Kòlòrzìyà 4:12 - Mokpwe: Bakwery (New Testament)

¹² Èpàhvràrzì mɔ̀ hvɛ a e omelì ikɔ̀mi. Mɔ̀ hvɛ a hwèlì ndi mòtò ema a uwɛ̀lɛ̀lɛ̀yi o mbowà ndɛnɛ ya anyu ndeŋgànɛlɛ a hwèlì ndi mògbèèlì wa ama Yerzù Krirztò. Mɔ̀ a e kànɛlɛlɛ ihvonda ja arzɛ. Inyɛ̀ Lohwɛ̀ mɔ̀ ŋmitɛ-ŋmitɛ a gbeeye na e jɔ̀kɛ̀ eyà ema mɔ̀ à arza nanù ema inyɔ e gbeye. Ndèŋgana inyɔ e àŋgàmɛ̀nɛ̀yi lì e gbeye.

Kòlòrzìyà 4:12 Mawu Ofanana

Matiyò 5:48

È gbèèyè ndi hweyà hwe gbamù, nà òmà Tatɛ̀ wa anyu wa ŋmanyu yà lohwà mɔ̀hvɛ à hwe gbeyà.”

Lukàrzɛ̀ 1:1

Ìi Tìyòhvilɔ̀rzì: Mòtò wà èluhwe, rzayì-rzayì ja hwatò hwa mà lìya ò lì tìla mɔ̀nɔ̀ŋgèlì mò hweyà ema hwe ma gbeyɛ̀nɛ ò ìtììtènì ja àrzu.

Lukàrzɛ̀ 22:44

À mà kànɛ ije-ije, nà òmà à mà òhve, è ndùtù ò ŋmèma, etòkò ema è mà hwɛ lì mò wurzà, è mà tɔ̀ ndi nàa màtɔ̀ mà màyija ò mɔ̀nyɛ̀.

Yòwanìrzɛ̀ 12:26

Tɔ̀ ima mòtò ema à nò gbèeyà à àŋgàmɛ̀nɛ̀yi lì hwɛ è mògbèèlì wà ami. Tɔ̀ ima èki ema nà hwèlì è mògbèèlì wa ami mɔ̀ hvɛ à àŋgàmɛ̀nɛ̀yi lì hwɛ aŋga. Tɔ̀ ima mɔ̀ ema à nò gbèèlì, Tatɛ̀ wa ami à mò ŋgbà èluhwe.

Ròmànì 15:14

Wònyàmòwe kòkò imba mbiti ò tɛ̀ɛ̀tɛ̀ɛ na hwi nanù ema inyɔ hwiti e òhvi mèèmà me gbamù ò lì gbeyà hweyà ema Lohwɛ̀ a arza nanù ema e gbeye, e rzɔ̀ŋgìtɛ̀nɛ̀ hweyà gbamù, ndeŋgànɛ̀lɛ̀ e tànɛyi lì àwòkòlɛ̀nɛ̀ mɔ̀kɔ na ɔ̀nɛyi.

Ròmànì 15:30

Ìi wònyamòwè kòkò, ò lìna la ama e Rzaŋgò Yerzù Krirztò, ndèŋgànà lì hvòmɛ̀nɛ̀ e ndòlo ema e uwɛ̀lɛ̀lɛ̀yi ò èlìŋgɛ̀ ya eni, imba na e atɛkɛ nanù ema i late màa ò lì nò kànɛ̀lɛlɛ na ŋginyà nanù ema Lohwɛ̀ a nò òŋgòwane.

1 Kɔ̀rintìyà 14:20

Ìi wònyàmowe kòkò, e rzi hwɛ̀nɛ̀ hvɛ màlùtèyà ma hwàna. È hwɛ ndi nàa jùma hwàna ema hwa rza hwiyɛ wòhwe. Ndi o màlùtèyà ma anyu e hwɛ ndi nàa hwàmbaki hwa hwatò.

