AMSAL 15:1 - Alkitab Singog In Mongondow Masa In Tanaa

¹ Singog inta moḷukó, mokopiong kon torú; tubag inta mopatú mokotagab kon torú.

AMSAL 15:1 Mawu Ofanana

SAMUEL 2 19:43

Intau in Israel in notubag, “Hak nami kon i datu in mopuḷú noguntuḷ in koḷobennea nongkon i monimu. Nongonu sin moiko in diábí moindoimai kon inami? Dika koḻiongan kon kamibí naa inta muna-munamai totok noguman kon modiadon bui kon i datu mobui!” Táe intau in Yohuda in motoga-togat in intau in Israel bo doí taḷowon.

DATU MITA IMITÁNEA 12:7

Mosia in notubag, “Aka ki Tuang totu-totuu moibog mogaid kon kopontingan in rayat, dá duduiaidon in oigum monia tua, dá mosia in moibogbí umuran mobantung kon i tuang datu.”

TAWARIKH 2 10:7

Mosia in notubag, “Aka moibog in ki Tuang mogaid kon inta mopia kon rayat, bo moposanang in gina monia, dá tubagaidon in inta mopia in mosia, dá mosia in motoinduduibí kon i Tuang dapot in mononoi.”

AYUB 41:3

Degá mopoigum in sia kon inimu sinbá buḻianmu? andeka moyosingogmu, mopoigum in totabi?

AMSAL 10:12

Yaat in gina mokopomuká kon ropatoi; totabian mongampung kon bayongan in taḷá.

AMSAL 15:18

Intau inta motoyong tumorú mokopomuká kon bobayowan, intau inta mosabar modia kon dodamean.

AMSAL 25:15

Aid mosabar takin tosingogon mita inta moḷukó in mokoyakinbí kon intau inta nongawasa, bo mokorimumud kon bayongan inta moḷawang.

AMSAL 28:25

Tongá morai kon kopontingan tontaní in mokopomukábí kon bobayowan; mountu-untungbí in iko aka mopirisaya kon i Tuhan.

AMSAL 29:22

Intau inta bayá-bayá tumorú mokopopisí kon mobayong in intau mobobayowan bo baradosaan.

AMSAL 29:8

Intau inta moibog mopotaḷá mokotombaukbí kon kotá, táe intau mobijaksana in mokoonowbí kon kaadaan.

OUMAN IN RASUL MITA 19:41

Naonda in noguman kon tua mita, bayongan in intau kon tua nodaitdon pinoki pobuian i jurutulis tatua.