HAKIM MITA 19:1 - Alkitab Singog In Mongondow Masa In Tanaa

¹ Kon tungkuḷ in intau Israel diápa ko datu, oyúon in intau in Lewi nogutun kon tampat inta noyayú, kon ḻikudmai in buḷud in Epraim. Nogamá in sia kon bobay tobatú nongkon Betlehem Yohuda bo binaḻínea ki buḷoinea ibanea.

HAKIM MITA 19:1 Mawu Ofanana

KINOBAḺIAN 22:24

Ki Nahor in kobuḷoi kon bobantungnea inta tangoinea ki Reuma, ki buḷoinea tatua nopononggadí kon i Tebah, kon i Gaham, bo kon i Maakha.

KINOBAḺIAN 25:6

táe kon dodai in sia nobiagpa nobarongbí doman in tombuinag inogoinea kon i adínea mita inta nongkon i buḷoinea ibanea. Onda intua pinotabáneadon in ki adínea mita tatua nomamping kon butá inta kon dotá in pomukaan kon Kanaan, sinbá yumayú kon i Ishak ki adínea.

KINOBAḺIAN 35:19

Naonda in ki Rahel minatoi, sia iḷobong kon bingkí in daḷan inta mopobayá in Eprata, inta masai naa sinangoian Betlehem.

SAMUEL 2 16:22

Dá, pinomiaandon in ki Absalom kon ḷoḷaigan kon tudu in atop in komaḻig inta notondodai tatua. Bo koonto-ontongbí in bayongan intau ki Absalom in sinumuot kon bonu in ḷoḷaigan tatua bo nosiug takin i buḷoi mita i amánea.

SAMUEL 2 19:5

Ki Yoab minayá kon tayowon i datu bo noguman, “Kon singgai in naa ki Tuang Datu in nokopooyámai kon intau i Tuang Datu, bokaka mosiadon tua in noposaḷamat kon nyawa i Tuang Datu, nyawa in adí ḷoḷaki bo bobay i Tuang Datu, i buḷoi inta sinonibuḷoi bo inta diá sinonibuḷoi i Tuang Datu.

SAMUEL 2 20:3

Naonda in ki Daud noyaput kon komaḻignea kon Yerusalem, bobay mopuḷú inta diá inika i datu inta sinaḷáan sin moḷukad kon komaḻig, pinoutunnea kon bonu in baḷoi inta iḷukadan in moḷoḷukad. Onu in pakéon monia sia in nopooyúon, táe diádon in ki Daud kon dodai in onda in nosiug takin i monia. Mosia tua in pinopoyayúdon bo kobiagan monia in naonda bo dongkadon boba-bobay nodapot in minatoi.

SAMUEL 2 3:7

Kon singgai tobatú ki Isyboset, adí ḷoḷaki i Saul, noponapud kon ki Abner in nosiugdon noyotakin i buḷoi amánea inta ki Rizpa adí i Aya.

SAMUEL 2 5:13

Naonda in ki Daud nomamping nongkon Hebron bo minayá in Yerusalem, buipa in sia nononibuḷoi kon tongonumai in bobay bo nogamá doman kon tongonumai in bobay sin binaḻínea buḷoi inta diá inika; dá nodugangdon in kobayong in adínea ḷoḷaki bo bobay.

DATU MITA IMITÁNEA 11:3

Pitu nogatut in adí bobay in intau moḷoben in pinobuḷoi i Salomo, bo toḷu nogatut in pahangnea. Ki buḷoinea mita tatuata inta nokopopisí kon i Salomo in nonoḻikud kon i Allah.

DATU MITA IMITÁNEA 4:8

Bupati mopuḷú bodoyowá tatua tongguḷu monia in gubernur tobatú. Naa in tangoi in bupati mita tatua bo butá kawasa monia: Ki Ben-Hur: kon butá inta kon buḷud in Epraim Ki Ben-Deker: kon kotá in Makas, Saalbim, Bet-Semes, Elon, Bet-Hanan Ki Ben-Hesed: kotá in Arubot, Sokho, bo bayongan butá in Heper Ki Ben-Abinadab, ki buḷoi i Tapat adí bobay i Salomo: bayongan butá in Dor. Ki Baana adí Ahilud: kotá in Taanakh, Megido, bo bayongan butá kon diug in Bet-Sean, kon diug in kotá in Sartan kon dotá in toḷatan kotá in Yizreel nodapot in kinoyoyayú in kotá in Abel-Mehola bo kotá in Yokmeam. Ki Ben-Geber: kotá in Ramot kon Gilead, ḻipú mita kon Gilead kapunyaan in inanakan i Yair buí i Manasye, butá in Argob kon Basan; tua komintan 60 in kotá moḷoben inta iniropotan in benteng bonoboi mita bitú kon ngaranea mita, Ki Ahinadab adí i Ido: butá in Mahanaim Ki Ahimaas, ki buḷoi i Basmat adí bobay i Salomo: butá in Naptali Ki Baana adí i Husai: butá in Asyer, kotá in Alot Ki Yosapat adí i Paruah: butá i Isakhar Ki Simei adí i Ela: butá in Benyamin Ki Geber adí i Uri: butá in Gilead, inta koḻipod kinawasa i Sihon datu in Amori, bo i Og datu in Basan.

