EPESUS 6:19 - Alkitab Singog In Mongondow Masa In Tanaa

¹⁹ Bo sambayangai doman in akuoi, sinbá wakutu in akuoi mosingog ogoian i Allah in singog mita inta moitutui, bo bá mobarani totok in akuoi mopotaau in onu inta noibunipa kon Habar Mopia tua.

EPESUS 6:19 Mawu Ofanana

OUMAN IN RASUL MITA 13:46

Táe taran-tarangan in taya dua in nosingog nanaa: “Koḻipodpabí singog i Allah naa in pinoyaput kon i monimu. Táe diá sinarima monimu, sin moiko ain noguman tontaní kon moiko in diábí patus motarima kon kobiagan mononoi. Tuamai tanaa mako taḷaan nami in moiko bo mayá kon intau ibanea.

OUMAN IN RASUL MITA 14:3

Manangka intua ki Paulus bo ki Barnabas in nogutun noḻin onggot kon tua. Bo umuranbí nobarani in mosia in nongonguman kon soaḷ ki Tuhan. Dá pinoniatadon i Tuhan kon habar inta pinotaau monia soaḷ totabi-Nea tatua in totuubí; mosia in inogoian-Neadon in kawasa mogaid kon soaḷ mita inta mokoherang bo inta diá komampuan in intau aidan.

OUMAN IN RASUL MITA 18:26

Takin kabaranian moḷoben ki Apolos nopotaau in Habar Mopia kon bonu in baḷoi pososambayangan. Naonda in dinongog i Priskila bo i Akwila in totundúnea mita tatua, dinia nayadua kon baḷoi monia in ki Apolos. Bo nodait monia sinarangkan kinopira kon inia in bayongan tomayá i Allah moposaḷamat kon bayongan intau pinodoyon kon i Yesus.

OUMAN IN RASUL MITA 19:8

Toḷu nobuḷan in ki Paulus umuran nobarani in nongonguman kon bonu in baḷoi pososambayangan bo mosisoaḷan takin bayongan in intau kon tua sin mopoyakin kon i monia in soaḷ ná onda in ki Allah momarenta saḷaku Datu.

OUMAN IN RASUL MITA 2:4

Mosia tua in komintandon kinawasa in Roho i Allah. Dá nomangkoidon in mosia nosingog nomaké in bahasa in intau ibanea. Mosia in nosingog podudui in singog inta inogoi in Roho i Allah singogon.

OUMAN IN RASUL MITA 28:31

Bo taran-tarangan doman in sia in nopotaau in Habar Mopia kon naonda in ki Allah momarenta saḷaku Datu bo moginsilang kon soaḷ ki Tuhan Yesus Kristus. Onu in inaidan i Paulus tatua diá bidon in noḷambo-ḷamboi mako.

OUMAN IN RASUL MITA 4:13

Intau mita kon tua inta nosidang kon i Petrus bo kon i Yohanes noherang totok in nokoontong kon kobobarani nayadua, bokaka kinotaauanbí monia kon taya dua tua in intaubí inta diá nosikoḷa. Bain tua bo kinotoropan monia kon taya dua tua in dumoduduibí i Yesus.

OUMAN IN RASUL MITA 4:29

Bo tanaa mako Tuhan, indoiaika in mosia mongancambí kon inami. Poigumon nami kon ini-Mu Tuhan, ogoiaipa in kabaranian in bobantung-Mu mita tanaa in mopoyaput in Pirman-Mu mita.

OUMAN IN RASUL MITA 4:31

Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

OUMAN IN RASUL MITA 9:27

Táe inangoi i Barnabas bo ginamá in sia bo pinotayow kon rasul mita. Bo nodait inouman i Barnabas kon i monia in soaḷ naonda in ki Saulus nokoontong kon i Tuhan kon yuak in daḷan bo soaḷ naonda in ki Tuhan nosingog kon inia. Bo inoumannea doman kon i monia in kinobobarani i Paulus nopoyaput in Habar Mopia soaḷ ki Yesus kon Damsyik.

OUMAN IN RASUL MITA 9:29

Sia in umuran mongonguman bo mobobayowan takin intau mita in Yahudi inta nomaké in bahasa Yunani, sahingga in totok ramujion monia ḻimoddon.

SURAT I PAULUS KON JAMAAT RUM 15:30

Podoyon kon tangoi i Tuhan naton ki Yesus Kristus, bo podoyon kon tabi inta inogoi in Roho i Allah, igumonku totok sinbá moiko in moyotakinku mosambayang kon i Allah.

