Hwèwulùwèlì 12:9 - Mokpwe: Bakwery (New Testament)

⁹ Aŋga ndi hwa a hvimba eŋge dragɔ̀ni ndɛnɛ o rze ya mɔ̀nyɛ̀. Èŋge dragɔ̀ni e ma hwɛ ndi nàa gbàahwà wo e hvonda ya kòwàa ema wo ma hwɛ̀lɛ̀hwɛ̀ Dɛhvùlì tɔ̀ Mòkarzɛ̀, ema a eŋgìrzɛ̀ e rze ya mɔ̀nyɛ̀ ya arzɛ. Ndeŋgànɛ̀lɛ̀ hwà mà hvimba iŋgi aŋgèlì ja eni ja arzɛ na mɔ̀ o e rze ya mɔ̀nyɛ̀.

Hwèwulùwèlì 12:9 Mawu Ofanana

Matiyò 13:39

È mɔ̀kɔ̀yèlì ema à mà òna iŋgi hvɔ̀ŋgɔ̀ ja wòhwe a hwèlì ndi Mòkarzɛ̀. Li rzàŋga hvɛ lì hwèlì ndi lìrzukù la hvònda ndèŋgànà hwàrzàŋgèlì hwa hwèlì ndi i aŋgèlì ja ama Lohwɛ̀.

Matiyò 24:24

Èhwanja rzayi-rzayi ja hwatò hwa ò wurza lì kɔ̀ hweyà a lì òhwa ema wɔ̀ ndi hwa hwèlì hwaŋga ema hwa ɔ̀kirzɛ̀hwɛyi. Nà hwà-òhwèlì hwa hwèlìŋgɛ̀ hwa mòlaŋgà hwa ò wurza, hwa ò gbeyà hweyà hwe ndɛnɛ hwe mànyakà nà lì uŋmɛ̀lɛ̀ hwèembànèlì hwe ndɛnɛ hwe mànyakà. Hwa ò gbeyà ndi nanù ò lì lùkɛlɛ hwatò ema Lohwɛ̀ a hvɔ̀rzì, wɔ hwa lu tɛ njiya ya lì hwa lukɛlɛ.

Matiyò 25:41

“Ndi e Kiŋgɛ̀ e ò ayèŋgòwɛ̀lɛ̀lɛ̀ hwaŋga ema hwa ò hwɛ ò lìya la eni la ŋmalì rzìi a hwa òhweyà nanù ema, ‘È nò anjiya anu inyɔ ema e jemahwi na Lohwɛ̀! È ɛndɛ e kpèeyà ò ehvɔ̀ndi ya mùnya ema Lohwɛ̀ à mà rzekeya Mòkarzɛ̀ na i aŋgèlì ja eni.

Matiyò 4:1

O mburza hvònda, Yerzù à mà tìmbahwa nà Èlìŋgɛ̀ ò lì kèkirzɛhwɛ̀ nà Mòkarzɛ̀ ò mòrzanjɛ̀.

Matiyò 4:10

Yerzù à mà mò alàhwɛ̀ nanù ema, “Mòkarzɛ̀! Ò nò anjiiya anù. È tìlahwì ò Kààtì yà Lohwà nanù ema, ‘Kanɛ̀ ndi Rzàŋgò Lòohwà là aŋgɔ̀, nà lì mò gbèèyà mɔ̀ ŋmìti mɛnɛ. Ndèŋgànɛ̀lɛ̀ ò mò gbèèyà ndi mɔ̀ mɛnɛ.’”

Matiyò 4:5

Mòkarzɛ̀ rzìi à mò tìmbà à mò ɛ̀ndɛnɛ ò mbòwà ya wòtani yà Jèrurzalɛ̀mù. Rzìi à mò tɛ̀mɛ̀nɛ ò ŋmanyu yà è njòŋgò yà è Ndawò yà Lohwà.

Matiyò 4:8

Mòkarzɛ̀ rzìi à tìmba Yerzù hvɛ, rzìi wɔ̀ hwahwàkɛ hwa tɛ̀mɛ̀ ò ŋmanyu yà è hvàko ema è mà karzama rzayì-rzayì. Mòkarzɛ̀ rzìi à mà uŋmɛ̀lɛ̀ hwèkòmè hwe è rze yà arzɛ nà mònàmɛ̀ mò awu mò arzɛ ema mò hwèlì ò tenì.