1 Kɔ̀rintìyà 2:6

I hwèlì tɛ na hwaŋga ema hwà mà jɛ̀ɛ̀ hwàmbaki o malòkɛ̀ ma awu na Yerzù, e hwèlì tɛ ema i ohwa ndi Ŋmɛ̀ndì mò Gbamù, i mo ohwàna ndi na lìhwiyè. Liŋgi lìhwiyè lì rza enje ndi lìhwiyè ema mòtò wa ene rze a gbeyàna. Tɔ̀ e lɔ ema e wɔ̀ hwa kànèyà ene rze, ema lìkànèyà la awu ŋmanà mbɔ lì kùwa.

2 Kɔ̀rintìyà 13:11

O lì umba ene kààtì, wònyamòwè kòkò, e oke mɔ̀nyɛ̀ŋgì. Nà e ohweyà ndi nanù ema e tikowe, ɛ̀ɛ̀mɛ̀ ya anyu e hwɛni lì lɔ̀wu, na arza nanù ema e òkànèyà mayowà mà ami. È hwɛnɛ ndi lì lùtèyà lɔ̀kɔ. È hwɛ o ɛ̀yɔ̀lɛ̀ mɔ̀kɔ na ɔ̀nɛyi. È gbèyi tɛ hwene hweyà hwe arzɛ, Lohwɛ̀ ema a e gbèyi ema e alìŋgànɛ na lì hwɛ o ɛ̀yɔ̀lɛ̀ mɔ̀kɔ na ɔ̀nɛyi, a o e nàmìrzɛ̀.

Gàletìyà 1:10

Nà oma na ohwa nanù, e rza ɔ̀ŋgɛ̀lɛ̀ ndi nanù ema hwatò hwa hwènàmà hwa no tuuwe lìna la gbamù. Imba na rza arza nanù. Lohwɛ̀ ndi imba na arza nanù ema a no tuuwe lìna la gbamù. È ma hwɛ tɛ nanù ema na arza ndi ema hwatò hwa hwènàmà hwa no tuuwe lìna la gbamù, o ma na rza enje ndi e mògbèèlì hwa ama Krirztò.

Gàletìyà 4:19

Ìi hwàanà hwa ami kòkò, o nyòla inyɔ na hweyà mòrziyò ema mo gbèyi ndi nàa molanà ema a hwèlì o mòrziyò mo lìyalì. Ndeŋgànɛ̀lɛ̀ na hweyà moŋgo mòrziyò natɛ̀ɛ ɛ̀ɛ̀mɛ̀ ya ama Krirztò è ò è kpèeyà gbamù.

Kòlòrzìyà 1:22

Ndi ò naŋgɛ, Lohwɛ̀ à mà gbeyà nanù ema inyɔ è mò tìmbeyà ò lì akeyà nà è kpelì yà ama è ŋmanà wà eni Krirztò ò mbàrza ema à mà ohva è nyo yà mòtò wà hwènàmà. Lohwɛ̀ à mà gbeyà ndi nanù aŋga nanù inyɔ è hwɛ ò èki ema mɔ̀ à hwèlì, inyɛ inyɔ è hwɛ hwatò ema hwa rzàŋgi, è rza àŋgàmɛ̀nɛ̀ lì hwɛnɛ tɔ̀ lìtɔ̀ti tɔ̀ lɔ̀kɔ là wòhwe ò nyo yà anyu, inyɛ hwa rza è lɛ̀mbɛ nà tɔ̀ lìtònà tɔ̀ lɔ̀kɔ.

Kòlòrzìyà 1:28

Ɔndèŋgàtɛ̀ irzɔ jò òhweyà hwatò lì hvomɛ̀nɛ̀ Krirztò tɔ̀ ima èki ema jè ɛndɛ. I hwa kòkòwɛ̀lɛ̀, nà lì hwa okòlɛ nà lìhwiyè là arzɛ ema Lohwɛ̀ à mà jò ŋgbɛ. Irzɔ i gbeyà ndi nanù ehwànja ja arza ndi nanù ema wɔ̀ hwa èmàyɛ̀lɛ̀ ò worzo wò ama Lohwɛ̀ nàa hwatò ema màtàŋga mà awu ma mà màa lì imbami ò tenì yà lì lòkɛ̀.

