Hwègbèèlì 14:1 - Mokpwe: Bakwery (New Testament)

¹ Nàa ɛ̀ɛ̀mɛ̀ ya awu Pàwolò na Bànàbàrzì hwà mà kpèeyà ò e ndawò ya màkanɛ̀ ya wònyà Yudà ò mbòwà ya Ikɔ̀nìyùmì. Hwà mà òhwa ŋmɛ̀ndì mò gbamù lì hvòmɛ̀nɛ̀ Yerzù aŋga nyayi ema rzayi-rzayi ja hwatò hwa wònyà Yudà na hwaŋga hwatò ema hwa rza enje wònyà Yudà hwà mà lòkɛ̀ Yerzù.

Hwègbèèlì 14:1 Mawu Ofanana

Makòrzì 7:26

Ònò mòlanà à mà uhwɛlɛlɛ ndi ò èkòmè ya Glìki, à mà ŋyahwɛlɛ ndi ò erzòòkà ya Rzilìyà, ema e ma hwɛ̀lɛ̀hwɛ̀ Hvɔ̀nìrzìyà. A rzòrzòmeya Yerzù nanù ema a wɔ̀wìrzɛ̀ e ŋmanà wa eni, ò èŋge èlìŋgɛ̀ ya wòhwe.

Yòwanìrzɛ̀ 12:20

Lòŋgò la hwatò hwa Grìki hwà mà hwɛ na hwanɛ̀yi hwatò ema hwà mà ɛ̀ndɛ ò Jèrurzalɛ̀mù lì kanɛ̀ ò e hvònda ya è Ndèma yà lì Aka Ɔ̀nɛyi.

Yòwanìrzɛ̀ 7:35

Èŋge eyà è mà gbeyà hwatimbelì hwa wònyà Yudà hwa ijòwànɛ̀ mɔ̀kɔ nà ɔ̀nɛyi nanù ema, “One ònò mòtò à arza lì ɛndɛ ema irzɔ ì rza ò tànɛyi lì mò ɛnɛ e? À arza ndi lì ɛndɛ ò èkòmè yà Grìki ema hwatò hwa arzu hwa hwèlì e? Ò lì òkòlɛ hwatò hwa Grìki e?

Hwègbèèlì 11:21

È ŋginyà ya ama e Rzàŋgò e ma hwɛ na wɔ̀. Ndèŋgànà ŋgìndì ndɛnɛ ya hwatò e ma lòkɛ̀ rzi e timbeya Rzàŋgò.

Hwègbèèlì 13:43

È hvònda ema hwaŋga hwatò hwà mà wurze ò màkanɛ̀, rzayì-rzayì ja wònyà Yudà na hwaŋga hwatò ema hwa rza enje wònyà Yudà ema hwà mà tikòwahwɛ ò lì lòkɛ̀ la wònyà Yudà, hwà mà òŋgamà Pàwolò na Bànàbàrzì. Pàwolò na Bànàbàrzì hwà mà hwa òhwìrzɛ̀nɛ̀ rzìi hwa hwà kɔ̀mɛlɛ nanù ema hwa hwɛ ndi ò lì lòkɛ̀ e ndèli ya ama Lohwɛ̀.

Hwègbèèlì 13:46

Ndi Pàwolò na Bànàbàrzì hwà mà hwɛ ndi lì òhwa nanù mɛnɛ e rzi hwɛ lì òka wɔ̀ŋgɔ̀. Hwà mà hwɛ lì òhwa nanù ema, “Inyɔ wònyà Yudà, inyɔ ndi e ma àŋgàmɛ̀nɛ̀ lì lòma lì òhwa eyà ya ama Lohwɛ̀. Kanatɛ inyɔ ye e rzɔ̀rzi, ndèŋgànɛlɛ na òma inyɔ hvɛ e rza awòwɛ̀ nàa hwatò ema hwa àŋgàmɛ̀nɛ̀yi lì òhva lòŋgɛ la gbìndèyà, ò naŋgɛ nanù, irzɔ je e hwɛmɛ ò lì àyiŋgòwɛ̀lɛ̀lɛ̀ hwaŋga hwatò ema hwa rza enje wònyà Yudà.

Hwègbèèlì 13:5

Nà òma hwà mà ùke ò mbòwa ya Rzàlàmìrzì, hwà mà òhwa eyà ya Lohwà ò mandawò ma màkanɛ̀ ma wònyà Yudà. Hwà mà lɛmbɛ Yòwanìrzɛ̀ Màkòrzì ò lì hwa òŋgòwànà.

