AMSAL 13:1 - Alkitab Singog In Mongondow Masa In Tanaa

¹ Adí moarip in mokidongogbí in aka tongginaan i amánea; intau moḷoḷatú in doíbí toboḷowon.

AMSAL 13:1 Mawu Ofanana

DATU MITA IMITÁNEA 22:43

Ná doman ki Asa, ki amánea, ki Yosapat in nogaid doman kon inta mopia kon tayowon i Tuhan. Iyompatnea nongkon dodatuan nea in bayongan sundaḷ ḷoḷaki bo bobay inta nopobayá in oaidan monia kon tampat mita pososumbaan kon berhala inta kinotaḷáan kon tungkuḷ i Asa, ki amánea. Táe tampat mita tatua in diábí irimumudnea. Rayat in tantúpabí doman moposumba in kuruban bo kamania kon tua. Ki Yosapat in nogaid kon kapaḷ mita in Tarsis sin pogakutan kon buḷawan kon Opir, táe kapaḷ mita tatua in diábí nobaḻí iḷumeag sin nogoguyaat kon Ezion-Geber. Ki Datu Ahazia nongkon Israel in nonotogmai sinbá intau mita in kapaḷnea in ḷumeagdon moyotakin in intau mita in kapaḷ i Yosapat, táe doí in ki Yosapat umpaka mopia in yoyobayat monia takin i datu in Israel. Onda intua ki Yosapat minatoi bo iḷobong kon poḷoḷobongan kon datu mita kon kotá i Daud. Ki Yoram ki adínea in nobaḻí datu nonoḻiu kon inia. Ouman ibanea mako kon i Yosapat, kobobaraninea bo pinoparangannea mita in pinaisdon kon bonu in buk Ouman in Datu mita in Yohuda. Kon tungkuḷ intua butá in Edom diá in datu. Nomarenta kon tua in tobatúbí bupati.

AMSAL 10:1

Naa in tonggina mita i Salomo: Adí inta mobijaksana in mokoyunggagá kon gina i amánea; adí inta bodok mokororiga kon gina i inánea.

AMSAL 12:15

Intau dondunguḷ in diábí mokoimontanmai in monotaau kon sia in noitaḷá, táe intau mobijaksana moibog mokidongog kon tonggina.

AMSAL 14:6

Intau moḷoḷatú in diábí mobaḻí mobijaksana, táe intau mopandoi motoyongbí in pobalajarannea.

AMSAL 15:12

Intau inta moibog mopoompámai kon intau ibanea in doíbí toboḷowon; doíbí in sia mopoigum in tonggina kon intau mobijaksana.

AMSAL 15:20

Adí inta mobijaksana, mokosanang kon gina i amánea; adí inta mobodok diábí mohoromat kon i inánea.

AMSAL 15:5

Intau bodok diá mopandung kon tonggina i amánea, intau mobijak mokidongog kon toboḷow.

AMSAL 7:24

Tuamai, adí mita, indongogaidon in akuoi. Tondudutdon in tongginaku mita.

SAMUEL 1 2:25

Aka intau mogaid kon taḷá kon tumpaḷa intau, yo motaaupabí tuḷungan i Allah; táe aka intau momia kon dosa kon i Tuhan, yo ki ine in motaau motuḷung kon inia?” Táe doíbí in mosia mokidongogmai kon tonggina i Eli, amá monia, sin sinantúdon i Tuhan kon ḻimodon in monia.