Hwèwulùwèlì 1:5 - Mokpwe: Bakwery (New Testament)

⁵ Yerzù Krirztò mɔ̀ hvɛ à è omelì è ndèli nà ɛ̀yɔ̀lɛ̀. Mɔ̀ ndi à hwèlì è mɔ̀ ema à ohwa è jɔ̀kɛ̀ lì hvomɛ̀nɛ Lohwɛ̀ nyayi ema ì hwi nanù ema è hwèlì è jɔ̀kɛ̀. Mɔ̀ ndi à hwèlì è mòtò wà worzo ema à lomi lì hvùmùlɛ, ndèŋgànɛ̀lɛ̀ mɔ̀ ndi à hwèlì è mòkànèlì hwa ikìŋgɛ jà ene rze. À jò lìŋgàni, ndèŋganɛlɛ mɔ̀ à mà gbeyà wòhwe wò rza jò kànèyà hvɛ nà oma mɔ̀ à jo ŋwèlɛ̀lɛ̀yì ò mèyohvo mè arzu.

Hwèwulùwèlì 1:5 Mawu Ofanana

Matiyò 20:28

nyàyi hvɔ̀kɔ hvɛ mɛnɛ nàa è Ŋmanà wà è Mòtò wà Hwènàmà a rzìi jɛ̀ɛ̀ ema hwatò hwa mò gbèeyà, ndi mɔ̀ à jelì ò lì gbèeyà hwatò, na ò lì ŋgba lòŋgɛ la eni nàa tùŋge ò lì kɔ̀tɔ̀ rzayì-rzayì ja hwatò.”

Matiyò 28:18

Yerzù rzìi a tòmbeya lì hwa kòmbɛnɛ rzìi a hwa òhweyà nanù ema, “Nà ŋgbààhwi wònja ò lìkànèyà la ŋmanyu na e rze.

Yòwanìrzɛ̀ 13:1

O ma kòmbɛ̀nɛ̀ ndi e hvònda ya è Ndèma yà lì Akà Ɔ̀nɛ̀yi. Yerzù à mà hwiya ema e hvònda ya eni e ma kòmbɛnɛ ò mɔ̀ lì hwɛmɛ ene rze, ò lì tìmba ò ma Tatɛ̀. À mà lìŋgàna hwatò hwa rze ema hwà mà mò lòkɛ̀yi. À mà hwa uŋmɛ̀lɛ̀ e ndìŋgɛ natɛ̀ɛ na ò lìrzùkù.

Yòwanìrzɛ̀ 13:34

Mbenda hvènya ene ema nà è ŋgbà naŋgɛ, è alìŋgànɛ mɔ̀kɔ nà ɔ̀nɛyi. Nà òma nà mè lìŋganè, ò èŋgànɛ̀lɛ̀ è hwɛnì lì alìŋganɛ̀ mɔ̀kɔ nà ɔ̀nɛyi.

Yòwanìrzɛ̀ 15:9

Nà òma Tatɛ̀ a nò lìŋgàni, nanù mɛnɛ ndi imba hvɛ na e lìŋgàni. O èŋgànɛ̀lɛ̀ e akakumɛnɛ ndi nanù mɛnɛ na imba aŋga nanù na hwɛni ndi lì e lìŋgàna nanù mɛnɛ.

Yòwanìrzɛ̀ 18:37

Pìlatò rzi a mò ijòwà nanù ema, “O hwèlì ndi Kiŋgɛ rzɔ e?” Yerzù rzi a mò alàhwɛ̀ nanù ema, “O wa ndi òhwi nanù ema na hwèlì ndi Kiŋgɛ. Lìtiŋga ema na ŋyaahwɛlɛyi na lì jàa anu rze lì hwèlì ndi ò lì tɛ̀mɛ̀ e mbòŋgi ya jɔ̀kɛ̀. Tɔ̀ ima mòtò ema a hwèlì ndì wa jɔ̀kɛ̀ a nò òkànèyà.”

