AMSAL 6:16 - Alkitab Singog In Mongondow Masa In Tanaa

^16-19 Pitu in pelekara inta kinodoí i Tuhan bo inta diá motaau tongá pomayá-Nea mako: Dodia inta moḷoḷatú, bibig inta mosingog kon uboḷ, ḻima inta moḻimod kon intau diá kotaḷá, utok inta monomayá kon oaid mita inta moraat, sioḷ inta ḻimikat in mayá mogaid kon inta moraat, sakusi inta umuran monguboḷ, bo intau inta mokopomuká kon sosaturuan kon sigad in yobayat.

AMSAL 6:16 Mawu Ofanana

DATU MITA 2 21:16

Koḻikud in nokopopisí kon intau in Yohuda binaradosa kon i Tuhan pinongin nosumba kon berhala, ki Manasye in noḻimod doman kon nobayong totok in intau inta diá kotaḷá dá dugú in moiḻig kon bayongan in tampat kon Yerusalem.

AYUB 5:19

Aka anib bo mopogogondok, iko in umuranbí posaḷamaton.

MAZMUR 11:5

Ki Tuhan in nonungkuḷ kon intau mopia bo intau moraat, dinoí-Nea in intau inta moḻingá.

MAZMUR 5:7

Yopúon-Mu in intau mita inta moibog monguboḷ. Mopopak bo moḷoḻimod mobú in Iko in mokoontong.

AMSAL 11:1

Ki Tuhan in doíbí kon intau inta mopomaké in simbangan inta motombogá táe mopia in gina-Nea kon intau inta mopomaké in pononimbangan inta moitutui.

AMSAL 11:20

Ki Tuhan in doíbí kon intau inta gina moraat, táe Sia in motabibí kon intau inta nobiag diá in bogit.

AMSAL 12:22

Ki Tuhan in doíbí kon intau mouboḷ; táe mopia in gina-Nea kon intau inta motuḻid in gina.

AMSAL 17:15

Ki Tuhan in doíbí kon intau inta mopobanar kon intau moraat, bo inta mopotaḷá kon intau inta diá kotaḷá.

AMSAL 20:10

Simbangan bo pogogukuran inta motombogá kinodoíbí i Tuhan.

AMSAL 20:23

Simbangan bo batu pononimbangan in intau motombogá in kinodoíbí i Tuhan.

AMSAL 21:4

Intau moraat tatua in binaradosa, popisí in kinawasa in dodia bo ḷoḷatúnea.

AMSAL 3:32

Sin, ki Tuhan in doíbí kon intau inta mogaid kon inta moraat, táe Sia in modaginbí kon intau inta motuḻid in kobobiagnea.

AMSAL 30:18

Oyúon in opat nopasaḷ inta mororigaku totok komangaḻean.

AMSAL 30:21

Oyúon in opat nopasaḷ inta moyoyiga tarimaan kon sinangkub in dunia:

AMSAL 30:24

Kon dunia naa opat norupa in mahaḷuk inta mointok táe mopandoi totok, tuata:

AMSAL 30:29

Oyúon opat nopasaḷ inta diá koḻiongan aka taridionmai in bobayánea, tuata:

AMSAL 6:15

Tua komintan in mokopopisí kon bodito moiantug kon inia inta moidaḻin-daḻí, bo morimumud in sia.

AMSAL 8:13

Mohoromat kon i Tuhan tua in mangaḻenea in mondoí kon inta moraat; akuoi in doíbí kon aid moḷoḷatú bo mododia. Kodoíkubí in dodia inta moraat bo tosingogon mita inta monguboḷ.

YEREMIA 26:15

Táe torop, aka moiko moḻimod kon inakó, moiko bo intau in kotá tanaa in mobaba kon taḷá kon pinoḻimodan kon intau inta diá kotaḷá. Sin, ki Tuhanbí inta nopotabá kon inakó mobogoi in tompoingat tatua kon inimu.”

AMOS 1:11

Ki Tuhan in noguman, “Intau in Edom ain nopobui-buimai binaradosa, tuamai in notantú bidon kon hukumon-Ku in mosia. Diá bidon in tabi monia in nonubu kon intau mita in Israel, ki utat mita monia. Mosia in umuran tumorú bo umuran motagú kon gina.

