Lukàrzɛ̀ 6:45 - Mokpwe: Bakwery (New Testament)

⁴⁵ È mòtò wà gbamù a gbeyà ndi hweyà hwe gbamù, èhwanja hwe uwɛ̀lɛ̀lɛ̀yi ndi ò tenì yà ŋmèma mò eni, ema gbàamù wò utahwi. Ndèŋgànɛ̀lɛ̀ hvɛ è mòtò wà wòhwe à gbeyà ndi hweyà hwe wòhwe, èhwanja hwe uhwɛlɛlɛ̀ ndi ò tenì ya ŋmèma mò eni ema wòhwe wò utahwi. È hwèlì ndi nanù èhwanja, hweyà ema hwe òndi mòtò ò ŋmèma mò eni, hwe ɔ̀ndi à wurzìrzɛ ò wàna yà èni.

Lukàrzɛ̀ 6:45 Mawu Ofanana

Yòwanìrzɛ̀ 7:38

È mɔ̀ ema a nò lòkɛ̀ è Kààtì ya Lohwà e òhwi nanù ema, ‘Merzò me malìhwà mà lòŋgɛ me ò mò wurza ò tenì ya eni.’”

Hwègbèèlì 5:3

Aŋga ndi Pètrò à mà mò ijòwa nanù ema, “Ìi Ànàniyarzì mamɛ ndèŋgàtɛ ò imanɛlɛ nanù ema mòkarzɛ̀ a ò kànèyà. Nàŋgɛ rzɔ mòkarzɛ̀ à mà ò gbeyà ò ma kɔ̀yeyà Èlìŋgɛ̀ yà Wòtani eyà na òma ò wa ò ma utɛ lòŋgò la wòŋgò wòlì ema ò ma àhwirzɛ̀ eŋge etò.

Ɛ̀hvìrzìyà 3:8

Tɔ̀ nɛ nà rza hwɛnɛ wòlìto ò ìtììtènì ja hwatò hwa ama Lohwɛ̀, Lohwɛ̀ à mà nò ŋgbà è ndèli yà eni ò lì ohweyà hwaŋga hwatò ema hwa rza enje wònyà Yudà lì hvomɛ̀nɛ̀ mònàmɛ̀ ema Krirztò à ŋgbà. Tɔ̀ mòtò wà hwènàmà à rza tànɛyi lì hwiya nɛ̀ mono mònàmɛ̀ mò hwèlì.

Ɛ̀hvìrzìyà 4:29

È rzi ohwa mbɔrzi ja èèti o wàna ja anyu. È ohwe ndi hweyà ema hwe oŋgowàna hwatò ò lì oŋgà o lìlòkɛ̀ la awu. Aŋga nanù hwaŋga ema hwe e okànèyà na oma e ohwa hwà okoweya o johwi ja anyu.

Ɛ̀hvìrzìyà 5:19

È à èmbànɛ mɛ̀rzɔ̀kɔ̀ mè Lohwà, ò lì àyètìrzɛ̀nɛ̀ mɔ̀kɔ nà ɔ̀nɛyi. È embe mɛ̀rzɔ̀kɔ̀ ema mè uwɛ̀lɛ̀lɛ̀yi ò kaàtì yà ama Lohwɛ̀ ya mɛ̀rzɔ̀kɔ̀ ndeŋgànɛ̀lɛ̀ è embe hvɛ tɔ̀ ima mɔ̀rzɔ̀kɔ̀ ema mò uwɛ̀lɛ̀lɛ̀yi ò Èlìŋgɛ̀ yà Wòtani ò lì eka Lohwɛ̀.

Kòlòrzìyà 3:16

Inyɛ̀ ŋmɛ̀ndì mò ama Krirztò mò lìya gbamù ò tenì yà mèèmà mè anyu ò ihvonda jà arzɛ. Inyɛ̀ inyɔ è gbeyàne moŋgo ŋmɛ̀ndì nà lìhwiyè lì anyu là arzɛ ò lì okòlɛ nà lì kòkòwɛ̀lɛ̀ mɔ̀kɔ nà ɔ̀nɛyi ò ihvonda ja arzɛ. Inyɔ è à èmbeyà Lohwɛ̀ mɛ̀rzɔ̀kɔ̀ ema mè hwèlì ò tenì yà è kààtì yà mɛ̀rzɔ̀kɔ̀ mè Lohwà. È èmbeyà Lohwɛ̀ mɛ̀rzɔ̀kɔ̀ ema mà eka Lohwɛ̀ nà Krirztò nà mè hvɛhvɛ mɛ̀rzɔ̀kɔ̀ ema mè è jɛ̀lɛ̀lɛ̀yì ò mèèmà mè anyu ò lì eka Lohwɛ̀. Inyɔ è mò èmbeyà ò lì mo eka nà mèèmà mè anyu mè arzɛ.

Kòlòrzìyà 4:6

Inyɔ nà wɔ̀ è tuwa tɛ mèndèŋgà, hwèyohwèlì hwe anyu hwe àŋgàmɛ̀nɛ̀yi lì lɔ̀wu nà lì tɛ̀ɛ̀. Inyɔ è gbeyà tɛ nanù, è hwiya nɛ è alàhwɛ̀ tɔ̀ ima mòtò ema à è ijo mììjòwèlì.

Hibrù 8:10

Lohwɛ̀ à ohwa hvɛ nanù ema, Imba è Rzàŋgo ndi nà ohwa. Ò nàŋgɛ nanù yòòmbò ene ema nà hwɛni lì ààtɛ̀ɛ̀ nà wònyà Irzàyɛ̀lì, ò è hvonda ema è ò jɛ̀ɛ̀ è hwèlì ndi nanù ema: nà ò hwa gbeyà ò lì hwiya imbenda jà ami, ndèŋgànɛ̀lɛ̀ hwa ò ohva ŋmèma mò lì ika iŋgi mbenda. Imba nà ò hwɛ Lòohwà là awu, ndèŋgànɛ̀lɛ̀ wɔ̀ hvɛ hwa ò hwɛ hwatò hwa ami.

Judɛ 1:15

Mɔ̀ à ò kàyìrzɛ hwatò hwa arzɛ hwa è rze yà mɔ̀nyɛ̀. Hwàto hwa arzɛ ema ɛ̀ɛ̀mɛ̀ yà awu è rza enje nàa ɛ̀ɛ̀mɛ̀ yà hwatò hwa Lohwà mɔ̀ à hwa tùùlɛ̀ ŋmàŋgo, ndèŋgànɛlɛ à ò kɔ̀kìrzɛ̀ hwatò hwa wòhwe ema hwa rza oka Lohwɛ̀ wɔ̀ŋgɔ̀. À ò hwa kɔ̀kìrzɛ̀ ò nyòla hweyà hwe wòhwe ema wɔ̀ hwa ohwa ò lì mò tèŋgɛ̀nɛ̀.”