1 Tesalonicenses 2:16 - Emberá Chamí

¹⁶ Dachi Akõreba karibamera daiba judiowãerãmaa jaradea kʉ̃ria panuud̶e, maarãba daiba jaradead̶ai ida kabid̶aabasii. Maka aude kachirua wau panuud̶eeba Dachi Akõreba ichi oa kachiruad̶eeba maarã ãrea kastikai.

1 Tesalonicenses 2:16 Mawu Ofanana

Mateo 12:45

Maabae 7 jai kachiruarã ichi audeara kachirua b̶ee mau ẽbẽramaa eneeped̶a chi ẽbẽra sõd̶e ed̶a panad̶e wãbadau. Maud̶eeba chi ẽbẽra chi naa b̶uad̶a audeara kachirua b̶eebarii. Ara mau kĩra chi mʉʉd̶e ijãad̶awãe panuu baita machi, chi id̶ibaebenarã kachiruarã baraa aude kachiruad̶e paneed̶ai».

Mateo 23:32

¡Maud̶eeba machi nabẽraed̶ebenarãba kachirua wauped̶aad̶awãe, mau joma wáusturu!

Mateo 24:14

Maud̶e chi bed̶ea bia Dachi Akõreba ichid̶irã ichi juad̶e ua b̶uu ʉ̃rʉbena joma nau druad̶e jaradead̶ai puurucha ũrid̶amera. Mau maad̶akare nau ewari baribai.

Mateo 24:6

Puuru ab̶a ab̶au puuru ome chĩobika nub̶uu ũriiduud̶e maud̶e makad̶ai ʉ̃rʉbena ũriiduud̶e, wapearã́sturu. Mau joma makai b̶uu. Maamina nau ewari wabid̶a neebai.

Mateo 3:12

Ichi juad̶e uru b̶uuba chi trigo ʉtaa jirakuabarii chi jãra ãyaa jãripuabii baita. Maabae chi trigo taa jãripuaped̶aad̶a chi pebariimarẽ pe nub̶ui maamina chi jãra tʉbʉchia kiikaud̶e baai».

Marcos 16:16

Mau bed̶ea ijãaduubʉrã maud̶e boro eaduubʉrã Dachi Akõreba mau karibai. Maamina chi mau bed̶ea ijãawẽe ichiba mau kastikai.

Hechos 13:45

Maamina chi judiorã karrarãba ẽbẽrarã ãrea ãchi ded̶e unusid̶aud̶e Pablo kakua sõd̶e jiwaa duaneesid̶au. Pabloba jaradea b̶uud̶e ãchiba seta abachid̶au maud̶e Pablo ʉ̃rʉbena kachirua berreabachid̶au.

Hechos 13:50

Maamina judiorãba Dachi Akõre wapea nuree wẽrarã chi mechiurãmaa maud̶e mukĩra chi mechiurãmaa jarasid̶au Pablo maud̶e Bernabé kachirua waud̶amera. Maka ãchi puurud̶ebena duabʉisid̶au.

Hechos 14:19

Listrad̶e panuud̶e waabenarã judiorã Antioquía puurud̶ebena maud̶e Iconio puurud̶ebena neesid̶au. Ãchiba Listrad̶ebenarãmaa Pablo ʉ̃rʉbena kachirua kʉ̃risiabiasid̶au. Maud̶eeba jomaurãba Pablo mooba b̶atasid̶au. Ichi biusii kʉ̃risiasid̶aud̶eeba puuru awara erta adoesid̶au.

Hechos 14:2

Maamina judiorã Jesús ijãad̶akaurãba judiowãerãmaa chi ãbarã ʉ̃rʉbena kachirua kʉ̃risiabiasid̶au.

Hechos 14:5

Judiorã maud̶e judiowãerã chi puurud̶ebena karrarã ome bed̶ea deasid̶au Pablo maud̶e Bernabé puꞌuabiad̶aped̶a mooba b̶ata bead̶ai baita.

Hechos 17:13

Maumisa judiorã Tesalónica puurud̶ebenarãba kuitaasid̶au Pabloba Dachi Akõre bed̶ea Berea puurud̶e jaradea b̶uu. Maud̶eeba araa wãsid̶aud̶e arabenarã kĩrubikabiasid̶au kachirua waud̶amera.

Hechos 19:9

Maamina waabenarã sõ chaareakuad̶aped̶a ijãad̶aabasii. Ẽbẽrarã daad̶e Jesús chi O ʉ̃rʉbena kachirua berreabachid̶au. Maud̶eeba Pablo jãmabena ãyaa wãsii. Ichiba chi ijãabadaurã jaradeabadau deed̶aa adoesii. Mau de Tiranod̶e basii. Aria ewaricha jaradeabachii.

Hechos 21:21

Maamina bichi ʉ̃rʉbena setaa ũrisid̶au. Waabenarãba ãchimaa jarasid̶au bichiba joma judiorã griego tãed̶e nureerãmaa Moisés ida b̶ubi b̶uu, ãchi warrarã mukĩra chi kakua tõobiakau maud̶e waabena dachi judiorãba waubadau sid̶a waubiakau.