AMOS 1:3

Ki Tuhan in noguman, “Intau mita in Damsyik ain nopobui-buimai in binaradosa, tuamai in notantú bidon kon hukumon in mosia. Mosia in nopoaid kon intau in Gilead pinodoyon kon aid inta totok in moḻingá,

AMOS 1:6

Ki Tuhan in noguman, “Intau in Gaza in nopobui-buimaidon nogaid kon dosa, tuamai in notantú bidon kon hukumon-Ku in mosia. Mosia in nogakutdon nodait kon bangusa tobatú bo pinotaḷui nobaḻí ata kon intau in Edom.

AMOS 1:9

Ki Tuhan in noguman, “Intau in Tirus ain nopobui-buimai in binaradosa, tuamai in notantú bidon kon hukumon-Ku in mosia. Mosia in nogakutdon nodait kon bangusa tobatú komintan pinobayá in pinoḷumbúan, bo nobogoi kon Edom; mosia in iḻimimpatdon kon dodandian yoyobayatan.

AMOS 2:1

Ki Tuhan in noguman, “Intau mita in Moab ain nopobui-buimaidon in binaradosa, tuamai in notantú bidon kon hukumon-Ku in mosia. Mosia in noningkuḻe kon i datu in Edom inta ain minatoi tatua, pinongin nongokai kon pinoḷobongan kon inia poḷat nogamá kon tuḷannea mita bo sinubá nobaḻí ḷobud.

AMOS 2:4

Ki Tuhan in noguman, “Intau in Yohuda ain nopobui-buimai binaradosa, tuamai in notantú bidon kon hukumon-Ku in mosia. Mosia in iḻimimpatdon kon parenta-Ku mita bo doí nopandungmai kon totundú-Ku mita. Mosia in pinoḷangkam in ilah mita ibanea inta sinumba in mogoguyang monia.

AMOS 2:6

Ki Tuhan in noguman, “Intau in Israel ain nopobui-buimai binaradosa, tuamai in notantú bidon kon hukumon-Ku in mosia. Intau mojujur inta diá mokopobui kon iḷuanannea, ain pinotaḷui monia nobaḻí ata. Natua doman in aid monia kon intau nobiag nobogá inta diá nokouboḻi kon boḻinea, umpaka boḻinea tatua tongá ná boḻi in aip in sioḷ togapang.

ZAKHARIA 8:17

Dika monomayá kon inta moraat kon tumpaḷa intau. Dika mongibot kon uboḷ. Kodoí-Ku in inta uboḷ bo inta diá moadil bo aid moromú.”

ULANGAN 23:18

Ná doman tua in doit inta nouḻí kon pinosundaḷan tatua in diábí motaau in diaan kon Baḷoi i Tuhan Allahmu sin poguboḻi kon dandimu, sin kinodoíbí i Tuhan Allahmu in bobay sundaḷ kon kuil mita pososumbaan bo boḻi in pinosundaḷan.

ULANGAN 24:4

Kon soaḷ doyowa tatua ki buḷoinea inta muna in diábí motaau mononibuḷoi bui kon bobay tatua; mustibí indoiannea in sia saḷaku bobay inta ain kinotoran. Aka buínea doman pobuḷoion, yo aidnea tatua in nopoompámaidon kon i Tuhan Allahmu. Moiko in diábí motaau in momia kon dosa ná moraat intua kon butá inta inogoi i Tuhan kon inimu.”

ULANGAN 25:16

Ki Tuhan Allahmu in doíbí kon intau inta moibog monguboḷ.”

WAHYU 21:27

Táe intau mita inta nogaid kon soaḷ mita inta mokorongó, ande intau mita inta mongouboḷ, yo singogon mako mopoḷok, mosia inta nogaid kon mokotor, diábí moituot kon tua. Inta motaau tumuot in tongábí intau inta tangoinea in pinais kon bonu in Buk Intau Nobiag, buk i Adí in Domba tatua.