Lukàrzɛ̀ 16:24 - Mokpwe: Bakwery (New Testament)

²⁴ Èŋge èhwàŋgì ya mòtò rzìi e tɛɛ nanù èma, ‘Ìi tatà Abràhamù, ò nò òkeya ììlì. Oma Làrzàlɔ̀tì ema a tɔ̀tè wòrzò wò jɔ̀nɔ ja eni ò màlìhwa a nò tɔ̀lɛ è mɔ̀ ò jɛ̀ɛ̀mɛ̀ ja amì ò lì nò yɔlɛ̀, èhwanja nà hweyà wɔ̀ɔ̀kì rzayì-rzayì ò tènì yà mònò mùnya.’

Lukàrzɛ̀ 16:24 Mawu Ofanana

Matiyò 25:41

“Ndi e Kiŋgɛ̀ e ò ayèŋgòwɛ̀lɛ̀lɛ̀ hwaŋga ema hwa ò hwɛ ò lìya la eni la ŋmalì rzìi a hwa òhweyà nanù ema, ‘È nò anjiya anu inyɔ ema e jemahwi na Lohwɛ̀! È ɛndɛ e kpèeyà ò ehvɔ̀ndi ya mùnya ema Lohwɛ̀ à mà rzekeya Mòkarzɛ̀ na i aŋgèlì ja eni.

Matiyò 3:9

È rzi ɔ̀ŋgɛlɛ hvɛ̀ èma è tànɛyi lì hwaŋga hwèkɔ̀kìrzèlì hwe ama Lohwɛ̀ ò lì àwòhwànɛ̀lɛ̀ inyɔ hwiti nanù ema, è hwèlì ndi hwàànà hwa ama Abràhamù. Ndi nà è òhwèyà ema Lohwɛ̀ à tanɛ̀yi lì gbèya na manù màŋyàyi ò lì mà gbèya ema mà hwɛ hwàànà hwa ama Abràhamù.

Matiyò 5:22

Ndi nà è òhwèyà ema tɔ̀ ima mòtò ema à tatani òhvɛhvɛ mòtò, mɔ̀hvɛ à ò ikahwa ò hwèkàyìrzelèlì. Tɔ̀ ima mòtò hvɛ ema à hwɛnyi ŋmànyàŋgò wà eni nanù ema, ‘Èleŋgè’ à hwɛnì lì alàhwɛ̀ è ndawò yà hwèkàyìrzelèlì yà hwa ndɛnɛ. Ndi tɔ̀ njɛnɛ hvɛ ema à hwɛlɛ ŋmànyàŋgò wà eni nanù ema, ‘Ò wà èèti yà mòtò,’ à ò aŋgbahwa ò mùnya ema mò rza lìma.

Lukàrzɛ̀ 16:30

Èŋge èhwàŋgì ya mòtò rzìi ya òhwa nanù ema, ‘Jàyɛ̀ tatà Abràhamù kòkò, mòtò à ànji tɛ anù, ò èkòmè ya kpelì, rzìi a ɛ̀ndɛ lì hwa òhweyà, òma hwà mà atikòwɛ ò wòhwe wa awu, lì tìmba ò ma Lohwɛ̀.’

Lukàrzɛ̀ 19:9

Yerzù rzìi a mò òhweyà nanù ema, “O yàwònò, lìrzùŋgàhwa lì ma kpèeyà ò tenì yà ène ndawò. Ònò mòtò mɔ̀ hvɛ à hwèlì ndi ò mòtende mò ama Abràhamù.

Lukàrzɛ̀ 3:8

Inyɔ e ɛndɛ e gbèèye hweyà ema hwe uŋmɛ̀lɛ̀ nanù ema e ma rzɔnjɛ̀lɛ̀ wòhwe wò anyu, rzèketɛ ò lì òhwà ò mèèmà me anyu nanù ema, ‘Ì hwèlì ndi hwàànà hwà mà Abràhamù, ò eŋgànɛ̀lɛ̀ ì rza tànɛ̀yi lì kɔ̀kìrzɛ̀hwɛ.’ Ndi nà è òhweyà ema Lohwɛ̀ à tanɛyi lì gbeyàna manù màŋyàyi ò lì ma gbeyà emà mà hwɛ hwàanà hwa ama Abràhamù.

Yòwanìrzɛ̀ 4:10

Yerzù rzìi a mò alàhwɛ̀ nanù ema, “O hwìiyàyì tɛ jàhwèyà ja ama Lohwɛ̀, rzìi ò hwiya hvɛ njɛnɛ ema a òhweyà à mà ò nò ŋgbe malìhwà mà lì nyɔ, ò ma ò wa ò nò ijò malìhwa. Ndèŋgàna ò ma imba na ò ŋgbèelì malìhwa ema mà ŋgba lòŋgɛ.”

Yòwanìrzɛ̀ 4:14

Ndi tɔ̀ njɛnɛ ema a nyɔ̀lì malìhwa ema imba na mò ŋgba, a rza ò hwɛnɛ ahwɛ̀nɛ̀ nyìrzɛ hvɛ. Maŋga malìhwa ema imba na mò ŋgba, ma hwɛ ndi ò tenì ya eni nàa itùŋgu ema i rza hwànja. Maŋga malìhwà mà mò ŋgba lòŋgɛ la gbìndèyà.”

