Yòwanìrzɛ̀ 14:6 - Mokpwe: Bakwery (New Testament)

⁶ Yerzù rzìi a alàhwɛ̀ nanù ema, “Imba ndi na hwèlì e njiya ema e ɛndɛ òma Tatɛ̀ wa ami, e jɔ̀kɛ̀ e uwɛ̀lɛ̀lɛ̀yi ndi na imba, imba hvɛ ndi na ŋgbà lòŋgɛ. Tɔ̀ mòtò tɔ̀ mɔ̀kɔ a rza tànɛyi lì jà òma Tatɛ̀ wa ami ema a rza akelɛ na imba.”

Yòwanìrzɛ̀ 14:6 Mawu Ofanana

Matiyò 11:27

“Tatɛ̀ wa ami a nò ŋgbelì hweyà hwe arzɛ ò màà mà ami. Tɔ̀ mòtò a rza hwi a hwiya e ŋmanà lì aka tɛ Lohwɛ̀ e Tatɛ̀. O rza enje hvɛ tɔ̀ mòtò ema a hwi a hwiya nɛ e Tatɛ̀ yɔ hvɛ e hwèlì lì aka tɛ e ŋmanà na tɔ̀ ima mòtò ema e ŋmanà a ò lìŋgànɛ ò lì mò uŋmɛ̀lɛ̀.

Yòwanìrzɛ̀ 1:14

Eyà è mà jà mòtò wà hwènàmà, rzi è lìya nà irzɔ. Ì mà ɛnɛ èluhwe yà eni ema Tatɛ̀ wà eni à mà mò ŋgbèe nàa ehvòwà yà eni yà ŋmanà. À mà ònda ndèli rzi à jò wùlùhweyà è jɔ̀kɛ̀ lì hvòmɛ̀nɛ̀ Lohwɛ̀.

Yòwanìrzɛ̀ 1:17

Lohwɛ̀ à mà ŋgbà è mbenda lì akeyà nà Mòrzè ndi è ndèli nà è jɔ̀kɛ̀ è mà jà ndi lì akeyà nà Yerzù Krirztò.

Yòwanìrzɛ̀ 1:4

Lòŋgɛ la arzɛ lì ma uhwɛlɛlɛ ndi ò eyà. À ma òhva lòŋgɛ rzi lìŋgi lòŋgɛ hvɛ lì mà jàneya hwatò ŋmàye.

Yòwanìrzɛ̀ 10:28

Nà ŋgbà mɛ̀ɛlɛ̀ŋgù me ami lòŋgɛ là gbìndèyà, ò èŋgànɛ̀lɛ̀ me rza ŋwa tɔ̀ wùnyà. Tɔ̀ mòtò arza tànɛyi lì nò hvùmana e meyɔ ò lìya la ami.

Yòwanìrzɛ̀ 10:7

O èŋgànɛ̀lɛ̀ Yerzù à mà òhwà hvɛ nanù ema, “Nà e òhweyà ndi e jɔ̀kɛ̀, imba ndi na hwèlì lìyòhva là è ndawò yà mɛ̀lɛ̀ŋgù.

Yòwanìrzɛ̀ 10:9

Nà e jɔ̀kɛ̀ imba ndi na hwèlì lìyòhva. Mòtò a nò akelì tɛ imba ò lì kpèeyà, a rzùŋgàhwà. Mɔ̀ a òhva wònja lì kpèeyà na lì wurza, a lùwa tɔ̀ ima lìtumba la eyà ema a arza.

Yòwanìrzɛ̀ 14:19

O rza wòwa hvònda hvɛ, e rze e rza ò nò ɛnɛ hvɛ. Ndi inyɔ e nò ɛnɛ. Èhwanja na hwèlì lòŋgɛ, inyɔ hvɛ e ò hwɛ lòŋgɛ.

