Yòwanìrzɛ̀ 11:52 - Mokpwe: Bakwery (New Testament)

⁵² Rzekɛtɛ ò wònyà Yudà mɛnɛ ndi ò lì rzàŋga hwatò hwa arzɛ hwa ama Lohwɛ̀ ema hwa wuhwèlì ò èki yɔ̀kɔ, aŋga nanù hwa hwɛ mòtò mɔ̀kɔ.

Yòwanìrzɛ̀ 11:52 Mawu Ofanana

Lukàrzɛ̀ 15:8

“È hwèlì tɛ ema mòlanà à òhvi lìyòmɛ̀ la kahvà ò lìya, rzìi kahvà hvɔ̀kɔ e wɔ̀ ò tenì ya ndawò yà èni, rzèkɛ òŋgò mòlanà à hwɛnì lì hvàalɛ etùlù, rzìi a wòteya hvɛ lì tutà è ndawò, ò lì ɔ̀ŋgɔ kɔ̀yi-kɔ̀yi natɛ̀ɛ à lùwà èŋge kahvà e?

Lukàrzɛ̀ 2:32

Ŋmàye mò eni mò ò gbeyà hwaŋga hwatò ema hwa rza enje wònyà Yudà hwa ò hwiyà, ndèŋgàna a ò jànà èluhwe ò hwatò hwa aŋgɔ̀ hwa Irzàyɛ̀lì.”

Yòwanìrzɛ̀ 1:12

Ndi e wɔ̀ ema hwà mà mò kàrzɛ na lì mò lòkɛ̀ hwanu ndi à mà ŋgbèe è wònjà ò lì hwɛ hwàànà hwa ama Lohwɛ̀.

Yòwanìrzɛ̀ 1:29

Ò wònɛ̀yi wùnyà Yòwanìrzɛ̀ rzìi à ɛnɛ Yerzù nà òma à mò jèeyà. Rzìi Yòwanìrzɛ̀ à òhwa nanù ema, “È ɔŋgɔ̀ tɛ, è Ŋgumà Mɔ̀lɛ̀ŋgù wà ama Lohwɛ̀ mɔ̀ òŋgò. Mɔ̀ ndi à wòwi wòhwe wò hwatò hwa è rze yà mɔ̀nyɛ̀ yà arzɛ.

Yòwanìrzɛ̀ 10:16

Nà òhvi mehvɛhvɛ mɛ̀lɛ̀ŋgù, ema me rza ènje ò tenì ya ene ndawò ya mɛ̀lɛ̀ŋgù. Nà àŋgàmɛ̀nɛ̀yi lì me jànà mèyɔ̀hvɛ. Me òkànèyà lìlò la ami, rzi me hwɛ gbaka wɔ̀kɔ na mɔ̀ɔŋgèlì mɔ̀kɔ.

Yòwanìrzɛ̀ 12:32

Nà mà kàrzɛhwɛ tɛ ò ene rze, na rzìima hwatò hwa arzɛ ò nyò ya ami.”

Hwègbèèlì 18:10

O hwiye nanù ema imba na hwèlì na ò wa. Tɔ̀ mòtò a rza tànɛyi lì ò urzuweya na lì ò hvaŋga. Èhwanja na òhvi rzayì-rzayì ja hwatò ò ene mbòwà ndɛnɛ.”

Ròmànì 3:29

Ŋga e lùtèyà ndi nanù ema, Lohwɛ̀ a hwèlì ndi Lohwà la wònyà Yudà mɛnɛ e? Rzeke a hwèlì hvɛ ndi Lòohwà la hwatò ema hwa rza enje wònyà Yudà e? Ò jɔ̀kɛ̀ a hwèlì hvɛ ndi Lòohwà la awu.

Ròmànì 4:17

È tìlahwì ò kaàtì yà Lohwà nanù ema, Lohwɛ̀ à mà òhweyà Abràhamù nanù ema, “Ìmba nà ò gbèyi è tatɛ̀ yà rzayì-rzayì ja hwèkòmè.” O èŋgànɛ̀lɛ̀ ò wòrzò wò ama Lohwɛ̀ Abràhamù ndi à hwèlì e tatɛ̀ hwa arzu. Lòohwà ema Abràhamù a lòkɛ̀, lì hwèlì ndi Lòohwà ema lì ŋgba hwatò ema hwa ŋwelì lòŋgɛ lìŋgi Lohwɛ̀ ema lì hvùmùlɛ̀ɛ è wɔ̀ hwa ŋwelì lòŋgɛ, ndèŋgàna mɔ̀ ndi à òhwa aŋga nanù hwèèmà ema hwe rza enje hwe hwɛ.

Ɛ̀hvìrzìyà 1:5

mɔ̀ à mà lòma lì ika nà è kòòhwà, à mà irzɔ jò ò hwɛ ndi hwàànà hwa eni, lì akeyà nà èwòlò ema Yerzù Krirztò à mà jò gbèeyà. Lohwɛ̀ à mà gbeyà ndi ene eyà nanù, èhwanja nanù ndi à mà tɛ̀yirzɛ̀ nà oma è mò lɔ̀ɔ̀nì.