TAWARIKH 2 11:21

Ki Rehabeam in kobuḷoi kon mopuḷú bo waḷu bo pahang in onom nopuḷú, doyowa nopuḷú bo waḷu in adí ḷoḷaki bo onom nopuḷú in adí bobay. Kon sigad in bayongan i buḷoinea bo i pahangnea tatua, ki Maakha inta totok in kinotabinea.

ESTER 2:14

Sia in dinia kon komaḻig i datu kon dodai in doḷom, bo nopoikoḷomai kon singgai sia in diaan kon komaḻig ibanea, bo tompiaan i Saasgas, pojabat tobatú inta moindoi kon pahang i datu. Mongodeaga tatua in diá bidon mayá kon tayowon i datu, koḻikudbí in aka moibog in ki datu bo mogoiní kon inia podudui in tangoinea.

DANIEL 5:3

Dá ḷagidon dinia mangoi kon inia in palo mita tatua, bo mosia komintan in nonginum kon anggur nomaké in pakakat mita tatua.

MALEAKHI 2:15

Kinotaauan monimu kon ki Allah Inta Totobatú tua noponobatúdon kon awak bo jiwa takin bobay tatua? Onu degá in makusud i Tuhan kon tua? Tongábí bá moiko in mokouḻí kon adí mita inta mobaḻí umat i Allah inta mopia. Dá ḷukadaibí in awakmu, dika modapot in oyúon in kon sigad monimu inta diá mosatia kon i buḷoinea bobay.

MATIUS 2:6

Bo iko Betlehem, butá i Yohuda, iko in deemanbí totok in mointok kon sigad monia inta nomarenta kon Yohuda. Sin nongkon inimubí naa moisindog in tobatú intau inta mobaḻí itoi, Sia inta moḷukad kon bayongan umat-Ku kon Israel.”

YOSUA 24:30

Sia iḷobong kon butá kapunyaannea tontaní kon Timnat-Serah kon Buḷud in Epraim kon dotá in utuan kon Buḷud in Gaas.

YOSUA 24:33

Onda intua ki Eleazar adí i Harun minatoi domandon, bo iḷobong kon Gibea, kotá inta noiukat kon buḷud i Epraim. Kotá tatua ain inogoi kon i Pinehas, adí i Eleazar.

HAKIM MITA 12:8

Nopaḷut kon i Yepta, itoi kon umat in Israel in ki Ebzan nongkon Betlehem.

HAKIM MITA 17:1

Oyúon in intau ḷoḷaki ki Mikha in tangoinea. Sia in nogutun kon buḷud kon butá in Epraim.

HAKIM MITA 17:6

Kon tungkuḷ intua Israel diádon in datu; batúan intau mogaid kon onu in irainea moitutui.

HAKIM MITA 17:7

Kon dodai doman intua oyúon in tayowmobiag tobatú nongkon suku i Lewi. Koḻipod nogutun in sia kon Betlehem kon butá in Yohuda.

HAKIM MITA 17:8

Táe tanaa in nonaḷámaidon in sia kon kotá tatua bo minayá notayak kon pogutunan ibanea. Kon binayáannea tatua nodapotdon in sia kon baḷoi i Mikha kon buḷud kon butá i Epraim.

HAKIM MITA 18:1

Kon dodai intua kon Israel diá in datu. Suku in Dan umuranpa motayak kon butá inta mobaḻí butá monia, sin mosia in diápa doman nokouḻí kon butá kon yua-yuak in suku mita in Israel ibanea.

HAKIM MITA 18:13

Nongkon tua minayá in mosia ná buḷud in Epraim nodapot kon baḷoi i Mikha.

HAKIM MITA 19:16

Ḻimitúpa mako in mosia kon ḷoḻitúan kotá, namangoidon in guranga tobatú inta bagu nobui kon gobánea. Sabanarnea sia tua in intaubí nongkon butá in buḷud i Epraim táe nogutundon kon Gibea. (Intau ibanea inta nogutun kon Gibea tua in intau mita in Benyamin.)

HAKIM MITA 19:2

Táe kon singgai noiduduimai bobay tatua sinumorú kon inia, nodapot in sia nobuidon kon baḷoi i amánea kon Betlehem. Naonda in bobay tatua opatdon nobuḷan kon tua,

HAKIM MITA 21:25

Kon dodai intua diápa in datu kon Israel. Batúan in intau mogaid kon onu in irainea noitutui.

HAKIM MITA 3:27

Naonda in nodapot kon buḷud in Epraim, sia in nogirup kon torompet sin mogoiní kon intau in Israel moparang. Mosia in namangoi bo dinianea in mosia nosiḻig kon buḷud tatua.