poyogaḷap inta mokopopisí kon kopatoianmu.

YEREMIA 3:9

bo beresibí diá inagían in oyá. Sia in nonuaḻing popisí in nosumba kon batu bo pangkoi in kayu, dá butá tanaa in nobaḻídon nonajis.

HOSEA 4:12

Moiko in mopoigum in topotundú kon kayu topongkó! Tungkud tobatú in mopotaau kon inimu kon onu inta koibogmu kotaauan! Moiko in notongkai in buḷoi bobay tobatú inta nobaḻí sundaḷ; moiko in nonaḷámai kon i-Nakó bo nobogoi in awakmu kon ilah mita ibanea.

HOSEA 9:1

Ei bangusa in Israel, dikadon morame bui kon singgai mita moḷobenmu ná bangusa mita ibanea. Moiko in nonaḷámaidon kon i Allahmu bo diá notoindudui kon i-Nia. Kon pomuḷoi in poḷoḻintogan kon gandum, moiko in nopotaḷui in awak saḷaku sundaḷ kon i Dewa Baal, bo mopia in gina in motarima kon gandum inta inanggapmu saḷaku tondan i dewa tatua kon inimu!

IMAMAT 17:7

Bangusa Israel musti tantú motoindudui kon i Tuhan bo diábí motaau mokoimontanmai moratá kon mahaḷuk kon gobá mita sin ogoi posumba kon dimukud mita moraat. Atorang tanaa musti umuran duduian modapot kon adí bo ompu.

PINOGIAPAN 15:39

Ḷambe-ḷambé mita in nobaḻí tompoingat: Pomuḷoi in moiko mokoontong kon tua, kotoropan monimu in bayongan parenta-Ku bo dumudui. Bo popisí intua diábí in moiko mokoḻiong kon i-Nakó sin dumudui kon ibogmu tontaní.

PINOGIAPAN 25:1

Kon dodai intua bangusa Israel nogutun kon Ḷopá in Sitim, Intau mita ḷoḷaki monia nomangkoidon nonuaḻing takin bobay mita in Moab inta nogutun kon tua.

PINOGIAPAN 25:2

Bobay mita tatua nonongganut kon i monia mayá in bobutungan kuruban sin mohoromat kon i ilah monia. Intau mita in Israel sinumakin doman nokaan kon kaanon kuruban tatua bo nosumba doman kon ilah intau in Moab.

OUMAN IN RASUL MITA 15:20

Táe kita in momaisdon kon surat bo mononggina kon i monia, sinbá donaai in mokaan kon kaanon inta ain pinosumba kon dewa, andeka mokaan kon tapú in mahaḷuk inta sinagangan, andeka mokaan kon dugúnea. Bo bá umuran mokopoyayú in mosia kon oaid mita inta mokotor.

KORINTUS 1 10:27

Aka moiko bo inoiní in intau inta diá mopirisaya kon i Yesus sin mongaan moyotakin monia, bo minayá in iko, yo kaanbí onu in inoḷud monia kon inimu. Kumudungbí in mongaan. Dikadon moḻibó mongo nouḻí kon onda in kaanon tatua, sinbá mopia in pongongaan monimu.

KORINTUS 1 8:10

Nanaa i makusudku: Aka kuma moiko inta aindon nopirisaya totu-totuu bo indoianmai iḻimitúbí mako bo mongaan kon bonu in baḷoi pobobogoian kon sosumba kon berhala, bo inontong in intau mita inta diápa noguyang in pirisayanea. Dá tantú oaidmu tatua in mobogoi bidon in contoh kon intau ibanea sahingga in nobarani intau tatua nokaan kon kaanon inta inogoidon pinosumba kon berhala?

KORINTUS 1 8:4

Yo soaḷ mokaan kon kaanon inta ain pinosumba kon berhala, sabanarnea in kinotaauanbí naton kon berhala tua in diábí onda. Sin kinotaauanbí doman naton kon tongábí tobatú in ki Allah; diábí in ibanea mako.

KORINTUS 1 8:7

Umpaka natua, táe diábí komintan intau in nonotaau kon soaḷ tatua. Sin umaaipa doman masa in tanaa oyúonpa in umuran mosumba kon berhala mita. Tuamai oyúonpa doman in raian kon kaanon inta ain pinosumba kon berhala in kaanonbí doman in berhala. Manangka intua aka kaanon monia in kaanon tatua yo porasaan monia in baradosaanbí in mosia; tua komintan popisíbí in diápa noguyang in pirisaya monia.

ULANGAN 31:16

Guman i Tuhan kon i Musa, “Kopatoianmu in motoyongdon. Naonda in iko matoi, bangusa Israel in diádon mosatia kon i-Nakó bo monoḻikudon kon dodandian inta pinomia-Ku takin i monia. Mosia in monaḷámaidon kon i-Nakó sin mayá mosumba kon ilah mita inta sinumba kon butá inta diádon moonggot tuotan monia.

ULANGAN 31:18

Kon dodai intua Akuoi in doíbí motuḷung kon i monia sin mosia in nosumbadon kon ilah mita ibanea bo nomiadon kon inta moraat.

ULANGAN 32:37

Dá ki Tuhan in moḻibó kon umat-Nea, ‘Kon onda in ilah mita moropot inta pongatamai monimu?’

ULANGAN 32:38

Mosia in nokaan kon ḷongó inta pinosumba monimu, bo nonginum kon anggur inta pinokuruban monimu. Oinídon in mosia mamangoi motuḷung kon i monimu, biódon mako sinbá mosia in mobaḻí pogogadopan monimu.

ULANGAN 7:2

Aka ki Tuhan Allahmu moposarakan in bangusa mita tatua kon bonu in kawasamu bo moiko monaḷowdon kon i monia, ḻimodon in mosia komintan. Dika motabi kon i monia ande momia kon dodandian takin i monia.

ULANGAN 7:3

Moiko in diábí motaau motonibuḷoi takin i monia, bo dika doman ogoi in adí mita monimu motonibuḷoi takin i monia,

YOSUA 23:12

Aka moiko bo diá mosatia bo moyobaukdon in bangusa mita inta nogutunpa kon sigad monimu, bo moiko in motonibuḷoi monia,

WAHYU 2:20

Táe naa in kinodoí-Ku kon i monimu; Pinomayámudon mako in ki Izebel, bobay inta dinumuí totabá i Allah tua. Nobayongdon in intau-Ku in inakaḷannea bo sinundúnea mogaid kon inta mokotor bo mokaan kon kaanon inta ain pinosumba kon berhala.

HAKIM MITA 2:17

Táe diábí indoianmai monia in itoi mita tatua. Mosia in umuranbí nosumba kon ilah mita ibanea, bo diá doman mosatia kon i Tuhan. Mosia in diábí dinumudui kon oaid mopia in mogoguyang monia inta mongotoḷutui kon parenta mita i Tuhan.

HAKIM MITA 3:6

Umat in Israel noyobuḷoidon magí-mako in bangusa mita tatua, bo sinumakindon nosumba kon dewa mita monia.