Kòlòrzìyà 1:29

Ò lì gbeyà ene èwòlò, imba nà atàkìrzɛ̀ rzàyi-rzàyi ò lì è gbeyà, è ŋginyà yà ama Krirztò ema è hwèlì ò tenì yà ami yɔ̀ ndi è nò ŋgba è ŋginyà è mà nà atàkìrzɛ̀nɛ̀.

Kòlòrzìyà 1:7

Èpàhvràrzì, è mògbèèlì wà ama Yerzù Krirztò, mɔ̀ ndi à mà è ohweyà moŋgo ŋmɛ̀ndì. À hwèlì ndi mòtò ema i gbeyànɛlɛ èwòlò ndeŋgànɛlɛ ì mò lìŋgàni rzàyi-rzàyi. À gbèeyà ndi Yerzù Krirztò èwòlò nà ŋmèma mɔ̀kɔ. Nà oma à hwèlì nà inyɔ, èwòlò ema ì mà hwɛnɛ lì gbeyà yɔ̀ ndi mɔ̀ à hwèlì à gbeyà nanù.

Kòlòrzìyà 1:9

Ò lìni lìtiŋgà rzɔ, irzɔ i hwèlì jè è kànɛ̀lɛ̀lɛ̀ tɔ̀ ima hvonda. Ì kanɛ̀ nanù ema inyɛ Lohwɛ̀ à gbèye inyɔ è rzɔ̀ŋgìtɛ̀nɛ̀ kɔ̀yi-kɔ̀yi eyà ema mɔ̀ à arza nanù ema è gbèyè. Ì kanɛ̀ nanù ema Lohwɛ̀ à è ŋgbe lìhwiyè nà lì rzɔ̀ŋgìtɛ̀nɛ̀ aŋga nanù è rzɔ̀ŋgìtɛ̀nɛ̀ gbamù eyà yà Èlìŋgɛ̀.

Kòlòrzìyà 4:9

Nà mò òma nà Ònɛ̀rzìmùrzì. Ònɛ̀rzìmùrzì mɔ̀ hvɛ à hwèlì ndi ŋmanyàŋgò wà arzu wà Krirztò ema i lìŋgàni, mɔ̀ hvɛ à gbèeya ndi Krirztò nà ŋmèma mɔ̀kɔ. À hwèlì ndi mòtò ema à uwɛ̀lɛ̀lɛ̀yi ò mbowà ndɛnɛ yà anyu. Mɔ̀ nà Tàyìkìkùrzì hwa è ohweyà hweyà ema hwe gbèyɛ̀nɛ anu.

1 Tɛ̀rzàlonìyà 5:23

Inyɛ̀ Lohwɛ̀ mɔ̀ ŋmìti ema a jo ŋgba ɛ̀yɔ̀lɛ̀ inyɛ a gbeeye inyɔ e hwɛ wòtani o hweyà hwe arzɛ. Inyɛ̀ e tɛ̀yirzɛ èlìŋgɛ̀ na inyɔ hwa arzɛ gbamù, ndèŋgànɛ̀lɛ̀ e rzi hwɛnɛ tɔ̀ lìtɔ̀tì tɔ̀ lɔ̀kɔ la màatò ma wòhwe o nyo ya anyu natɛ̀ɛ na e hvonda ema e Rzàŋgo ya arzu Yerzù Krirztò a o jɛ̀ɛ̀.

Hvìlɛ̀mɔ̀nì 1:23

Èpàhvràrzì, ema à hwèlì nà imba ò hwèwòwà ò lìnà là ama Yerzù Krirztò, mɔ̀hvɛ à è òmèlì ikɔ̀mi.

Hibrù 5:14

Molelì ema mo eti mo hwèlì ndi o hwatò ema hwà mà kòkɛ. Mòtò ema à mà kòkɛ rzɔ̀ a hwèlì ndi mòtò ema a ma okowɛ ndèŋgànɛ̀lɛ̀ a hwi hweyà ema hwe hvomɛ̀nɛ̀ na e hweyɔ ema hwe rza hvomɛ̀nɛ̀.

