1 Corintios 12:10 - Emberá Chamí

¹⁰ Maud̶e Dachi Akõre Jauriba chi nureemaa dea b̶uu ẽbẽrarãba ne poyaa waud̶akau poyaa waud̶amera. Chi nureemaa dea b̶uu poyaa Dachi Akõre baita berread̶amera. Chi nureemaa dea b̶uu poyaa kuitaad̶amera ab̶auba Dachi Akõre Jaurid̶eeba berrea b̶uu maebʉrã jai kachiruad̶eeba berrea b̶uu. Maud̶e chi nureemaa dea b̶uu dachiba ũrid̶akau chi bed̶ea didiwaraa berread̶amera. Maud̶e chi nureemaa dea b̶uu dachiba kauwa ũrid̶akau bed̶ead̶e jarad̶a kuitaa jarad̶amera.

1 Corintios 12:10 Mawu Ofanana

Marcos 16:17

Chi mʉʉd̶e ijãa nureeba nau ẽbẽrarãba ne poyaa waud̶akau waud̶ai: mʉ trʉ̃d̶eeba jai kachiruarã duabʉid̶ai maud̶e bed̶ea wid̶id̶e berread̶ai.

Marcos 16:20

Maabae chi Jesús baara nibabadaurãba ichi bed̶ea ãchi wãaduumaacha jarasid̶au. Dachi Mechiuba ãchi aid̶abachii. Ẽbẽrarãba poyaa ne waud̶akau waubi b̶uud̶eeba kuitaabiabachii ãchiba jara panuu biawãra b̶uu.

Lucas 24:49

Biawãra mʉʉba machimaa mʉ Chachaba ichi Jauri deai jarad̶a bʉi. Maud̶eeba machi nama Jerusalend̶e panásturu ab̶a ichi bajãad̶ebena poyaabarii adauduud̶aa.

Juan 14:12

Mʉʉba biawãra jaraaruu: barikiuba mʉʉd̶e ijãa b̶uubʉrã, mʉʉba wau b̶uu ichiba waui. Biawãra mʉʉba wau b̶uu audeara ichiba waui, mʉ, mʉ Chachamaa b̶uad̶e wãid̶eeba.

Juan 16:13

Maamina Dachi Akõre Jauriba biawãra bed̶ea kuitaabiabariid̶eeba ichi neeruud̶e machimaa jaradeai chi biawãra bed̶ea Dachi Akõred̶eeba nee b̶uu joma kuitaad̶amera. Ara ichi kʉ̃risiad̶eeba berreabai, maumaarã joma mʉʉd̶ebena ũriiruu jarai. Ichiba machimaa kuitaabiai chi neei ewarid̶e kãare sakai.

Hechos 1:8

Maamina Dachi Akõre Jauri machi baara b̶uad̶e neeruud̶e machiba ichi poyaabarii adaud̶ai. Mauba machiba Jerusalend̶e, joma Judea druad̶e, Samaria druad̶e maud̶e drua kaitawẽ nureed̶e mʉ ʉ̃rʉbena berread̶ai.

Hechos 11:27

Mau ewarid̶e Dachi Akõre baita berreabadaurã Jerusalend̶ebena Antioquiad̶aa wãsid̶au.

Hechos 11:28

Ab̶a Agabo abadau ʉkʉ nub̶eeped̶a Dachi Akõre Jaurid̶eeba jarasii joma nau druad̶e jarrba waud̶ai neei. Mau jarrba biawãra neesii Claudio Romad̶ebena chi aude mechiu basiid̶e.

Hechos 19:6

Maabae Pabloba ichi jua ãchi ʉ̃rʉ kub̶usiid̶e Dachi Akõre Jauri ãchimaa neesii. Maud̶e bed̶ea didiwaraad̶e berreasid̶au maud̶e Dachi Akõre baita berreasid̶au.

Hechos 5:3

Pedroba jarasii: —Ananías, ¿Sakãe Satanasba waubi b̶uu kĩra wausma? Bichiba Dachi Akõre Jaurimaa setaa jaraaruu. Bichi drua nedobʉid̶ad̶ebena chi nejarr b̶aꞌãra uru b̶eeruu.