Lukàrzɛ̀ 10:18

Yerzù rzìi a hwa òhweyà nanù ema, “Nà mà ɛ̀nɛ nà òmà Mòkarzɛ̀ a mà unde nàa lìŋmɛ̀tì-ŋmɛ̀tì ò ŋmanyu yà Lohwà.

Lukàrzɛ̀ 13:16

Ònò mòlanà à hwèlì ndì e ŋmanà wa ama Abràhamù, Mòkarzɛ̀ à mò kaki nà e nyàmbɛ ò lìnì lìyòmɛ̀ la meya nà wàmbì. Inyɔ è nò òhweyà ŋgà e hwèlì wòhwe lì rzòlòwà ònò mòlanà ò wùnyà wò lì arzìyòlɛ̀ e?”

Lukàrzɛ̀ 22:3

Mòkarzɛ̀ à mà kpèeyà mòòkòwèlì mɔ̀kɔ wà ama Yerzù ema à ma hwɛ̀lɛ̀hwɛ̀ Jùdàrzì. Lìnɛ̀yi lìna la eni hvɛ lì mà hwɛ ndi Ìrzìkalìyɔ̀tɛ̀. Jùdàrzì à ma hwɛ ndi mɔ̀kɔ wà lìyòmɛ̀ la hwà-òkòwèlì nà hwàhwàkɛ̀ hwa ama Yerzù.

Lukàrzɛ̀ 22:31

“Rzìmɔ̀nì e, ìi Rzìmɔ̀nì e, òkànèyà tɛ! Mòkarzɛ̀ à lu wònjà ò lì e kèkirzɛ nà ò lì e kakòwa. À ikà e hwa gbamù nà è hwa wòhwe. Nà òmà mòtò a rzɛ̀ŋgbɛ ì mbàrzi ò lì ulɛ hweyarza.

Lukàrzɛ̀ 8:12

Iŋgi hvɔ̀ŋgɔ̀ ema ì mà undìrzɛ̀hwɛ̀ ò njìya, ì tɛmelì ndi hwatò ema hwa hweyà Eyà yà Lohwà, ndi Mòkarzɛ̀ à jà rzìi à hwa ulɛnɛ̀ è yɔ̀ ò mèèmà mè awu, ò lì àrza nanù ema hwa rzì lòkɛ̀ Lohwɛ̀, nà ò lì arza hvɛ nanù ema hwa rzà rzùŋgàhwa.

Yòwanìrzɛ̀ 12:31

O nàŋgɛ nanù e hvònda ene ema Lohwɛ̀ a kàyìrzɛ ene rze. Nàŋgɛ nanù e mòkànèlì wà ene rze a hweni lì kàyìrzɛ̀hwɛ.

Yòwanìrzɛ̀ 14:30

Nà rza òhwa hvɛ na inyɔ hvònda ema e wawi, èhwanja e mòkànèlì wà ene rze a hwèlì a ja. Mɔ̀ a rza nò hwɛnelì tɔ̀ ŋginyà.

Yòwanìrzɛ̀ 16:11

Ndèŋgànɛ̀lɛ̀ hwa tòni hvɛ o lì o hwàanà hwèkàyìrzèlèlì, hwe ama Lohwɛ̀ èhwanja mɔ̀ à mà màa lì kàyìrzɛ̀ e mòkànèlì wà ene rze.”

Yòwanìrzɛ̀ 8:44

È hwèlì ndi e hwa ama e rzàŋgò ya anyu, Mòkarzɛ̀, ɔ̀ndeŋgàtɛ̀ e arza ndi lì òndìrzɛ̀ e nyɔ̀ŋgi ya eni. Mɔ̀ à mà hwɛ ndi mòòŋwèlì natɛ̀ɛ na ò hwewòtelì. A rza alɛ̀mbɛnɛ ò jɔ̀kɛ̀, èhwanja a rza òhvi jɔ̀kɛ̀. Mɔ̀ a kɔ tɛ hweyà, a òhwa ndi e mbɔrzi ya eni ya mbòwà. Èhwanja mɔ̀ à hwèlì ndi mòtò wa mòlàŋgà, ndèŋgànɛ̀lɛ̀ a hwèlì ndi e rzàŋgò ya mòlàŋgà.