Hibrù 5:7

È hvonda ema Yerzù à mà hwɛ ò è rze yà mɔ̀nyɛ̀, à mà hwɛ lì kànɛ, lì atɛkɛ Lohwɛ̀, à mà hwɛ lì eeya lùwa lì ndɛnɛ, ndèŋgànɛ̀lɛ̀ mììrzɔ̀lì ma mà hwɛ lì mò wurza. À mà hwɛ lì kànɛ̀lɛ̀lɛ̀ Lohwɛ̀ ema à tanɛyi lì rzùŋga lòŋgɛ là eni. Lohwɛ̀ à mà hweyàna lìkanɛ̀ là eni, èhwanja mɔ̀ à hwɛni wɔ̀ɔ̀ŋgɔ̀ wo ama Lohwɛ̀ o tenì ya eni.

Jèmìrzì 1:1

Imba Jèmìrzì e mògbèèlì wa ama Lohwɛ̀ na Rzàŋgo Yerzù Krirztò ndi na tilì ene kààtì. Nà e kɔ̀mi inyɔ hwa arzɛ lìyomɛ la matumba na mahwakɛ ma wonyà Irzàyɛ̀lì ema e bùhwèlì o e rze ya mɔ̀nyɛ̀ ya arzɛ.

Jèmìrzì 1:4

Inyɛ̀ mèèmà me anyu me e ete natɛ̀ɛ na o lìrzùkù, aŋga nanù ɛ̀ɛ̀mɛ̀ ya anyu e hwɛ gbamù ndèŋgànɛ̀lɛ̀ e onda, aŋga nanù e rza hwɛnɛ tɔ̀ ɛ̀ɛ̀mɛ̀ ya wòhwe o mòŋgɛ ma anyu.

Jèmìrzì 5:16

O eŋgànɛ̀lɛ rzɔ, e àpùrzɛ̀lɛ̀nɛ̀ wòhwe hwa anyu mɔ̀kɔ na ɔ̀nɛyi ndèŋgànɛ̀lɛ̀ inyɛ tɔ̀ ima mòtò a kànɛlɛlɛ ŋmanyàŋgò wa eni, aŋga nanù inyɔ hwa arzɛ e wɔ̀wìrzɛ̀hwɛ. Màkanɛ̀ ma e mòtò ema a gbeyà hweyà hwe jɔ̀kɛ̀ o worzo wo ama Lohwɛ̀ hwe imbami rzàyi-rzàyi, ndèŋgànɛlɛ ma ɛndeya.

2 Pètrò 1:1

Imba Rzimɔ̀ni Pètro ema nà hwèlì è mògbèèlì nà è àpɔ̀rzìtòlò yà ama Yerzù Krirztò, nà è tìleyà ndi inyɔ hwatò ema è lòkɛ̀ Yerzù Krirztò nyayi hvɔ̀kɔ hvɛ nà oma irzɔ hvɛ ì mò lòkɛ̀. Yerzù Krirztò ndi à hwèlì Lòohwà nà Mòrzùŋgèlì hwa arzu. Mɔ̀ à tɛ̀mì ehve-ehve. Ndeŋgànɛ̀lɛ̀ mɔ̀ ndi à gbèyi ndèŋgànà irzɔ hwa arzɛ jè è mò lòkɛ̀.

Judɛ 1:24

Èluhwe e hwɛ na Lohwɛ̀ ema a rza emeyà nanù ema e unde o tenì ya wòhwe. Mɔ̀ ŋmìti ndi à e jàni o èki ema mɔ̀ à hwèlì na ŋmàye mo eni. A o e jànà aŋga e rzi hwɛ tɔ̀ lìtɔ̀tì tɔ̀ lɔ̀kɔ la wòhwe o inyo ja anyu, ndèŋgànɛ̀lɛ̀ e o òka mɔ̀nyɛ̀ŋgì.