HAKIM MITA 7:14 - Alkitab Singog In Mongondow Masa In Tanaa

¹⁴ Tubag in yobayatnea, “O, tua in notantú bidon kon pitow i Gideon ki adí i Yoas, intau in Israel tatua! Mangaḻenea, kon ki Allah ain nopountung kon inia nongkon intau in Midian bo bayongan in tontara naton!”

HAKIM MITA 7:14 Mawu Ofanana

AYUB 1:10

Sia, motoḷuadínea bo bayongan in kaoyúonannea umuran iḷukadan-Mu. Oaidannea in binarakatan-Mu bo inogoian-Mu in sia in bobiagon nobayong totok kon butá tanaa.

PINOGIAPAN 22:38

Ki Bileam notubag, “Yo, naa akuoi ain namangoi. Táe diábí in hakku moguman kon onuka koḻikudbí in onu in pokiguman i Allah kon inakó.”

PINOGIAPAN 23:20

Akuoi in pinotabá momarakat; bo aka ki Allah in momarakat, yo diábí in motaau indoianku bui.

PINOGIAPAN 23:5

Bo pinotaaudon i Tuhan kon i Bileam in onu inta musti singogonnea, bo nopotabá bui kon inia mayá kon i Balak sin mopotaau in koyow i Tuhan kon inia.

YOSUA 2:24

Onda intua mosia noguman, “Notantú bidon kon ogoibí i Tuhan in bayongan in butá tatua kon inaton; Bayongan in intau kon tua moondokdon kon i naton.”

YOSUA 2:9

bo noguman kon i monia, “Kinotaauankubí kon butá tanaa inogoidon i Tuhan kon i monimu. Bayongan in intau kon naa moondokdon kon i monimu.

YOSUA 5:1

Bayongan in datu in Amori kon dotá in toyopan kon Ongkag in Yordan, bo bayongan datu in Kanaan inta kon bingkí in Dagat Toyuak nokodongogdon kon Ongkag in Yordan ain iningkagan i Tuhan kon bonu in umat Israel iḷumoḷan kon ongkag tatua. Dá inagíandon in ondok in mosia bo uyotdon mako popisí in intau Israel.

HAKIM MITA 3:28

“Dudui kon inakó,” gumannea kon i monia, “Ki Tuhan ain nonaḷow kon intau mita in Moab, mosia kon bonudon in kawasamu.” Dá kon bonu in tongganut i Ehud, nosiḻigdon in intau mita in Israel tatua nongkon buḷud. Mosia in nogagow kon ḷoḷoḷanan in intau in Moab kon Ongkag in Yordan. Diá in tobatúmai in musung mita tatua pinomayá mako iḷumoḷan takin nosaḷamat.

HAKIM MITA 7:13

Naonda in ki Gideon nodapot in tua, sia nokodongog kon intau tobatú nongonguman kon togoindopnea kon yobayatnea. Intau tatua noguman nanaa, “Akuoi in sinumogoindop kon oyúon in roti tobatú noḻiḻid bo noituot kon pinononḷoḷaigan naton bo noitaḻib kon ḷoḷaigan tobatú. Ḷoḷaigan tatua noumpag nodapot in notondodaidon in butá.”

HAKIM MITA 7:15

Naonda in kinodongogan i Gideon in togoindop in intau tatua takin mangaḻenea, dá sia sinumungkudon bo nosumba kon i Allah. Onda intua sia nobuidon kon pinononḷoḷaigan in intau Israel bo noguman, “Posadiadon! Ki Tuhan in mobogoidon in kauntungan kon inimu nongkon tontara mita in intau in Midian!”

SAMUEL 1 14:12

Onda intua mosia nomaḷú kon i Yonatan bo bobantungnea, “Potakodon mangoi kon naa sinbá oyúon in poontong nami kon inimu!” Bo ki Yonatan in noguman kon tayowmobiag tatua, “Duduidon kon inakó, sin mosia in inogoidon i Tuhan kon Israel.”