HAKIM MITA 13:18 - Alkitab Singog In Mongondow Masa In Tanaa

¹⁸ Malaekat tatua noḻibó, “Nongonu sin moibogbí in iko monotaau kon tangoiku? Tangoiku tua in mokoherangbí.”

HAKIM MITA 13:18 Mawu Ofanana

KINOBAḺIAN 32:29

Ki Yakub in noguman, “Pogumandon tangoi Tuang.” Táe intau tatua notubag, “Diábí paraḷu iko moḻibó mongo ki ine in tangoiku!” Bo binarakatanneadon in ki Yakub.

KINOBAḺIAN 32:30

Onda intua ki Yakub noguman, “Akuoi ain noyodungkuḷ noyopogotmai i Allah, bo akuoi nobiagpa.” Tuamai tampat tatua sinangoiannea Pniel.

NEHEMIA 9:5

Ibada kon singgai tua in pinangkoi in intau mita in Lewi inta noiduduimai naa: ki Yesua, ki Kadmiel, ki Bani, ki Hasabneya, ki Serebya, ki Hodia, ki Sebanya bo ki Petahya. Mosia in noguman, “Sindog bo dayowdon in ki Tuhan Allah naton! Podayowdon kon i-Nia modapot in mononoi! Dinayo-dayowdon in tangoi-Nea inta nopuḻing in kamuliaan, tangoi inta motoyang, noiḻiu kon bayongan dodayow!”

IḶUAIAN 23:21

Indoiai bo duduiai in sia. Dika ḷumoḷatú kon inia sin totabá-Ku in sia, bo diábí in sia mongampung kon aidmu inta moitaḷá.

YESAYA 9:5

Adí tobatú ain pinononggadí kon i naton; kita in pinonotabian in ḷoḷaki tobatú. Sia in mobaḻí itoi naton. Sia in sinangoian: “Monononggina Mobijaksana” “Ki Allah Inta Motorindog”. “Ki Amá Inta Mononoi”. “Datu in Dodamean”.

YESAYA 9:6

Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki Tuhan Inta Totok in Mokawasa notantúbí kon mogaid kon tua.

HAKIM MITA 13:6

Nopaḷut mako kon tua ki buḷoi Manoah minayá kon i buḷoinea bo noguman, “Uḻe, totabá i Allah in namangoi kon inakó; batangannea in ná malaekat i Allah, dá inagían in ondok in akuoi. Diábí in akuoi noḻibó mongo nongkon onda in sia, bo diábí doman pinogumannea in tangoinea kon inakó.