Hebreos 9:28 - Emberá Chamí

²⁸ Ara mau kĩra Cristoba b̶es ab̶a ichi ida beabisii ãreaba kachirua wauped̶aad̶a awara b̶ui baita. Ichi waya neei, maamina dachiba kachirua waubadau awara b̶ui baita neebai. Maumaarã neei ichi esed̶au duanuu karibakuai baita.

Hebreos 9:28 Mawu Ofanana

Mateo 20:28

Ara mau kĩra mʉ, chi Ẽbẽra Ba B̶uad̶a neewẽa b̶uu ẽbẽrarã mʉ baita bari trajabadaurã nuread̶amera. Maumaarã nee b̶uu ẽbẽrarã baita bari trajabarii b̶uai baita. Maka mʉ biui ãrea ẽbẽrarã karibai baita.

Mateo 25:31

»Mʉ, chi Ẽbẽra Ba B̶uad̶a joma angelerã baara kĩrawãrea baraa neeruud̶e, mʉ rey ãkaud̶e akʉ b̶eei, ẽbẽrarã nebʉra bara nuree ai baita.

Mateo 26:28

Nau mʉ oabʉ. Mʉ oa cheeruuba Dachi Akõreba bed̶ea chiwid̶i dearuu ãrea ẽbẽrarãba kachirua wauped̶aad̶a perdonayua.

Juan 14:3

Mʉ mau biꞌia waud̶e wãaruubʉrã, waya neei machi uad̶oi baita mʉ ome nuread̶amera.

Hechos 1:11

Mau ẽbẽraba naka jarasid̶au: —Machi Galilead̶ebena, ¿sakãe bajãad̶aa ichia panuma? Jesús machi baara b̶uad̶a bajãad̶aa wãd̶a waya neei ichi bajãad̶aa wãd̶a kĩra.

Romanos 3:25

Dachi Akõreba Jesucristo b̶usii ichi oa chemera, dachi kachirua kakua. Mau ijãaduud̶e Dachi Akõreba dachi kachirua perdonabarii. Maka unubia b̶uu Dachi Akõre jipa nii, dachi karibai baita. Cristo neei naed̶e kachirua wauped̶aad̶a Dachi Akõreba joma dauchia jãadua b̶uud̶eeba kastikawẽa b̶uasii.

Romanos 5:15

Biawãra ẽbẽra ara ab̶aba kachirua waud̶a kakua joma biusid̶au. Maamina ẽbẽra june ab̶ad̶eeba Dachi Akõreba ichi sõbiad̶eeba chokae b̶uai bari deasii joma chokae nuread̶amera. Jesucristoba ichi sõbiad̶eeba dachi baita waud̶a, chi Adanba kachirua waud̶a audeara bibuara b̶uu. Maud̶eeba chi Dachi Akõreba bari dea b̶uu, Adanba kachirua waud̶a kakua need̶a kĩra b̶uwãema.

Romanos 6:10

Cristo b̶es ab̶a biud̶aba kachirua joma poyaasii. Ichi waya biubai maumaarã Dachi Akõre baita chokae b̶uu.

Romanos 8:23

Maud̶e dachia bid̶a puꞌuaba isa neebii esed̶au panuu, Dachi Akõreba dachi chi kakua biꞌia b̶umera. Ichi warrarã adauruud̶e maka waui. Ichi Jauri dachimaa naed̶e deasii biawãra dachi ichi warrarã kuitaad̶amera.

Romanos 8:3

Moisesba b̶ʉd̶aba dachi kachiruad̶ebena poyaa enabiaibasii. Chi nau kakuaba wau kʉ̃ria b̶uud̶eeba nibabadaurãba mau Moisesba b̶ʉd̶a waud̶ai bad̶amaarã kachirua waubadau. Maamina Dachi Akõreba ichi Warr bʉisii dachi chi kachiruarã kĩra b̶uamera. Maud̶e dachiba kachirua wauped̶aad̶a kakua biusii. Maka chi dachi kakua kachirua wauped̶aad̶a Dachi Akõreba kastikasii.

1 Corintios 1:7

Machiba Dachi Mechiu Jesucristo unud̶ai baita esed̶au panuumisa, Dachi Akõreba ichi Jaurid̶eeba dea b̶uu joma uru panuu.

1 Corintios 15:54

Maka dachi kakua chi b̶eraabarii, chi kakua b̶eraakau b̶eeruud̶e maud̶e nau kakua biui b̶uu chi biukau kakua b̶eeruud̶e, Dachi Akõre bed̶ead̶e b̶ʉ kub̶uu kĩra biawãra b̶uai. Naka b̶ʉ kub̶uu: «Dachi Akõreba dachi biui wãꞌãebisii».

1 Tesalonicenses 1:10

Ãchiba jara panuu saka machiba Dachi Akõre Warr Jesús bajãad̶ebena neei esed̶au panuu. Ara mau Jesús Dachi Akõreba biud̶ad̶ebena chokae jiradubisii. Mauba Dachi Akõreba dachi kastikai bad̶a karibasii.

2 Tesalonicenses 2:1

Mau awara ãbarã, daiba chi chuburia id̶i panuu Dachi Mechiu Jesucristo neei ʉ̃rʉbena maud̶e dachi ichi ome ãbua panad̶ai ʉ̃rʉbena ara makʉd̶e adua panuu kãare kʉ̃risiad̶ayu. Ab̶auba Dachi Mechiuba kastikai ewari neesii aaruubʉrã, perarã́sturu. Barikiuba Dachi Akõre ʉ̃rʉbena berrea b̶uu kĩra maka jaraaruubʉrã, maebʉrã maka jaradearuubʉrã maebʉrã daiba kartad̶e maka b̶ʉped̶aad̶a aaruubʉrã, ijãarã́sturu.