Yòwanìrzɛ̀ 15:1

“Imba ndi na hwèlì gbèe wò hwehvùma wò jɔ̀kɛ̀, rzìi Tatà wa ami ndi à hwèlì e mògbèèlì hwa hvaya.

Yòwanìrzɛ̀ 18:37

Pìlatò rzi a mò ijòwà nanù ema, “O hwèlì ndi Kiŋgɛ rzɔ e?” Yerzù rzi a mò alàhwɛ̀ nanù ema, “O wa ndi òhwi nanù ema na hwèlì ndi Kiŋgɛ. Lìtiŋga ema na ŋyaahwɛlɛyi na lì jàa anu rze lì hwèlì ndi ò lì tɛ̀mɛ̀ e mbòŋgi ya jɔ̀kɛ̀. Tɔ̀ ima mòtò ema a hwèlì ndì wa jɔ̀kɛ̀ a nò òkànèyà.”

Yòwanìrzɛ̀ 5:21

Nà òma Tatɛ̀ a hvùmùlɛ̀ e wɔ̀ ema hwa ŋwelì lì hwa ŋgba lòŋgɛ, nanù mɛnɛ hvɛ ndi è Ŋmanà wà eni a gba lòŋgɛ ò hwatò ema mɔ̀ à lìŋgàni.

Yòwanìrzɛ̀ 6:33

Èhwanja imba ndi nà hwèlì eŋge èhvòòtò ema Lohwɛ̀ à ŋgba, ema è uhwɛlɛlɛ ò ŋmanyu yà lohwà, ema è ŋgba hwatò hwa ene rze lòŋgɛ.”

Yòwanìrzɛ̀ 6:51

Imba ndi nà hwèlì èhvòòtò ema è ŋgba lòŋgɛ ema è uwɛ̀lɛ̀lɛ̀yi ò ŋmanyu yà Lohwà. Tɔ̀ njɛnɛ à lelì ene èhvòòtò, à hwɛnɛ lòŋgɛ ema lì rza kùwa. Ndèŋgànɛ̀lɛ̀ ene èhvòòtò ema nà è ŋgba è hwèlì ndi è nyò yà ami ema nà ò ŋgba ò lì rzùŋga lòŋgɛ là ene rze.”

Yòwanìrzɛ̀ 6:57

Tatɛ̀ ema a gbèyi ema hwatò hwa hwɛ lòŋgɛ mɔ̀ ndi hvɛ a na òmi, mɔ̀ ndi hvɛ a gbèyi ema na hwèlì lòŋgɛ. Nànù ndi e hwèlì na tɔ̀ njɛnɛ hvɛ ema a lelì e nyò ya ami na mò gbeyà a hwɛ lòŋgɛ.

Yòwanìrzɛ̀ 6:68

Rzimɔ̀ni Pètrò rzi a timbirzɛlɛlɛ ama, “Rzàŋgò e, òma njɛnɛ irzɔ jɛ̀ɛ ɛ̀ndɛ e? O wa ndi òhvi e mbɔrzi ema e ŋgbà lòŋgɛ la gbìndèyà.

Yòwanìrzɛ̀ 8:32

Àŋga nanù e hwiya e jɔ̀kɛ̀, ndèŋgànɛ̀lɛ̀ èŋge jɔ̀kɛ̀ yɔ ndì ye ŋgba wònjà.”

Yòwanìrzɛ̀ 8:51

Nà e òhweyà e jɔ̀kɛ̀ ema tɔ̀ ima mòtò ema a ika i mbenda ja ami, mɔ̀ à rza ɛnɛ e kpelì.”

Hwègbèèlì 3:15

O eŋgànɛ̀lɛ̀ rzɔ inyɔ e ma gbeyà e mòtò ema a jànà hwatò lòŋgɛ la jɔ̀kɛ̀ à mà òŋwahwa ndi Lohwɛ̀ à mà mò hvùmùlɛ̀ ò kpelì. Irzɔ hwiti i ma ɛnɛnɛ hweŋge hweyà na mìirzɔ̀ ma arzu.

