HAKIM MITA 20:6 - Alkitab Singog In Mongondow Masa In Tanaa

⁶ Dá ginamákudon in mayatnea bodongka pinongko-pongkó bo pinoki dia in pongkóan mita tatua kon suku in bangusa naton inta mopuḷú bo doyowa tua, tumongo pongkó in tongo suku. Tua in pinomiaku sin intau mita in Gibea tua in nomiadon kon inta moraat bo mokopooyámai kon umat in Israel.

HAKIM MITA 20:6 Mawu Ofanana

KINOBAḺIAN 34:7

Tongkaná intua ki adí mita i Yakub nobuidon nongkon tampat pinopokaanan monia in bobiagon. Nokodongogmai kon onu in nobaḻí tatua, mosia in noitaḻikokog bo totok in sinumorú. Sin aid i Sikhem natua kon i adí i Yakub notongkai in mosia nokopooyámaidon kon bayongan intau Israel.

IMAMAT 18:24

Awakmu dika ponajison in oaid mita tatua, sin natuata in dodia in bangusa mita inta nogutun kon Kanaan kon tungkuḷ in moiko diápa kon tua mosia noponajisdon in awak monia. Tuamai mosia inuntun i Tuhan, sinbá moiko motaaudon mogutun kon butá tatua.

IMAMAT 18:30

Dá ki Tuhan noguman, “Duduiaidon in atorang mita inta inogoi-Ku bo dikadon dumayan kon dodia in intau mita inta nogutun kon butá in Kanaan wakutu in moiko diápa nogutun kon tua. Dika moponajis in awakmu tontaní takin momia kon oaid mita tatua. Akuoi ki Tuhan Allahmu.”

YOSUA 7:15

Bo ki ine inta noniatadon kon ain notagú kon barang inta ilarang tatua dá mustidon tubáan kopayongon moyotakin in motoḷuadínea bo bayongan kapunyaannea; sin siadon tuata inta iḻimimpat kon dodandian bo nomiadon kon moraat moḷoben kon yua-yuak in umat in Israel.”

HAKIM MITA 19:22

Koyogot in mosia mobarasanang, daḻíbí in baḷoi tatua iḻipung in intau mita moraat kon kotá tatua. Sinuḷud monia in ḷoḻingkop bo noguman kon guranga tatua, “Ogoidon kon inami in ḷoḷaki inta diniamu kon baḷoimu. Aidanmaidon nami in sia!”

HAKIM MITA 19:23

Guranga tatua iḻumuai bo noguman kon i monia, “Dika, uḻe utat mita! Poigumonku, dika momia kon inta moraat bo inta diá patus ná tua, sin sia tua in mokokiangoiku.

HAKIM MITA 19:29

Noidapotmai kon baḷoi, sinumuot in sia bo nogamá kon tosilad bo noyinga-yingat kon i buḷoinea ibanea tatua nobaḻí mopuḷú bo doyowa nopongkó. Nopaḷut mako kon tua, pinoki dianea in pongkóan mita in awak in bobay tatua kon suku mita in Israel inta mopuḷú bo doyowa tatua, tumongo batu.

HAKIM MITA 20:10

Mopuḷú noporosen nongkon bayongan in ḷoḷaki kon Israel in musti moposadia in kaanon kon i monia inta mayá moparang. Ibanea in mayá monubu kon Gibea sin mohukum kon i monia popisí in aid monia inta moraat inta pinopoaid monia kon sigad in umat in Israel.”