Hwèwulùwèlì 13:1 - Mokpwe: Bakwery (New Testament)

¹ Rzìi na ɛnɛ èembe e wurza o tenì ya ŋmàànja. Èŋge èembe e ma hwɛnɛ lìrzàmba la mèyòhvò na lìyomɛ̀ la mèrzehwa, na lìyomɛ la hwèkòòtò o merzehwà mà eni. Tɔ̀ ima mòohvo mo mà ohva lìnà ema lì hwɛnyɛ Lohwɛ̀.

Hwèwulùwèlì 13:1 Mawu Ofanana

Hwèwulùwèlì 11:7

È hvonda ema wɔ̀ hwa ò kulɛ ò lì ohwa hweyà ema hwa mà ohwahwɛlɛ ò lì ohwa, eŋge èembe ema è ò uwɛ̀lɛ̀lɛ̀yi ò tenì yà ehvɔ̀ndi ema è rza ohvɛ lìrzùkù è ò hwa urzùweyà. Èŋge èembè è ò hwa aka màyìmbì ndeŋgànɛlɛ è hwa oŋwa.

Hwèwulùwèlì 12:3

Èhvɛhvɛ embànelì ya mànyàkà e ma wurza o ŋmanyu yà lohwà. Aŋga ndi e dragɔ̀ni ya a wurza jègba. È ma olowa rzayi-rzayi ndèŋgànɛ̀lɛ̀ e ma teya. È ma hwɛnɛ lìrzamba la mèyòhvò na lìyome la merzehwa. Tɔ̀ ima mohvo ma mà wɔ̀tɔ̀ ekooto.

Hwèwulùwèlì 13:11

Nà mà ɛnɛ èhvɛhvɛ èembe, ema è mà wurza ò rze yà mɔ̀nyɛ̀. È mà ohva mèrzehwa mèhwàkɛ̀ nàa ŋmɛ̀ŋgɛ mò è Ŋguma yà Mɔ̀lɛ̀ŋgù, ndi è mà ohwa ndi nàa è dragɔ̀ni.

Hwèwulùwèlì 13:14

Ò nyòla yà hweyà hwe mànyaka ema à mà ŋgbààhwe è wònjà ò lì gbeyà, eŋge èembe yà worzo, yɔ̀ à mà lùkɛ̀lɛ̀ hwatò hwa è rze yà mɔ̀nyɛ̀. Ndeŋgànɛ̀lɛ̀ mɔ̀ à ma hwɛ ndi lì gbeyà nanù ò worzo wò eŋge èembe ema è mà ohva èhwènà ndɛnɛ. À mà òhweyà hwatò nanù ema hwa wondɛ èrzìrzà ema wɔ̀ hwa ò kanɛ̀, ema è àyɛ̀kɛ̀nɛ̀ eŋge èembe ema è mà ohva èhwènà yà rzɔ̀lɔ̀ ndi tɔ̀ nanù è e hwèlì lòŋgɛ.

Hwèwulùwèlì 13:15

Èèmbe ema è ùkirzɛ̀ hwehwàkɛ è mà ŋgbààhwà wònjà ò lì rzìyoweya mùùlù mò lòŋgɛ ò eŋge èrzìrzà yà eŋge èembe yà worzo. È mà gbeyà ndi nanù, aŋga nanù eŋge èrzìrzà è ohwa ndèŋgànɛ̀lɛ̀ è ò oŋwa hwatò hwa arzɛ ema hwa rza èmèlɛ̀ lì è kanɛ̀.

Hwèwulùwèlì 15:2

Nà ma ɛnɛ yoma nàa ŋmànja ema mo àyɛ̀kɛ̀nɛ̀ lìyɛ̀ni, ema mo hviyànɛlɛhwɛyi na mùnya. Ndeŋgànɛ̀lɛ̀ nà mà ɛnɛ hwatò hwa tɛmì o toŋgoŋgo ya eŋge yoma ema e ma hwɛ ndi nàa ŋmànja hwa tɛ̀tì indiŋga ja ama Lohwɛ̀. Hwàŋga hwatò hwa hwèlì ndi hwatò ema hwà mà rzuwàna eŋge èembè, na èrzìrzà ya eni, ndèŋgànɛ̀lɛ̀ hwà mà rzuwàna hvɛ mɔ̀rzɔ̀ŋgi mo lìinà la eŋge èembè ya worzo.

Hwèwulùwèlì 16:13

Rzìi na ɛnɛ hwèlìŋgɛ̀ hweyàwò hwe wòhwe, ema hwe ma akɛnɛ hwètɔ̀lɔ̀lɔ̀ hwe ma hwɛ lì wurza. Hweŋge hwèlìŋgɛ̀, yɔ̀kɔ e ma wurza o e wàna ya e dragɔ̀ni, yɔ̀kɔ e ma wurza o e wàna ya eŋge èembè ema e ma uwɛlɛlɛ o ŋmànja, ndèŋgànɛ̀lɛ̀ inɛyi jɔ̀hvɛ i ma wurza o e wàna ya e mòòhwèlì wà èlìŋgɛ̀ wa mòlàŋgà.

Hwèwulùwèlì 17:16

Lìyome là mèrzehwa ema ò ɛ̀neyàyi nà eŋge nyàmà yà wòhwe hwe ò kɔ̀ɔ̀ oŋgo molanà wà àkpàlà. Hwe ò mò wòwàna hwèèmà hwe arzɛ ema à ohvi, rzìi hwa ò mò gbeyà ò lì hwɛ mòrzombo. Hwa ò làa è nyàma nyo yà eni, ndèŋgànɛ̀lɛ̀ hwa ò mò rzɛ̀lɛ̀ ò mùnya.

Hwèwulùwèlì 17:3

Èlìŋgɛ̀ yà ama Lohwɛ̀ rzìi è nò rzìhweyà, è aŋgèlì rzìi è nò ɛndɛ̀nɛ̀ ò mòrzànjɛ. Nà mà ɛnɛ molanà mɔ̀kɔ aŋga ema à mà lìya ò ŋmanyu yà è nyàmà yà wòhwe ema è teya. Ène nyàmà è mà onda nà mìinà mà ìrzìlako ò è nyo yà eni. È mà ohva lìrzàmba là mèyòhvò nà lìyomɛ là mèrzehwa.

Hwèwulùwèlì 17:5

O ma hwɛ lìna o mbɔ̀mbɔ̀ ya eni ema e ma hwɛ ndi nàa wùndɛ̀ ema tɔ̀ mòtò a rzi hwiyɛ. Lìŋgi lìna lì ma hwɛ ndi, “Bàbìlɔ̀nì, e mbowà ndɛnɛ. È nyàŋgo ya hwalana hwa àkpàlà, na e hwa hwèèmà hwe ndɔ̀ki hwe e rze.”

Hwèwulùwèlì 19:19

Rzìi nà ɛnɛ è nyàmà yà wòhwe nà ikìŋgɛ jà è rze yà mɔ̀nyɛ̀ nà hwàànèlì hwa awu hwa njùma hwa arzàŋganɛ ò lì anàna è mɔ̀ ema à mà loma lì jà rzì à lìya ò ŋmanyu yà è wɔ̀rzi ema è tana nà hwàànèlì hwa eni hwa njuma.