Hibrù 6:18 - Mokpwe: Bakwery (New Testament)

¹⁸ Lohwɛ̀ à mà ŋgbà hwene hweyà hweahwàkɛ ema hwe rza tanɛ lì àyèŋgowɛ̀, ehwànja Lohwɛ̀ a rza kɔ̀ɔ hweyà. A ma jo ŋgba yòombò na lìkàkɛ̀nɛ. A ma gbeyà ndi nanù, aŋga nanù irzɔ ema i lɛmbi lìni lìkàkɛ̀nɛ na màyìmbi jo o rzulɛhwɛ, na o lì àhvìtɛ̀ o hwèèmà ema mɔ̀ à ohwi nanù ema a o jo ŋgba.

Hibrù 6:18 Mawu Ofanana

Matiyò 24:35

È ŋmanyu nà è rze hwe ò kùwa lì aka ndi hweyòhwèlì hwe ami hwe ò hwɛ ò i hvònda ja arzɛ.

Matiyò 3:7

Nà òma Yòwanìrzɛ̀ à mà ɛnɛ rzayì-rzayì ja Hvàlìrzàyì nà Rzàdùrzì hwa jà ema à hwa lùhwìrzɛ̀, rzìi à hwa òhwèyà nanù ema, “Inyɔ hvèyi! Njɛnɛ à è kòkòhwɛ̀lɛ̀yi nanù ema è hwaŋgè è kɔ̀kìrzɛ̀ yà ama Lohwɛ̀ ema è jà e?

Lukàrzɛ̀ 2:25

O èŋge hvònda, ò mà hwɛ mùnyanà ò Jèrurzalɛ̀mù, à ma hwɛ̀lɛ̀hwɛ̀ Rzimìyɔ̀nì. Ò nò mùnyanà à mà tɛ̀mɛ̀ ehve-ehve, nà lì òkà Lohwɛ̀ wɔ̀ŋgɔ̀. À mà ambɛlɛlɛ è hvònda ema Lohwɛ̀ à mà hwɛnɛ lì òŋgìrzɛ̀ hwatò hwa Irzàyɛ̀lì, Èlìŋgɛ̀ yà Wòtani e mà hwɛ nà mɔ̀.

Ròmànì 15:5

Inyɛ̀ Lohwɛ̀ ema a jò ŋgbà la àjùlɛ̀ na lì kɔ̀mɛ̀lɛ̀, a e òŋgòwane ò lì ahweyànɛ mɔ̀kɔ na ɔ̀nɛyi, na òma e òŋgama Yerzù Krirztò.

Ròmànì 3:25

Lohwɛ̀ à mà ŋgbà Yerzù nàa jàhwèyà ò lì e ŋwèeyà. Ndèŋgana hwatò hwa ò làkìrzɛ̀hwɛ̀ èhwanja hwa mò lòkɛ̀yì. Lohwɛ̀ à mà gbeyà ndi nanù ò lì uŋmɛ̀lɛ̀ hwatò hwa arzɛ kɔ̀yi-kɔ̀yi nanù ema, a gbeyà hweyà ŋgàna ema e hvòmɛ̀nɛ̀. O e hvònda kòhwa Lohwɛ̀ à mà àjùlɛ̀ na hwatò, a rzi kɔ̀kìrzɛ̀ hwatò ema hwa gbeyà wòhwe.

Ròmànì 3:4

Ò jɔ̀kɛ̀ rzeketɛ nanù. Tɔ ima mòtò wa hwènàmà anu rze ya mɔ̀nyɛ̀ a tànɛyi lì òhwa hweyà ema hwe rza enje jɔ̀kɛ̀. Ndi Lohwɛ̀ mɔ̀ à hwèlì jɔ̀kɛ̀ ò ihvònda ja arzɛ. Nà òma e tìlahwì ò kààtì ya Lohwà nanù ema, “A òhwi tɛ eyà, hwatò hwa àŋgàmɛ̀nɛ̀yi lì hwiya nanù ema màmɛ ema a òhwa e hwèlì ndi e jɔ̀kɛ̀. Hwa ò kàyìrzɛ̀ tɛ, ò hwɛni lì kaya mòŋgò ŋmàŋgò ŋgàna ema e hvòmɛ̀nɛ̀.”

Ròmànì 5:5

Jò òhvi tɛ lìhvìtà i rza timbana màa matò. Èhwanja Lohwɛ̀ à mà jò uŋmɛ̀lɛ̀ nɛ mɔ̀ à jò lìŋgàni, na òma a mà gbeyɛ e ndìŋgɛ ya eni ò lì kpèeyà ò mèèmà me arzu. À mà gbeyà ene na òma a jò ŋgbelì Èlìŋgɛ̀ yà eni yà Wòtani.

Hvìlipìyà 2:1

Nà oma e hwèlì mɔ̀kɔ na Krirztò e kɔ̀mɛlɛhwɛyi, ndèŋgànɛ̀lɛ̀ e ndìŋgɛ ya eni è e ŋgba etembe, inyɔ e alàtanɛ na Èlìŋgɛ̀ yà Wòtani. È awuŋmɛ̀lɛ̀nɛ mèèmà me gbamù na lì a okànɛ̀lɛ̀ mɔ̀kɔ na ɔnɛyi ììlì.

