HAKIM MITA 8:26 - Alkitab Singog In Mongondow Masa In Tanaa

²⁶ Bayongan in nganti-nganting buḷawan inta inogoi kon i Gideon dodai intua kobogatnea in gogió bo doyowa nopuḷú nokilo, diápabí pinotakin in ḷambá mita, boboḷ, kaeng nokasumba inta pinaké in datu mita in Midian, bo boboḷ inta ginamá kon sigogow in unta mita monia.

HAKIM MITA 8:26 Mawu Ofanana

ESTER 8:15

Nopaḷut mako kon tua ki Mordekhai in nonaḷámaidon kon komaḻig takin nogiḷambung in ḷambung intau moḷoben inta nobidu bo nobudó, jubah nokamumu nongkon lenan moaḷus bo mahkota buḷawan inta mogaga totok. Intau kon kotá in Susan monggoḷakap mita sin noḷunganga in gina monia.

AMSAL 31:22

Siabí tontaní in nomia kon ompat in taḷog; ḷambungnea in nongkon kaeng lenan nokamumu inta nopira totok.

YESAYA 3:18

Moiangoibí in wakutunea ki Tuhan in mogamá nongkon bobay mita in Yerusalem in bayongan ḷambá inta poyunggagá monia: bongkow in uḷu, galang in sioḷ, boboḷ,

YEREMIA 10:9

Sia in inaipan in saḷaka bo buḷawan inta dinia nongkon Spanyol bo kotá in Upas, tua komintan aidbí in ḻima in mongongurig bo mononontaḷ kon buḷawan. Pakeangnea in nongkon kaeng nokamumu nogurang bo kaeng nokamumu noguod, pinomia in mogogaboḷ mita kinopia totok.

YEHEZKIEL 27:7

Ḻeag bo tomponuotmu in nongkon linen in Mesir, inta sinujian in noyagi-yagimai. Moaḷus totok in bahan mita in ḷoḷaiganmu, didit nongkon Siprus nokamumu in batangannea.

LUKAS 16:19

“Oyúon intau nooyúon inta umuran mogiḷambung in ḷambung inta totok in momahaḷ, bo pomuḷoi in singgai sia in umuran mokaan kon kaanon inta mongopia.

YOHANES 19:2

Tontara mita in nomia kon mahkota nongkon tanga mita inta dodugian, bo pinobandow monia kon uḷu i Yesus. Onda intua iḷambungan monia in jubah nopars,

YOHANES 19:5

Bo ki Yesus in iḷumuai takin nogijubah nopars. Ki Pilatus in noguman kon i monia, “Indoiaika in Intau tatua.”

WAHYU 17:4

Bobay tatua nogi ḷambung in ḷambung nopars bo nopura noguyang, bo iḷambáan in buḷawan mita, permata bo mutiara. Sia in kokada-kadai in tobatú palo buḷawan inta nopuḻing in soaḷ mita inta moraat bo mokotor, bungai mita in aid monia inta mongokotor.

WAHYU 18:12

Diádon in motaḷui kon buḷawan, saḷaka, permata bo mutiara monia; kaeng moaḷus inta momahaḷ, kaeng nopars, kaeng sutra, bo kaeng inta nopura nogurang; bo norupa-rupamai in bahan inta nongkon kayu inta moḷawádon mouḻí, norupa-rupamaidon in bahan inta nongkon gading, norupa-rupamai domandon in bahan inta pinomia nongkon kayu momahaḷ, inta nongkon tambaga, nongkon uatoi, bo nongkon batu permata.

WAHYU 18:16

poḷat mosingog, “Adodoia kaasí, totokdon moḷoben in bodito in kotá inta moḷoben tanaa! Biasamai mogiḷambung in sia nongkon kaeng inta moaḷus, kaeng nopars, bo kaeng nopura inta noguyang; biasamai sia nopuḻing in ḷambá buḷawan, permata, bo mutiara!

HAKIM MITA 8:21

Ki Zebah bo ki Salmuna noguman kon i Gideon, “Koḻigai, aka iko ḷoḷaki, yo ikodon tontaní in moḻimod kon inami!” Dá iḻimodon i Gideon in mosia bo poḷat ginamánea in ḷambá inta kon sigogow in unta monia.

HAKIM MITA 8:25

“Mopia,” tubag monia, “takinbí pia in gina mobogoi intua kon inimu.” Bo nobuká in mosia kon kaeng tobatú, onda intua kon batúan in intau namangoi nogukat kon tua kon nganti-nganting inta ain inagow monia nongkon musung.

HAKIM MITA 8:27

Nongkon buḷawan mita tatua, ki Gideon nomia kon patong berhala, bo pinosindognea kon ḻipúnea inta kon Opra. Bayongan in intau in Israel minayá intua sin nosumba kon patong berhala tatua, nodapot in mosia diádon noindoimai kon i Allah. Bo soaḷ tatua in nobaḻí naonda bo poyogaḷap tobatú kon i Gideon bo motoḷuadínea.