Hechos 23:12

Norema chi nuree judiorãba bed̶ea deasid̶au Pablo bead̶ai baita. Mau ẽbẽrarãba biawãrad̶eeba berreasid̶au kod̶aabai maud̶e bania dod̶aabai Pablo beaduud̶aa.

Hechos 24:9

Judiorã aria panuu bid̶a joma mau bed̶ea biawãra asid̶au.

Hechos 25:2

Aria paare mechiurã maud̶e judiorã mechiurãba Festomaa Pablo jideasid̶au.

Hechos 25:7

Pablo adoesid̶aud̶e judiorã Jerusalend̶ebena neeped̶aad̶aba ichi ad̶u jũrasid̶au. Maud̶e ichi jideasid̶au maamina poyaa kuitaabiad̶aabasii chi ãchiba jara panuu biawãra b̶uu.

Hechos 4:12

Maud̶eeba Jesucristod̶éburu ijãaduubʉrã, Dachi Akõreba dachi kastikaabai dachiba kachirua wauped̶aad̶a kakua. Ichi awara, Dachi Akõreba ab̶a bid̶a nau iujãad̶e b̶uubasii ẽbẽrarã karibamera.

Hechos 9:23

Ewari aribia baaruud̶e judiorã Damasco puurud̶ebenarãba Saulo bead̶ai baita bed̶ea deasid̶au.

1 Corintios 10:33

Ara mau kĩra mʉʉba wau b̶uud̶eeba jomaurãmaa biꞌia kʉ̃risiabiai kʉ̃ria b̶uu. Ab̶aburu mʉ biꞌia b̶uai baita jʉrʉkau, maumaarã ẽbẽrarã ãrea biꞌia nuread̶amera jʉrʉbarii. Maka mʉʉba wau b̶uud̶eeba ãchiba Cristod̶e ijãad̶ai Dachi Akõreba karibamera.

Gálatas 5:11

Ãbarã, mukĩra chi kakua tõod̶ai panuu mʉʉba wabid̶a jaradea b̶uad̶a basirã, chi maka jaradea nureerãba mʉ kachirua waud̶ai baita wãraad̶aabai basii. Mʉʉba maka jaradea b̶uad̶a basirã ãchiba Jesús cruzd̶e biud̶a ʉ̃rʉbena kachirua kʉ̃risiad̶aabai basii.

Efesios 3:13

Maud̶eeba mʉʉba machimaa naka chi chuburia id̶iiruu: mʉ machi kakua nama naka biꞌiwãe b̶umina ãrea jirukaraarã́sturu. Maka ãrea biꞌiwãe b̶uu machi Dachi Akõre ome biꞌia nuread̶amera.

Efesios 3:8

Joma ẽbẽrarã Dachi Akõred̶erã tãed̶e mʉ kaebeu nimina, ichi sõbiad̶eeba mʉ b̶usii judiowãerãmaa Cristo ʉ̃rʉbena ne bia chi wãꞌãekau jaradead̶e wãmera.

1 Tesalonicenses 1:10

Ãchiba jara panuu saka machiba Dachi Akõre Warr Jesús bajãad̶ebena neei esed̶au panuu. Ara mau Jesús Dachi Akõreba biud̶ad̶ebena chokae jiradubisii. Mauba Dachi Akõreba dachi kastikai bad̶a karibasii.

2 Tesalonicenses 2:10

Ne barikiu kachirua wau b̶uud̶eeba ẽbẽrarã tʉbʉ aokod̶e ãrea biꞌiwãe panad̶ai panuu, mauba setaa kũrai. Ãchiba chi biawãra bed̶ea kʉ̃riad̶akaud̶eeba Dachi Akõreba karibaabai.

1 Timoteo 2:4

Ichiba kʉ̃ria b̶uu jomaurãba chi biawãra bed̶ea kuitaaped̶aad̶a kachiruad̶ebena karibad̶ai.

Hebreos 6:8

Maamina kui ched̶akare ʉri tonooruubʉrã maud̶e sirua kachirua tonooruubʉrã, mau ioro biꞌiwãe b̶uu. Dachi Akõreba mau iujãa ʉ̃rʉbena kachirua jaraped̶a joma baabʉʉi.

Apocalipsis 22:11

Chi kachirua wau b̶uu ida b̶use waya kachirua wau b̶uamera. Chi ne joma Dachi Akõreba kʉ̃riakau wau b̶uu ida b̶use ichi kuitaa ne joma chi Dachi Akõreba kʉ̃riakau wau b̶uamera. Maamina chi jipa wau b̶uu chi ewaricha jipa wau b̶uai b̶uu. Maud̶e chi Dachi Akõre baita biꞌia b̶uu ewaricha Dachi Akõre baita biꞌia b̶uai b̶uu.