Romanos 12:6

Dachi Akõreba ichi sõbiad̶eeba dachicha ne waud̶amera aꞌawaraa deasii. Ichiba chi nureerãmaa deasii ichi baita berread̶amera. Maka dead̶akasiibʉrã, ãchiba biawãra ijãa panuud̶eeba maka berread̶ai panuu.

Romanos 15:19

maud̶e ẽbẽrarãba ne poyaa waud̶akau wau b̶uud̶eeba maka aid̶asii. Mʉʉba Dachi Akõre Jauri poyaad̶eeba joma mau wausii. Jerusalend̶ebena Ilírico druad̶aa bed̶ea bia Cristo ʉ̃rʉbena mʉʉba joma jaradeai b̶uad̶amaa jaradeasii.

1 Corintios 11:4

Ãbarã araa ãbua imiiduud̶e chi mukĩra ichi borod̶e ne jʉ̃ped̶a Dachi Akõremaa ʉtaa id̶iiruubʉrã maebʉrã Dachi Akõre baita berrearuubʉrã, ichi chibari Cristo wapeawẽa nii unubi b̶uu.

1 Corintios 13:8

Ẽbẽrarã kʉ̃riai wãꞌãekau. Maamina ewari ab̶a Dachi Akõre baita berreabadau waa berread̶aabai, dachiba ũrid̶akau bed̶ead̶e berreabadau waa berread̶aabai, Dachi Akõre Jaurid̶eeba kuitaaped̶aad̶a jaradeabadaurãba waa jaradead̶aabai.

1 Corintios 14:13

Maud̶eeba chi dachiba ũrid̶akau bed̶ead̶e berrea b̶uuba Dachi Akõremaa ʉtaa id̶i b̶uu ara ichiba jarad̶a poyaa kuitaa jaraaruu baita.

1 Corintios 14:39

Maka ãbarã, biꞌia jʉrʉ́sturu Dachi Akõre baita berread̶ayu. Maud̶e dachiba ũrid̶akau bed̶ead̶e berreabadaurã ida berreabiásturu.

Gálatas 3:5

Dachi Akõreba ichi Jauri machimaa deasii awara, ẽbẽrarãba ne poyaa waud̶akau machi tãed̶e wau b̶uu. ¿Chi Moisesba b̶ʉd̶a machiba wau panasiid̶eeba maka wau b̶uka? ¿Maka wauwẽka chi bed̶ea bia Cristo ʉ̃rʉbena ũrid̶aped̶a ijãasid̶aud̶eeba?

1 Tesalonicenses 5:20

Dachi Akõre baita berreabariiba jara b̶uu ida b̶urã́sturu.

Hebreos 2:4

Mau awara Dachi Akõreba ẽbẽrarãba ne poyaa waud̶akau mechiu aꞌawaraa waubiasii. Ichiba kʉ̃ria b̶uad̶a kĩra ichi Jauriba waubi b̶uu ichid̶irãcha dead̶akasii. Joma maud̶eeba kuitaabiasii mau bed̶ea biawãrabʉ.

1 Juan 4:1

Ãbarã, barikiurãba Dachi Akõre Jaurid̶eeba berrea panuu abadaurã ijãarã́sturu, maumaarã kauwa ichiásturu ãchiba biawãra Dachi Akõre Jaurid̶eeba maebʉrã waabenarãd̶eeba berrea panuu kuitaad̶ai baita. Mau makásturu ãreaba nau iujãad̶e setad̶eeba ãchiba Dachi Akõre Jaurid̶eeba berrea panuu abadaud̶eeba.

Apocalipsis 2:2

»Mʉʉba machiba wau panuu kuitaa b̶uu. Mʉ baita ãrea traja panuu maud̶e ãrea biꞌiwãe panuud̶e joma dauchia jãadua panuu kuitaa b̶uu. Machiba chi kachirua waubadaurãmaa ida kabid̶akau kuitaa b̶uu. Chi nuree machimaa wãd̶aped̶a maabae Jesucristoba bʉid̶arã abachid̶au. Maamina machiba kauwa ichia panuud̶eeba kuitaasid̶au maarã chi seta nuree.