Ɛ̀hvìrzìyà 3:11

Kòòhwa ndèŋgànà Lohwɛ̀ à è wèka è rze mɔ̀ à mà lòma lì tɛ̀yirzɛ̀ nanù ema hweyà hwe ene ema mɔ̀ à ò gbèyɛ. Nàŋgɛ rzɔ mɔ̀ à mà gbèeyà hwene hweyà ò lì gbèyɛ̀nɛ̀ lì akeyà nà hweyà ema è Rzàŋgo yà arzu Yerzù Krirztò è mà gbeyɛ.

Jèmìrzì 1:1

Imba Jèmìrzì e mògbèèlì wa ama Lohwɛ̀ na Rzàŋgo Yerzù Krirztò ndi na tilì ene kààtì. Nà e kɔ̀mi inyɔ hwa arzɛ lìyomɛ la matumba na mahwakɛ ma wonyà Irzàyɛ̀lì ema e bùhwèlì o e rze ya mɔ̀nyɛ̀ ya arzɛ.

1 Pètrò 1:1

Imba Pètro ema na hwèlì e àpɔ̀rzìtòlò ya ama Yerzù Krirztò ndi na tilì ene kààti. Nà e tìleya ndi hwatò hwa ama Lohwɛ̀ ema hwa hvɔ̀rzɔ̀hwì, ema hwà mà wuhweyà ndèŋgànɛ̀lɛ̀ hwa hwèlì ndi nàa hwàyɛ̀nì o hwèrzòòkà hwe Pòntìyùrzì, Gàlerzìyà, Kapadorzìyà, Èrzìyà na Bìtìnìyà.

1 Yòwanìrzɛ̀ 2:2

Krirztò ŋmìti à mà hwɛ ndi nàa jàhwèyà ema Lohwɛ̀ à mà gbeyàne o lì jo kɔ̀tɔ̀ o wòhwe ema i ma gbeye. A ma gbeyà ndi nanù aŋga nanù irzɔ i luwa lì làkìrzɛnɛ. Rzeketɛ o wòhwe wo arzu mɛnɛ ndi o wòhwe wo hwatò hwa arzɛ hwa ene rze.

1 Yòwanìrzɛ̀ 3:1

È ɔŋgɔ tɛ e ndìŋgɛ ndɛnɛ ema Tatɛ̀ a jo lìŋgàni. Èŋge ndìŋgɛ e olo natɛ̀ɛ irzɔ i hwɛ̀lɛ̀hwɛ̀ hwàanà hwa ama Lohwɛ̀, ndèŋgànɛ̀lɛ̀ nanù ndi irzɔ i hwèlì. Lìtiŋga ndeŋgatɛ ene rze e rza jo hwi lì hwèlì ndi ehwànja hwa rzi lome lì hwiya e Tatɛ̀.

1 Yòwanìrzɛ̀ 3:10

Nànù ndi irzɔ ì hwɛni lì hwiya njɛnɛ hwàànà hwa ama Lohwɛ̀ hwa hwèlì, nà njɛnɛ hwàànà hwa ama Mòkarzɛ̀ hvɛ hwa hwèlì, tɔ̀ njɛnɛ ema à rza gbèyɛ mamɛ ema è hvomɛ̀nɛ̀yi à rza enje è ŋmanà wà ama Lohwɛ̀. Ŋgànà hvɔ̀kɔ hvɛ nà tɔ̀ njɛnɛ ema à rza lìŋgànɛ̀ ŋmanyàŋgò tɔ̀ è ndomɛ̀ yà eni.

1 Yòwanìrzɛ̀ 3:2

Wònyàmòwe kòkò, o naŋgɛ nanù irzɔ i hwèlì ndi hwàanà hwa ama Lohwɛ̀, ndèŋgànɛlɛ hvɛ mamɛ ema irzɔ jo ò hwɛ o e ŋmɛlɛ irzɔ i rzi e hwi. Ndì i hwi hvɛ nanù ema Krirztò a jelì tɛ, irzɔ jo ò hwɛ ndi nàa mɔ̀, ehwànja i hwɛni lì mo ɛnɛ na oma mɔ̀ à hwèlì.

Hwèwulùwèlì 5:9

Hwa mà èmba mɔ̀rzɔ̀kɔ̀ mòhvènya, nanù ema, “Ò kànɛ̀yi lì wòwa è kààti ema è lìŋgɛ̀lɛ̀hwɛ nà ò lì rzòlòwà mòjèkà mò eni, ò kànɛyi ehwànja ò mà oŋwàhwa, ndèŋgànɛ̀lɛ̀ ò mà kɔ̀tɔ̀wɔ̀ hwatò hwa ama Lohwɛ̀ nà màyija mà aŋgɔ. Ò mà gbeyà hwa mà timba ndi hwatò hwa ama Lohwɛ̀. Hwa mà uwɛ̀lɛ̀lɛ̀yi ò mahvɛhvɛ màtumba, hwa ò ohwa ihvɛhvɛ mbɔrzi, hwa uwɛ̀lɛ̀lɛ̀yi ò hwehvɛhvɛ hwèkòmè, ndèŋgànɛ̀lɛ̀ hwa hwèlì inyayi jà hwatò hwa arzɛ.