12 Мийӧ тіянӧс туйдӧтім, ӧзйӧтім, кеймисьӧмӧн корим овны сідз, кыдз колӧ Енлӧ. Сія тіянӧс корӧ эд Аслас Юраланінӧ да югьяланінӧ.
Мийӧ тӧдамӧ: Енсӧ радейтіссеслӧ, Сылӧн висьталӧм сьӧрті корӧммеслӧ, оланын быдӧс керсьӧ бур вылӧ.
Кинӧс Еныс бӧрйис, нійӧ и корис. Кӧднӧ корис, нійӧ и керис Сы сьӧрті веськыта оліссезӧн. Кӧднӧ керис Сы сьӧрті веськыта оліссезӧн, нылӧ сетіс Ассис югьялӧмсӧ.
Еныс надейнӧй, Сія корис тіянӧс ӧтлаасьны Аслас Зонкӧт ─ миян Дӧсвидзись Кристос Исускӧт.
Еныс эд тшӧктӧм югйӧвтны пемытінас югытыслӧ. Сія югдӧтіс миянлісь сьӧлӧммезнымӧс, медбы мийӧ Кристос Исус чужӧмын адззим Енлісь югьялӧмсӧ.
Ме тіянлӧ висьтала: олӧ Енлӧн Лов сьӧрті. Сэк тійӧ одӧ пондӧ керны вывтырныт ӧзйӧтчӧм сьӧрті.
Ме, Дӧсвидзись понда пукалісь, кеймися тіянлӧ: олӧ сідз, кыдз колӧ овны Енлӧн корӧммезлӧ.
Олӧ ӧтамӧднытӧ радейтӧмӧн, кыдз и Кристосыс радейтӧ миянӧс. Сія эд миян понда сетіс Асьсӧ Еныслӧ чӧскыт руа езъялан козин туйӧ.
Тійӧ одзжык вӧліт пемытӧн, а ӧні Дӧсвидзиськӧт ӧтлаасьӧмсянь тійӧ лоитӧ югытӧн. Ӧні олӧ сідз, кыдз колӧ овны югытлӧн челядьлӧ.
Мый бы эз вӧв, лоӧ Кристослӧ туяна отирӧн, олӧ Сы Бур Юӧр сьӧрті. Локта тіян дынӧ, ог я лок, адззыла тіянӧс, ог я ─ ась ме кыла тіян йылісь бурсӧ: тійӧ пӧ ӧтлаын, ӧтік сьӧлӧмӧн кутчисит дорйыны Бур Юӧрсӧ да ассиныт веритӧмнытӧ
Мийӧ кеймам, медбы тіян оланныт вайис Енлӧ ошкӧм и быдӧс керит Сы сьӧрті. Кеймам, медбы бурсӧ керӧмнаныт вайит воӧм да буржыка пондіт тӧдны Енсӧ.
Тійӧ Дӧсвидзись Кристос Исуссӧ босьтіт сьӧлӧманыт. Сідзкӧ, сідз и одзлань олӧ Сыкӧт ӧтлаасьӧмӧн.
Воннэзӧ, миянсянь тійӧ тӧдат, кыдз колӧ овны Ен сьӧрті. Тійӧ сідз и олат. Но корам тіянӧс и кеймисям Кристос Исус нимӧн: вынсьӧтчӧ эшӧ буржыка овны Еныс сьӧрті.
Сэк Енлӧ вериттӧм отирыс пондасӧ бурӧ пуктыны тіянӧс, да и тіян быдӧс лоас тырмӧмви.
Тіянӧс Корисьыс надейнӧй. Сія висьталӧмыс сьӧрті и керас.
Эта лоас Дӧсвидзисьлӧн локтан Лунӧ. Сэк Сылӧн быдӧс вежа отирыс пондасӧ ошкыны Сійӧ. Веритіссес быдӧнныс пондасӧ дивуйтчыны Сы одзын. И тійӧ лоат ны коласын, тійӧ эд веритіт миян висьтасьӧмӧ.
Сія миянӧс мездіс, корис овны вежа олӧмӧн. Эз кор миянӧс бурсӧ керӧмным понда, корис Аслас шуӧм сьӧрті да бурсетӧмнас, кӧда вӧлі козьналӧм миянлӧ Кристос Исус пыр эшӧ быдӧс аркмӧтӧмӧдз.
А тійӧ Енлӧн бӧрйӧм увтыр, Ӧксулӧн вежауджаліссез. Еныс босьтіс тіянӧс Аслас вежа отирӧн. Сія тіянӧс пемытсис корис адззывлытӧм югытас. Тійӧ ӧні сувтӧтӧмӧсь висьтасьны Сылісь бурся-бур керӧмсӧ.
Умӧльыс понда умӧльнас эд вештісьӧ. Тіянӧс видасӧ кӧ, эд видчӧ, а бласлӧвитӧ. Тійӧ эд сідз керны корӧмӧсь. Сэк и тіянлӧ Еныс сетас лӧсьӧтӧм пайсӧ ─ бласлӧвитӧмсӧ.
Тійӧ ӧні мыйкӧ дырна пессят-мырсят. Но быдӧс бурсетӧмыс локтӧ Енсянь. Сія тіянӧс Кристос Исусыс пыр корис Аслас пырся югьяланінӧ. Ӧні Сія Ачыс керас тіянӧс быдсӧн бурресӧн, лэбтас да вынсьӧтас, велӧтас чорыта видзсьыны.
Кристослӧн Ен выныс козьналіс быдӧс коланасӧ, медбы миянлӧ овны да Енлӧ юрбитны. Мийӧ эд тӧдмалім Сійӧ, Кӧда корис миянӧс Аслас югьялӧмӧн да бурсӧ керӧмӧн.
Кин баитӧ, ме пӧ Сыкӧт ӧтлааси, мортыслӧ сэк и овны колӧ Кристосыс моз.
Вичкуын Кристос отир одзын нія висьтасисӧ тэнат радейтӧм йылісь. Бур лоас, тэ кӧ кольлалан нійӧ, кыдз колӧ Енлӧ.