Yòwanìrzɛ̀ 11:25 - Mokpwe: Bakwery (New Testament)

²⁵ Yerzù rzìi a mò òhweyà nanù ema, “Imba ndi na hwèlì hwèhvùmùwèlì nà lòŋgɛ, tɔ̀ ima mɔ̀ ema à nò lòkɛ̀ tɔ̀ nɛ à ŋwa, à ò tɛ̀mɛ̀ hvɛ ò lòŋgɛ.

Yòwanìrzɛ̀ 11:25 Mawu Ofanana

Lukàrzɛ̀ 23:43

Yerzù, rzìi a tìmbirzɛlɛlɛ nanù ema, “Nà ò òhweyà è jɔ̀kɛ̀ ema, yàwònò ò hwɛ nà ìmba ò pàlàdìrzì.”

Yòwanìrzɛ̀ 1:4

Lòŋgɛ la arzɛ lì ma uhwɛlɛlɛ ndi ò eyà. À ma òhva lòŋgɛ rzi lìŋgi lòŋgɛ hvɛ lì mà jàneya hwatò ŋmàye.

Yòwanìrzɛ̀ 14:19

O rza wòwa hvònda hvɛ, e rze e rza ò nò ɛnɛ hvɛ. Ndi inyɔ e nò ɛnɛ. Èhwanja na hwèlì lòŋgɛ, inyɔ hvɛ e ò hwɛ lòŋgɛ.

Yòwanìrzɛ̀ 14:6

Yerzù rzìi a alàhwɛ̀ nanù ema, “Imba ndi na hwèlì e njiya ema e ɛndɛ òma Tatɛ̀ wa ami, e jɔ̀kɛ̀ e uwɛ̀lɛ̀lɛ̀yi ndi na imba, imba hvɛ ndi na ŋgbà lòŋgɛ. Tɔ̀ mòtò tɔ̀ mɔ̀kɔ a rza tànɛyi lì jà òma Tatɛ̀ wa ami ema a rza akelɛ na imba.”

Yòwanìrzɛ̀ 3:16

Lohwɛ̀ a lìŋgàni hwatò hwa ene e rze ya mɔ̀nyɛ̀ rzayì-rzayì. O èŋgànɛ̀lɛ̀, à mà òma ehvòwà ya eni ya Ŋmanà nanù ema, tɔ̀ ima mɔ̀ ema a mò lòkɛ̀ a rza ŋwa ndi à lùwa lòŋgɛ la gbìndèyà.

Yòwanìrzɛ̀ 3:36

Tɔ̀ ima mɔ̀ ema a lòkɛ̀yì òŋgò Ŋmanà wa eni a hwɛnɛ lòŋgɛ la gbìndèyà, ndi tɔ̀ ima mɔ̀ ema a rza gbeyà na òma Mɔ̀ a òhwi, a rza luwa lòŋgɛ la gbìndèyà, a ò timba ndi lì luwa hvɛ e kɔ̀kìrzɛ̀ ya ama Lohwɛ̀.

Yòwanìrzɛ̀ 5:21

Nà òma Tatɛ̀ a hvùmùlɛ̀ e wɔ̀ ema hwa ŋwelì lì hwa ŋgba lòŋgɛ, nanù mɛnɛ hvɛ ndi è Ŋmanà wà eni a gba lòŋgɛ ò hwatò ema mɔ̀ à lìŋgàni.

Yòwanìrzɛ̀ 5:26

Nà òma Tatɛ̀ mɔ̀ ŋmìti a hwèlì lìwòndò la lòŋgɛ, nanù mɛnɛ hvɛ ndi à gbèyi è Ŋmanà wà eni lìwòndò la lòŋgɛ.

Yòwanìrzɛ̀ 6:35

Yerzù rzìi à hwa alàhwɛ̀ nanù ema, “Imba ndi nà hwèlì èhvòòtò ema è ŋgba lòŋgɛ là gbìndèyà.” Tɔ̀ njɛnɛ ema à nò jɛ̀lɛ̀lɛ̀yi à rza ò hwèya njàwò hvɛ. Tɔ̀ njɛnɛ ema à nò lòkɛ̀yì à rza òhva nyìrzɛ̀ hvɛ.

