GALATIA 4:4 - Alkitab Singog In Mongondow Masa In Tanaa

⁴ Táe naonda in motompodon in wakutunea, potabádon i Allah in ki Adí-Nea mamangoi in dunia naa. Ki Adí-Nea tatua in pinononggadí in tobatú bobay inta nobiagpa kon bonu in kawasa in hukum i Musa.

GALATIA 4:4 Mawu Ofanana

KINOBAḺIAN 3:15

Iko bo bobay tatua in mobaḻí mososaturuan, buínea bo buímu umuran mososaturuan. Buínea in moritak kon uḷumu, bo tobakonmu in singkod monia.”

KINOBAḺIAN 49:10

Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

YESAYA 48:16

Angoidon diug kon i-Nakó bo indongogaidon, nongkon dungkuḷpabímai diábí bunion-Ku in tosingogon-Ku; onu in siningog-Ku umuranbí pototuu-Ku.” Tanaa in ki Tuhan Allah nopotabá kon inakó bo nobogoi kon inakó in kawasa-Nea tontaní.

YESAYA 7:14

Tanaa, ki Tuhan tontaní in mobogoi in tomponuot kon inimu: Mongodeaga tobatú inta sidia in mopononggadíbí in ḷoḷaki tobatú inta sinangoiannea Imanuel.

YEREMIA 31:22

Modapot in toonu moḻia-ḻiaw in ginamu, ei bangusa inta diá motoindudui kon i-Nakó? Akuoi in nomaḻídon kon inta mobagu kon dunia, tobatú inta diá notombuḷoi – naonda bo bobay diá motombuḷoi in moḷukad kon ḷoḷaki.”

ZAKHARIA 6:12

Potaau kon inia kon Akuoi ki Tuhan Inta Totok in mokawasa in noguman, ‘Intau inta dinonoi ki Inta Tokat, in mokoḷongasidon kon tampat inta pogutunannea bo sia in moposindog bui in Baḷoi i Tuhan.

MALEAKHI 3:1

Tubag i Tuhan Inta Totok in mokawasa, “Akuoi in mopotabábí in totabá-Ku mita sin moposadia in daḷan bayáan-Ku. Dá baḷúdon in Akuoi, ki Tuhan inta sinayak monimu, in mamangoidon in Baḷoi-Ku. Totabá-Ku inta sinano-tanob monimu tatua in mamangoi bo mopotaau in dodandian-Ku.”

PINOGIAPAN 28:22

Posumba domandon in bembé koḷakian tobatú inta baḻíon kuruban potobut kon dosa. Natuata in pogogaid monimu kon upacara potobutan kon dosa in umat.

MATIUS 1:23

“Tobatú mongodeaga in modia kon sian bo mopononggadí kon tobatú adí ḷoḷaki bo adí tatua tangoian monia ki ‘Imanuel’, inta mangaḻenea: Ki Allah kotaki-takin naton.”

MATIUS 3:15

Táe ki Yesus in notubag: “Pomayádon mako, diábí nongonu, sin natuabí in kita aka mogintompod kon bayongan inta kinoibog i Allah.” Dá binaptis domandon i Yohanes in Sia.

MATIUS 5:17

“Donaaidon sangkaan monimu, kon Akuoi in mamangoi momopat kon hukum i Musa andeka buk mita in nabi. Akuoi in mamangoi deemanbí momopat kon tua, táe mogintompodbí.

MARKUS 1:15

Ki Yesus in noguman, “Ki Allah in ḷagidon momangkoi momarenta. Pogogaidon moiko in mogaid kon dosa bo popirisayadon kon Habar Mopia inta nongkon i Allah!”

LUKAS 1:31

Iko in mobaḻí sidia bo nopolahir in adí ḷoḷaki, bo musti tangoianmu ki Yesus in Sia.

LUKAS 1:35

Dá tubag in malaekat tatua kon inia nanaa, “Roho i Allah takin kawasa-Nea inta totok in moḷantud mamangoi bo mongawasa kon inimu. Tuamain Adí inta polahirmu tua in tangoion Mokudus, ki Adí i Allah.

LUKAS 2:7

Sia nopolahir in adí ḷoḷaki, ki adínea guya-guyang. Adí tatua binakutnea in yumbit in daing bodongka pinouḻid kon bonu in duḷang sin mosia in diá nokouḻí kon baḷoi pinongandupan.

LUKAS 20:44

Dá aka ki Daud tontaní monangoi kon i-Nia ki Tuangnea, yo naondabí kon Sia tua in tangoionbí buí i Daud?”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 10:36

Yo nongonu sin singogonbí monimu kon Akuoi in mohojat kon i Allah popisí in Akuoi noguman kon Akuoi in ki Adí i Allah? Bokaka Akuoi in piniḻíbí i Amá bo pinotabá namangoi in dunia.

