GALATIA 5:5 - Alkitab Singog In Mongondow Masa In Tanaa

⁵ Táe aka kon i nami, kami in tongábí moharap mako kon totabi i Allah sin pinodoyon kon pirisaya kon i Kristus, ki Allahbí in mobogoi in kasampatan mobiag moyodame bui takin-Nea.

GALATIA 5:5 Mawu Ofanana

KINOBAḺIAN 49:18

O Tuhan, kasaḷamatan inta inogoi-Mu, tuata inta inoḷatku mako.

MAZMUR 130:5

Akuoi in mogoḷat mako kon totuḷung i Tuhan, dandi-Nea in inamangku mako.

MAZMUR 25:3

Intau inta nonoḻikud kon ini-Mu in pokopooyáanbímai, táe inta mopirisaya kon ini-Mu in diábí pokudaion.

MAZMUR 25:5

Tundúdon bo kapitdon in akuoi kon mobiag podudui in koibog-Mu, sin Ikobí in ki Allah inta noposaḷamat kon inakó, akuoi in umuranbí mongamang kon ini-Mu.

MAZMUR 62:5

Moiko in tongábí niat mopoḷabú kon inia nongkon ḷoḻitúannea inta moḷantud. Moiko in moibog monguboḷ; bibigmu pakéon monimu momarakat, táe kon bonu in gina monimu in mongutukbí.

HOSEA 12:6

Ki Allah tua in ki Tuhan Inta Totok in Mokawasa. Tangoinea in ki Tuhan. Pinongin tangoi tatuata ibogon-Nea intau moibada kon i-Nia.

SURAT I PAULUS KON JAMAAT RUM 5:21

Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.

KORINTUS 1 1:7

Tuamai barakat kon i monimu in diábí modai-dait kon dodai in moiko mogoḷat mako kon koangoian i Tuhan naton ki Yesus Kristus.

EPESUS 2:18

Pinotonsigad kon i Kristus, kita komintan, intau Yahudi andeka deeman intau in Yahudi, takin totuḷung in Roho i Allah inta tobatú tua, kita in motaau dimiug kon i Amá.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

TESALONIKA 1 1:10

Inouman doman monia in kososatia monimu in mogoḷat mako kon koangoian bui i Adí i Allah inta ki Yesus Kristus nongkon soroga. Sia inta ain biniag bui i Allah nongkon sigad in intau mita minatoi. Sia tuata inta moposaḷamat kon i naton nongkon hukuman i Allah kon singgai moiduduimai.

TESALONIKA 2 3:5

Poigumon mako tua ki Tuhan in umuran motundú kon daḷan mopia kon i monimu sinbá kotaauandon totok monimu kon motabibí totok in ki Allah kon i monimu bo ogoianbí i Kristus in kasabaran in moiko.

TIMOTIUS 2 4:8

Bo tanaa mako in pinopooḷatdon mako kon inakó in saḷaku intau inta nountung. Kon singgai ponantúan ki Tuhan, hakim inta moadil totok tua in moposarakan in tombuinag tatua kon inakó. Deemanbí doman tongá akuoi in motarima kon tombuinag natua, táe bayonganbí doman intau inta umuran mogoḷat mako kon koangoian bui i Tuhan.

TITUS 2:13

Tanaa mako, kita in mogoḷatpa mako kon singgai inta iharap mako naton tua. Kon singgai tatua, dunia naa in mokoontongdon kon kamuliaan i Yesus Kristus, Sia tuata in ki Allah Inta Totok in Momulia bo Datu Mopoposaḷamat naton.