Hwèwulùwèlì 19:9 - Mokpwe: Bakwery (New Testament)

⁹ Èŋge aŋgèlì rzìi e no ohweyà nanù ema, “Tila nanù ema, mònàmɛ̀ na hwaŋga ema hwa yowɛhwɛyi o e ndèma ya lìhwa ya ama e Ŋguma ya Mɔ̀lɛ̀ŋgù.” Èŋge aŋgèlì rzìi e lata hvɛ o lì ohwa nanù ema, “Hwene hweyà hwe jɔ̀kɛ̀ hwe uwɛ̀lɛ̀lɛ̀yi ndi o ma Lohwɛ̀.”

Hwèwulùwèlì 19:9 Mawu Ofanana

Lukàrzɛ̀ 22:16

Nà è jɔ̀kɛ̀ nà è òhweyà naŋgɛ ema nà rza mò làa hvɛ, natɛ̀ɛ na e hvònda ema hwe òndìrzɛ̀hwɛ̀ ò Lìkànèyà là ama Lohwɛ̀.”

1 Tìmotì 1:15

Hwèyòhwèlì hwe jɔ̀kɛ̀ hwène, ema irzɔ i hwɛni lì èmeyà nà lì lòkɛ̀ kɔ̀yi-kɔ̀yi. Yerzù Krirztò à mà jà ò rze ò lì rzùŋga hwatò hwa wòhwe. Imba ndi nà hwèlì è mɔ̀ ema wòhwe wò eni wò koki lì aka wòhwe wò hwahvɛhvɛ hwatò.

1 Tìmotì 4:9

Ène eyà ema na ohwi nanù e hwèlì ndi e jɔ̀kɛ̀, e hwɛni lì e lòkɛ̀.

2 Tìmotì 2:11

Hwene hweyohwèlì hwe hwèlì ndi e jɔ̀kɛ̀ nanù ema, “È hwèlì tɛ ema, irzɔ i ŋwelì na Krirztò, nanù oma jo ò hwɛ o lòŋgɛ na mɔ̀.

Tàyìtùrzì 3:8

Hwène hweyà hwe arzɛ ema nà mà ohwɛ hwe hwèlì ndi e jɔ̀kɛ̀. Nà arza ema e ùkirzɛ̀lɛ̀lɛ̀ hwene hweyà nɔ̀ke-nɔ̀ke aŋga nanù, hwaŋga ema hwà mà lòkɛ̀ Lohwɛ̀ hwa o aŋgowa o lì aŋgbɛ wɔ̀ hwiti o lì gbeyà mamɛ ema e hvomɛ̀nɛ̀. Nànù ndi i gbeye ndèŋgànɛ̀lɛ̀ nanù ndi hwe jànà hwatò hwa arzɛ mɔ̀rzɛ̀ŋgi.

Hwèwulùwèlì 1:1

Ène kààtì e ohwa ndi lì hvomɛ̀nɛ̀ hweyà ema hwe o gbèyɛ̀nɛ ema Yerzù Krirztò a gbèyi ndèŋgànà hwe o e hwiyɛnɛ. Lohwɛ̀ à mà mo ŋgba hwene hweyà nanù ema hwe hwiyɛnɛ aŋga nanù mɔ̀ à uŋmɛ̀lɛ̀ hwàgbèèlì hwa eni hweyà ema hwe o gbèyɛ̀nɛ ŋmanà mbɔ. Krirztò à mà gbeyà e mògbèèlì wa eni Yòwanìrzɛ̀ o lì hwiye hwenè hweyà na oma à mà mo òmeya e aŋgèlì ya eni.

Hwèwulùwèlì 1:19

O eŋgànɛ̀lɛ̀ rzɔ, tìla mamɛ ema o ma ɛnɛ, ema hwe hwèlì hwe gbèyɛ̀nɛ naŋgɛ ndèŋgànɛ̀lɛ̀ ema hwe o gbèyɛ̀nɛ.

Hwèwulùwèlì 10:4

Nà oma lìrzamba là ŋgalà yà lohwà lì mà rzìŋge, nà mà arza lì wòteyà lì tìla hweyà ema lì mà ohwe. Ndi nà mà hweyà lìlo lì mà uwɛ̀lɛ̀lɛ̀yi ò ŋmanyu yà lohwà lì ohwa nanù ema, “È utè hweyà ema lìrzamba là ŋgalà lohwa lì mà ohwɛ, hwe àŋgàmɛ̀nɛ̀yi ndi lì hwɛ wùndɛ̀, ndèŋgànɛlɛ o rzi hwe tìla o rze.”

