GALATIA 2:16 - Alkitab Singog In Mongondow Masa In Tanaa

¹⁶ Umpaka natua yo kinotaauanbí nami kon diábí in tobatúmai intau in posaḷamaton i Allah sin dinumudui kon hukum i Musa. Táe intau posaḷamatonbí sin pirisaya kon i Yesus Kristus. Tuamai kami tontaní in nopirisayadon kon i Yesus Kristus, sinbá kami in posaḷamaton doman, deemanbí posaḷamaton sin dinumudui kon onu inta kon hukum i Musa.

GALATIA 2:16 Mawu Ofanana

AYUB 25:4

Degá intau motusi kon mata i Allah? Degá nodarit kon tayowon-Nea?

AYUB 9:29

Dá, aka natua, onupabí in motaauku aidan?

MAZMUR 143:2

Akuoi naa in mogogundoi-Mu, dikabí monisig kon inakó, sin diábí in intau in diá kotaḷá in kon tayowon-Mu.

YOHANES 20:31

Táe onu inta pinais kon buk tanaa, makusudnea kon bá mopirisaya in moiko kon ki Yesusbí tua in Datu Mopoposaḷamat, bo ki Adí i Allah, bo popisí in pirisayamu tatua dá mokouḻí i moiko kon kobiagan.

OUMAN IN RASUL MITA 4:12

Diábí in kasaḷamatan kon ibanea mako koḻikudbí in kon i Yesus tontaní, sin kon dunia naa in diábí in intau ibanea in inogoian i Allah in kawasa moposaḷamat kon i naton.”

SURAT I PAULUS KON JAMAAT RUM 1:17

Sin pinongin Habar Mopia tatua ki Allah in nopoontongdon kon naonda in pogogaid sinbá hubungan in intau bo i Allah in moyoguḻitdon bui: aidnea kon tua in tongábí mopirisaya kon i Allah nongkon pinomangkoianpamai modapot in pangabisan. Tua in ná inta ain pinais kon bonu in Buk Motusi, nanaa, “Intau in nopirisayadon kon i Allah, sahingga in hubungannea takin i Allah notompiadon bui, bo intau tatua in mobiagbí!”

SURAT I PAULUS KON JAMAAT RUM 3:30

Sin ki Allah tua in tongábí tobatú. Siabí tua inta nobogoi in kasampatan kon intau mita in Yahudi noyopia bui takin i Allah sin pinodoyon doman kon pirisaya monia. Bo Siabí doman tua inta nobogoi in kasampatan kon intau ibanea mobiag moyopia takin i Allah, bo tua in nobaḻí doman popisí in mosia mopirisaya.

SURAT I PAULUS KON JAMAAT RUM 4:2

Aka soaḷ mita inta inaidannea tatua bo nobaḻí dodoyonan pinotarimaan i Allah kon inia saḷaku intau inta mokosanang kon gina-Nea, dá oyúon doman in dodoyonannea dumodia. Táe sia in diábí motaau dumodia kon tayowon i Allah.

SURAT I PAULUS KON JAMAAT RUM 4:24

táe kon i natonbí doman. Kita in tarimaanbí doman i Allah saḷaku intau inta ain nokosanang kon gina-Nea, sin kita in nopirisaya kon i Allah inta ain nomiag bui kon i Yesus, ki Tuhan naton.

SURAT I PAULUS KON JAMAAT RUM 8:3

Onu inta diá koaidan in hukum agama, sin kita intau ilo-ilow, yo tua ain inaidan i Allah. Ki Allah ain nonaḷow kon kawasa in dosa nongkon tabiat in intau takin aid nopotabá mangoi kon i Adí-Nea tontaní, inta namangoi ná kaadaan in intau baradosa, sin momopat kon dosa.

SURAT I PAULUS KON JAMAAT RUM 9:30

Dá, nanaa in kasimpulannea: Bangusa mita ibanea inta deeman Yahudi in diábí moramuji konbá motompia bui in hubungan monia takin i Allah. Táe popisí in mosia mopirisaya, dá sinompiadon bui i Allah in hubungan monia takin-Nea.

KORINTUS 1 6:11

Koḻipod oyúon in kon sigad monimu in umuran mogaid kon natua mita. Táe tanaa in poniatadon kon nodaritdon in moiko nongkon bayongan oaid inta diá mopia. Moiko in nobaḻídon umat i Allah inta piniḻí-Nea. Moiko buidon noyobayat i Allah, sin nopirisayadon kon i Tuhan Yesus Kristus bo popisí kawasa doman in Roho inta nongkon i Allah naton.

GALATIA 4:5

Sia naa in pinotabá sin mobogoi in kabebasan kon intau mita inta umuranpa nobiag kon bonu in kawasa in hukum i Musa; sinbá kita in mobaḻí ki adí mita i Allah.

GALATIA 5:4

Aka moiko bo moramuji dumudui kon hukum i Musa sinbá posaḷamaton, yo tua in mangaḻenea hubungan monimu takin i Kristus in nobontowdon. Bo aka natua yo moiko in nobiag bidon kon ḷuai in totabi i Allah.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

PETRUS 1 2:24

Ki Kristusbí tontaní in notanggung kon dosa mita naton. Tua mita in sinanggung-Nea kon tudu in Kayu pinoyotaḻempang, sinbá kita in moipilatdon kon bonu in kawasa in dosa, bo mobiagdon podudui in ibog i Allah. Kekeb-Neabí mita tatua inta mokopia kon i monimu.

PETRUS 1 3:18

Sin ki Kristus tontaní in tongábí doman komintan minatoi popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

YOHANES 1 1:7

Táe aka kita in mobiag kon bonu in bayag ná ki Allah inta kon bonu doman in bayag, dá kita in mustibí mobiag modagin, motompia bo mositabian tobatú bo tobatú. Bo dugú i Yesus, ki Adí-Nea tua, mondarit kon i naton nongkon bayongan dosa.

WAHYU 7:14

Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.

WAHYU 7:9

Nopaḷut mako kon tua akuoi in nokoontongpa bui kon intau inta modamaḷ totok, diádon tobatúmai in intau in mokoiyap kon kobayongnea tua. Mosia tua in intau mita inta nongkon bayongan bangusa, suku, negara bo bahasa. Mosia in sinimindog kon tayowon in tampat pomomarentaan tatua bo kon tayowon i Adí in Domba. Mosia komintan nogiḷambung in jubah nobudó bo kokada-kadai doman tanga in kayu palem.