YOHANES 3:16

Popisí in ná domai tua in tabi i Allah kon intau kon dunia naa, dá inogoi-Neadon in ki Adí-Nea tuḷong, sinbá bayongan in intau inta mopirisaya kon i-Nia diá in moyoyang, táe mokouḻí kon kobiagan mononoi.”

YOHANES 6:38

Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó.

YOHANES 8:42

Dá ki Yesus in noguman kon i monia, “Aka ki Allah tua ki Amámu, yo motabibí in moiko kon i-Nakó, sin Akuoi in namangoibí nongkon i Allah. Bo deemanbí ibog-Ku tontaní in namangoi, táe ibogbí i-Nia inta nopotabá mangoi kon i-Nakó.

OUMAN IN RASUL MITA 1:7

Ki Yesus in notubag, “Diábí paraḷu kotaauanmu in sempo andeka wakutunea, sin tua in ki Amá-Kubí in monantú podudui in kawasa-Nea.

SURAT I PAULUS KON JAMAAT RUM 1:3

Habar Mopia tatua in soaḷbí ki Adí i Allah, inta ki Tuhan naton, ki Yesus Kristus. Inta aka podudui in awak ilo-ilow naa, yo Sia tua in buíbí i Daud.

SURAT I PAULUS KON JAMAAT RUM 15:8

Torop in naa, ki Kristus ain nobantung kon intau in Yahudi sin mopoontong kon ki Allah in mogaidbí kon onu inta ain pinodandi-Nea kon mogoguyang naton.

SURAT I PAULUS KON JAMAAT RUM 5:6

Wakutu in kita diádon kodaya, ki Kristus in pinokurubandon sin kopontingan naton pinotombubung kon wakutu inta ain sinantú i Allah; bokaka kita in intau mita inta noyayú nongkon i Allah.

SURAT I PAULUS KON JAMAAT RUM 8:3

Onu inta diá koaidan in hukum agama, sin kita intau ilo-ilow, yo tua ain inaidan i Allah. Ki Allah ain nonaḷow kon kawasa in dosa nongkon tabiat in intau takin aid nopotabá mangoi kon i Adí-Nea tontaní, inta namangoi ná kaadaan in intau baradosa, sin momopat kon dosa.

SURAT I PAULUS KON JAMAAT RUM 9:5

Mosia in buíbí doman in mogoguyang naton. Awak i Kristus naa in nongkon bangusabí monia tua. Táe Siabí in moḷantu-ḷantud nongkon bayongan in yagi-yagi. Dinayo-dayowdon in ki Allah modapot in kopaḷutannea! Amin.

EPESUS 1:10

Makusud in tomayá-Nea tatua in bá bayongan in yagi-yagi inta kon soroga ande inta kon dunia naa, in motobatúdon i Kristus saḷaku tongguḷu. Bo soaḷ tatua in iḷapatandon i Allah aka aindon wakutunea.

KOLOSE 2:14

bo pinopatan-Neadon in surat boboḻian kon i naton, inta mongancam kon i naton takin sarat mita inta mongobogat. Takin nopopakúdon in surat boboḻian tatua kon kayu pinoyotaḻempang, ki Allah in nomopat kon bayongan inta pinonapud kon i naton.

TIMOTIUS 1 2:6

Sia in tobatú intau inta ain noposarakan in awak-Nea sin pinotobut kon dosa mita in bayongan intau. Tua in moponiata kon wakutu inta ain sinantú i Allah, ibogon-Nea in bayongan intau in posaḷamaton.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

IBRANI 2:14

Lantaran intau mita inta sinangoi-Nea adí tua, tongábí intau ilo-ilow inta mato-matoipabí, dá ki Yesus sinumongkaidon kon i monia bo nobiag naonda bo kaadaan intau. Tua pinomia-Nea, sinbá kinopatoian-Nea tua mokorimumud kon Ibilis inta nongawasa kon popatoi.

IBRANI 9:10

Sin upacara mita tatua in tongábí soaḷ kokaanon bo oinumon bo noyagi-yagimaidon upacara pondaritan. Bayongan intua tongábí atorang mita in intau inta pakéon modapot wakutunea ki Allah monoimbagu kon dunia naa.

YOHANES 1 4:14

Kami tontaní ain nokoontong kon i Adí i Allah, bo kami in nopohabar kon Sia in pinotabá mangoi i Amá sin mobaḻí Datu Mopoposaḷamat in dunia naa.

YOHANES 1 4:2

Nanaa in tandanea kon i naton monotaau mongo tua in Roho i Allah andeka deeman: Intau inta mongaku kon ki Yesus Kristus in namangoidon in dunia saḷaku intau, yo intau tatua kinawasa in Roho i Allah.