Hwègbèèlì 13:51

I àpɔ̀rzìtòlò i ma hvàkùmɛ̀lɛ̀ irzɔ̀hwɛ̀ ema i ma hwɛ ò màtàŋgà ma awu, nàa embànèlì nanù ema wɔ̀ hwa òhvi e kɔ̀kìrzɛ̀. Nà òma hwà mà kùlɛ̀ lì gbeyà nanù, rzìi hwa ɛ̀ndɛ ò mbòwà ya Ikɔ̀nìyùmì.

Hwègbèèlì 14:19

Lòŋgò là hwatò hwa wònyà Yudà hwa mà uwɛ̀lɛ̀lɛ̀yi ò mbòwà ndɛnɛ yà Antìyɔ̀kì ò erzòòkà yà Pìrzìdìyà, ndèŋganɛlɛ hwa mà uwɛ̀lɛ̀lɛ̀yi hvɛ ò è mbòwa ndɛnɛ yà Ikɔ̀nìyùmì rzi hwa uka ò è mbòwa ndɛnɛ ya Lìrzìtìrà. Wɔ̀ hwa mà lɔ̀mbɔ̀ è ŋgindi natɛ̀ɛ wɔ̀ nà è ŋgindi hwa uŋma Pàwolò màŋyàyi, rzìi hwa à mò kòòhwà ò rze, rzìi hwa mò wurzana ò mbòwà ndɛ̀nɛ, èhwanja hwa mà ɔ̀ŋgɛ̀lɛ̀ nanù ema à mà ŋwa.

Hwègbèèlì 14:2

Ndi lòŋgò la wònyà Yudà ema hwà mà rzɔ̀rzɔ̀ ò lì lòkɛ̀, hwà mà hvuŋguwa hwaŋga hwatò ema hwa rza enje wònyà Yudà, rzìi hwa hwà hvaŋga mèèmà me awu ò lì teŋgɛ̀nɛ̀ hwàlòkèlì hwa ama Yerzù.

Hwègbèèlì 14:21

Pàwolò na Bànàbàrzì hwà mà òhwa ŋmɛ̀ndì mò gbamù mò ama Lohwɛ̀ ò mbòwà ndɛ̀nɛ ya Dɛ̀bì, hwà mà gbeyà rzayi-rzayi ja hwatò ò lì hwɛ hwà-òkòwèlì hwa ama Yerzù. O mburza nanù, hwà mà tìmba ò imbowà ndɛnɛ ja Lìrzìtìrà, Ikɔ̀nìyùmì, na Antìyɔ̀kì ò erzòòkà ya Pìrzìdìyà.

Hwègbèèlì 16:1

Hwa Pàwolò hwa mà ɛ̀ndɛ ò mbòwa ndɛnɛ yà Dɛ̀bì na Lìrzìtìrà. Mòtò mɔ̀kɔ à mà hwɛ aŋga ema à mà hwɛ̀lɛ̀hwɛ̀ Tìmòtì. Nyàŋgò wà eni à mà hwɛ ndi mòlanà wa wònyà Yudà ndèŋgànɛ̀lɛ̀ mɔ̀ hvɛ à mà lòkɛ̀ Yerzù, ndi e tatɛ̀ ya eni e ma hwɛ ndi mòtò wa Grìki.

Hwègbèèlì 16:2

Hwàlòkèlì hwa imbowà ndɛnɛ ja Lìrzìtìrà na Ikɔ̀nìyùmì hwà mà òhwa gbamù lì hvòmɛ̀nɛ̀ Tìmòtì.

Hwègbèèlì 17:12

O eŋgànɛ̀lɛ̀ rzɔ, rzayi-rzayi ja hwatò hwà mà lòkɛ̀. Ndeŋgana rzayi-rzayi ja hwalana hwa wònya Grìki ema hwà mà karzɛhwɛ na èluhwe, na rzayi-rzayi ja wunyanà hwa wònya Grìki wɔ hvɛ hwà mà lòkɛ̀.

