HAKIM MITA 2:11 - Alkitab Singog In Mongondow Masa In Tanaa

^11-14 Onda intua intau in Israel binaradosadon kon i Tuhan. Mosia in diá bidon nosumba kon i Tuhan, Allah in mogoguyang monia, ki Allah inta ain nodia kon i monia iḻumuai nongkon Mesir. Mosia nomangkoidon nosumba kon i Baal bo kon i Asytoret takin dewa mita ibanea inta sinumba in bangusa mita inta kon diugmai monia. Dá ki Tuhan sinumorú kon i monia bo pinomayá-Neadon mako in musung nonubu bo nogagow kon i monia. Mosia kinodaitandon in akaḷ in tumayow kon musung mita inta ain noḻipung kon i monia.

HAKIM MITA 2:11 Mawu Ofanana

KINOBAḺIAN 13:13

Kotá in Sodom tua pinogutunan in intau mita inta totuu mongoraat bo totok in binaradosa kon tayowon i Tuhan.

KINOBAḺIAN 38:7

Gogutú i Er moraat totok, dá ki Tuhan sinumorú bo nomatoi kon inia.

DATU MITA IMITÁNEA 11:5

Ki Salomo in nosumba kon i Asytoret, dewi in bangusa in Sidon, bo kon i Molokh dewa inta mokorongó inta sinumba in bangusa in Amon.

DATU MITA IMITÁNEA 18:18

“Akuoi in deemanbí mononuyayow,” tubag i Elia, “táe ki tuang datubí tontaní. Ki Tuang datubí bo motoḷuadí i Tuang datu in mononuyayow. Pinongin mosumba kon berhala mita in Baal, Ki Tuang datu in iḻimimpatdon kon parenta mita i Tuhan.

DATU MITA IMITÁNEA 22:53

Sia in nogaid kon dosa kon i Tuhan sin dinumudui kon i amánea bo kon i inánea bo dinumayan kon oaid i Datu Yerobeam inta nokopopisí kon intau in Israel nogaid kon dosa.

TAWARIKH 2 28:2

Sia in nobiag naonda bo datu mita in Israel bo nokiaid kon intau in patong mita in Baal nongkon logam,

TAWARIKH 2 28:3

poḷat notubá kon dupa kon Ḷopá in Hinom. Nodapot in ki adínea ḷoḷaki tontaní in pinosumbanea nobaḻí kuruban kon berhala, podudui in kabiasaan diá mopia in intau mita inta ain pinoguntun i Tuhan nongkon butá mita in Kanaan kon tungkuḷ in intau mita in Israel sinumuot kon butá tatua.

TAWARIKH 2 33:6

Ki adínea mita pinosumbanea nobaḻí kuruban payongon kon Ḷopá in Hinom. Sia in dinumudui doman nogaid kon pongonggaing, mopirisaya kon tundi mita, totaau, bo nopoigum in totundú mita kon dimukud mita. Totok in sia binaradosa kon i Tuhan dá nokopomuká kon torú i Tuhan.

NEHEMIA 9:26

Táe umat-Mu in nomarontak bo diá motoindudui kon ini-Mu, nonaḷámai kon hukum bo atorang-Mu, noḻimod kon nabi mita inta nopotoingat kon i monia, bo inta nopotabá kon i monia mamangoi bui kon ini-Mu, ki Allahnea. Oo Tuhan, pomuḷoi doman mako Iko in singkuḻeon monia,

MAZMUR 78:56

Táe nomarontak in mosia bo nonungkuḷ kon i Allah Inta Totok in Moḷantud, parenta-Nea mita diá dinuduian monia.

YEREMIA 11:10

Mosia in nogaidon kon dosa inta pinomia in mogoguyang monia inta doí motoindudui kon i-Nakó, Mosia in nosumba kon ilah mita ibanea bo doí dumudui kon parenta-Ku. Pinomayá Israel andeka Yohuda iḻimimpatdon kon dodandian inta ain pinomia-Ku takin mogoguyang monia.

YEREMIA 16:11

Potaaudon kon i monia kon Akuoi in noguman nanaa, ‘Mogoguyangmu ain nonaḷámai kon i-Nakó sin mosumba bo moibada kon ilah mita ibanea. Mosia in nonaḷámaidon kon i-Nakó bo doí tumoḷutui kon atorang-Ku mita.

YEREMIA 2:20

Ki Tuhan in noguman, “Ain noonggot iko in doí mogundoi kon i-Nakó; doí dumudui andeka mosumba kon i-Nakó. Kon bayongan tudu in buḷud inta moḷantud, bo kon siungon in bayongan in pangkoi in kayu inta mobambar iko in mosumba kon dewa mita mopoḷumbá.

YEREMIA 2:23

Totuu mokobaḻí in iko in mosingog kon iko in diá moromú, bo Baal in diábí kon dodai in onda in dinuduianmu! Indoiai in dodiamu kon ḷopá, torop in aidmu moraat bo akudon! Iko in naonda bo unta kobaayan inta iḷanúan in ibog, moribatuk mamagí mamako diádon koḷamboian,

YEREMIA 32:23

Táe naonda in mosia namangoi in butá tanaa bo nogagow, mosia in diábí notoḷutui kon parenta-Mu mita, bo diá nobiag podudui in totundú-Mu mita. Bayongan inta pinarenta-Mu kon i monia diá tobatúmai in inaidan monia. Tuamai in pinopoangoi-Mu in bayongan bodito tanaa kon i monia.