Kòlòrzìyà 1:23

Inyɛ̀ è hwɛ ndi nanù ema lì lòkɛ̀ là anyu lì àŋgàmɛ̀nɛ̀yi lì imbama, è inyàmɛ̀nɛ̀ hwètɛ̀mèlì hwe matàŋga mà anyu ò mɔ̀nyɛ̀, ndèŋgànɛ̀lɛ̀ è ika mèèmà mè anyu ò ŋmɛ̀ndì mò gbamù ema è mà hwèyɛ. Moŋgo ŋmɛ̀ndì mò gbamù ema inyɔ è mà màa lì hweyà, mò hwèlì ndi ŋmɛ̀ndì mò gbamù ema mò mà nyàlɛ̀ ò è rze yà arzɛ, ndeŋgànɛlɛ mɔ̀ ndi imba Pàwolò nà atìmbìrzɛ̀yi è mògbèèlì wà ama Lohwɛ̀ ò lì gbeyà.

Kòlòrzìyà 1:27

Lohwɛ̀ à arza nanù ema hwatò hwa eni hwa hwiye nanù ema mònàmɛ̀ nà è ndèli yà ama Krirztò è hwèlì hvɛ nanù mɛnɛ ò hwatò ema hwa rza enje wònyà Yudà. È wùndɛ̀ ema è hwèlì ò tenì è hwèlì ndi ema inyɔ e ika mèèmà mè anyu nanù ema, inyɔ è lùwa è ndèli ema Lohwɛ̀ à ohwi nanù ema à ŋgba hwatò wà eni.

Kòlòrzìyà 1:5

I hwi nanù ema inyɔ è gbeyà ndi nanù ehwànja è mà rzèkeyà mèèmà mè anyu nanù ema è ò lùwa mònàmɛ̀ ema Lohwɛ̀ à mà è ùteya ò ŋmanyu yà lohwà. Inyɔ è mà màa lì hweya hweyà lì hvomɛ̀nɛ̀ moŋgo mònàmɛ̀, è hvonda ema hwa mà lòme lì è ohweyà ŋmɛ̀ndì mò gbamù.

1 Tɛ̀rzàlonìyà 1:10

Hwa ohwa hvɛ nà oma inyɔ è ambɛ̀lɛ̀lɛ̀ hwèjèelì hwe è Ŋmanà wà ama Lohwɛ̀ ema à uwɛ̀lɛ̀lɛ̀yi ò ŋmanyu yà lohwà. Oŋgo Ŋmanà wà ama Lohwɛ̀ Yerzù, ema à jò rzùŋgi ò è kɔ̀kìrzɛ̀ yà ama Lohwɛ̀ ema è jà, mɔ̀ ndi Lohwɛ̀ à mà hvùmùlɛ̀.

1 Tìmotì 1:1

Imba Pàwolò, ema na hwèlì e àpɔ̀rzìtòlò ya ama Yerzù Krirztò, ndi na tilì ene kààtì. Lohwɛ̀ ndi à no kànèlì ema na gbeye ene èwòlò mɔ̀ ema a jo rzùŋgi o wòhwe hwa arzu. Lini lìkànèyà lì uwɛ̀lɛ̀lɛ̀yi hvɛ oma Krirztò Yerzù ema ji ikayi lìhvìta.

1 Tìmotì 6:12

O àjùlɛ̀ o lì atàkìrzɛ̀ lì ika ŋmèma mo aŋgɔ̀ na Lohwɛ̀ na o lì mo gbèeyà. Lòŋgɛ la gbìndèyà ema Lohwɛ̀ à mà o ŋgbɛ o lì lɛmbɛ gbamù. Lohwɛ̀ à mà o ŋgba lìŋgi lòŋgɛ lìrzako ema o ma ohwe o marzo ma hwatò rzayi-rzayi nanù ema o lòkɛ̀ Krirztò.

2 Tìmotì 2:13

I gbèyi tɛ mamɛ ema Krirztò a arza nanù ema i gbeye, mɔ̀hvɛ a gbeyà hweŋge hwe arzɛ ema a ohwi nanù ema a gbeyà, èhwanja mɔ̀ à rza tanɛ lì arzɔ̀rzɛ̀ mɔ̀ ŋmìti.”

Tàyìtùrzì 1:2

Aŋga nanù, hwatò hwa ama Krirztò hwa ò luwa lìhvìta là lì luwa lòŋgɛ la gbìndèyà. Ndèŋgana Lohwɛ̀ à è wèka è rze, a mà kàkɛ̀nɛ̀ nanù ema, hwatò hwa eni hwa o hwɛ na mɔ̀ natɛ̀ɛ nà ò gbìndèyà. Mɔ̀ a rza kɔ̀ hweyà.

