26 Maana “nti pi wa Mbwana na zooshi ziriimo.”
Aphano, amana mwikishututela wa waamineyavo mwisiila huula yaka na khuthokorela wahati aka, mweeyo mwinttela wiiya atthu aka, ootafikhana zayita khapila kiina, maana olumwenku wooshi pi waka.
Munsa khujipu yoori: “Amana miiyo kilaamo nsitati mphu kintta wookolela nkhono aka wa Nnyizinku kilompe. Taari enyamale na vuula yaamuse yoori weeyo ojuwe yoori olumwenku pi wa Nnyizinku.
Ila amana ntthu alupa yoori: “Zatwaheliwa sanamu,” ohije, mwaasa wa otule awuuziyeeyo na akhili zawe.
Weekhweele, epile Nluku ompiyeeyo pi zooshapweya zooshi, ehiiyevo hatha moote enthanyiwaaye amana yiiya yoopokhereliwa wonshukhurwelavo Nluku.
Monkoni wa mathaajiri voolumwenku apha, owaahirimize yoori ahisala ajinkhelela, wala thwaama zaya ahitthe nkatthi wa maali epile zoohilipaneyi; ila thwaama zaya atthe wa Nluku, Ye oninkha wa waattavo vitthu zooshi yoori nisala nijirela.