Hwèwulùwèlì 14:13

Rzìi nà hweyà lìlo lì uwɛ̀lɛ̀lɛ̀yi ò ŋmanyu yà lohwà lì ohwa nanù ema, “Tìla ò rze nanù ema, ò lì wòteyà nàŋgɛ, mònàmɛ̀ nà hwatò ema hwa ŋwelì, ehwànja hwa lòkɛ̀yì è Rzàŋgo.” Èlìŋgɛ̀ yà wòtani è ohwi nanù ema, “Ɛ̀ɛ̀, wɔ̀ hwa ò lùwa lì arzìyòlɛ̀ ò nyòla èwòlò ema hwa mà gbeyɛ, ndèŋgànɛ̀lɛ̀ hwa ò lùwa mòrzàhwèlì ò nyòla hwèwòlò hwe gbamù ema hwa mà gbèyɛ.”

Hwèwulùwèlì 17:1

Mɔ̀kɔ wa iŋgi aŋgèlì lìrzàmba ema i ma ohva hwewoki lìrzàmba e no jèeya rzìi e no ohweyà nanù ema, “Jà ono, na uŋmɛ̀lɛ̀ nɛ e molanà wa àkpàlà ndɛnɛ a o kɔ̀kìrzɛ̀hwɛ̀. Oŋgo molanà wa àkpàlà ema a lìya o mbowà ndɛɛndɛ ema e hwèlì o toŋgoŋgo ya rzayi-rzayi ja meyorzo.

Hwèwulùwèlì 17:17

Hwa ò gbeyà ndi nanù ehwànja, Lohwɛ̀ à mà ika nà oma mɔ̀ àrzeyà nanù ema hwa gbèèyè ò mèèmà mè awu. Lohwɛ̀ à mà rzèkeyà nanù ema hwèŋge hwèembe hwe ohve ndi janda jɔ̀kɔ, ò lì mò gbèeyà nàa mòtò mɔ̀kɔ. Wɔ̀ hwa ò ŋgba eŋge nyàmà yà wòhwe màyìmbì mà awu mà lìkànèyà natɛ̀ɛ nà ò è hvonda ema hweyà ema Lohwɛ̀ à mà ohwe hwe ò ondìrzɛ̀hwɛ̀.

Hwèwulùwèlì 2:1

Oŋgo ema à mà àyɛ̀kɛ̀nɛ̀ è mòtò wà hwènàmà rzìi à nò òhweyà nanù ema, “Tìleyà è aŋgèlì ema è hwèlì ò ŋmèmba mò Ɛ̀hvɛ̀rzɔ̀rzì nanù ema, è mòtò ema à tɛ̀tì lìrzàmba là rzòmbe ò lìya là enì là momɛ̀, ema à ɛ̀ndeyà ò ìtììtènì jà lìrzamba là mboko jà gòòlù ema jò ohvi hwètùlù, mɔ̀ ndi à omi mono ŋmɛ̀ndì.

Hwèwulùwèlì 2:12

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba mò Pɛ̀gàmùmì nanù ema, “‘Mono ŋmɛ̀ndì mò uwɛ̀lɛ̀lɛ̀yì ndi nà è mɔ̀ ema à ohvi è rzɔ̀lɔ̀ ema yè èeyà hwèhvàrzù hwe ahwàkɛ.

Hwèwulùwèlì 2:18

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba mo Tìyatìrà nanù ema, “Mono ŋmɛ̀ndì mò uwɛ̀lɛ̀lɛ̀yi ndi ò mà è Ŋmàna wà ama Lohwɛ̀, ema mììrzɔ̀ mà eni mà tèeyà ndi nàa mùnya ema mò òŋwa, matàŋga mà eni hvɛ mà ɛneyà ndi nàa ɛ̀ɛkɛ̀ ema è hwɛ̀lɛ̀hwɛ̀ brɔ̀nrzi ema è hvànya.

