Marcos 13:23 - Emberá Chamí

²³ Kauwa nureásturu. Joma mʉʉba machimaa jarasii makai naed̶e.

Marcos 13:23 Mawu Ofanana

Mateo 24:25

Mau joma mʉʉba machimaa jarasii makai naed̶e.

Mateo 7:15

»Kauwa panásturu. Waabenarãba setad̶eeba Dachi Akõre baita berreabadau abadau. Ãchiba biawãra kĩra jaradeabadau maamina maka panuu ẽbẽrarãba Dachi Akõre bed̶ea ida b̶ud̶amera.

Marcos 13:22

Mau ewarid̶e setaa jarad̶ai ãchi Dachi Akõreba Dachi Karibabarii deai jarad̶a. Maud̶e waabenarãba setad̶eeba jarad̶ai ãchi Dachi Akõre baita berreabadaurã. Maarãba ẽbẽrarãba ne poyaa waud̶akau mechiu waud̶ai ẽbẽrarã setaa kũruad̶ai baita. Dachi Akõreba jʉrʉ adaud̶arã sid̶a poyaa setaa kũruaped̶aad̶a basirã, ãchi sid̶a setaa kũruad̶ai basii.

Marcos 13:24

»Ẽbẽrarã ãrea biꞌiwãe panaped̶aad̶akare ʉmada pãriui. Jed̶ako sid̶a pãriui.

Marcos 13:33

»¡Kauwa nureásturu! ¡Dau kuitaa nureásturu! Machiba chi ewari sakaed̶e neei adua panuu.

Marcos 13:5

Maud̶e Jesusba jarasii: —Kauwa nureásturu ab̶au bid̶a setaa kũruarãad̶amera.

Marcos 13:9

»Kauwa nureásturu. Machi chi jaradea ua b̶uabadaurãmaa jidau eneed̶aped̶a judiorã araa ãbua imibadau ded̶e soaba ped̶ai. Mʉʉd̶e ijãa panuu kakua ãchiba machi chi jaradea ua b̶uabadaurã maud̶e chi reyrã daad̶e adoed̶ai. Maud̶e machiba mʉ ʉ̃rʉbena ãchi daad̶e berread̶ai.

Lucas 21:34

»Kauwa panásturu Dachi Akõred̶e dauchia jãadua panad̶amera. Itua do nibarã́sturu, ne kʉ̃risiawẽa panásturu maud̶e nau kakuaba wau kʉ̃ria b̶uu waurã́sturu. Kauwa nibad̶awẽebʉrã, mau ewari machi ʉ̃rʉ neei, enabe chi ãnimara ʉ̃rʉ b̶aebarii kĩra. Mau ewari jomaurã ʉ̃rʉ maka neei.

Lucas 21:8

Jesusba panausii: —Kauwa nureásturu ab̶au bid̶a setaa kũruarãad̶amera. Ãreaba jarad̶ai: “Mʉ Dachi Akõreba Dachi Karibabarii deai jarad̶a”. Mau awara chi ewari araa bamaa b̶uu ad̶ai. Maamina maarã baara wãrã́sturu.

Juan 14:29

Mʉʉba mau jara b̶uu makai naed̶e, biawãra makaaruud̶e machiba ijãad̶amera.

2 Pedro 3:17

Ãbarã, machiba mau kuitaa panuud̶eeba kauwa panásturu ẽbẽra kachiruarãba biꞌiwãe jaradea panuuba setaa kũruarãad̶amera. Maka machiba ãrea ijãa panuu ida b̶ud̶aabai.