Hibrù 3:6 - Mokpwe: Bakwery (New Testament)

⁶ Ndi Krirztò nàa è Ŋmanà wà munyanà wa ama Lohwɛ̀, à mà hwɛ lì kànèyà e ndawò yà Lohwà na ŋmèma mɔ̀kɔ. Irzɔ hvɛ i hwèlì ndì hwatò hwa lìtumba la e ndawò ya ama Lohwɛ̀, e hwèlì tɛ nanù ema jo ohvi etembe, ndèŋgànɛ̀lɛ̀ ji ikayi mèèmà me arzu na eyà ema ja àyèkìrzɛ̀nɛ̀ ema ji ikayi màhvìtà mà arzu.

Hibrù 3:6 Mawu Ofanana

Matiyò 10:22

Hwatò hwa àrzɛ hwa ò e kɔ̀ ò nyòla lìinà la ami. Ndi hwatò ema hwa ò nò kakana mèèmà natɛ̀ɛ nà ò lìrzukù hwa ò rzùŋgàhwà.

Matiyò 16:18

Pètrò na òhweyà nanù ema ò hwèlì ndi ɛ̀kɔ̀kɔ̀ ya lìŋyàyi. O ŋmanyu ya ene ɛkɔkɔ ya lìŋyàyi ndi na òŋga mìitelì me ami. Tɔ̀ è ŋginyà ya e kpelì e rza tànɛyi lì anana meŋge miitelì.

Matiyò 24:13

Ndi hwatò ema hwa ò nò kakana mèèmà natɛ̀ɛ nà ò lìrzukù hwa ò rzùŋgàhwà.”

Ròmànì 11:22

Anù ndi i ɛnɛ ììlì na lì ambirzɛnɛyi la ama Lohwɛ̀. A ambirzɛnɛyi ò hwaŋga hwatò ema hwà mà kpɛɛ. Ndi mɔ̀ à ò òkeya ììlì, e hwèlì tɛ nanù ema ò wa ò lìya lòŋgɛ ema lì kànɛ̀yi ììlì ja eni. Ndi ò rza gbèyi tɛ nanù ò wa hvɛ ò rzenjòwahwa.

Ròmànì 12:12

Inyɛ̀ tɔ̀ ima mòtò a hwɛnɛ mɔ̀nyɛ̀ŋgì na lìhvìtà ema a hwɛni. Inyɛ̀ tɔ̀ ima mòtò a àjùlɛ̀ ò tenì ya mètàkà. Tɔ̀ ima mòtò àjùlɛ̀ ò tenì ya màkanɛ̀.

Ròmànì 15:13

Nà kànɛ nanù ema, Lohwɛ̀ ema mɔ̀ ndi à ŋgbàà lìhvìtà, a e gbeye e ònde na mɔ̀nyɛ̀ŋgì mò arzɛ na ò lì hwɛ na ɛ̀yɔ̀lɛ̀ ò nyòla lì lòkɛ̀ ema e lòkɛ̀. Ène eyà e gbeyà e ŋginyà ya Èlìŋgɛ̀ yà Wòtani e gbeyà lì lòkɛ̀ la anyu lì nyàla rzayi-rzayi.

Ròmànì 5:2

Mɔ̀ ndi à jò lìhvòhwèlì e njiya ya lìlòkɛ̀ aŋga nanù i hwiya e ndèli ya ama Lohwɛ̀. O èŋgànɛ̀lɛ̀ rzɔ jò òki mɔ̀nyɛ̀ŋgì rzayi-rzayi èhwanja i ma ika mèèmà me arzu nanù ema jò ò luwa ŋmàye mò ama Lohwɛ̀.

1 Kɔ̀rintìyà 3:16

Nà lòkɛ̀yi nanù ema e ayèmbɛ inyɔ hwa arzɛ nanù ema e hwèlì ndi nàa e Ndawò yà Lohwà. Ndèŋgana èlìŋgɛ̀ ya ama Lohwɛ̀ e hwèlì, e lìyayi o ìtììtènì ja anyu.