Hwègbèèlì 26:18

O wa ò hwa lìhvòhwa mìirzɔ̀ ma awu aŋga nanù hwa anjiya ò ìtììtènì ja jìtìtì, hwa luwa ŋmàye rzìi hwa anjiya ò tenì ya e ŋginyà ya ama Mòkarzɛ̀ rzìi hwa ɛndɛ ò rze ya e ŋginyà ya ama Lohwɛ̀, eŋge eyà e gbeyà wɔ hwa luwa mèlàkìrzɛnɛ ò wòhwe wò awu, rzìi hwa hwɛ èki yɔ̀kɔ na hwatò ema Lohwɛ̀ à mà rzàŋgìrzɛ̀ ehwànja hwa nò lòkɛ̀.’”

Hwègbèèlì 5:3

Aŋga ndi Pètrò à mà mò ijòwa nanù ema, “Ìi Ànàniyarzì mamɛ ndèŋgàtɛ ò imanɛlɛ nanù ema mòkarzɛ̀ a ò kànèyà. Nàŋgɛ rzɔ mòkarzɛ̀ à mà ò gbeyà ò ma kɔ̀yeyà Èlìŋgɛ̀ yà Wòtani eyà na òma ò wa ò ma utɛ lòŋgò la wòŋgò wòlì ema ò ma àhwirzɛ̀ eŋge etò.

Ròmànì 16:18

È rzi keka lì hwa òŋgama èhwanja hwa rza gbèeyà ndi e Rzàŋgò ya arzu Krirztò, ndi hwa gbèeyà ndi nanù ò lì òndìrzɛ̀ e nyɔ̀ŋgi ya awu. Hwa gbeyàna e mbɔrzi ya awu ya gbamù na jòòhwì ja gbamù ò lì lukɛlɛ hwatò ema hwa rza rzɔ̀ŋgɔ lì rzɔ̀ŋgìtɛ̀nɛ̀.

Ròmànì 16:20

Lohwɛ̀ la ɛ̀yɔ̀lɛ̀ ŋmanà mbɔ à hwɛni lì rzììkà Mòkarzɛ̀ ò rze yà matàŋga mà anyu. Inyɛ̀ è ndèli yà ama è Rzàŋgò hwa arzu Yerzù Krirztò è hwɛ nà inyɔ hwa arzɛ.

2 Kɔ̀rintìyà 11:14

Ène eyà e rzà no tàmìrzɛ̀ èhwanja, tɔ̀ Mòkarzɛ̀ mɔhvɛ a àwuŋmɛ̀lɛ̀ mo ŋmìti hwa ɛnɛ oma a hwèlì ndi aŋgèlì yà ama Lohwɛ̀ ya wòtani.

2 Kɔ̀rintìyà 11:3

Ndi tɔ̀ nanù, na oka wɔ̀ŋgɔ̀ nanù ema, na oma Mòkarzɛ̀ à mà lukɛlɛ Èhva, nanù mɛnɛ hvɛ ndi hwa e o lukɛlɛ aŋga nanù e rza ika mèèmà me anyu me arzɛ oma Yerzù Krirztò, ndèŋgànɛlɛ e rza o mo gbèeyà na mèèmà me anyu me arzɛ.

2 Kɔ̀rintìyà 12:7

O lì arza nanù ema na rza a uŋmɛ̀lɛ̀ imba mbiti o hweyà hwe mànyakà hwɛ̀ndɛnɛ ema Lohwɛ̀ a no uŋmɛ̀lɛ̀ na o lì gbeyà ema na hweye. A gbeyà nanù ema na hwɛni nyàmbɛ o nyo ya ami ema e no ŋgba mòrziyò mondɛnɛ. Ène nyàmbɛ e ma hwɛ ndi nàa meerzenja ema Mòkarzɛ̀ à mà ome o lì no tàkìrzɛ̀ aŋga nanù na rza ohva kumba.

