Hwèwulùwèlì 4:5 - Mokpwe: Bakwery (New Testament)

⁵ O eŋge konda ya lìkànèyà, lìŋmɛti lì ma hwɛ lì wurza, mɔ̀tɔ̀wù mo ma hwɛ lì wurza, ndèŋgànɛ̀lɛ̀ e ŋgala lohwà yɔ hvɛ e ma hwɛ lì kèhwa. Lìrzàmba la mekàko ema me ma hwɛ lì hvàyèya, lì ma hwɛ o worzo wo eŋge konda ya lìkànèyà. Liŋgi lìrzàmba la mekàko lì hwèlì ndi lìrzàmba la hwèlìŋgɛ̀ hwe ama Lohwɛ̀.

Hwèwulùwèlì 4:5 Mawu Ofanana

Matiyò 25:1

Yerzù à mà kpɛɛ mɔ̀ hvɛhvɛ ŋmàna ò lì òhwa nanù ema, “Ò eŋge hvònda ema è Ŋmanà wà è Mòtò wà Hwènàmà à ò jɛ̀ɛ̀, lìkànèyà là ŋmanyu lì ò hwɛ ndi nàa lìyòmɛ̀ là mèyɔ̀mbɔ̀ mè ŋgɔ̀ndɔ̀ ema hwa mà wòwà hwètùlù hwe awu ò lì ɛ̀ndɛ lì ambɛlɛlɛ è mòhwayèlì ò lì ɛndɛ lì mò lìyɛlɛ.

Matiyò 3:11

Imba nà è lùhwìrzɛ̀ nà malìhwa ò lì uŋmɛ̀lɛ̀ nanù ema è mà ayèŋgòwɛ̀ ò wòhwe wò anyu. Ndi òhvɛhvɛ mòtò à hwèlì à jà ema à nò akàyi. Ema imba nà rza ukɛ hvɛ tɔ̀ mòtò ema à tanɛ lì hwànɛ hwètàmbì hwe eni. Mɔ̀ à è lùhwìrzɛ̀ ndi nà Èlìŋgɛ̀ yà Wòtani nà mùùnya.

Hwègbèèlì 2:3

Aŋga ndi wɔ̀ hwà mà ɛnɛ hwema nàa mùnya ema mò ma ayèkɛnɛ̀ mekakò me tɛmi ò mèyòhvò me tɔ̀ ima mòtò.

Hwèwulùwèlì 1:4

Imba Yòwanìrzɛ̀, nà tìlèlì mììtèlì lìrzàmba ema mè hwèlì ò erzòòkà yà Èrzìyà. Inyɛ̀ è ndèli nà ɛ̀yɔ̀lɛ̀ yà ama Lohwɛ̀, è hwɛ nà inyɔ. Lohwɛ̀ ema à hwèlì, ema à mà hwɛ, nà è mɔ̀ ema à ò hwɛ̀ɛ̀, ndèŋgànɛ̀lɛ̀ hwèlìŋgɛ̀ lìrzàmba hwa è omèlì è ndèli nà ɛ̀yɔ̀lɛ̀. Hweŋge hwèlìŋgɛ̀ hwe hwèlì ò worzo wò è konda yà lìkànèyà yà è ŋmanyu yà lohwà.

Hwèwulùwèlì 10:3

Rzìi à tɛɛ nà lìlo ema lì kàrzàmi nàa njilà ndi è rziŋga. Ò mburzà hwètɛ̀ɛ̀lì hwe eni, màlo mà lìrzamba là ŋgalà lohwà ma mà rzìŋga.

Hwèwulùwèlì 11:19

Aŋga ndi nà à ɛnɛ è Ndawò yà Lohwà ema è hwèlì ò ŋmanyu yà lohwà yà à lìhvoweya. Ndeŋgànɛ̀lɛ̀ ò tenì yà eŋge Ndawò yà Lohwà, nà mà ɛnɛ Iwòŋgo jà eni jà Yòmbo. Lìŋmɛti lì mà aka, mɔ̀tɔ̀wù mòndɛnɛ mò mà wurza ò ŋmanyu, è ŋgalà yà lohwà è mà kàndeyà, mònyìŋgìrzɛ̀nɛ̀ mò mà hwɛ, ndèŋgànɛ̀lɛ̀ è mbuwà yà màŋyàyi màndɛ̀nɛ̀ è mà yɔ̀ɔ̀.

Hwèwulùwèlì 3:1

Oŋgo mòtò ema à mà àyɛ̀kɛ̀nɛ̀ è mòtò wà hwènàmà à mà nò òhweyà nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàdìrzì nanù ema, “Mono ŋmɛ̀ndì mò uwɛ̀lɛ̀lɛ̀yi ndi nà imba ema nà tɛtì lìrzàmba là hwèlìŋgɛ̀ ema hwe uwɛlɛlɛyi o ma Lohwɛ̀, ndèŋgànɛ̀lɛ̀ hvɛ nà tɛ̀tì lìrzàmba là rzòmbe. Nà hwi èwòlò ema inyɔ è gbeyà. Hwàto hwa ohwa nanù ema è hwèlì lòŋgɛ ndi inyɔ è rza enje lòŋgɛ.

Hwèwulùwèlì 5:6

Nà mà ɔ̀ŋgɔ rzìi na ɛnɛ e Ŋguma ya Mɔ̀lɛ̀ŋgù, e tɛmi o ìtììtènì ja e konda ya lìkànèyà ema e tòŋgahwi na hweŋge hwèembè hwe àniiyɛ na hwàmbaki. Èŋge Ŋguma ya Mɔ̀lɛ̀ŋgù e ma ɛneya ndi nàa e mɔ̀ ema hwà mà oŋwe. È ma ohva lìrzamba la merzehwa na lìrzamba la mìirzɔ̀. Lìŋgi lìrzàmba la mirzɔ̀ lɔ ndi lì hwèlì lìrzàmba la hwèlìŋgɛ̀ la ama Lohwɛ̀ ema Lohwɛ̀ à mà ome o tenì ya e rze ya mɔ̀nyɛ̀ ya arzɛ.

Hwèwulùwèlì 8:5

Èŋge aŋgèlì rzìi e wowa eŋge ewoki ya gòòlù ema itùwà i ma onde o tenì, a e ondìrzɛ̀ na mùùnya ema mo ma uwɛ̀lɛ̀lɛ̀yi o ètàwo ya itùwà, rzìi a e koma o e rze ya mɔ̀nyɛ̀. Ène eyà e ma gbeyà e ŋmanyu yà lohwà e ma hwɛ lì kèhwa, mɔ̀tɔ̀wu mo a wurza, lìŋmɛti lì ma mɔ̀tɛ̀lɛ̀ mònyìŋgìrzɛ̀nɛ̀ hvɛ mo hwɛ.