Yòwanìrzɛ̀ 3:11

Nà e òhweyà e jɔ̀kɛ̀ nanù ema irzɔ jò òhwa ndi mamɛ ema i hwi. I tɛ̀mɛ̀ mbòŋgi ò mamɛ ya arzɛ ema irzɔ i ma ɛnɛ. Ndi tɔ̀ nanù, tɔ̀ mɔ̀kɔ hwa anyu a rzi imanɛlɛ ò lìlòkɛ̀ hweyà ema i hwèlì jò òhwa.

Yòwanìrzɛ̀ 3:16

Lohwɛ̀ a lìŋgàni hwatò hwa ene e rze ya mɔ̀nyɛ̀ rzayì-rzayì. O èŋgànɛ̀lɛ̀, à mà òma ehvòwà ya eni ya Ŋmanà nanù ema, tɔ̀ ima mɔ̀ ema a mò lòkɛ̀ a rza ŋwa ndi à lùwa lòŋgɛ la gbìndèyà.

Yòwanìrzɛ̀ 3:32

Hweyà ema a ɛnɛ na mamɛ ema a hweyà ɔ̀ndi mɔ̀ à òhwa ndi tɔ̀ nanù tɔ̀ mòtò a rza mò lòkɛ̀.

Hwègbèèlì 20:28

È àwòŋgòhwɛlɛ inyɔ hwiti, na lìhwemba la hwatò ema Èlìŋgɛ̀ yà Wòtani ye e ŋgbelì ò rze ya anyu ò lì ɔŋgeya. È hwɛ nàa hwà-ɔ̀ŋgèlì hwa mɛ̀lɛ̀ŋgù e ɔŋgeya hwatò hwa ama Lohwɛ̀. A ma gbeyà ŋmèmba mò eni ò lì hwɛ e mò eni lì akeyà na e kpelì ema è Ŋmanà wà eni a ŋwelɛlɛyi ò mbarza.

Hwègbèèlì 26:23

Wɔ̀ hwà mà òhwa nanù ema è Mɔ̀ ema à Ɔ̀kirzɛ̀hwɛ̀yi a hwɛnì lì taka rzìi a hwɛ e mòtò hwa wòrzò ò lì hvùmùwà ò kpelì. A ò òhweyà hwatò nanù ema ŋmàye mò hvànyeya hwatò hwa wònyà Yudà na ò hwaŋga hwatò ema hwa rza enje wònyà Yudà nàŋgɛ.”

Ròmànì 3:25

Lohwɛ̀ à mà ŋgbà Yerzù nàa jàhwèyà ò lì e ŋwèeyà. Ndèŋgana hwatò hwa ò làkìrzɛ̀hwɛ̀ èhwanja hwa mò lòkɛ̀yì. Lohwɛ̀ à mà gbeyà ndi nanù ò lì uŋmɛ̀lɛ̀ hwatò hwa arzɛ kɔ̀yi-kɔ̀yi nanù ema, a gbeyà hweyà ŋgàna ema e hvòmɛ̀nɛ̀. O e hvònda kòhwa Lohwɛ̀ à mà àjùlɛ̀ na hwatò, a rzi kɔ̀kìrzɛ̀ hwatò ema hwa gbeyà wòhwe.

Ròmànì 8:37

Jàyɛ̀, ò hwenè hweyà hwe arzɛ irzɔ i rzùù hvɔ̀mbɔ̀wɔ̀ lì akeyà nà Krirztò mɔ̀ ema à jò lìŋgàni, ndèŋgànɛlɛ à jò òŋgòwànà.