2 Kɔ̀rintìyà 2:11

I hwɛni ndi lì gbeyà nanù, aŋga nanù Mòkarzɛ̀ a rza jo lukɛlɛ. Èhwanja e mo hwiyelì meyànò me eni.

2 Kɔ̀rintìyà 4:4

Mòkarzɛ̀, e mòkànèlì wa ene rze mɔ̀ ndi à kànèyà màlùtèyà ma hwatò ema hwa rza lòkɛ̀yì Krirztò. Wɔ̀ hwa rza tànɛyi lì rzɔ̀ŋgìtɛ̀nɛ̀ nanù ema ŋmɛ̀ndì mò gbamù e uŋmɛ̀lɛ̀ nɛ Krirztò a hwɛni wòlìto. Krirztò mɔ̀ ŋmìti a hwèlì ndi nàa Lohwɛ̀.

Ɛ̀hvìrzìyà 4:14

O eŋge hvonda i rza hwɛ hvɛ ndi nàa hwàna. Ène eyà e o gbèeyà hwatò ema hwa lukɛlɛnɛ hwa o òkolɛ hwatò hwèokòlelì hwe mòlàŋgà hwa rza o tànɛyi o lì jo lukɛlɛ na lì jo gbèeyà ema i gbeeye hweyà ema hwe rza hvomɛ̀nɛ̀. I rza o hwɛ ndi nàa wɔ̀ɔ̀lɔ̀ ema e mbɛ̀hvɛ̀nì e neŋgirzɛ o tɔ̀ ima èhvàrzù.

2 Tɛ̀rzàlonìyà 2:3

È rzi keka lì emeyà nanù ema tɔ̀ mòtò a e lukɛlɛ na tɔ̀ ima hveyo. Èhwànja o Wùùnyà ema Rzàŋgo à ò jɛ̀ɛ̀, mɔ̀ à rza o jà natɛ̀ɛ e hvonda ema o ò hwɛ̀ɛ mbunàkɛ ndɛnɛ o rze ya mɔ̀nyɛ̀, ndèŋgànɛlɛ e mòtò ema a hwèlì e mòtò wà wòhwe a o ɛneya. Lohwɛ̀ mɔ̀ à mà màa lì tɛ̀yirzɛ nanù ema oŋgo mòtò a o ɛndɛ o ɛhvɔ̀ndi ya mùnya.

1 Tìmotì 2:14

Linɛyi lìtiŋga lì hwèlì ndi nanù ema, rzeketɛ Adàmu ndi Mòkarzɛ̀ à mà lukɛlɛ, e molanà ndi Mòkarzɛ̀ à mà lukɛlɛ. O eŋgànɛ̀lɛ̀ rzɔ e molanà ndi à mà unda e mbenda.

2 Tìmotì 3:13

Ndi hwatò hwa wòhwe na hwatò hwa menito, hwa o ɛndɛ ndi o worzo ò lì gbeyà hweyà hwe wòhwe, o lì lukɛlɛ hwatò, ndèŋgàna hwahvɛhvɛ hwa o hwa lukɛlɛ.

Hibrù 2:14

Nà oma e hwèlì ema hwanu hwànà hwa ama Lohwɛ̀ hwa ohvi e nyàmà ya nyo na màyija, ɔ̀ndeŋgàtɛ̀ Yerzù mɔ̀hvɛ à mà wòwa e nyo ya e mòtò wa hwènàmà nàa wɔ̀. À ma gbeyà ndi nanù, aŋga nanù e kpelì ema mɔ̀ à mà ŋwe e tìtòwà màyimbì ma ama Mòkarzɛ̀, ema a gbèyi ndeŋgàtɛ hwatò hwa ŋwa.

1 Pètrò 5:8

Ya aŋgowe, e wowe hvonda. Mòkarzɛ̀ e mɔ̀kɔ̀yèlì wa anyu a hwèlì a ahwa ndi nàa njila ema e rzìŋga o lì arza njɛnɛ ema a tàawa.

