Yòwanìrzɛ̀ 1:13 - Mokpwe: Bakwery (New Testament)

¹³ Wɔ̀ hwa rza enje ndi hwàànà hwa ama Lohwɛ̀ nàa hwatò hwa hwènàmà hwa ŋyàa hwànà. Hwa rzi hwɛ ndi hwàànà hwa ama Lohwɛ̀ nàa ò à ɛnɛ ema mòtò wà hwènàmà ndi à hwa ŋyàayi. Lohwɛ̀ mɔ̀ ŋmìti ndi à hwèlì è Tatɛ̀ yà awu.

Yòwanìrzɛ̀ 1:13 Mawu Ofanana

Matiyò 3:9

È rzi ɔ̀ŋgɛlɛ hvɛ̀ èma è tànɛyi lì hwaŋga hwèkɔ̀kìrzèlì hwe ama Lohwɛ̀ ò lì àwòhwànɛ̀lɛ̀ inyɔ hwiti nanù ema, è hwèlì ndi hwàànà hwa ama Abràhamù. Ndi nà è òhwèyà ema Lohwɛ̀ à tanɛ̀yi lì gbèya na manù màŋyàyi ò lì mà gbèya ema mà hwɛ hwàànà hwa ama Abràhamù.

Yòwanìrzɛ̀ 3:3

Yerzù rzìi à mò alàhwɛ̀ nanù ema, “Imba nà ò òhweyà ndi è jɔ̀kɛ̀ ema ò rza enje tɔ̀ mòtò tɔ̀ mɔ̀kɔ ema à ò kpèeyà ò lìkànèyà là ama Lohwɛ̀ à rza ŋyààhwì tɛ mòhvènya.”

1 Kɔ̀rintìyà 3:6

Imba nà mà ona ndi e hvɔ̀ŋgɔ̀. Apòlòrzì mɔhvɛ rzìi a hvahva èŋge hvɔ̀ŋgɔ̀ malìhwa. Ndi Lohwɛ̀ Mɔ̀ndi à mà hvùmùlɛ̀ èŋge hvɔ̀ŋgɔ̀.

Hvìlipìyà 2:13

Inyɛ̀ e gbeye nanù, ehwànja Lohwɛ̀ a hwèlì na inyɔ o ihvonda ja arzɛ, aŋga nanù e o ohva mèèmà o lì gbeyà hweyà hwe gbamù ema mɔ̀ à arza nanù ema e gbeye, ndèŋgànɛ̀lɛ̀ e hwe gbèyi.

Tàyìtùrzì 3:5

Rzeketɛ o hweyà hwe ehve-ehve ema i ma gbeeye ɔ̀ndèŋgàtɛ̀ à mà jo rzùŋgà, ndi à mà jo rzùŋgà ndi o nyòla ììlì ja eni. Lohwɛ̀ à mà oma Èlìŋgɛ̀ yà Wòtani o lì rzorza wòhwe wo arzu, aŋga nanù jo o ŋyàahwà hwahvènya.

Jèmìrzì 1:18

Lohwɛ̀ à mà kàkɛ̀nɛ̀ nanù ema a jo ŋgba lòŋgɛ lì hvènya, e hvonda ema à mà jo ŋgbe eyà ya eni ya jɔ̀kɛ̀. A ma gbeyà ndi nanù, aŋga nanù o ìtììtènì ja ewèkelì ya eni ya arzɛ irzɔ i hwɛ ndi nàa e mbota ya eni ya worzo ema e mo ŋgbààhwà nàa làhweyà.

1 Pètrò 1:23

È hwɛni lì hwiya nanù ema Lohwɛ̀ à mà è ŋgbàà lòŋgɛ lì hvènya ò lì akeyà nà è mbɔrzi yà eni. Èŋge mbɔrzi è mà jana lòŋgɛ, ndèŋgànɛ̀lɛ̀, è rza enje ndi eyà ema è hvaŋgèya. È ò hwɛ natɛ̀ɛ nà ò mòlìkɛ̀. Lohwɛ̀ ema à hwèlì ò gbìndèyà, mɔ̀ ndi à è ŋgbelì lìŋgi lòŋgɛ, rzeketɛ è mòtò wà hwènàmà.

