Hvìlipìyà 2:3 - Mokpwe: Bakwery (New Testament)

³ È rzi gbeyà hweyà ema hwe uŋmɛ̀lɛ̀ nanù ema e hwe gbeyà ndi o lì hwɛ gbamù. È rzi gbeyà hvɛ hweyà ema hwe uŋmɛ̀lɛ̀ nanù ema e awòwɛ̀. Ndi na lì arzihwirzɛ la anyu la arzɛ inyɛ e ɛnɛ hwahvɛhvɛ hwatò wòlìto lì aka inyɔ hwìtì.

Hvìlipìyà 2:3 Mawu Ofanana

Lukàrzɛ̀ 18:14

Yerzù rzìi a òhwa hvɛ nanù ema, “Nà è òhweyà ema, ònò mòtò à mà tìmba ò ndawò yà èni rzìi a tɛ̀mɛ̀ ehve-ehve nà Lohwɛ̀, lì aka òŋgò Hvàlìrzàyì. Tɔ̀ njɛnɛ ema a akàrzɛ mɔ̀ ŋmìti, à rzìhwìrzɛ̀hwɛ̀. È mɔ̀ hvɛ ema arzihwirzɛ, a kàrzɛ̀hwɛ̀.”

Ròmànì 12:10

Inyɛ̀ tɔ̀ ima mòtò a lìŋgàne ŋmanyàŋgò wa eni na ŋmèma mò eni mò arzɛ. Inyɛ̀ tɔ̀ ima mòtò a ŋgbe ŋmanyàŋgò wa eni èluhwe lì aka mamɛ ema a aŋgbɛ mɔ̀ ŋmìti.

Ròmànì 13:13

Inyɛ̀ i hwɛnɛ hwɛ̀ɛ̀mɛ̀ hwe gbamù nàa hwatò ema hwa hwèlì ò ŋmàye. È rzi ɛndɛ ò indèma ema hwatò hwa nyɔ mimba rzi hwa wòma, i rzi hwɛnɛ nyìrzɛ̀ ya mòrzònje. È rzi gbeyà hweyà hwe ndɔ̀ki. È rzi tɔ̀wɔ ndèŋgànà e rzi hwɛnɛ inòna.

Ròmànì 2:8

Hwahvɛhvɛ hwatò hwa hwèlì ikuka ndèŋgànɛ̀lɛ̀ hwa rza gbeyà hweyà hwe jɔ̀kɛ̀, wɔ hwa gbeyà ndi hweyà hwe wòhwe. Inì nyayi ja hwatò Lohwɛ̀ a ò hwa uŋmɛ̀lɛ̀ hwètàtò hwe eni ò lì hwa kɔ̀kìrzɛ̀.

1 Kɔ̀rintìyà 15:9

O i àpɔ̀rzìtòlò ja arzɛ, imba ndi na hwèlì e mɔ̀ ema a rza ohvɛ wòlìtò.

1 Kɔ̀rintìyà 3:3

Èhwanja e hwèlì e nɔ̀ŋgɔ ndi hweyà hwe e nyàmà yà nyo. È a ohvanɛyi inona mɔ̀kɔ na ɔ̀nɛyi. È tɔ̀wɔ hvɛ metaŋgo mɔ̀kɔ na ɔ̀nɛyi. Rzeke hwenè hweyà hwe uŋmɛ̀lɛ̀ nanù ema hwègbèèlì hwe wòhwe hwe e nyàmà ya nyo hwe hwèlì hwe e kànèyà e? Rzekè inyɔ e hwèlì e lìya ndi nàa hwatò hwa ène rze.

2 Kɔ̀rintìyà 12:20

Nà oka wɔ̀ŋgɔ̀ nanù ema na jelì tɛ o lì e ɛnɛ na e ùŋmanɛlɛ e gbeyà hweyà ema na rza lìŋganɛyi, ndèŋgànɛlɛ imba hvɛ na gbeyà hweyà ema inyɔ hvɛ e rza lìŋgànɛyi. Nà oka wɔ̀ŋgɔ̀ nanù ema na jelì tɛ na e ùŋmanɛlɛ o motaŋgo, e anònànɛ̀yì mɔ̀kɔ na ɔ̀nɛyi, e ahwɛ̀nɛ̀nɛ̀yi hwètàtò, e rza o arza nanù ema ohvɛhvɛ mòtò a hwɛnɛ èluhwe, e àhwɛ̀nyɛ̀nɛ̀yì, e a o àyìndànɛ̀, e o òhva kumba ndèŋgàna e o gbeyà ndi hweyà hwe mbùnakɛ̀.