1 Yòwanìrzɛ̀ 5:19

Ì hwi nanù ema irzɔ ì hwèlì ndi hwàanà hwa ama Lohwɛ̀, tɔ̀ nɛ ì hwi nanù ema è Mɔ̀ wà Wòhwe ndi à kànèyà hwatò ò rze ema hwa rza hwiyɛ Lohwɛ̀.

Judɛ 1:9

Ndi tɔ̀ Màyìkɛ̀lì è aŋgèlì ndɛnɛ à rzi hwɛnyɛ dɛhvùlì, è hvonda ema wɔ̀ nà mɔ̀ hwa mà hwɛ lì tɔ̀wɔ̀ ò lì hvomɛ̀nɛ̀ è mòtò ema à wòwà èèmbè ya ama Morzè. À mà mò ohweyà ndi nanù ema, “Rzàŋgo à ò kɔ̀kìrzɛ̀.”

Hwèwulùwèlì 12:12

O èŋgànɛ̀lɛ̀ rzɔ, e ŋmanyu yà lohwà na hwaŋga hwatò hwa arzɛ ema hwa hwèlì aŋga hwa àŋgàmɛ̀nɛ̀yi lì oka mɔ̀nyɛ̀ŋgì. Ndi èwòmɛ̀ na hwatò ema hwa hwèlì o e rze ya mɔ̀nyɛ̀, na o ŋmànja, ehwànja e Dɛhvùlì à mà e rzihweyà na hwetato hwe ndɛnɛ, ehwànja a hwi nanù ema e hvonda ya eni e ma utuhwa.”

Hwèwulùwèlì 12:3

Èhvɛhvɛ embànelì ya mànyàkà e ma wurza o ŋmanyu yà lohwà. Aŋga ndi e dragɔ̀ni ya a wurza jègba. È ma olowa rzayi-rzayi ndèŋgànɛ̀lɛ̀ e ma teya. È ma hwɛnɛ lìrzamba la mèyòhvò na lìyome la merzehwa. Tɔ̀ ima mohvo ma mà wɔ̀tɔ̀ ekooto.

Hwèwulùwèlì 12:7

Rzìi o hwɛ njuma o ŋmanyu yà lohwà. Màyìkɛ̀lì na i aŋgèlì ja eni hwà mà wòteya lì anana eŋge dragɔ̀ni. Èŋge dragɔ̀ni na i aŋgèlì ja eni wɔ̀ hvɛ hwa wòteyà lì hwa anana.

Hwèwulùwèlì 12:8

Ndi Màyìkɛ̀lì na i aŋgèlì ja eni hwà mà rzùùwana eŋge dragɔ̀ni na i aŋgèlì ja eni. O eŋgànɛlɛ rzɔ, e dragɔ̀ni na i aŋgèlì ja eni hwa rzi hwɛnɛ hvɛ tɔ̀ èki o ŋmanyu yà lohwà.

Hwèwulùwèlì 13:14

Ò nyòla yà hweyà hwe mànyaka ema à mà ŋgbààhwe è wònjà ò lì gbeyà, eŋge èembe yà worzo, yɔ̀ à mà lùkɛ̀lɛ̀ hwatò hwa è rze yà mɔ̀nyɛ̀. Ndeŋgànɛ̀lɛ̀ mɔ̀ à ma hwɛ ndi lì gbeyà nanù ò worzo wò eŋge èembe ema è mà ohva èhwènà ndɛnɛ. À mà òhweyà hwatò nanù ema hwa wondɛ èrzìrzà ema wɔ̀ hwa ò kanɛ̀, ema è àyɛ̀kɛ̀nɛ̀ eŋge èembe ema è mà ohva èhwènà yà rzɔ̀lɔ̀ ndi tɔ̀ nanù è e hwèlì lòŋgɛ.

Hwèwulùwèlì 16:14

Hwene hwèlìŋgɛ̀, hwe hwèlì ndi hwèlìŋgɛ̀ hwe wòhwe ema hwe gbeyà hweyà hwe mànyaka, hwene hwèlìŋgɛ̀, hwe ɛndeya ikiŋgɛ o e rze ya arzɛ, o lì hwa rzàŋga o èki yɔ̀kɔ aŋga nanù hwa rzekeya e njuma o wùnyà ema Lòohwà lì Kàrzàmi a kàyìrzɛ hwatò.