1 Kɔ̀rintìyà 6:11

Nànù ndi lòŋgo là hwa inyɔ è mà hwɛ. Ndi inyɔ è mà rzàŋgìrzɛ̀hwɛ̀ ò wòhwe wò anyu, è emànɛ̀lɛ̀hwɛ̀yì nà Lohwɛ̀, è tɛmìrzɛ̀hwɛ̀yi ehve-ehve nà Lohwɛ̀ lì akeyà nà Rzàŋgo Yerzù Krirztò nà Èlìŋgɛ̀ yà Lohwà là arzu.

Gàletìyà 2:20

Nà oma Yerzù à mà ŋwèeyà o mbarza, e hwèlì ndi ema imbahvɛ nà mà ŋwa. Nà rza enje lòŋgɛ hvɛ. Krirztò ndi à hwèlì o tenì ya ami. O eŋgànɛ̀lɛ̀ rzɔ tɔ̀ ima lìtumba la eyà ema na gbèeyà o rze ya mɔ̀nyɛ̀ nàŋgɛ, na e gbèeyà ndi èhwanja o lìlòkɛ̀ ema na ohvani è Ŋmanà wà ama Lohwɛ̀ ema a no lìŋgàni rzii a ŋwa o nyòla ami.

Ɛ̀hvìrzìyà 2:4

Ndi Lohwɛ̀ ema a ondi na ììlì, na lì jo hwɛneya hvɛ ndìŋgɛ ndɛɛnɛ̀,

Ɛ̀hvìrzìyà 5:2

Inyɔ e lìŋgàne hwahvɛhvɛ hwatò, ŋgànà hvɔ̀kɔ nàa oma Krirztò a me e lìŋgàne rzìi a jo ŋwèeyà. A ma aŋgbɛ̀ɛ mɔ̀ ŋmìti o ma Lohwɛ̀ nàa làhweyà na jàhwèyà ema i ma lìŋgìrzɛ Lohwɛ̀ rzayi-rzayi.

Kòlòrzìyà 1:18

Mɔ̀ ndi à hwèlì mòòhvò mò hwatò ema hwa mò lòkɛ̀yì, ndèŋgànɛlɛ wɔ̀ hwa hwèlì ndi nàa è nyo yà eni. Mɔ̀ ndi à ŋgba hwaŋga hwatò lòŋgɛ ehwànja mɔ̀ ndi à hwèlì è mòtò wà worzo ema Lohwɛ̀ à hvùmùlɛ̀yi ò kpelì, ndèŋganɛlɛ ema mɔ̀ ndi à ò hwɛ natɛ̀ɛ nà ò gbìndèyà. Ène eyà è mà gbèyɛ̀nɛ̀ ndi nanù aŋga nanù mɔ̀ à hwɛ ò lì kànèyà hweyà hwe arzɛ.

1 Tìmotì 6:13

O worzo wo ama Lohwɛ̀, mɔ̀ ema a ŋgbàà lòŋgɛ o hwema hwe arzɛ, ndèŋgàna o worzo wo ama Yerzù Krirztò mɔ̀ ema à mà ohwa e jɔ̀kɛ̀ o worzo wo ama Pòntìyùrzì Pìlatò, na e ohweyà nanù ema,

1 Tìmotì 6:15

Mɔ̀ a o jà o wùnyà ema Lohwɛ̀ e Tatɛ̀ a ikayi nanù ema a jà, mɔ̀ Lohwɛ̀ ema hwatò hwa eka. Ndèŋgàna mɔ̀ ndi à hwèlì e mɔ̀ mɛnɛ ema a hwèlì e Mòkànèlì mòndɛ̀nɛ hwa e rze ya arzɛ. Mɔ̀ ndi à hwèlì e Kiŋgɛ ya ikiŋgɛ̀ ja arzɛ, mɔ̀ ndi hvɛ a hwèlì Rzàŋgo wa irzàŋgo ja arzɛ.