SURAT I PAULUS KON JAMAAT RUM 16:25

Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

KORINTUS 1 1:5

Popisí in moiko bo nopirisayadon kon i Kristus, dá bayongan in yagi-yagi komintanbí mouḻí monimu. Moiko aindon inogoian in totabi motundú kon onu in kinotaauan monimu.

KORINTUS 1 2:7

Kabijaksanaan inta poyaputku naa in nongkon i Allahbí. Kabijaksanaan tatua in diápa kinotaauan in bayongan intau kon dunia naa, táe munadon sinadia i Allah wakutu in diápa inaidan-Nea in dunia, sinbá mosanang in kita.

KORINTUS 1 4:1

Anggapbí in kami naa mogogaid mita kon oaidan i Kristus inta motanggung jawab mopotaau in tomayá mita i Allah inta diápa kinotaauan in bayongan intau kon dunia naa.

KORINTUS 2 3:12

Lantaran natua in harapan nami, dá mobarani in kami mosingog kon natua.

KORINTUS 2 6:11

Utat mita kon Korintus inta kinotabiku! Kami in taran-tarangan bidon in nosingog kon i monimu, onu in kon gina nami aindon nodait pinotaau nami.

KORINTUS 2 7:4

Akuoi in mopirisaya bidon totok kon i monimu. Moiko nion inta totok mokoḷunganga kon ginaku! Umpakabí mobayong in yoyiga korasaanku, táe noundambí in ginaku, sin lantaran moiko nion. Totuu moḷunganga in ginaku!

KORINTUS 2 8:7

Kon bayongan in yagi-yagi: Moiko nion in noiḻiudon totok kon soaḷ pirisaya, soaḷ pororai, kon soaḷ pongotahuan, kon bayongan in yagi-yagi oaidan, bo kon soaḷ kototabi monimu kon inami. Tuamai poigumonku doman mako sinbá moiko moiḻiu doman kon bayongan oaidan inta mopia tanaa.

EPESUS 1:9

Ibog-Neabí tontaní in nopotaau kon i naton in tomayá-Nea inta noibunipa tatua; Sinantú-Neadon kon tomayá-Nea tatua in iḷapatan-Neadon pongin i Yesus Kristus.

EPESUS 3:9

bo akuoi in pinaké doman i Allah mogaid kon oaidan tatua sinbá bayongan in intau monotaau kon naonda in pinogogaid i Allah inta nomia kon dunia naa, mogaid kon tomayá-Nea inta binuni-Nea kon dunia naa nongkon tungkuḷ intua.

KOLOSE 2:2

Naa komintan inaidanku sinbá moropotdon in gina monia bo mositabian poḷat mobiag motobatú, sahingga in mosia totu-totuudon momangarti bo moyakin poḷat monotaau kon onu inta binuni i Allah, tuata in ki Kristus tontaní.

KOLOSE 4:3

Sambayangai doman in kami sinbá ogoian i Allah in kasampatan mopia kon mopotaa-taau mako in habar soaḷ inta noibuni kon i Kristus. Inta lantaran soaḷ tatuata dá tanaa mako akuoi binonu kon ponjara.

TESALONIKA 1 2:2

Bo kinotaauan bidon monimu kon wakutu in kami diápa namangoi kon i monimu kon Tesalonika, kami in muna bidon pinogutú bo siningkuḻe kon kotá in Pilipi. Táe umpaka nobayong in intau moḷawang kon i nami, táe umuranbí inogoian i Allah naton in kabaranian in kami mopotaau kon i monimu in Habar Mopia inta nongkon i Allah.

TESALONIKA 1 5:25

Uḻe utatku mita, tantú sambayangai in kami!

TESALONIKA 2 3:1

Naa doman in poigumonku kon i monimu Utat mita, tantú sambayangai in kami. Sinbá habar nongkon i Tuhan in umuran potaau magí-mako bo tarimaan domandon takin pia in gina ná pinototarima monimu koḻipod.

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

PILEMON 1:22

Akuoi in mopoigum doman kon inimu, tuḷungaipa posadiaai in akuoi kon gopot kon baḷoimu sin haraponku mako kon indongoganbí i Allah onu in pinoigum i utat mita konbá akuoi in buipa mamangoi kon i monimu.

IBRANI 13:18

Tantúbí sambayangai in kami. Moyakinbí in kami kon notuḻidbí totok in gina nami, sin pomuḷoi in kami mogaid kon yagi-yagi, tantúbí inta mobanar in aidan nami.