DATU MITA 2 9:17 - Alkitab Singog In Mongondow Masa In Tanaa

¹⁷ Naonda in moḷoḷukad kon ḷangkeang in kotá in Yizreel nokoontong kon i Yehu bo intaunea mita namangoi, nomaḷú in sia, “Topaanan in intau nopoangoi in naa!” Ki Yoram in notubag, “Potabádon in tontara tobatú tumakoi kon kabaḷo bo mayá monaridi mongo yobayat in mosia tua andeka musung.”

DATU MITA 2 9:17 Mawu Ofanana

SAMUEL 2 13:34

Kon dodai intua ki Absalom ain noḷagui. Moḷoḷukad kon komaḻig i Daud nokoontong kon nobayong in intau in namangoi nosiḻig kon buḷud nongkon dotá in Horonaim. Dá minayádon in sia kon i datu bo nopotaau intua.

SAMUEL 2 18:24

Ki Daud ḻimitú mako kon yuang kon sigad in ngara dotá in bonunea bo ngara dotá in ḷuai in kotá tatua. Moḷoḷukad noponik kon dinding bo sinimindog kon atop in ḷoḻingkop in ngara tatua. Naonda in sia nobobui magí mako, inontongnea oyúon in intau tobatú namangoi sindaḷan noribatuk.

DATU MITA IMITÁNEA 2:15

Ki Adonia in notubag, “Kinotaauan i iná kon sabanarnea in akuoibí in mobaḻí datu; tua in inoḷat bidon mako in bayongan Israel. Táe noyoḻiudon in nobaḻí; ki ai-aikubí in nobaḻí datu, sin natua in kinoibog i Tuhan.

DATU MITA 2 7:14

Dá nomiḻídon in mosia kon tongonumai in intau, bo pinoki diaandon i datu in mosia in kereta in parang doyowa bo minayá nonaridi mongo onu in nobaḻí kon tontara mita in Siria.

DATU MITA 2 9:11

Ki Yehu in buidon minayá kon yobayatnea mita, bo noḻibó in mosia, “Onu in habar? Onu in inangoi in intau nobundai tatua kon inimu?” “Uḻe, kinotaauandon monimu,” tubag i Yehu.

DATU MITA 2 9:16

Nopaḷut mako kon tua sinumakoi in sia kon kereta in parangnea bo nobuat minayá in Yizreel. Kon tungkuḷ intua ki Yoram in diápa nopia, bo ki Ahazia datu in Yohuda in kon tua doman nokipodungkuḷ kon inia.

DATU MITA 2 9:18

Takin kotako-takoi kon kabaḷo, minayádon in tontara tatua nokipodungkuḷ kon i Yehu bo noguman, “Pinoki ḻibó i datu mongo ki Tuang in namangoi saḷaku yobayat.” “Tua in deemanbí totaaumu!” tubag i Yehu, “Dugangdon mangoi kon inakó.” Inontong in moḷoḷukad kon ḷangkeang tatua kon tontara tatua in noiyaputdon kon paanan tatua, táe diábí nobui mangoi. Dá pinotaauneadon in tua,

DATU MITA 2 9:19

bo pinotabádon bui in tontara tobatú ibanea. Tontara tatua in noḻibó doman natua kon i Yehu, bo buipa doman sinubagan i Yehu, “Tua in deemanbí totaaumu! Angoidon dugang mangoi kon inakó!”

YESAYA 56:10

Guman i Tuhan, “Itoi mita in bangusa-Ku in intau mita bilog! Mosia in diábí nonotaau in onu bo onu. Mosia in naonda bo ungkú bobó inta diá mogaú, táe tongábí mosiug mako bo tumogoindop. Mosanang totok in mosia in mosiug!

YESAYA 62:6

Kon dinding in Yerusalem Akuoi monampat kon moḷoḷukad; singgai doḷom mosia in diábí motaau in tongá kibio-biómai, táe mustibí umuran moponorop kon i Allah kon dandi inta ain pinomia-Nea.

SAMUEL 1 16:4

Ki Samuel nomia kon ná inta pinoguman i Tuhan. Naonda in sia nodapot kon Betlehem, itoi mita in kotá kon tua nonontomu kon inia takin noitaḻikokog bo noḻibó, “Degá kinoangoian i Amá naa in mokopoangoi kon saḷamat?”

SAMUEL 1 17:22

Bo pinoki tagúpa i Daud in onu inta dinianea tatua kon intau inta moḷoḷukad kon touḷut in tontara, bo minayá in tampat popoparangan sin mayá mokipodungkuḷ kon i guya-guyangnea mita.