Yòwanìrzɛ̀ 7:37

Wùnyà wò lìrzukù wò e ndèma ema wò ma hwɛ wùnyà wò menya wò ma uka. Yerzù à mà tɛ̀mɛ̀nɛ ò ŋmanyu rzìi a òhwa na lìlò lì karzami nanù ema, “Tɔ̀ ima mɔ̀ ema a hwèya e nyìrzɛ̀ ya malìhwa, a nò jèeya a nyɔ.

Ròmànì 4:12

Èŋge e ma gbèyɛ̀nɛ hvɛ ndi nanù aŋga nanù Abràhamù à hwɛ hvɛ ndi è tatɛ̀ yà hwaŋga ema hwà mà endàhwɛ̀, ema wɔ̀ hvɛ hwa lòkɛ̀ Lohwɛ̀ na òma Abràhamù e tatɛ̀ ya arzu mɔ̀ hvɛ à mà lòkɛ̀ Lohwɛ̀ e hvònda ema a rza endàhwɛ̀.

2 Tɛ̀rzàlonìyà 1:8

À ò kɔ̀kìrzɛ̀ hwatò ema hwa rzɔ̀rzì Lohwɛ̀, ndèŋgànɛ̀lɛ̀ hwa rzɔ̀rzì ò lì oŋgamà Ŋmɛ̀ndì mò Gbamù ema mò òhwa lì hvomɛ̀nɛ̀ Rzàŋgo wà arzu Yerzù.

Jèmìrzì 2:13

Èhwànja Lohwɛ̀ a rza o uŋmɛ̀lɛ̀ ììlì ja eni e hwèlì tɛ nanù ema mɔ̀ à o kàyìrzɛ e mòtò ema mɔ̀ à rza uŋmɛ̀lɛ̀ ohvɛhvɛ ììlì. Ndi e mòtò ema a hwɛnelì hwahvɛhvɛ hwatò ììlì, mɔ̀ à rza o òka wɔ̀ŋgɔ̀ o wùnyà ema Lohwɛ̀ a o mo kàyìrzɛ.

Jèmìrzì 3:6

Ndèŋgànɛ̀lɛ̀ jɛ̀ɛ̀mɛ̀ jɔ̀ hvɛ i gbèyi ndi nàa mùnya. I hwèlì ndi enama o e nyo ya mòtò wa hwènàmà, ndeŋgànɛlɛ i gbeyà wòhwe wo kànèyà e nyo ya arzɛ ya e mòtò wa hwènàmà. Jɛ̀ɛ̀mɛ̀ i gbeyà lòŋgɛ la e mòtò wa hwènàmà lì gbeyà ndi o a ɛnɛ oma lì oŋwa ndi mùnya. Moŋgo mùnya mo uwɛ̀lɛ̀lɛ̀yi ndi o yulu ya mùnya ema mo rza lìma.

Hwèwulùwèlì 19:20

Rzìi hwa lɛmbɛ eŋge nyàmà yà wòhwe nà hwà-òhwèlì hwa hwèlìŋgɛ̀ hwa mòlàŋgà. Oŋgo mòòhwèlì wà èlìŋgɛ̀ wà mòlàŋga à mà hwɛ ò worzo wò eni, à mà hwɛ lì uŋmɛ̀lɛ̀ embànelì ò lì lùkɛ̀lɛ̀lɛ̀ hwatò ema hwa mà luwɛ eembànelì yà eŋge nyàmà yà wòhwe ndèŋgànɛ̀lɛ̀ hwa mà hwɛ lì kanɛ̀ eŋge elìŋgɛ̀. È hvonda ema hwà mà hwɛ lòŋgɛ hwà mà hwa hvimba wɔ̀ hwahwàkɛ o tenì ya ehvɔ̀ndi ya mùnya, ndèŋgànɛ̀lɛ̀ hwà mà rzeeya na mùùnya ema mo ma hwɛ lì tumbana rzayi-rzayi.

Hwèwulùwèlì 20:15

Tɔ̀ njɛnɛ ema lìinà là eni lì rzi tìlahwɛ ò tenì yà è kààtì yà lòŋgɛ, à ò hvìmbàhwà ò tenì yà yùlu yà mùnya.

Hwèwulùwèlì 22:1

È aŋgèlì rzìi e no uŋmɛ̀lɛ̀ morzo mo malìhwa ema mo gbeyà mòtò a hwɛ lòŋgɛ natɛ̀ɛ na o gbìndèyà, ndèŋgànɛ̀lɛ̀ mo uŋmɛ̀lɛ̀ ndi ŋgɛyi-ŋgɛyi nàa lìyɛni. Maŋga malìhwà ma mà uwɛ̀lɛ̀lɛ̀yi ndi o e konda ya lìkànèyà la ama Lohwɛ̀ na e Ŋgumà ya Mɔ̀lɛ̀ŋgù,