DATU MITA IMITÁNEA 4:34 - Alkitab Singog In Mongondow Masa In Tanaa

³⁴ Datu mita kon bayongan in dunia naa nokodongogdon kon kopopandoi i Salomo dá mosia in nopotabá in intau monia momangoi sin mokidongog kon inia.

DATU MITA IMITÁNEA 4:34 Mawu Ofanana

DATU MITA IMITÁNEA 10:1

Datu bobay kon butá in Syeba nokodongogdon kon habar soaḷ ki Salomo. Dá namangoi in sia kon Yerusalem sin monungkuḷ kon i Salomo takin nobogoi in tangkí mita inta mongobogat raion.

DATU MITA IMITÁNEA 4:33

Sia in mokosanggupbí in mosingog soaḷ pangkoi mita in kayu bo pinomuḷa mita – nongkon pangkoi in ḷokuyú in Libanon nodapot kon bonok hisop inta nobiag kon dinding mita in batu. Sia in nongonguman doman kon soaḷ bobiagon kon toba bo bobiagon ḷumoḷayug, bobiagon ḷumandai bo toyá.

TAWARIKH 2 9:1

Datu Bobay in butá in Syeba in nokodongogdon kon ki Salomo in ponango-nangoiandon totok. Dá namangoi in sia in Yerusalem sin monungkuḷ kon i Salomo pinongin tangkí mita inta mongobogat tubagan. Namangoi in sia kotaki-takin in intaunea mita mobayong bo unta inta dinatogan in noyagi-yagimai in pododungú mita, batu permata, bo mobayong doman totok in buḷawan. Kon tungkuḷ in noyodungkuḷ i Salomo, ki datu bobay tatua noḻibódon kon noyagi-yagimai inta kinoraiannea.

TAWARIKH 2 9:23

Bayongan in datu moḷongasi mokipodungkuḷ kon i Salomo sin mokidongog kon totundú mobijaksana inta inogoi i Allah kon inia.

YESAYA 2:2

Kon singgai mita moiduduimai buḷud kinoḻitúan in Baḷoi Tuhan inta moḷantud bo inta noisindog moroton kon tudu in buḷud mita bo tombuḷudnea mita. Bayongan in bangusa moyotakinbí in mayá intua,

ZAKHARIA 8:23

Kon singgai mita tatua mopuḷú in intau ango-angoi in mamangoi kon intau in Yahudi tobatú bo moguman, ‘Kami in moibogbí doman in mopia ná moiko; sin dinongogdon nami kon ki Allah in nomarakat kon i monimu.’ ” Ki Tuhan Inta Totok in mokawasa ain nosingog.