Hwègbèèlì 4:12

“Lì òŋgirzɛhwɛ lì rza uwɛ̀lɛ̀lɛ̀yi na ohvɛhvɛ mòtò lì aka tɛ Yerzù, èhwanja ò rza enje tɔ̀ lì hvɛhvɛ lìnà ò tenì ya ene rze ema Lohwɛ̀ à mà ŋgbe hwatò hwa hwènàmà ema lì àŋgàmɛ̀nɛyi lì jò rzùŋgà.”

Hwègbèèlì 9:2

Rzìi à mò ijòwa ama à mò ŋgbe itita, ò lì ŋgba hwàtìmbèlì hwa è ndawò yà màkànɛ̀ ema è hwèlì ò mbòwa yà Dàmàrzkɔ̀rzì. Aŋga nanù, à hwɛnɛ è wònja nanù ema à ɛni tɛ tɔ̀ ima mòtò ema à nɔ̀ŋgɔ è njiya yà ama Yerzù aŋga mɔ̀ à hwa ŋgbaŋgɛ, tɔ̀ hwa hwɛ ndi wunyanà tɔ̀ hwalanà, à hwa ɛ̀ndɛ̀nɛ̀ ò mbòwa yà Jèrurzalɛ̀mù.

Ròmànì 15:16

Lohwɛ̀ à mà nò ŋgba e ndèli ya eni ò lì hwɛ e mògbèèlì wa ama Yerzù Krirztò, ò lì òhweyà hwatò ema hwa rza enje wònyà Yudà, ŋmɛ̀ndì mò gbamù. Nà gbèeyà ndi ene èwòlò nàa pìlìrzì ò lì òhwa Ŋmɛ̀ndì mò Gbamù ema mò uwɛ̀lɛ̀lɛ̀yi ò ma Lohwɛ̀, aŋga nanù hwatò ema hwa rza enje wònyà Yudà hwa ò hwɛ ndi nàa jàhwèyà ema nà mà ŋgbɛ ema je imayɛnɛhwɛ na Lohwɛ̀. Lohwɛ̀ a ò hwe emeyà èhwanja Èlìŋgɛ̀ yà Wòtani e ma hwa gbeyà ema hwa emàyɛ̀lɛ̀hwɛ̀ ò wòrzò wò ama Lohwɛ̀.

Ròmànì 5:2

Mɔ̀ ndi à jò lìhvòhwèlì e njiya ya lìlòkɛ̀ aŋga nanù i hwiya e ndèli ya ama Lohwɛ̀. O èŋgànɛ̀lɛ̀ rzɔ jò òki mɔ̀nyɛ̀ŋgì rzayi-rzayi èhwanja i ma ika mèèmà me arzu nanù ema jò ò luwa ŋmàye mò ama Lohwɛ̀.

Ròmànì 5:21

O eŋgànɛ̀lɛ̀ rzɔ, na òma wòhwe wò hwɛni e ŋginyà ò lì jànà e kpelì, nanù mɛnɛ ndi e ndèli ya ama Lohwɛ̀ yɔ hvɛ e hwɛni ŋginyà aŋga nanù hwatò hwa ò emeyàlɛhwɛ ò wòrzò wò ama Lohwɛ̀, na lì luwa lòŋgɛ la gbìndèyà, lì akeyà na Yerzù Krirztò, Rzàŋgò wà arzu.

1 Kɔ̀rintìyà 15:45

È tìlahwì o kààtì ya Lohwà nanù ema, “È mòtò wa worzò, Adàmu, Lohwɛ̀ à mà mo weka rzi a mo ŋgbaà lòŋgɛ.” Ndi e Adàmu ya lìrzukù e hwèlì ndi èlìŋgɛ̀ ema e ŋgba lòŋgɛ.

