EZRA 6:14 - Alkitab Singog In Mongondow Masa In Tanaa

¹⁴ Binantungan i Nabi Hagai bo i Zakharia, itoi mita in Yahudi nongingguput kon pinogaidan kon Baḷoi Tuhan tatua. Mosia in ḷagi noginḷapat kon Baḷoi tatua podudui in parenta i Allah Israel bo i Kores, i Darius bo i Artahsasta, datu mita in Persia tatua.

EZRA 6:14 Mawu Ofanana

EZRA 3:8

Dá kon buḷan induanea, kon taong nogindua naonda in intau in Israel nobui kon Yerusalem, nomangkoidon in mosia noposindog bui in Baḷoi Tuhan. Ki Zerubabel, ki Yesua, bo topobayat monia tobangusa, imang mita, intau in Lewi, impoḷok mako in singog, komintan intau inta nokoimontandon iḷumbú, sinumakin nogaid. Intau mita in Lewi inta umur 20 notaong bo namonik sinundú pinoki indoian in oaidan kon poposindogan in Baḷoi Tuhan.

EZRA 4:24

Pinogaidan kon Baḷoi Tuhan in pinogogaidon bo diádon iningguputan nodapot kon taong nogindua kon pinomarentaan i Darius, datu in Persia.

EZRA 4:3

Táe ki Zerubabel, ki Yesua bo tongguḷu mita in inanakan tatua in notubag, “Kami in diápabí moparaḷu kon totuḷung i utat mita in moposindog in baḷoi kon i Tuhan Allah nami. Kami in moposindogbí tontaní podudui in parenta i Kores, datu in Persia, kon inami.”

EZRA 5:1

Kon dodai intua doyowa in nabi, inta ki Hagai bo ki Zakharia ki adí i Ido, nomangkoidon nosingog pinodoyon kon tangoi i Allah in Israel kon intau in Yahudi inta nogutun kon Yohuda bo kon Yerusalem.

EZRA 5:13

Onda intua ki Kores nobaḻí datu in Babel bo kon taong imitánea kon pinomarentaannea, sia in nopoḷuai in parenta kon moposindog bui in Baḷoi Tuhan tatua.

EZRA 5:2

Nokodongogmai kon koyow in nabi doyowa tatua, ki Zerubabel ki adí i Sealtiel bo ki Yesua ki adí i Yozadak ḷagidon nomangkoi bui noposindog in Baḷoi Tuhan kon Yerusalem, binantungan in nabi doyowa tatua.

EZRA 6:3

“Kon taong imitánea kon pinomarentaan i Datu Kores, sia in nopoḷuai in parenta sinbá Baḷoi Tuhan kon Yerusalem posindogondon bui mobaḻí tampat in intau modia kon sosumba bo motubá kon kuruban. Koḷantud in Baḷoi tatua in mustibí 27 nometer bo kooḷadnea in musti doman 27 nometer.

EZRA 6:8

Poyotakinon in naa akuoi momarenta kon i Utat mita mobantung kon i monia mogaid kon oaidan monia tatua takin aid nanaa: Bayongan in boḻi in oaidan poposindogan bui in Baḷoi tatua musti gamáan nongkon pajak in negara kon propinsi in Eprat Toyopan bo musti uboḻian kon intau mita tatua takin diábí baḷú-baḷuian in wakutunea.

EZRA 7:1

Tongonumai notaong noiduduimai kon tua, kon dodai in ki Artahsasta nomarenta nobaḻí datu in Persia, oyúon in ḷoḷaki tobatú tangoinea in ki Ezra, nongkon buí i Imang Moḷoben ki Harun. Pipidan in pinomuíannea nongkon ḻimonag bo pinoonik in noiduduimai naa: Ki Ezra Ki Seraya Ki Azarya Ki Hilkia

EZRA 9:9

Kon tungkuḷ in kami kon pinononggataanpa, diábí sinaḷáan-Mu in kami. Binaḻí-Mu in kami kinotabi in datu mita in Persia bo pinomayá mako in nobiag bo noposindog bui in Baḷoi-Mu inta dongkadon rumbunnea tua. Iḷukadan-Mu in kami in kon naa, kon Yohuda bo kon Yerusalem.

NEHEMIA 6:15

Pinonompiaan kon dinding tatua in ḻima nopuḷú bodoyowá nosinggai, bo noḷapat kon singgai in doyowa nopuḷú bo ḻima kon buḷan Elul.

YESAYA 44:28

Akuoibí inta noguman kon i Kores, ‘Ikobí inta momarenta sin kopontingan-Ku, bo mogaid kon bayongan inta kinoibog-Ku. Parentadon sinbá Yerusalem posindogon bui, bo Baḷoi Tuhan aidandon in kinodoyonannea.’ ”

HAGAI 1:1

Kon taong induanea kon pinomarentaan i Datu Darius kon Persia, kon singgai imitánea kon buḷan noginggonom, ki Tuhan in nosingog pinongin i Nabi Hagai. Koyow i Tuhan tatua inogoi kon i Zerubabel ki adí i Sealtiel, gubernur in Yohuda, bo kon i Imang moḷoben Ki Yosua ki adí i Yozadak.

HAGAI 1:8

Tanaa, in potakodon kon tombuḷud mita sin mogamá kon kayu, bo posindogdon in Baḷoi-Ku; dá mopiabí in gina-Ku bo Akuoi in sumbaandon bui podoyon kon inta moitutui. Bo, taridiaidon bui in kaadaanmu!

ZAKHARIA 1:1

Kon buḷan noginwaḷu kon taong nogindua kon pinomarentaan i Datu Darius kon Persia, ki Tuhan in nopotaau in koyow tanaa kon inakó, ki Nabi Zakharia ki adí i Berekhya bo ki ompu i Ido.

ZAKHARIA 1:16

Tanaa in mobuidon in Akuoi kon Yerusalem sin mongampung kon kotá tatua. Baḷoi-Ku in posindogondon bui bo kotá in Yerusalem in tompiaandon bui.”

ZAKHARIA 4:9

Kai-nia, “Ki Zerubabel ain nogukat kon dodatoḷan in Baḷoi-Ku, bo sia in moginḷapatbí kon bayongan in bangunan tatua. Aka tua bo mobaḻí, yo kotaauandon in umat-Ku kon Akuoibí inta ain nopotabá kon inimu Zakharia kon i monia.

ZAKHARIA 8:9

Ki Tuhan in noguman kon umat-Nea, “Koropot in ginamu! Tanaa moiko in nokodongogdon kon tosingogon mita inta ain doman siningog in nabi kon dodai in dodatoḷan inukat, sin moposindog bui in Baḷoi-Ku.