Hibrù 10:29

Mòtò a rza wowi tɛ e Ŋmanà wà mùnyanà wa ama Lohwɛ̀ nàa tɔ̀ eyà, nanù oma mɔ̀ à rza wowi màyija ma yòòmbò ya ama Lohwɛ̀ ema mà mo gbèyi ema a hwɛ worzaŋgi nàa tɔ̀ eyà. Ndèŋgàna e hwèlì tɛ ema mɔ̀ à hwɛnyɛ Èlìŋgɛ̀ ema e jànà ndèli nɛ rzɔ e kɔ̀kìrzɛ̀ ya ama ene nyayi ya mòtò e tànɛyi lì hwɛ e?

Hibrù 9:14

È hwèlì tɛ ema màyija ma hwèembè ma tanɛ ma hwɛnɛ màyìmbì ma lì rzàŋgirzɛ hwatò, nanù oma màyija ma ama Yerzù ma hwɛni màyìmbì rzayi-rzayi o lì rzàŋgirzɛ hwatò. Krirztò ema a rza ohvɛ tɔ̀ wòhwe tɔ̀ wɔ̀kɔ à mà aŋgbɛ mɔ̀ ŋmìti nàa jàhwèyà o lì jo kɔ̀tɔ̀ irzɔ hwa arzɛ. A ma gbeyà ndi ene eyà nanù o lì akeyà na èlìŋgɛ̀ yà wòtani ema e hwɛ natɛ̀ɛ na o gbìndèyà. Màyìjà ma eni mɔ̀ ndi ma jo rzàŋgirzɛyi mèèmà me arzu, ema i rza gbeyà hweyà hwe wòhwe ema hwe jo jàneyà e kpelì. Ndi e àŋgàmɛ̀nɛ̀yi lì gbèeyà Lòohwà la lòŋgɛ.

1 Pètrò 1:19

Ndi inyɔ e ma kɔ̀tɔ̀wɔ̀ ndi na màyija ma wòlìtò ma ama Krirztò, mɔ̀ ema à mà hwɛ ndi nàa ŋguma mɔ̀lɛ̀ŋgù ema mo rzi hwɛnɛ tɔ̀ lìtònà tɔ lɔ̀kɔ ò nyo ya eni.

1 Yòwanìrzɛ̀ 1:7

Ndi i hwɛni tɛ lòŋgɛ la ŋmàye, na oma mɔ̀ ŋmìti hvɛ a hwɛni, aŋga nanù i hwɛ mɔ̀kɔ na ɔ̀nɛyi, ndèŋgànɛ̀lɛ̀ màyija ma ama e ŋmanà wa eni Yerzù, ma jo rzàŋgìrzɛ̀ o wòhwe wo arzu wa arzɛ.

1 Yòwanìrzɛ̀ 4:10

Nànù ndi è ndìŋgɛ yà jɔ̀kɛ̀ è hwèlì, è rza enje ndi nanù ema ì mà lìŋgàna Lohwɛ̀, ndi è hwèlì ndi nanù ema à mà jò lìŋgàna rzìi à jò òmeya è Ŋmanà wà eni wà Mùnyanà nàa jàhwèyà ò lì jò kɔ̀tɔ̀ ò nyòla wòhwe ema irzɔ ì mà gbèèyɛ̀.

Hwèwulùwèlì 11:15

È aŋgèlì è ùkirzɛ̀ lìrzamba hvɛ è tòŋga è là eni lìyɔ̀mi. Rzìi lìlo ema lì kàrzami lì uwɛlɛlɛ ò ŋmanyu yà lohwà lì à ohwa nanù ema, “È wònjà yà lìkànèyà ene rze ò naŋgɛ è mà tìmba ndi è yà ama è Rzàŋgo, Lòohwà là arzu nà è Krirztò yà eni, ndèŋgànɛlɛ mɔ̀ à ò kànèyà natɛ̀ɛ nà ò gbìndèyà.”