Ɛ̀hvìrzìyà 2:18

Èhwanja ò mamɛ ema Krirztò à mà jò gbèeyà, irzɔ hwa arzɛ i hweni è njiya ò lì ɛndɛ ò mà Tatɛ̀. Èŋge Èlìŋgɛ̀ yà awɔ̀kɛ mɛnɛ yɔ̀ ndi è jò oŋgòhwànà ò lì gbeyà nanù.

Kòlòrzìyà 2:17

Iŋgi mbenda jà arzɛ ì mà hwɛ ndi nàa èlìŋgɛ̀ ema è uŋmɛ̀lɛ̀ hwèèmà hwe gbamù ema Lohwɛ̀ à àŋgàmɛ̀nɛ̀yi lì oma. Ndeŋgànɛlɛ Krirztò ndi à ondìrzɛ̀ hweŋge hwèèmà hwe arzɛ.

Kòlòrzìyà 2:9

È rzi emeyà nanù ema hwaŋga hwà-òkòlèlì hwa mòlàŋga hwa e lukɛlɛ, ehwànja e ŋginyà na ɛ̀ɛ̀mɛ̀ ya ama Lohwɛ̀ e hwèlì o tenì ya e nyo ya e mòtò wa hwènàmà ya ama Krirztò.

Kòlòrzìyà 3:4

Krirztò ndi à hwèlì lòŋgɛ là arzu, ndeŋgànɛlɛ mɔ̀ à jelì tɛ ò ene rze, inyɔ hvɛ è hwɛ nà mɔ̀ ò èluhwe yà eni yà arzɛ.

Hibrù 7:25

O eŋgànɛ̀lɛ̀ rzɔ, Yerzù a tanɛyi o lì rzùŋgà mòŋgɛ ma hwatò ema hwa jà o ma Lohwɛ̀ lì akeyà na mɔ̀. Mɔ̀ a tanɛyi o lì hwa rzùŋgà mòŋgɛ ma awu ehwànja mɔ̀ à hwèlì lòŋgɛ ihvonda ja arzɛ o lì hwa kànɛlɛlɛ.

Hibrù 9:8

Èlìŋgɛ̀ yà Wòtani e ma gbeyà hwene hweyà o lì jo uŋmɛ̀lɛ̀ nanù ema, na oma i hwèlì i gbeyàna lìwondo la e rze ya mɔ̀nyɛ̀, e ma gbeyà ema irzɔ i rza tanɛyi o lì uka Lìwondo la Wòtani o èki ema Lohwɛ̀ a hwèlì.

1 Pètrò 1:21

Krirztò a gbèyi inyɔ e ma lòkɛ̀ Lohwɛ̀. È tanɛyi lì lokɛ Lohwɛ̀ na lì ika mèèmà me anyu me arzɛ na mɔ̀ èhwanja mɔ̀ à mà hvùmùlɛ̀ Krirztò o kpelì na lì uŋmɛ̀lɛ̀ èluhwe ya ama Krirztò.

1 Pètrò 2:4

Inyɔ e jèeya e Rzàŋgo, Mɔ̀ ema a hwèlì ndi nàa lìŋyàyi la lòŋgɛ ema hwà-òŋgèlì hwà mà lììyè, rzìi Lohwɛ̀ a ɛnɛ nanù ema lì hvomɛ̀nɛ̀yi, a lì hvɔ̀rzɔ̀wɔ̀ rzìi a lì uta.

1 Pètrò 3:18

Nà ohwi ene eyà nanù ehwànja Krirztò mɔ̀ hvɛ à mà taka na lì ŋwa o nyòla wòhwe wo arzu o ŋgèlì hvɔ̀kɔ o iŋgèlì ja arzɛ. A ma hwɛ ndi mòtò ema à mà hwɛ lì gbeyà hweyà ema Lohwɛ̀ a arza, ndi à mà ŋwa o nyòla hwatò hwa wòhwe. A ma gbeyà ndi nanù aŋga nanù irzɔ i uka o ma Lohwɛ̀. Hwàto hwà mà mo òŋwa ndi e nyàma nyo ya eni ya e mòtò wa hwènàmà ndi e ma ŋwa. Lohwɛ̀ à mà gbeyà èlìŋgɛ̀ ya eni o lì hwɛ lòŋgɛ.