Hwègbèèlì 17:17

O eŋgànɛ̀lɛ̀ rzɔ à mà ɛndɛ ò tenì ya e ndawò ya màkànɛ ya wònyà Yudà rzìi a akòhwana hwatò hwa wònyà Yudà, na e wɔ ema hwa rza enje wònyà Yudà ema hwà mà hwɛ lì kànɛ Lohwɛ̀ mendeŋga. A ma hwɛ hvɛ ò lì ɛndɛ ò ewòka ya màlòkò wùnyà tɛ ò lì kòòwàna hwatò ema hwà mà hwɛ lì jà aŋga mendeŋga.

Hwègbèèlì 17:4

Lòŋgò la awu la hwatò hwa Yuda hwà mà lòkɛ̀ rzìi hwa òŋgama Pàwolò na Rzàyìlàrzì. Nànù hvɛ mɛnɛ na ŋgindi ndɛnɛ ya hwatò hwa Grìki ema hwà mà lòkɛ̀ Lohwɛ̀. Nà rzayi-rzayi ja hwalana hwa èluhwe wɔ hvɛ hwà mà hweŋga Pàwolò na Rzàyilarzi.

Hwègbèèlì 18:4

Tɔ̀ ima Wùnya wò lì Arzìyòlɛ Pàwolò à mà hwɛ lì ɛndɛ ò ndawò ya màkanɛ̀ ya wònyà Yudà, ò lì òhwirzɛnɛ hwatò hwa wònyà Yudà na e hwa Grìki, aŋga nanù wɔ hwa lòkɛ̀ hweyà ema à mà hwɛ lì hwa òhweyà.

Hwègbèèlì 18:8

Klìrzpùrzì, ema mɔndi à mà hwɛ e mòkànèlì wa e ndawò ya màkanɛ̀ ya wònyà Yudà, mɔ̀ na lìtumba la eni la arzɛ, hwà mà lòkɛ̀ e Rzàŋgò. Rzayì-rzayì ja hwatò hvɛ ò Kɔ̀rintò hwà mà hweyà Ŋmɛ̀ndì mò Gbamù, hwà mà mò lòkɛ̀ ndèŋgàna hwà mà lùhwìrzɛ̀hwɛ̀.

Hwègbèèlì 19:10

Pàwolò à mà gbeyà nanù ò hvòka ya meya mehwakɛ. Ène eyà e ma gbeyà nanù ema wònyà Yudà na hwaŋga hwatò ema hwa rza enje wònyà Yudà ema hwà mà hwɛ lì lìya ò erzòòkà ya Èrzìyà hwà mà hweyà eyà ya Lohwà.

Hwègbèèlì 19:17

Wònyà Yudà na hwatò ema hwa rza enje wònyà Yudà hwà mà hweyà hwene hweyà. Wɔ hwà mà hweye hwene hweyà wɔ hwà mà lɛmbeya wɔ̀ŋgɔ̀. Lìina la ama e Rzàŋgò Yerzù lɔ hvɛ lì ma òhva èluhwe ndɛnɛ.

Hwègbèèlì 19:8

Pàwolò à mà lìya aŋga ŋgbɛndɛ iyàwò. Hvònda tɛ à mà hwɛ lì kpèeyà ò ndawò ya màkànɛ ya wònyà Yudà rzìi hwa a kòòwà e rzi hwɛ mɔ̀ lì òka tɔ wɔ̀ŋgɔ̀. Wɔ̀ na mɔ̀ hwà mà hwɛ ò hvenda ndèŋgànɛ̀lɛ̀ mɔ̀ à mà hwɛ lì keka ò lì hwa telɛlɛ aŋga nanù hwa lòkɛ̀ nanù ema màmɛ ema a hwa òhweyà lì hvòmɛ̀nɛ̀ lìkànèyà la ama Lohwɛ̀ e hwèlì ndi e jɔ̀kɛ̀.

Hwègbèèlì 2:47

Hwa mà hwɛ lì eka Lohwɛ̀ nà ò lì òka là mɔ̀nyɛ̀ŋgì mò hwèhwɛ̀ɛlì hwe gbamù hwe hwatò hwa arzɛ. Ndèŋgana wùnyà tɛ Rzàŋgò à mà hwatɛ ò mòndèŋge mò awu hwaŋga ema hwa mà hwɛ lì rzùŋgàhwà.

Hwègbèèlì 20:21

Nà ma kòkòwɛ̀lɛ̀ hwatò hwa wònyà Yudà na hwatò ema hwa rza enje wònyà Yudà nanù ema wɔ hwa hwɛni lì tikòwa ò lì anjiya ò wòhwe wò awu lì timbeya Lohwɛ̀ na lì lòkɛ̀ hvɛ e Rzàŋgò ya arzu Yerzù.