Hwèwulùwèlì 18:2

È mà tɛ nà lìlo lì kàrzàmi nanù ema, “È mà rzuuhwa, Babìlɔ̀nì, è mbowà ndɛ̀ɛ̀ndɛ̀ è rzùùhwi! È mà timba ndi è mbowà ya hwèlìŋgɛ̀ hwe wòhwe, èki ema hwèlìŋgɛ̀ hwe arzɛ hwe mbìndò hwe hwèlì, na èki ya hwenɔ̀ni hwe mbìndò ema hwatò hwa kɔ̀ɔ.

Hwèwulùwèlì 18:23

O e mbowà ndɛnɛ ya aŋgɔ, etùlù e rza o hvànya hvɛ tɔ̀ wùnyà, lìlo la mɔ̀nyɛ̀ŋgì la mɔ̀ɔ̀mbì na e mohwɛ̀ɛ̀nɛ wa mɔ̀ɔ̀mbì lì rza o hwɛ̀ɛnɛ hvɛ tɔ̀ wùnyà. Hwa o hvàŋga eŋge mbowà ndɛnɛ ehwànja, hwatò hwa aŋgɔ̀ hwa nyòŋga ya lì anda na lì ahwìrzɛ wɔ̀ ndi hwà mà hwɛ iŋgumu ja nyòŋga o e rze ya mɔ̀nyɛ̀ ya arzɛ, ndèŋgànɛ̀lɛ̀ hwatò hwa arzɛ hwa hwèkòmè hwe e rze ya mɔ̀nyɛ̀, o ma gbeyàna màagikì ma aŋgɔ o lì hwa lukɛlɛ.”

Hwèwulùwèlì 19:20

Rzìi hwa lɛmbɛ eŋge nyàmà yà wòhwe nà hwà-òhwèlì hwa hwèlìŋgɛ̀ hwa mòlàŋgà. Oŋgo mòòhwèlì wà èlìŋgɛ̀ wà mòlàŋga à mà hwɛ ò worzo wò eni, à mà hwɛ lì uŋmɛ̀lɛ̀ embànelì ò lì lùkɛ̀lɛ̀lɛ̀ hwatò ema hwa mà luwɛ eembànelì yà eŋge nyàmà yà wòhwe ndèŋgànɛ̀lɛ̀ hwa mà hwɛ lì kanɛ̀ eŋge elìŋgɛ̀. È hvonda ema hwà mà hwɛ lòŋgɛ hwà mà hwa hvimba wɔ̀ hwahwàkɛ o tenì ya ehvɔ̀ndi ya mùnya, ndèŋgànɛ̀lɛ̀ hwà mà rzeeya na mùùnya ema mo ma hwɛ lì tumbana rzayi-rzayi.

Hwèwulùwèlì 2:13

Nà hwi èki ema ò lìya. Aŋga ndi è konda yà lìkànèyà là ama mòkarzɛ̀ è hwèlì. Ndi è eka mèèmà mè anyu nà imba nanù mɛnɛ. È mà nò lòkɛ̀ nà ŋmèma mɔ̀kɔ nanù mɛnɛ tɔ̀ ò è hvonda yà ama Àntipàrzi. Àntipàrzi à mà nò tɛ̀meyà è mboŋgi yà jɔ̀kɛ̀, ndèŋgànɛ̀lɛ̀ hwa mà mò oŋwa ò ìtììtènì jà anyu ò hwèlìyelì hwe ama Mòkarzɛ̀.

Hwèwulùwèlì 2:24

“Ndi na e ohweyà inyɔ hwatò ema e lìyelì o Tìyatìrà, inyɔ ema e rzi ika hwenè hwèokòlelì, inyɔ i rzi okowi hwèokòlelì hwe hweyà ema hwe hwɛ̀lɛ̀hwɛ̀ nanù ema, ìwùndɛ̀ ja ama Mòkarzɛ̀. Nà e ohweyà nanù ema, na rza arza lì e tàkìrzɛ̀ hvɛ.