Yòwanìrzɛ̀ 6:44

Ndi tɔ̀ mɔ̀kɔ a rza tànɛyi lì nò jèeyà e rza enje tɛ nanù ema, Tatɛ̀ ema a nò òmi mɔ̀ ndi à nò jàneyà e mɔ̀. Ndèŋgànɛ̀lɛ̀, imba na mò hvùmùlɛ̀ ò wùnyà wò lìrzukù.

Hwègbèèlì 3:15

O eŋgànɛ̀lɛ̀ rzɔ inyɔ e ma gbeyà e mòtò ema a jànà hwatò lòŋgɛ la jɔ̀kɛ̀ à mà òŋwahwa ndi Lohwɛ̀ à mà mò hvùmùlɛ̀ ò kpelì. Irzɔ hwiti i ma ɛnɛnɛ hweŋge hweyà na mìirzɔ̀ ma arzu.

Ròmànì 4:17

È tìlahwì ò kaàtì yà Lohwà nanù ema, Lohwɛ̀ à mà òhweyà Abràhamù nanù ema, “Ìmba nà ò gbèyi è tatɛ̀ yà rzayì-rzayì ja hwèkòmè.” O èŋgànɛ̀lɛ̀ ò wòrzò wò ama Lohwɛ̀ Abràhamù ndi à hwèlì e tatɛ̀ hwa arzu. Lòohwà ema Abràhamù a lòkɛ̀, lì hwèlì ndi Lòohwà ema lì ŋgba hwatò ema hwa ŋwelì lòŋgɛ lìŋgi Lohwɛ̀ ema lì hvùmùlɛ̀ɛ è wɔ̀ hwa ŋwelì lòŋgɛ, ndèŋgàna mɔ̀ ndi à òhwa aŋga nanù hwèèmà ema hwe rza enje hwe hwɛ.

Ròmànì 8:2

Ène eyà e hwèlì ndi nanù èhwanja, e mbenda yà Èlìŋgɛ̀ ema e jò jàneyà lòŋgɛ, na òma irzɔ i hwèlì mɔ̀kɔ na Yerzù Krirztò, e ma nò rzòlòwa ò e mbenda yà eyà ya wòhwe na ò màà mà kpelì.

1 Kɔ̀rintìyà 15:18

È uŋmɛ̀lɛ̀ hvɛ ndi nanù ema hwaŋga hwatò ema hwà mà lòkɛ̀ Krirztò ema hwà mà ŋwɛɛ hwa wɔ̀.

1 Kɔ̀rintìyà 15:29

O naŋgɛ nanù nɛ e hwèlì na hwaŋga hwatò ema hwa lùhwìrzɛ̀hwɛyi o mèyòhvò me hwaŋga hwatò ema hwà mà ŋwɛɛ e? È hwèlì tɛ ema e wɔ̀ ema hwa ŋwelì hwa rza hvùmùwà, mamɛ ndeŋgatɛ hwa lùhwìrzɛ̀ hwatò ò mèyòhvò me hwaŋga hwatò ema hwa ŋwelì e?

2 Kɔ̀rintìyà 4:14

Irzɔ i hwi nanù ema Lohwɛ̀ ema mo ndi à mà hvùmùlɛ̀ Rzàŋgo Yerzù, a o jo hvùmùlɛ̀ irzɔhvɛ, o lì hwɛ o lòŋgɛ na Yerzù. Ndèŋgana, Lohwɛ̀ a o jo jànà irzɔ na inyɔ o èki ema a hwèlì.