1 Yòwanìrzɛ̀ 1:8

Jo òhwi tɛ ema i rza ohvi tɔ̀ wòhwe, nanù oma ja alukɛlɛ ndi irzɔ hwiti ndèŋgànɛlɛ o ma e jɔ̀kɛ̀ e rza enje na irzɔ.

1 Yòwanìrzɛ̀ 2:23

Hwàŋga hwa arzɛ ema hwa rzɔ̀rzi è Ŋmanà, hwa rzɔ̀rzi hvɛ Tatɛ̀. Hwàŋga hwa arzɛ ema hwa imànɛ̀lɛ̀yì è Ŋmanà wà ama Lohwɛ̀, hwa imànɛ̀lɛ̀yì hvɛ è Tatɛ̀.

1 Yòwanìrzɛ̀ 5:20

Ì hwi nanù ema è Ŋmanà wà ama Lohwɛ̀ à mà jà ò rze yà mɔ̀nyɛ̀, ndèŋgànɛ̀lɛ̀ à mà jò gbeyà ò lì hwiya Lòohwà là jɔ̀kɛ̀. Ndeŋgana irzɔ ì hwèlì ndi ò lì ahvìyànɛ̀ nà mɔ̀, nà oma jà ahvìyànɛ̀ nà è Ŋmanà wà eni Yerzù Krirztò. Mɔ̀ ndi à hwèlì Lohwà là jɔ̀kɛ̀ ndèŋgànɛlɛ mɔ̀ ndi à hwèlì è mɔ̀ ema à ŋgba lòŋgɛ là gbìndèyà.

1 Yòwanìrzɛ̀ 5:6

Yerzù Krirztò à mà jà ò rze. Hwa mà mò lùhwìrzɛ̀ nà malìhwa, ndi ò mburza hweŋweelì hwe eni ò mbàrza, rzi màyija mà eni mà kòmeyà ò rze. Rzeketɛ lì lùhwìrzɛ̀ là màlìhwa mɛnɛ ndi lì mà mò gbèyɛ̀nɛ̀, ndi è hvonda ema à mà ŋwe màyija mà eni ma mà kòmeyà ò rze. Èlìŋgɛ̀ yà Wòtani yɔ̀ ndi è jò uŋmɛ̀lɛ̀ nanù ema ene eyà è hwèlì ndi è jɔ̀kɛ̀, ehwànja Èlìŋgɛ̀ yà Wòtani è rza kɔ̀ɔ̀ hweyà.

2 Yòwanìrzɛ̀ 1:9

Tɔ̀ ima mòtò ema à rza oŋgàmɛ̀ hwèokòlelì hwe ama Krirztò, rzìi à oŋgama ndi hwehvɛhvɛ hwèokòlelì nanù oma à rza enje nà Lohwɛ̀. Ndi tɔ̀ ima mòtò ema à oŋgama hwèokòlelì hwe ama Krirztò nanù oma à hwèlì nà è Tatɛ̀ nà è Ŋmanà wà eni.

Hwèwulùwèlì 1:5

Yerzù Krirztò mɔ̀ hvɛ à è omelì è ndèli nà ɛ̀yɔ̀lɛ̀. Mɔ̀ ndi à hwèlì è mɔ̀ ema à ohwa è jɔ̀kɛ̀ lì hvomɛ̀nɛ Lohwɛ̀ nyayi ema ì hwi nanù ema è hwèlì è jɔ̀kɛ̀. Mɔ̀ ndi à hwèlì è mòtò wà worzo ema à lomi lì hvùmùlɛ, ndèŋgànɛ̀lɛ̀ mɔ̀ ndi à hwèlì è mòkànèlì hwa ikìŋgɛ jà ene rze. À jò lìŋgàni, ndèŋganɛlɛ mɔ̀ à mà gbeyà wòhwe wò rza jò kànèyà hvɛ nà oma mɔ̀ à jo ŋwèlɛ̀lɛ̀yì ò mèyohvo mè arzu.

