GALATIA 5:1 - Alkitab Singog In Mongondow Masa In Tanaa

¹ Tanaa kita totu-totuudon nobebas, sin ki Kristus tontaní in nopobebas kon i naton! Tuamai tantúdon ḷukadai in kabebasanmu, bo donaai in moibog bui tonggataan.

GALATIA 5:1 Mawu Ofanana

MAZMUR 51:12

Baḻídon in ginaku naa modarit, o Allah, toimbagudon in ginaku takin ibog inta moroton.

AMSAL 23:23

Totundú inta mobanar, hikmat, topotundú, bo pomomangaḻe – tua komintan in patusbí taḷuion, bo donaaibí potaḷui.

YESAYA 61:1

Kawasa i Tuhan Inta Totok in Moḷantud oyúon kon inakó; Sia in nomiḻí bo nopotabá kon inakó sin modia kon habar mopia kon intau nobogá bo moḻipoi kon intau inta nokuyang in ginanea, sin mopotaau kon intau inta sinokodakop kon mosia in ḷagidon poḷuaton, bo kon intau mita kon bonu in ponjara kon mosia in ḷagidon poḷuaion.

MATIUS 23:4

Mosia in nobogot kon diaan kinosibuḷ totok, bo mopopotaan kon obaga intau ibanea, táe mosia tontaní in doíbí moḻiai.

LUKAS 5:38

Aka anggur nobagu yo bonuonbí kon botutu inta mobagu doman.

OUMAN IN RASUL MITA 15:10

Yo nongonu sin tanaa mako moiko in moibogbí moḷawang kon i Allah bo mobogoi in atorang inta totok in mororiga aidan in intau mita inta mopirisaya tanion, bokaka mogoguyangpa naton in diábí doman mokoaid kon tua komintan?

SURAT I PAULUS KON JAMAAT RUM 6:14

Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.

SURAT I PAULUS KON JAMAAT RUM 6:18

Moiko in pinilatandon nongkon kawasa in dosa, bo tanaa ain nobaḻí ata inta mogaid kon onu inta kinoibog i Allah.

SURAT I PAULUS KON JAMAAT RUM 7:3

Tuamai aka bobay tatua bo noyogaḷumdon in ḷoḷaki ibanea kon wakutu in ki buḷoinea nobiagpa, dá bobay tatua in tangoian nokituaḻing. Táe aka ki buḷoinea minatoidon, dá podudui in hukum, bobay tatua noipilat bidon. Bo aka sia in pobuḷoiondon in ḷoḷaki ibanea, dá sia in deeman bidon nokituaḻing.

SURAT I PAULUS KON JAMAAT RUM 7:6

Táe tanaa in kita in diádon noitogot kon hukum in agama Yahudi. Kita ain bidon minatoi kon hukum inta koḻipod nongawasa kon i naton. Kita in diá bidon mobantung ná aid tungkuḷ intua, inta pinodudui kon hukum inta pinais. Táe tanaa kita in mobantungbí podudui in aid mobagu inta sinundú in Roho i Allah kon i naton.

SURAT I PAULUS KON JAMAAT RUM 8:15

Sin Roho, inta inogoi i Allah kon i monimu, diábí mopobaḻí kon i monimu ata, sahingga moiko in mobiagdon kon bonu in porasaan moondok. Táe Roho i Allah in mopobaḻíbí kon i monimu ki adí mita i Allah. Bo takin kawasa in Roho tatua kita komintan in monangoi kon i Allah, “Amá, o Amáku!”

SURAT I PAULUS KON JAMAAT RUM 8:2

Sin Roho inta nobogoi in kobiagan ain nopoḷuat kon inakó inta ain notobatú i Kristus nongkon hukum in dosa bo hukum in popatoi.

KORINTUS 1 15:58

Tuamai uḻe utatku mita inta kinotabiku, mokoporopot bo kotorindog. Umuran totu-totuu pogundoi kon i Tuhan, sin kinotaauanbí monimu kon bayongan inta inaidan monimu kon i Tuhan, komintanbí baraguna.

KORINTUS 1 16:13

Umuran mokopoingat! Sindog kotorindog kon bonu in pirisayamu saḷaku intau Keresten. Mokopobarani bo mokoporopot!

KORINTUS 1 7:22

Sin ata inta mopirisaya kon i Tuhan, nobaḻí bidon intau i Tuhan inta nobebas. Bo intau nobebas inta nopirisayadon kon i Tuhan, nobaḻí bidon mogogaid kon oaidan i Tuhan Yesus Kristus.

KORINTUS 2 11:20

Tongá pomayá mako monimu aka oyúon in intau mononggata kon i monimu, andeka momakisa moigum bo mogamá kon kauntungan kon i monimu, ande inta monganggap kon mosia in moḷantu-ḷantud nongkon i monimu sahingga in mobarani monokap kon i monimu.

KORINTUS 2 3:17

Sin ki Tuhan tua in Rohobí; bo kon onda oyúon in Roho i Tuhan, yo kon tua oyúon in kabebasan.