1 Pètrò 1:3

Jèka ì hwɛ nà Lohwɛ̀ è Tatɛ̀ yà ama è Rzàŋgo wà arzu Yerzù Krirztò. À mà hvùmùlɛ̀ Yerzù Krirztò ò kpelì. Ò eŋgànɛ̀lɛ̀ i mà luwa lòŋgɛ lì hvènya. Nà oma mɔ̀ à gbèyi nanù, à mà jò ŋgba lìhvìta là lòŋgɛ là gbìndèyà.

1 Pètrò 2:2

È aŋgàmɛ̀nɛ̀yi lì keka lì ana o lì luwa mòlelì mo èlìŋgɛ̀ ema mo rzàŋgi, nyayi hvɔ̀kɔ nàa mɛ̀ɛŋgɛ̀ me hwàna me èyeya mànyɔ̀ŋgɔ̀ ma màhwɛ, aŋga nanù, e lelì tɛ, e oŋga o lì luwa lìrzùŋgahwà lì anyu.

1 Yòwanìrzɛ̀ 3:9

Tɔ̀ mɔ̀kɔ hwa hwaŋga ema à hwèlì è ŋmanà wà ama Lohwɛ̀ à rza tànɛ lì lìmeyà ò lì gbeyà wòhwe. Èhwànja hwèhwɛ̀ɛ̀lì hwe ama Lohwɛ̀ hwe hwèlì ò tenì yà awu. Hwa rza tanɛ lì lìmeyà ò lì gbeyà wòhwe hvɛ ehwànja Lohwɛ̀ à hwèlì ndi Tatɛ̀ wà awu.

1 Yòwanìrzɛ̀ 4:7

Imbùnda jà ami kòkò, inyɛ jà alìŋgànɛ mɔ̀kɔ nà ɔ̀nɛyi, ehwànja Lohwɛ̀ ndi à jò gbèeyà ema ì lìŋgàne hwatò. Tɔ̀ ima mòtò ema à lìŋgàni hwatò nanù oma à hwèlì ndi nàa è ŋmanà wà ama Lohwɛ̀ ndèŋgànɛlɛ à hwi Lohwɛ̀.

1 Yòwanìrzɛ̀ 5:1

Tɔ̀ ima mòtò ema à lòkɛ̀ nanù ema Yerzù mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi à hwèlì ndi nàa è ŋmanà wà ama Lohwɛ̀, ndèŋgàna tɔ̀ njɛnɛ ema à lìŋgàni Tatɛ̀ nanù oma à lìŋgàni hvɛ è Ŋmanà wà eni.

1 Yòwanìrzɛ̀ 5:18

Ì hwi nanù ema tɔ̀ ima mòtò ema à mà jɛ̀ɛ̀ è ŋmanà wà ama Lohwɛ̀ à rza tànɛ lì eleyà ò wòhwe. Oŋgo ema à mà jɛ̀ɛ̀ è ŋmanà wà ama Lohwɛ̀, Yerzù à mò kombɛ̀ komba-komba aŋga nanù è Mɔ̀ wà Wòhwe à rza mò gbeyà tɔ̀ eyà yà wòhwe.

1 Yòwanìrzɛ̀ 5:4

Èhwanja tɔ̀ njɛnɛ ema à hwèlì è ŋmanà wà ama Lohwɛ̀ à mà màa lì rzuwànà è rze. Lìtiŋga ema mɔ̀ à mà màà lì rzuwànà è rze lì hwèlì ndi nanù ema, irzɔ ì lòkɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi nà Lohwɛ̀.