Gàletìyà 5:15

Ndi e rza ahweyànɛlɛ tɛ rzi e anana mɔ̀kɔ na ɔ̀nɛyi o a ɛnɛ oma e hwèlì ndi nyàmà ja wàŋga e aŋgowe. È rza aŋgo tɛ nanù oma e hwɛni lì àwòŋwànɛ̀yì mɔ̀kɔ na ɔ̀nɛyi.

Gàletìyà 5:26

I rza hwɛni lì a ekirzɛ, i rza hwɛni lì ahvikowanɛ, tɔ̀ lì a ahwɛnɛnɛ inona.

Ɛ̀hvìrzìyà 4:2

Tɔ̀ mamɛ ema è gbèeyà, è à rzììrzɛ, è hwɛ hvɛ hviyayi, rzìi è ajùlɛ̀nɛ̀ mɔ̀kɔ nà ɔ̀nɛyi. È à ùŋmɛlɛnɛ è ndìŋgɛ nà oma è ajùlɛ̀nɛ̀ mɔ̀kɔ nà ɔ̀nɛyi.

Ɛ̀hvìrzìyà 5:21

È aŋgbɛ inyɔ hwiti o lì gbèeyà mɔ̀kɔ nà ɔnɛ̀i o nyòla ya èluhwe e ma i ŋgbelì Krirztò.

Hvìlipìyà 2:14

È gbeye hweyà hwe arzɛ e rzi hwɛ lì àyiŋgòwɛ̀ tɔ̀ o lì kɔɔ hvènda.

Kòlòrzìyà 3:12

È hwèlì ndi nàa hwatò ema Lohwɛ̀ à mà hvɔ̀rzɛ̀, inyɔ è ondi wòtani ndèŋgànɛ̀lɛ̀ à è lìŋgàni rzàyi-rzàyi. Ò èŋgànɛlɛ rzɔ inyɔ è àŋgàmɛ̀nɛ̀yi lì hwɛnɛ mèèmà mè ììlì, è hwɛni lì hwɛnɛ mèèmà mè gbamù, è hwɛni lì arzìirzɛ̀. È hwɛni lì hwɛ hviyayi, ndèŋgànɛlɛ è hwɛni lì àjùlɛ̀.

Kòlòrzìyà 3:8

Ndi ò nàŋgɛ inyɔ è hwɛni lì hwɛmɛ ò lì gbeyà hweyà nàa, hwètàtò, lì hwɛ̀nɛ̀ lìndɛ̀nɛ̀, è kɔ̀ɔ̀wù, ò lì hvàŋga lìinà là mòtò, nà ò lì hwɛnɛ wànà yà wòhwe.

1 Tìmotì 6:4

Hwàŋga hwatò hwa ondi na kumba ndèŋgàna hwa rza hwi tɔ̀ eyà. È nyayi ema hwaŋga hwatò hwa lìŋgàni hwèhvèŋgòwèlì hwe mbɔrzi na mòtaŋgo e gbèyi ndi nàa nyàmbɛ na wɔ̀. Ène eyà e hwa jànelì inona o ìtììtènì ya awu, mòhvùŋgu, hwatò hwa ohwa wòhwe lì teŋgɛ̀nɛ hwahvɛhvɛ hwatò, ndèŋgàna hwa a ohvanɛ màlùtèyà ma wòhwe lì hvomɛ̀nɛ̀ mɔ̀kɔ na ɔ̀nɛyi.

1 Pètrò 3:8

O lì umba ene mbɔrzi, inyɔ hwa arzɛ e hwɛni ndi lì hwɛ mòtò mɔ̀kɔ. Ya àwòhvànɛ mèèmà me ììlì. Ya alìŋgànɛ mɔ̀kɔ na ɔ̀nɛyi. È àyènjànɛ̀ na lì arzihwirzɛ.

1 Pètrò 5:5

Ŋgànà hvɔ̀kɔ hvɛ mɛnɛ, inyɔ hwatò ema e rzi rzɔ̀ mòkèka, e arzihwirzɛ o hwàmbaki hwa anyu. Inyɔ hwa arzɛ e arzìhwìrzɛ̀lɛ̀lɛ̀ mɔ̀kɔ na ɔ̀nɛyi, ehwànja e tìlahwì o e kààtì ya Lohwà nanù ema, “Lohwɛ̀ a teŋgɛ̀nɛ̀ hwatò ema hwa ohvi kumba ndi à uŋmɛ̀lɛ̀ ŋmèma mo gbamù o hwaŋga hwatò ema hwa arzihwirzɛ.”