Hwèwulùwèlì 2:8

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàmàyinà nanù ema, “È mòtò ema à hwèlì è wà worzo ndèŋgànɛ̀lɛ̀ à hwèlì è mòtò ema à hwèlì è wà lìrzùkù, mɔ̀ ema à mà ŋwa ndèŋgànɛ̀lɛ̀ à hwèlì ò lòŋgɛ hvɛ, mɔ̀ ndi à omi mono ŋmɛ̀ndì.

Hwèwulùwèlì 21:5

Mɔ̀ ema à mà lìyà o konda ya lìkànèyà rzìi a ohwa nanù ema, “È ɔŋgɔ tɛ nà mà gbeyà hweyà hwe arzɛ hwe hvènya!” Rzìi à no ohweyà hvɛ nanù ema, “Tila hwene hweyà ehwànja hwene hweyà ema na ohwa hwe hwèlì ndi e jɔ̀kɛ̀ ndèŋgànɛlɛ hwe hwèlì ndi hweyà ema tɔ̀ ima mòtò a àŋgàmɛ̀nɛ̀yi lì lòkɛ̀.”

Hwèwulùwèlì 22:6

È aŋgèlì rzìi e no òhweyà nanù ema, “Hwene hweyà ema na o ohweyà hwe hwèlì ndi e jɔ̀kɛ̀ o eŋgànɛlɛ e àŋgàmɛ̀nɛ̀ lì hwe lòkɛ̀. È Rzàŋgo, Lohwɛ̀ ema a ŋgbàà hwà-òhwèlì hwa hwèlìŋgɛ̀ elìŋgɛ̀ ya eni, aŋga nanù hwa ohwa ŋmɛ̀ndì mo eni, mɔ̀ à mà oma e aŋgèlì ya eni o lì uŋmɛ̀lɛ̀ hwàgbèèlì hwa eni hweyà ema hwe o gbèyɛ̀nɛ ŋmanà mbɔ̀.”

Hwèwulùwèlì 3:1

Oŋgo mòtò ema à mà àyɛ̀kɛ̀nɛ̀ è mòtò wà hwènàmà à mà nò òhweyà nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàdìrzì nanù ema, “Mono ŋmɛ̀ndì mò uwɛ̀lɛ̀lɛ̀yi ndi nà imba ema nà tɛtì lìrzàmba là hwèlìŋgɛ̀ ema hwe uwɛlɛlɛyi o ma Lohwɛ̀, ndèŋgànɛ̀lɛ̀ hvɛ nà tɛ̀tì lìrzàmba là rzòmbe. Nà hwi èwòlò ema inyɔ è gbeyà. Hwàto hwa ohwa nanù ema è hwèlì lòŋgɛ ndi inyɔ è rza enje lòŋgɛ.

Hwèwulùwèlì 3:14

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Làwòdèrzìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì, Inyɛ̀ wò Lìya Nànù. Mɔ̀ à gbeyà ndi nà oma Lohwɛ̀ à àrzeyà, à hwèlì ndi mboŋgi ya jɔ̀kɛ̀, ndèŋgànɛ̀lɛ̀ ò lì akeyà nà mɔ̀, ɔndi Lohwɛ̀ à mà wèkè hwèèmà hwe arzɛ natɛ̀ɛ nà ò hwèwòtèlì.

Hwèwulùwèlì 3:20

È ɔŋgɔ tɛ. Nà tɛmi o lìyohva la anyu ndèŋgànɛ̀lɛ̀ na hwèlì na lì kumba. Tɔ̀ njɛnɛ ema a hweyi lìlo la ami, rzìi a lìhvowa lìyohva, imba na kpèeyà, ndèŋgànɛ̀lɛ̀ na laa mòlelì na mɔ̀, ndèŋgànɛlɛ mɔ̀ hvɛ a laa mòlelì na imba.

Hwèwulùwèlì 3:7

À mà nò òhweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Hvìladɛlhvìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì wòtani nà jɔ̀kɛ̀. Mɔ̀ à hwɛni màyìmbì ò lì kànèyà nyayi hvɔ̀kɔ nà oma kìŋgɛ Dàhwitì à mà hwɛ lì kànèyà. Mɔ̀ à lìhvo tɛ lìyòhva tɔ̀ mòtò à rza tànɛ à lì umba, ndèŋgànɛlɛ à umbi tɛ lìyohva tɔ̀ mòtò à rza tànɛ à lì lìhvowa.