2 Timoteo 4:8

Mʉʉba jipa wau b̶uu baita Dachi Mechiuba mʉ baita boro jũra nu uru b̶uu. Ichiba jipa ichiabariid̶eeba mau boro jũra mʉʉmaa deai ichiba ichiaruud̶e. Maamina ab̶aburu mʉʉmaa deabai, maumaarã joma ichi neei ewari unu kʉ̃ria nureerãmaa deai.

Tito 2:13

Dachi biꞌia panad̶ai ewari esed̶au panuumisa maka panad̶ai panuu. Mau ewarid̶e Dachi Karibabarii Jesucristo neeruud̶e, ichi kĩrawãrea unud̶ai Ichi Dachi Akõre chi mechiud̶eeba.

Hebreos 1:14

Makarã, ¿Angelerã kairãma? Maarã joma Dachi Akõre baita nureed̶eeba, ãchi bʉikabarii chi ichiba karibai b̶uurã aid̶ad̶amera.

Hebreos 10:10

Dachi Akõreba kʉ̃ria b̶uu Jesucristoba joma wausii. Ara ichi ida beabisii. B̶es ab̶a maka waud̶aba dachi ewaricha Dachi Akõre baita biꞌia b̶usii.

Hebreos 12:14

Jomaurã ome jirukaraayuwãe nureásturu. Maud̶e Dachi Mechiu baita biꞌia panásturu. Dachi Mechiu baita biꞌia nureewãed̶eeba ichi poyaa unud̶aabai.

Hebreos 2:3

Ara mau kĩra Dachi Akõreba karibai ʉ̃rʉbena bed̶ea dachiba ida b̶uuduubʉrã, ¿Dachi Akõreba kastikaid̶ebena dachirã saka karibad̶aima? Mau bed̶ea ãrea biꞌia b̶uu Dachi Mechiu Jesusba naed̶e jaradeasii. Chi ũriped̶aad̶aba dachimaa mau bed̶ea biawãra abachid̶au.

Hebreos 4:15

Jesús dachi Paare Mechiuba kuitaa b̶uu dachi meserãaswãe nuree. Jʉbawãe niiba mau kachiruad̶e b̶aebii chaa b̶uasii dachi kachiruad̶e b̶aebii chaa b̶uabarii kĩra. Makasmina Jesusba kachirua waubasii.

Hebreos 5:9

Ne jomad̶e biꞌia wausiid̶eeba, joma chi ũribaba ũriiduu poyaa karibai b̶uu ewaricha chokae nuread̶amera.

Hebreos 7:27

Ichiba waukau waabenarã paare mechiurãba ewaricha waubadau kĩra. Maarãba ara ãchiba kachirua wauped̶aad̶a kakua naa Dachi Akõremaa ãnimara baa deabachid̶au. Maad̶akare waabena ãnimara baa deabachid̶au waabenarã ẽbẽrarãba kachirua wauped̶aad̶a kakua. Maamina Jesusba ãnimara baa dearuu kĩra ara ichi ida beabisii ẽbẽrarãba kachirua waubadau kakua. B̶es ab̶a maka waud̶aba kachirua joma jeraasii.

Hebreos 9:25

Ichi bajãad̶aa wãabasii, ichi oa b̶es ãrea jĩtod̶okai baita nau iujãad̶ebena paare mechiuba añocha Dachi Akõre baita biꞌia b̶uu piezad̶e waubarii kĩra.

1 Pedro 2:24

Cristoba dachi kachirua ichi ʉ̃rʉ cruzd̶e adoesii dachi kachiruad̶ebena biud̶aped̶a jipa nuread̶amera. Ichi kakua puꞌuasid̶aud̶eeba machi biꞌia paneesid̶au.

1 Pedro 3:18

Cristo jipa b̶umina kachirua kakua b̶es ab̶a biꞌiwãe b̶uasii. Mauba dachi chi jipawãe nuree Dachi Akõre ome biꞌia b̶usii. Ichi beasid̶au, maamina Dachi Akõre Jaurid̶eeba chokae jiradusii.

2 Pedro 3:12

Dachi Akõreba kastikai ewari esed̶au panuumisa Dachi Akõreba kʉ̃ria b̶uu wau panásturu mau ewari isa bamera. Mau ewarid̶e Dachi Akõreba bajãa baai. Ne joma dachiba bajãad̶e unubadau maud̶e nau iujãad̶e unubadau wãsiaba dorrab̶arii.

1 Juan 3:2

Ãbarã, dachi Dachi Akõre warrarãbʉ. Dachi Akõreba wabid̶a unubiawẽa b̶uu dachi saka nuread̶ai. Maamina kuitaa panuu Cristo neeruud̶e ichi kĩra nuread̶ai, mau ewarid̶e ichi saka nii unud̶aid̶eeba.

1 Juan 3:5

Maamina machiba kuitaa panuu Jesucristo nau iujãad̶aa neesii dachi kachirua awara b̶ui baita. Ichi chi kachirua b̶aꞌãra bid̶a wãꞌãe nii.

Judas 1:21

Dachi Akõre kʉ̃riad̶eeba nibásturu. Dachi Mechiu Jesucristoba kĩra chuburia b̶uud̶eeba ewaricha chokae nibabiad̶ai esed̶au panásturu.

Apocalipsis 1:7

Ichiásturu. Cristo jʉ̃rʉarad̶e neei. Maud̶e jomaurãba unud̶ai. Ichi suped̶aad̶a bid̶a unud̶ai. Ichi unuuduud̶e joma nau iujãad̶ebena jẽad̶ai. Biawãra maka b̶uai.