Hwègbèèlì 21:28

Hwa a tɛɛ nanù ema, “Ìi wònyàmòwè hwa Irzàyɛ̀lì, e jò òŋgòwane! È mòtò ònò ema a òkòlɛ hwatò hwa arzɛ ò hweki hwe arzɛ nanù ema hwatò hwa Irzàyɛ̀lì, e mbenda ya ama Mòrzè na e ndawò yà Lohwà hwe rza enje tɔ̀ eyà. Tɔ̀ nàŋgɛ nanù, mɔ̀ à mà jànà lòŋgò la hwatò ema hwa rza enje wònyà Yudà ò tenì ya e ndawò yà Lohwà ndèŋgànà eŋge eyà e ma gbeyà e ndawò yà Lohwà e rza rzàŋgi hvɛ.”

Hwègbèèlì 9:20

O lìwòkimɛnɛ a wòteyà lì òhwa eyà ya Lohwà ò tenì ya i ndawò ja màkanɛ̀ nanù ema, Yerzù ndi à hwèlì è Ŋmanà wà ama Lohwɛ̀.

Ròmànì 1:16

Imba nà rza òka ìrzɔnì ò lì òhwa Ŋmɛ̀ndì mò Gbamù, èhwanja mɔ̀ ndi mò hwèlì màyìmbì mà ama Lohwɛ̀ ema mò mà jànà lì rzùŋgàhwa ò hwatò hwa arzɛ ema hwa mò lòkɛ̀ lìwòteyà ò hwaŋga hwatò ema hwa hwèlì wònyà Yudà nà hwaŋga ema hwa rza enje wònyà Yudà.

Ròmànì 10:12

Ène e hwèlì rzɔ ò hwatò hwa arzɛ èhwanja ò rza enje hwekàhweli ema hwanu hwa hwèlì ndi wònyà Yudà, hwanu hvɛ hwa rza enje wònyà Yudà. Lohwɛ̀ a hwèlì ndi e Rzàŋgò ya hwatò hwa arzɛ, ndeŋgànɛ̀lɛ̀ hvɛ à nàmìrzɛ̀ rzayi-rzayi hwaŋga ema hwa mò hwɛlɛ.

Gàletìyà 2:3

Tɔ Tàyìtùrzì ema à mà hwɛ ndi mòtò wa èkòmè ya Grìki ema à mà hwɛ na imba, hwa rzi mo nyàkìrzɛ̀ nanù ema à hwɛni lì endàhwà,

Gàletìyà 3:28

Ò eŋgànɛ̀lɛ̀ rzɔ, o rza enje lì akahwanɛ ò hwaŋga ema hwa hwèlì wònyà Yudà nà hwaŋga ema hwa rza enje wònyà Yudà, ò hwàkòmì nà ò hwaŋga ema hwa hwèlì wònja, ò wunyanà nà hwalanà. Inyɔ hwa arzɛ è hwèlì ndi mòtò mɔ̀kɔ èhwanja è lòkɛ̀ Yerzù Krirztò.

Kòlòrzìyà 3:11

ò rza enje hwèkàkòwèlì ò hwatò hwa wònyà Yudà nà hwatò ema hwa rza enje wònyà Yudà, tɔ̀ mòtò ema à endàhwì tɔ̀ è mɔ̀ ema à rza endàhwɛ̀. Ò rza enje hwèkakòwèlì ŋga mòtò à hwèlì ndi ŋmɛ̀nì tɔ̀ mòtò wà hwaŋga tɔ̀ mòtò wà wònja. Krirztò ndi à hwèlì hweyà hwe arzɛ, ndèŋgànɛlɛ à hwèlì ò tenì yà inyɔ hwa arzɛ.

2 Tìmotì 3:11

O hwi nɛ hwatò hwa no tàkìrzɛ̀, ndèŋgàna o hwi mètàkà ema imba na lu o tenì ya moŋgo motaka. O hwi lìtumba la hweyà ema hwe ma no gbèyɛ̀nɛ o tenì ya màmbowà mà Antìyɔ̀kì, Ikònìyùmì na Lìrzìtìrà. O hwi nɛ nà mà kake ŋmèma o mètàkà ema nà mà luwe aŋga. Ndi Rzàŋgo Yerzù à mà no rzùŋga o tenì ya meŋge mètàkà me arzɛ.