Hwèwulùwèlì 2:9

Imba nà hwi mètàkà mè anyu, ndèŋgànɛ̀lɛ̀ nà hwi nanù ema è hwèlì ndi mèlìrzà mè hwatò, ndi tɔ̀ nanù è hwèlì ndi hwèwàŋgì. Nà hwi hweyà hwe wòhwe ema hwatò ema hwa ohwa nanù ema hwa hwèlì ndi wònyà Yudà tɔ̀ nɛ hwa rza enje wònyà Yudà, hwa ohwa ò lì è teŋgɛ̀nɛ̀. Wɔ̀ hwa hwèlì ndi hwatò hwa ama Mòkarzɛ̀ tɔ̀ hwatò ema hwa hwèlì ò mòndèŋge mò eni.

Hwèwulùwèlì 20:10

Rzìi e Dɛhvùlì ema è mà hwa lùkɛ̀lɛ̀, è mà hvimbahwa ò yùlu yà mùnya ema e tumbana rzayi-rzayi, o èki ema eŋge nyàmà yà wòhwe na hwà-òhwèlì hwa hwèlìŋgɛ̀ hwa mòlàŋgà, hwa hwèlì. Ndeŋgànɛlɛ aŋga ndi wɔ̀ hwa o tàkɛ rzayi-rzayi ŋmèrze nà wuu natɛ̀ɛ nà ò gbìndèyà.

Hwèwulùwèlì 20:8

Mɔ̀ a rzolowahwi tɛ o hwèwòwà, a o ɛndɛ o injuka ja aniyɛ ja e rze ya mɔ̀nyɛ̀, o lì lukɛlɛ hwatò hwa arzɛ ema hwa hwèlì o e rze ya mɔ̀nyɛ̀. Ini njuka ja aniyɛ ja e rze ya mɔ̀nyɛ̀ i hwèlì ndi Gɔ̀gi na Magɔ̀gi. Mòkarzɛ̀ a hwa rzaŋga wɔ̀ hwa arzɛ èki yɔ̀kɔ o njùma. Ndeŋgànɛlɛ hwa o koka ndi nàa e nyàŋga ema e hwèlì o rzàawà ya ŋmànja.

Hwèwulùwèlì 3:9

Inyɔ è ɔŋgɔ tɛ, hwatò ema hwa hwèlì ò mòndèŋgè mò ama Mòkarzɛ̀, ema hwa nanù ema hwa hwèlì ndi hwatò hwa wònyà Yudà ema wɔ̀ hwa rza enje hwatò hwa wònyà Yudà, hwa hwèlì ndi hwàtò ema hwa kɔɔ hweyà. Nà hwa gbeyà hwa o jèeya, ndèŋgànɛ̀lɛ̀ hwa o rzumeya o màtàŋgà mà aŋgɔ̀, na gbeyà wɔ̀ hwa arzɛ hwa hwiya nanù ema na o lìŋgàni.

Hwèwulùwèlì 9:1

È aŋgèlì ema e ma ùkirzɛ̀ ita e ma tòŋga lìyɔ̀mi la eni. Rzìi na ɛnɛ rzombe ema e ma akakowɛ o lìwòhwɛ la ŋmanyu rzìi e unda o rze ya mɔ̀nyɛ̀. Ène rzombe e ma ŋgbààhwà ilìhvowàni ja ehvɔ̀ndi ema e rza ohvɛ lìrzùkù.

Hwèwulùwèlì 9:20

Hwanɛyi hwatò hwà hwènàmà hwa arzɛ ema ini kàndɛ i rzi oŋwɛ, hwa rzi hwɛmɛ o lì kànɛ mòohwà ema wɔ̀ hwiti hwà mà wèkè. Hwa rzi hwɛmɛ o lì gbèeyà hwèlìŋgɛ̀ hwe wòhwe, hwa rzi hwɛmɛ o lì gbèeyà mahvɛhvɛ mohwà, mohwà ema hwà mà wondɛ na gòòlù, na rzìlìhwà, na brɔ̀nrzi tɔ̀ màŋyàyi, tɔ̀ hwèhwàmbo, mohwà ema mà rza tanɛ lì ɛnɛ, ma rza tanɛ lì hweyà na e mɔ̀ ema mà rza tanɛ lì ɛndɛ.