Hibrù 11:7

Lìlòkɛ̀ ndi lì ma gbeyà ema Nowà a hweyàne Lohwɛ̀ na oma Lohwɛ̀ à mà mo òhweyà hweyà ema hwe o gbèyɛ̀nɛ o hvonda ema e o jɛ̀ɛ̀. Tɔ̀ nɛ o eŋge hvonda mɔ̀ à rza ɛnɛ hweŋge hweyà na mìirzɔ̀ ma eni, ndi mɔ̀ à mà gbeyà hweŋge hweyà ema Lohwɛ̀ à mà mo òhweyà ema a gbeye. A ma oŋga wɔ̀lɔ wo ndɛnɛ. O tenì ɔ̀ndi mɔ̀ à mà kpeyaneya lìtumba la eni la arzɛ ndèŋgàna wɔ̀ hwà mà rzùŋgàhwa e hvonda ema màlìhwà ma mà onde e rze ya arzɛ rzìi hwèèmà hwe arzɛ hwe inda. Nà oma Nowà à mà gbèyi nanù e ma awuŋmɛ̀lɛ̀ nanù ema hwatò hwa arzɛ hwa e rze ya mɔ̀nyɛ̀ hwà mà hwɛ wòhwe. Ndi lìlòkɛ̀ ema Nowà à mà hwɛnɛ lì ma gbeyà ema Lohwɛ̀ a mo wowa nàa mòtò ema a tɛmi ehve-ehve.

Hibrù 3:11

Nà mà hwa tàtànà natɛ̀ɛ nà àtɛ̀ɛ̀ yòmbo nanù ema, ‘Hwa rza ò kpèya à kpèeyà hvɛ tɔ̀ ò èki yà ami yà lì àrzìyòlɛ̀.’”

Hibrù 3:6

Ndi Krirztò nàa è Ŋmanà wà munyanà wa ama Lohwɛ̀, à mà hwɛ lì kànèyà e ndawò yà Lohwà na ŋmèma mɔ̀kɔ. Irzɔ hvɛ i hwèlì ndì hwatò hwa lìtumba la e ndawò ya ama Lohwɛ̀, e hwèlì tɛ nanù ema jo ohvi etembe, ndèŋgànɛ̀lɛ̀ ji ikayi mèèmà me arzu na eyà ema ja àyèkìrzɛ̀nɛ̀ ema ji ikayi màhvìtà mà arzu.

Hibrù 6:17

O eŋgànɛ̀lɛ̀ rzɔ na oma Lohwɛ̀ à mà arze lì uŋmɛ̀lɛ̀ na e jɔ̀kɛ̀ o hwaŋga hwatò ema hwà mà hwɛnɛ lì luwa mamɛ ema à mà hwa kàkɛ̀nɛ, nanù ema mɔ̀ à rza àyèŋgowɛ̀ o lì kàkɛ̀nɛ la eni, o eŋgànɛ̀lɛ̀ à mà aàtɛ yòombò o lì hwàtɛ o lì kàkɛ̀nɛ la eni.

Hibrù 7:19

Ì hwi nanù ema è mbenda è rza è gbeyà ema eyà è hwɛ nà oma è àŋgàmɛ̀nɛ̀yi lì hwɛ. Jò ɔ̀ŋgɔ tɛ ò ɛnɛyi ehvàrzu, eyà yà gbamù è mà jà ema è jò gbèyi jò ohvi màhvìta. Ndeŋgànɛ̀lɛ̀ yɔ̀ ndi è mà jò jànà ò lì kombɛ̀nɛ̀ Lohwɛ̀.

Hibrù 7:21

Ndi lìrzàkò ema Lohwɛ̀ à mà hvɔ̀rzɔ̀ Yerzù ò lì hwɛ è pìlìrzì, mɔ̀ à mà ohwa nanù ema, “Rzàŋgo à mà ààtɛ̀ yombò, ndèŋgànɛ̀lɛ̀ mɔ̀ à rza unda yòòmbò yà eni, nanù ema, ‘O hwèlì ndi Pìlìrzì natɛ̀ɛ na o gbìndèyà na o gbìndèyà.’”

1 Yòwanìrzɛ̀ 1:10

Irzɔ jo òhwi tɛ nanù ema i rzi gbèyi tɔ̀ wòhwe, nanù oma i gbèyi ndi Lohwɛ̀ o lì hwɛ e mɔ̀ wa mòlàŋgà, ndèŋgànɛ̀lɛ̀ eyà ya ama Lohwɛ̀ e rza enje na irzɔ.

1 Yòwanìrzɛ̀ 5:10

Tɔ̀ ima mòtò ema a lòkɛ̀ è Ŋmanà wà ama Lohwɛ̀, eŋge ŋgànà e hwèlì ndi nanù ema a hwi nanù ema hwene hweyà hwe arzɛ hwe hwèlì ndi e jɔ̀kɛ̀. Ndi tɔ̀ ima mòtò ema a rza lòkɛ̀ Lohwɛ̀ e gbèyi ndi nàa mɔ̀ à ohwa ndi nanù ema Lohwɛ̀ a hwèlì mòlàŋga, ehwànja mɔ̀ à rza lòkɛ̀ hweyà ema Lohwɛ̀ a ohwa o lì hvomɛ̀nɛ̀ è Ŋmanà wà eni.