Hvìlipìyà 1:23

Hwene hweyà hweahwakɛ hwe no tɛmelì o worzo, ndèŋgànɛ̀lɛ̀ e no ambani o lì hwiya e yɔ ema na hvɔ̀rzɔ̀. Nà lìŋgàni lì o hwɛmɛ lìni lòŋgɛ rzìi na hwɛ na Krirztò, ehwànja eŋge eyà e lɔ̀wu lì aka lì hwɛ anu rze.

Hvìlipìyà 3:10

Nà arza lì hwiya Krirztò na o lì hwɛnɛ màyìmbi ema mɔ̀ à mà hwɛnɛ o hwehvùmuwelì hwe eni. Nà lìŋgàni nanù ema na luwe mètàkà ŋgànà hvɔ̀kɔ mɛnɛ na oma mɔ̀ hvɛ à mà me luwe. Ndeŋgànɛ̀lɛ̀ na lìŋgàni nanù ema na luwe mètàkà na oma mɔ̀ hvɛ à mà me luwe, natɛ̀ɛ hwa no oŋwe na oma hwà mà mo oŋwe mɔ̀ hvɛ.

1 Tɛ̀rzàlonìyà 4:14

Nà oma irzɔ i lòkɛ̀ nanù ema Yerzù à mà ŋwa rzìi a hvùmùwà o kpelì, o eŋgànɛ̀lɛ rzɔ̀ i lòkɛ̀ nanù ema e hvonda ema Yerzù a o timbɛ o rze, Lohwɛ̀ a o gbeyà hwaŋga hwàlòkèlì hwa arzɛ hwa ama Krirztò ema hwà mà lomɛ lì ŋwa o lì hvùmùwà rzìi hwa hwɛ na Krirztò.

Hwèwulùwèlì 1:18

Imba ndi na hwèlì oŋgo ema a hwèlì lòŋgɛ. Nà ma ŋwa, ndi o naŋgɛ na hwèlì lòŋgɛ o gbìndèyà na o gbìndèyà. Ndeŋgànɛ̀lɛ̀ na kànèyà e mbowà ya e kpelì.

Hwèwulùwèlì 20:5

Hwanɛ̀yi hwa arzɛ ema hwà mà ŋwa hwa rzi timbe o lòŋgɛ natɛ̀ɛ ikolì ja meya i ma aka. Hwehvùmuwelì hwe kpelì hwe worzò hwe ene.

Hwèwulùwèlì 21:4

A o hwa titowa tɔ̀ ima mirzɔ̀lì o mìrzɔ ma awu. O rza o hwɛ hvɛ tɔ̀ kpelì, tɔ̀ lì ehwɛ, tɔ̀ luwa, tɔ̀ mòrziyò. È o hwɛ ndi nanù ehwànja hweyà hwe mbolowa hwe ma aka.”

Hwèwulùwèlì 22:1

È aŋgèlì rzìi e no uŋmɛ̀lɛ̀ morzo mo malìhwa ema mo gbeyà mòtò a hwɛ lòŋgɛ natɛ̀ɛ na o gbìndèyà, ndèŋgànɛ̀lɛ̀ mo uŋmɛ̀lɛ̀ ndi ŋgɛyi-ŋgɛyi nàa lìyɛni. Maŋga malìhwà ma mà uwɛ̀lɛ̀lɛ̀yi ndi o e konda ya lìkànèyà la ama Lohwɛ̀ na e Ŋgumà ya Mɔ̀lɛ̀ŋgù,

Hwèwulùwèlì 22:17

Èlìŋgɛ̀ ya ama Lohwɛ̀ nà Mɔ̀ɔmbì hwa ohwa nanù ema, “Jà.” Tɔ̀ njɛnɛ ema a hweyi ene eyà mɔ̀ hvɛ a ohwa nanù ema, “Jà.” Tɔ̀ njɛnɛ ema a hwɛni nyìrzɛ ya malìhwa inyɛ a jèe a nyɔ malìhwa emà mà gbeyà hwatò hwa hwɛ o lòŋgɛ natɛ̀ɛ na o gbìndèyà. Tɔ̀ njɛnɛ ema a arzi manù malìhwa à mà luwa ŋgundu.