Hwèwulùwèlì 11:3

Nà ŋgba imboŋgi jà ami jà ahwàkɛ è wònjà o lì ohwa hweyà ema hwe ò gbèyɛ̀nɛ ò tenì yà ikolì jɔ̀kɔ hwègbe hwehwakɛ nà mèni mòtòhwa mè mèènyà. Ndeŋgànɛ̀lɛ̀ hwa ò wɔ̀tɔ̀ mààtù mà màyɛ̀hwɛ̀.”

Hwèwulùwèlì 17:14

Hwa ò teŋgɛ̀nɛ̀ ò lì anàna è Ŋguma yà Mɔ̀lɛ̀ŋgù njùma. Ndi è Ŋguma yà Mɔ̀lɛ̀ŋgù è ò hwa rzùùwanà ehwànja mɔ̀ ndi à hwèlì è Rzàŋgo yà hwatò hwa arzɛ ndèŋgànɛ̀lɛ̀ à hwèlì ndi è Kìŋgɛ yà ikìŋgɛ jà arzɛ. À hwèlì nà hwatò hwa eni ema Lohwɛ̀ à mà hwɛlɛ nà lì hvɔ̀rzɔ̀, ema hwa mò gbèeyà nà ŋmèmà mɔ̀kɔ.”

Hwèwulùwèlì 19:11

Nà ma ɛnɛ e ŋmanyu yà lohwà e lìhvohwèlì. Rzìi na ɔŋgɔ rzìi na ɛnɛ wɔ̀rzi ema e tana, e mòtò ema à mà e lìya o ŋmanyu à mà hwɛ̀lɛ̀hwɛ̀ ndi Èhve-ehve na Jɔ̀kɛ̀. Mɔ̀ a kàyìrzɛ hwatò ŋgànà ema e hvomɛ̀nɛ̀yi ndèŋgànɛ̀lɛ̀ a anana hwàkɔ̀yèlì.

Hwèwulùwèlì 19:16

O mòŋgòmbè mo eni na o e rzorzo ya eni lìni lìnà lì tìlahwi aŋga nanù ema, “Kiŋgɛ wa ikiŋgɛ ja arzɛ na e Rzàŋgo ya irzaŋgo ja arzɛ.”

Hwèwulùwèlì 2:13

Nà hwi èki ema ò lìya. Aŋga ndi è konda yà lìkànèyà là ama mòkarzɛ̀ è hwèlì. Ndi è eka mèèmà mè anyu nà imba nanù mɛnɛ. È mà nò lòkɛ̀ nà ŋmèma mɔ̀kɔ nanù mɛnɛ tɔ̀ ò è hvonda yà ama Àntipàrzi. Àntipàrzi à mà nò tɛ̀meyà è mboŋgi yà jɔ̀kɛ̀, ndèŋgànɛ̀lɛ̀ hwa mà mò oŋwa ò ìtììtènì jà anyu ò hwèlìyelì hwe ama Mòkarzɛ̀.

Hwèwulùwèlì 3:14

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Làwòdèrzìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì, Inyɛ̀ wò Lìya Nànù. Mɔ̀ à gbeyà ndi nà oma Lohwɛ̀ à àrzeyà, à hwèlì ndi mboŋgi ya jɔ̀kɛ̀, ndèŋgànɛ̀lɛ̀ ò lì akeyà nà mɔ̀, ɔndi Lohwɛ̀ à mà wèkè hwèèmà hwe arzɛ natɛ̀ɛ nà ò hwèwòtèlì.

Hwèwulùwèlì 7:14

Nà ma mo timbirzɛlɛlɛ nanù ema, “Ìi rzàŋgo kòkò, o wa ndi o hwi.” Rzìi à no òhweyà nanù ema, “Hwatò hwanù ema hwa karzo ò tenì ya metàkirzɛnɛ mendɛnɛ. Wɔ̀ hwà mà rzorza meŋgombe me awu na màyija ma ama e Ŋguma ya Mɔ̀lɛ̀ŋgù o lì me timbirzɛ mbɔ̀mi.