Hwèwulùwèlì 19:11

Nà ma ɛnɛ e ŋmanyu yà lohwà e lìhvohwèlì. Rzìi na ɔŋgɔ rzìi na ɛnɛ wɔ̀rzi ema e tana, e mòtò ema à mà e lìya o ŋmanyu à mà hwɛ̀lɛ̀hwɛ̀ ndi Èhve-ehve na Jɔ̀kɛ̀. Mɔ̀ a kàyìrzɛ hwatò ŋgànà ema e hvomɛ̀nɛ̀yi ndèŋgànɛ̀lɛ̀ a anana hwàkɔ̀yèlì.

Hwèwulùwèlì 20:15

Tɔ̀ njɛnɛ ema lìinà là eni lì rzi tìlahwɛ ò tenì yà è kààtì yà lòŋgɛ, à ò hvìmbàhwà ò tenì yà yùlu yà mùnya.

Hwèwulùwèlì 22:1

È aŋgèlì rzìi e no uŋmɛ̀lɛ̀ morzo mo malìhwa ema mo gbeyà mòtò a hwɛ lòŋgɛ natɛ̀ɛ na o gbìndèyà, ndèŋgànɛ̀lɛ̀ mo uŋmɛ̀lɛ̀ ndi ŋgɛyi-ŋgɛyi nàa lìyɛni. Maŋga malìhwà ma mà uwɛ̀lɛ̀lɛ̀yi ndi o e konda ya lìkànèyà la ama Lohwɛ̀ na e Ŋgumà ya Mɔ̀lɛ̀ŋgù,

Hwèwulùwèlì 22:17

Èlìŋgɛ̀ ya ama Lohwɛ̀ nà Mɔ̀ɔmbì hwa ohwa nanù ema, “Jà.” Tɔ̀ njɛnɛ ema a hweyi ene eyà mɔ̀ hvɛ a ohwa nanù ema, “Jà.” Tɔ̀ njɛnɛ ema a hwɛni nyìrzɛ ya malìhwa inyɛ a jèe a nyɔ malìhwa emà mà gbeyà hwatò hwa hwɛ o lòŋgɛ natɛ̀ɛ na o gbìndèyà. Tɔ̀ njɛnɛ ema a arzi manù malìhwa à mà luwa ŋgundu.

Hwèwulùwèlì 3:14

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Làwòdèrzìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì, Inyɛ̀ wò Lìya Nànù. Mɔ̀ à gbeyà ndi nà oma Lohwɛ̀ à àrzeyà, à hwèlì ndi mboŋgi ya jɔ̀kɛ̀, ndèŋgànɛ̀lɛ̀ ò lì akeyà nà mɔ̀, ɔndi Lohwɛ̀ à mà wèkè hwèèmà hwe arzɛ natɛ̀ɛ nà ò hwèwòtèlì.

Hwèwulùwèlì 3:7

À mà nò òhweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Hvìladɛlhvìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì wòtani nà jɔ̀kɛ̀. Mɔ̀ à hwɛni màyìmbì ò lì kànèyà nyayi hvɔ̀kɔ nà oma kìŋgɛ Dàhwitì à mà hwɛ lì kànèyà. Mɔ̀ à lìhvo tɛ lìyòhva tɔ̀ mòtò à rza tànɛ à lì umba, ndèŋgànɛlɛ à umbi tɛ lìyohva tɔ̀ mòtò à rza tànɛ à lì lìhvowa.