God-waŋarrwuŋ maŋutji-gurrupanawuy 21:18 - Djambarrpuyŋu New Testamen

¹⁸ Ga ḻoḻuny ŋunhiyi latjun' mirithirra dhika, miny'tji-miny'tjimirra guṉḏany, yurr lanyiŋnha banydjin, ga wäŋany ŋunhi buṉbuny mala ga dhukarrnydja dhika nhäny mala djeŋarra'yinan gan, mel-wiḏi'mirriynha bulayyu dhaṯthurr, miny'tji-wapthurra gan dhärranany, djeŋarran' ŋula nhämiriwnha, lanyiŋnha banydjin, miḻŋ'miḻŋdhurra gan dhärranany.

God-waŋarrwuŋ maŋutji-gurrupanawuy 21:18 Mawu Ofanana

God-waŋarrwuŋ maŋutji-gurrupanawuy 21:19

Ga ḻukuny nhanŋu ŋurikiny ḻoḻuwnydja dhärranharaw gan dhärranany dhaṯthunawuynha wiripuŋuynha wiripuŋuynha guṉḏaynydja, miny'tji-dharrwamirra mirithirra dhika. Yo, ga ŋoyŋurnydja ŋunhi dhuḏiŋurnydja gan guṉḏa dhärran wiripun miny'tji, mulkuminynha, ga yäkuny ŋayi ŋunhiyi djatjpa, ga ŋurikalyi gan gorruŋal wiripu guṉḏa yäku, mulkuminy'thi yan miny'tji, yurr gänan ŋunhiyiny, latjun' dhikan mirithirra. Yurr ŋapa-ŋal'-ŋalmaranhawuynha bala wiripu wiripun ŋunhiyi guṉḏany malany, ga nambany malany ŋunhiyi guṉḏany 12-nha. Ga barrkuwatjnha ŋunhi yäkuny mala guṉḏany, yurr bukmak ŋunhiyi yulŋuny latjun' mirithirra dhika, miny'tji-dharrwamirra.

God-waŋarrwuŋ maŋutji-gurrupanawuy 21:21

Ga ŋunhiliyiny ŋunhi 12-ŋurnydja dhaḻakarrŋur dhurrwaraŋur mala marrtjin gorru'-gurruŋal gulawun malany, yurr ḏilkurra dhika mirithirra. Ga dhukarrnydja malany ŋunhiŋuwuyyi wäŋapuynydja marrtjin ŋorran mel-wiḏi'mirriynha bulayyu, dhukunmiriwnha ŋula nhämiriwnha, ḏarrtjalknha.

God-waŋarrwuŋ maŋutji-gurrupanawuy 4:6

Ga wiripuny ŋunhili bili yan wäŋaŋur gan dhärran balanya nhakun ŋunhi gapun guḻunnha, yurr lanyiŋnha banydjin, garrkuḻuknha mirithirra. Ga ŋunhiliyi gali'ŋurnydja ga gali'ŋurnydja marrtjin dhärra'-dharran ṉapuŋga'yaŋalnydja ŋunhi nhinanhawuynydja ŋula nhaliynha malaŋuy ḏämbumiriwyun walŋamirriynha, yurr maŋutjiny mala walalaŋgal marrtjin ŋunhi dhärra'-dharran dharrwan mirithirra dhika gumurrŋurnydja ga ḏiltjiŋurnydja.