YEREMIA 9:14

Mosia in pamandot bo mosumba kon berhala mita in Baal ná inta sinundú in mogoguyang monia.

PINOGIAPAN 25:3

Popisí in intau Israel nosumbadon kon i Baal Peor, dá ki Tuhan sinumorú kon i monia bo noguman kon i Musa,

ULANGAN 31:16

Guman i Tuhan kon i Musa, “Kopatoianmu in motoyongdon. Naonda in iko matoi, bangusa Israel in diádon mosatia kon i-Nakó bo monoḻikudon kon dodandian inta pinomia-Ku takin i monia. Mosia in monaḷámaidon kon i-Nakó sin mayá mosumba kon ilah mita inta sinumba kon butá inta diádon moonggot tuotan monia.

ULANGAN 4:25

Ná doman tua aka moiko moonggotdon in mogutun kon butá tatua bo mononggadí dapot in mononggompu, yo dika baradosaan popisí in momia kon patong naondaka in batangannea sin sumbáan monimu. Oaid natua in oaidbí moraat kon tayowon i Tuhan Allahmu bo mokopopisídon kon i-Nia tumorú.

HAKIM MITA 10:10

Bo umat in Israel nokuanidon kon i Tuhan, kainia, “Kami aindon nogaid kon dosa kon ini-Mu, sin kami in diádon noindoimai kon ini-Mu, o Allah nami. Kami in nosumbadon kon dewa mita i Baal.”

HAKIM MITA 10:6

Umat in Israel buidon nomia kon dosa kon i Tuhan. Mosia in diádon noindoimai kon i Tuhan bo doí domandon nosumba kon i Tuhan. Mosia in nosumbadon kon dewa mita i Baal bo Asytoret, bo dewa doman in bangusa in Siria, Sidon, Moab, Amon bo Pilistin.

HAKIM MITA 13:1

Intau in Israel buidon binaradosa kon i Tuhan, bo ki Tuhan in nopomayádon mako kon intau in Pilistin nongawasa kon i monia opat nopuḷú notaong in koonggotnea.

HAKIM MITA 3:12

Umat in Israel buidon binaradosa kon i Tuhan, dá binaḻídon i Tuhan in ki Eglon, datu in Moab, moropo-ropot nongkon Israel.

HAKIM MITA 3:7

Umat in Israel binaradosa kon i Tuhan, ki Allah monia. Mosia nokoḻiong kon i-Nia nodapot in mosia nosumbadon kon berhala mita i Baal bo i Asyera.

HAKIM MITA 4:1

Naonda in ki Ehud minatoi, bangusa in Israel binaradosadon bui kon i Tuhan.

HAKIM MITA 6:1

Komintanpa doman in umat Israel nogaid kon dosa kon i Tuhan, dá pinomayá-Neadon mako in bangusa in Midian nongawasa kon i monia pitu notaong in koonggotnea.

HAKIM MITA 6:25

Kon doḷom tua ki Tuhan nobogoi in parenta tanaa kon i Gideon, “Pogamádon kon sapi koḷakian i amámu, inta totok in mopia inta umur pitu notaong. Kokaidon in mezbah inta pinosindog i amámu kon i Baal, bo umpagdon in oigi inta nobaḻí lambang i Dewi Asyera inta kon dotá in mezbah tatua.

HAKIM MITA 8:33

Naonda in ki Gideon minatoi, intau in Israel diádon mosatia kon i Allah. Mosia in nosumbadon kon dewa mita i Baal bo binaḻídon monia in ki dewa Baal-Berit dewa monia.

SAMUEL 1 12:10

Onda intua mosia nosambayang kon i Tuhan nongaku kon dosa monia; guman monia, ‘Kami aindon binaradosa sin nonoḻikudon kon ini-Mu, oo Tuhan, bo nosumba kon patong mita i Dewa Baal bo i Asytoret. Táe, tanaa in posaḷamatdon in kami nongkon musung nami, dá kami in mogundoidon kon ini-Mu!’

SAMUEL 1 7:3

Bo nogumandon in ki Samuel kon umat in Israel, “Aka moiko moibogdon mobui mangoi kon i Tuhan bo mosumba kon i-Nia takin ḻimbatú in ginamu, yo mustibí ḷumbúon monimu in bayongan dewa ibanea bo patong i Dewi Asytoret. Totu-totuudon posarakai in awakmu kon i Tuhan bo tongádon pooibada kon i-Nia, dá moiko in poḷuaton-Neadon nongkon intau in Pilistin.”

SAMUEL 1 7:4

Dá intau in Israel noḷumbúdon kon bayongan in patong i Dewa Baal bo patong i Dewi Asytoret, bo tongádon nogundoi kon i Tuhan.