GALATIA 2:4

umpakabí oyúon intau in totok momakisa kon inia. Mosia tua in intau mita inta umuran kumapog kon i naton bo mongaku kon mosia in ki utat naton. Mosia tua in umuni-uni mako monarukira kon onukabí in aidan naton saḷaku intau inta ain notobatú takin i Kristus Yesus. Ibogon monia in kita mobui kon kaadaan naton koḻipod saḷaku ki ata monia,

GALATIA 3:25

Tanaa mako wakutuneadon in intau mopirisaya kon i Kristus, dá kita in diá bidon iḷukadan mako in hukum i Musa.

GALATIA 4:26

Táe Yerusalem inta kon soroga tuata in Yerusalem inta nobebas, bo siabí tua in ki iná naton.

GALATIA 4:31

Dá pogumanku utat mita, kita naa in deemanbí ki adí in bobay ata tatua, táe ki adíbí in bobay inta nobebas.

GALATIA 4:9

Tongá masa in tanaa, moiko aindon nopirisaya kon i Allah, ande singogon mako mopoḷok, ki Allah ain nonotaau kon i monimu. Táe nongonu sin moiko in buipabí mosumba kon dimukud mita inta moraat tatua?

GALATIA 5:13

Utat mita! Moiko aindon inoiní mobaḻí intau inta nobebas. Táe donaaibí pakéon in kabebasanmu tatua saḷaku kasampatan mogaid kon onukadon in koibog monimu aidan. Táe popobaragunabí in kasampatan tatua motuḷung kon intau táe musti podoyon kon tabi kon tumpaḷa intau.

EPESUS 6:14

Moiko in musti umuran mobasadia. Ginamu inta motoindudui kon i Allah aidaidon naonda bo abit bo gina motuḻid aidaidon naonda bo ḷambungmu uatoi.

PILIPI 1:27

Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

TESALONIKA 1 3:8

habar tatua in nokodugang kon rigon in gina nami, asaḷ bo tantú koroton in sosindog monimu bo umuran motobatú i Tuhan.

TESALONIKA 2 2:15

Tuamai, utat mita, sindogdon koroton bo umuran kadaiai in totundú mita inta mobanar inta ain pinoyaput nami kon i monimu, pinomayá inouman ande inta pinais.

IBRANI 10:23

Koḻigai in kita mokopotantú kon pirisaya bo umuran kumadai kon onu inta inakudon naton bo inta i harap mako naton, sin Sia inta nodandi in tantúbí mobogoi in onu inta ain pinodandi-Nea tatua.

IBRANI 3:14

Kita naa in komintanbí yobayat topogaidan i Kristus asaḷ bo tantú kumadai kon onu mita inta pinirisayadon naton nongkon pinomangkoianmai modapot kon kopaḷutan in dunia naa.

IBRANI 3:6

Táe ki Kristus in mosatiabí saḷaku Adí inta motanggung jawab kon Baḷoi Allah. Bo kitabí naa in Baḷoi Allah aka umuran moḷoben in ibog naton kumadai bo moyakin in mokouḻí kon onu inta harapon mako naton.

IBRANI 4:14

Manangka intua, musti umuran in kita kumadai kon onu inta ain ináku bo pinirisaya naton sin oyúondon in Imang naton momulia bo inta moḷoben. Sia ain sinumuot dapot kon tayowon i Allah, Sia tuata in ki Yesus ki Adí i Allah.

PETRUS 1 2:16

Bo kobiagdon in moiko saḷaku intau inta mobebas, táe donaai pakéon in kabebasan tatua sin momompon kon aid mita monimu inta moraat, táe kobiagbí saḷaku intau mita inta nogaid kon oaidan i Allah.

PETRUS 2 2:19

Mosia tua in mopodandi in kasaḷamatan kon intau ibanea, bokaka mosia tontaní ain nobaḻí ki ata in oaid mita inta diá mopia inta mokogoguyaat kon intau. Sin aka tobatú intau bo sinaḷowdon in tobatú kawasa dá sia in mobaḻí bidon ata in kawasa inta nokotaḷow kon inia tua.

YUDAS 1:3

Utat mita inta kinotabiku! Totuu kon oyúonbí in makusudku in nomais kon surat tanaa kon i monimu, tuata in soaḷ kasaḷamatan inta ain tumpaḷa kinorasaan naton. Kon soaḷ tanaa totokdon kon ginaku in momais kon surat kon i monimu bo mononggina sinbá moiko in umuran mokoporoton in kumadai kon onu inta ain pinirisaya monimu inta ain pinoyaput kon intau mita inta ain inoiní i Allah.

WAHYU 2:25

Táe dapot Akuoi in mamangoidon bui, moiko in musti dumudui kon onu inta aindon sinundú-Ku kon i monimu.

WAHYU 3:3

Tuamai in toropdon bui in onu inta ain sinundú kon i monimu koḻipod bo onu inta ain dinongog monimu. Duduiai intua bo pogogaidon in mogaid kon dosa mita. Aka moiko bo diá mobangon, yo Akuoi in mamangoi kon i monimu naonda bo mononakow; bo diábí kotaauan monimu mongo toonu in Akuoi in mamangoi.