HAKIM MITA 2:17 - Alkitab Singog In Mongondow Masa In Tanaa

¹⁷ Táe diábí indoianmai monia in itoi mita tatua. Mosia in umuranbí nosumba kon ilah mita ibanea, bo diá doman mosatia kon i Tuhan. Mosia in diábí dinumudui kon oaid mopia in mogoguyang monia inta mongotoḷutui kon parenta mita i Tuhan.

HAKIM MITA 2:17 Mawu Ofanana

MAZMUR 106:39

Popisí in aid mita monia tatua dá mosia in nonajisdon, bo diá notoḷutui kon i Allah.

MAZMUR 106:43

Nopobui-buimaidon in ki Tuhan nopoḷuat kon i monia, táe moibo-ibogbí in mosia momarontak, dá noyopú in mosia kon bonu in dosa mita monia.

MAZMUR 73:27

Intau inta monaḷámai kon ini-Mu in moboditobí, Iyopú-Mu in intau inta diá motoḷutui kon ini-Mu.

IḶUAIAN 32:8

Mosia ain sinumabat kon parenta-Ku mita. Mosia nomiadon kon patong sapi nongkon buḷawan, bo sinumba monia poḷat inogoian monia in kuruban. Mosia ain noguman kon tuata in ilah monia inta nodia kon i monia iḷumuai nongkon Mesir.

YEREMIA 3:6

Kon tungkuḷ in pinomarentaan i Datu Yosia, ki Tuhan in noguman nanaa kon inakó, “Inontongmudon degá in onu inta inaidan in Israel, bobay inta diá motoindudui tatua? Sia in nonaḷámai kon i-Nakó bo sinumundaḷ kon bayongan tudu in buḷud inta moḷantud bo kon siungon in bayongan pangkoi in kayu inta mobambar.

YEREMIA 6:16

Ki Tuhan in noguman kon umat-Nea, “Sindogdon kon poyotangaan mita in daḷan, bo taridiadon kopira! Ḻibódon in daḷan mita dungkuḷmai, bo onda in mopia-pia kon sigadnea. Duduiaidon in daḷan tatua, sinbá moiko in mobiag moodom.” Táe mosia in noguman, “Diá, kami in doíbí mongin daḷan tatua!”

HOSEA 2:2

Ki Tuhan in noguman, “Ei adí-Ku mita, ki inámu in deeman bidon ki buḷoi-Ku, bo Akuoi in deemanbí ki buḷoinea. Tuamai, pelekaradon in sia sinbá sia in dika monuaḻing bo dikadon sumundaḷ bui.

IMAMAT 17:7

Bangusa Israel musti tantú motoindudui kon i Tuhan bo diábí motaau mokoimontanmai moratá kon mahaḷuk kon gobá mita sin ogoi posumba kon dimukud mita moraat. Atorang tanaa musti umuran duduian modapot kon adí bo ompu.

AMOS 2:4

Ki Tuhan in noguman, “Intau in Yohuda ain nopobui-buimai binaradosa, tuamai in notantú bidon kon hukumon-Ku in mosia. Mosia in iḻimimpatdon kon parenta-Ku mita bo doí nopandungmai kon totundú-Ku mita. Mosia in pinoḷangkam in ilah mita ibanea inta sinumba in mogoguyang monia.

GALATIA 1:6

Akuoi in moherangbí totok kon i monimu utat mita! Moiko nion inoiní i Allah tongábí pinodoyon kon tabi i Yesus Kristus, táe nongonubí sin moiko in noḻikatbí totok in nonoḻikud kon i-Nia bo minayá nokidongog poḷat dinumudui kon habar inta kai monia in “habar mopia” doman, bokaka deemanbí nongkon i Allah.

ULANGAN 31:16

Guman i Tuhan kon i Musa, “Kopatoianmu in motoyongdon. Naonda in iko matoi, bangusa Israel in diádon mosatia kon i-Nakó bo monoḻikudon kon dodandian inta pinomia-Ku takin i monia. Mosia in monaḷámaidon kon i-Nakó sin mayá mosumba kon ilah mita inta sinumba kon butá inta diádon moonggot tuotan monia.

ULANGAN 31:18

Kon dodai intua Akuoi in doíbí motuḷung kon i monia sin mosia in nosumbadon kon ilah mita ibanea bo nomiadon kon inta moraat.

ULANGAN 9:12

Bo ki Tuhan noguman kon inakó, ‘Ḷagidon posiḻig, sin bangusamu inta diniamu iḻumuai nongkon Mesir nomiadon kon inta moraat. Mosia sinumabatdon nongkon parenta-Ku mita, bo nomiadon kon patong sin sumbáan.’

ULANGAN 9:16

Inontongkudon kon moiko ain noḷawang kon parenta i Tuhan Allahmu. Moiko binaradosadon kon i Tuhan sin nomiadon kon patong sapi nongkon logam sin sumbáan monimu.

YOSUA 24:24

Bo intau mita tatua noguman kon i Yosua, “Kami in tongábí mogundoi kon i Tuhan, Allah naton. Kami in dumuduibí kon parenta-Nea mita.”

YOSUA 24:31

Kon dodai in ki Yosua nobiagpa, umat in Israel umuranbí nogundoi kon i Tuhan. Bo naonda in sia minatoi mosia in umuranbí doman nogundoi kon i Tuhan kon dodai in kon sigad monia tua oyúonpa in itoi mita inta ain nokoontong tontaní kon bayongan in yagi-yagi inta ain pinomia i Tuhan kon umat in Israel.

HAKIM MITA 2:7

Kon tungkuḷ in ki Yosua nobiagpa, intau in Israel nogundoi kon i Tuhan. Naonda in ki Yosua minatoidon mosia in umuranpabí doman nogundoi kon i Tuhan kon dodai in umuranpa oyúon in itoi mita monia inta nokoontong tontaní kon bayongan inta mokoherang inta pinomia i Tuhan sin motuḷung kon intau in Israel.

HAKIM MITA 8:33

Naonda in ki Gideon minatoi, intau in Israel diádon mosatia kon i Allah. Mosia in nosumbadon kon dewa mita i Baal bo binaḻídon monia in ki dewa Baal-Berit dewa monia.

SAMUEL 1 12:12

Tongá naonda in moiko nokoontong kon moiko in tubuondon i Nahas datu in Amon, moiko in nondoídon kon i Tuhan saḷaku datumu bo noguman kon inakó, ‘Kami in moibog parentaan in datu tobatú.’ ”

SAMUEL 1 12:17

Akuoi in mokuani kon i Tuhan, bo umpaka tanaa sempo in poninggai, ki Tuhan in mopoangoibí in gotup bo uyan saḷaku tubag kon sambayangku. Bain tua bo kotaauandon monimu kon totuubí moḷoben in dosamu kon i Tuhan sin noigum kon datu tobatú.”

SAMUEL 1 12:19

Bo nogumandon in mosia kon i Samuel, “Tuḷungaipa, Amá, posambayangaipa in kami kon i Tuhan Allahmu, sinbá diá in kami matoi. Tanaa in kinotaauandon nami kon koḻikud in dosa nami koḻipod, kami in dinosadon bui sin kami ain noigum kon datu tobatú.”