1 Kɔ̀rintìyà 6:19

È rza hwi nanù ema è nyo ya anyu è hwèlì ndi hwèlìyelì hwe Èlìŋgɛ̀ yà Wòtani e? Èma e lìyayi o tenì yà nyo yà anyu, ema Lohwɛ̀ a mà è ŋgbè e? Rzèketɛ inyɔ ndi e ohvi i nyo ja anyu, i hwèlì ndi nyo ja ama Lohwɛ̀.

2 Kɔ̀rintìyà 6:16

È Ndawò ya Lohwà e rza ohvi tɔ̀ eyà o lì gbeyà na e ndawò ya lì hvɛhvɛ lohwà. Imba na ohwa ndi nanù èhwanja irzɔ ndi i hwèlì e ndawò yà Lohwà, Lòohwà ema lì hwèlì lòŋgɛ. È hwèlì ndi nanù, na oma e tìlahwì nanù ema Lohwɛ̀ a ohwi nanù ema, “Nà o hwɛ na hwatò hwa amì ndèŋgànɛlɛ na o lìya na wɔ̀. Hwa o no gbeyà ndi nàa e Ndawò ya Lohwà ndèŋgànɛlɛ na o ò hwa wòwa ndi nàa hwatò hwa ami.”

Gàletìyà 6:10

O èŋgànɛ̀lɛ̀ rzɔ, tɔ̀ ima hvonda ema i lu o lì gbeyà gbamù, inyɛ i wo gbèeyà tɔ̀ ima mòtò, rzɛ̀hvɔ̀nì wònyàmòwe hwa Krirztò.

Gàletìyà 6:9

Inyɛ̀ i rza ɔ̀tɔ̀ o lì gbeyà mamɛ ema e lɔ̀wu. Èhwanja irzɔ i rza ɔ̀tɔ̀ tɛ, jo ò luwa etaŋgi ja arzu o hvonda ya jɔ̀kɛ̀ ema e o jɛ̀ɛ̀.

Ɛ̀hvìrzìyà 3:12

Èhwanja i lòkɛ̀yì Krirztò nà lì hwɛ mɔ̀kɔ nà mɔ̀, eŋge ndi è jò lìhvòwèlì è njiya ò lì ɛndɛ lì kombɛ̀nɛ̀ Lohwɛ̀ nà lìhvìta là arzɛ è rzì hwɛ irzɔ lì oka tɔ̀ wɔ̀ŋgɔ̀.

Kòlòrzìyà 1:23

Inyɛ̀ è hwɛ ndi nanù ema lì lòkɛ̀ là anyu lì àŋgàmɛ̀nɛ̀yi lì imbama, è inyàmɛ̀nɛ̀ hwètɛ̀mèlì hwe matàŋga mà anyu ò mɔ̀nyɛ̀, ndèŋgànɛ̀lɛ̀ è ika mèèmà mè anyu ò ŋmɛ̀ndì mò gbamù ema è mà hwèyɛ. Moŋgo ŋmɛ̀ndì mò gbamù ema inyɔ è mà màa lì hweyà, mò hwèlì ndi ŋmɛ̀ndì mò gbamù ema mò mà nyàlɛ̀ ò è rze yà arzɛ, ndeŋgànɛlɛ mɔ̀ ndi imba Pàwolò nà atìmbìrzɛ̀yi è mògbèèlì wà ama Lohwɛ̀ ò lì gbeyà.

1 Tɛ̀rzàlonìyà 5:16

È lìŋge ihvonda ja arzɛ,

2 Tɛ̀rzàlonìyà 2:16

Inyɛ̀ Rzàŋgo wà arzu, Yerzù Krirztò mɔ̀ ŋmìti nà Lohwɛ̀, Tatɛ̀ wà arzu, mɔ̀ ema à mà jò lìŋgàna ndèŋgànɛ̀lɛ̀ ò è ndèli yà eni, à jò ètìrzɛ̀ mèèmà mè arzu nà gbèti ema wò rza kuwa, ndèŋgànɛlɛ à jò ŋgbe lìhvìtà ò hweyà hwe gbamù.

1 Tìmotì 3:15

Nà e tìleya hwene hweyà ema e hwɛyi o lì hwe gbèeyà aŋga nanù na rza akɛlɛ tɛ lì jà, e hwɛni lì hwiya ɛ̀ɛ̀mɛ̀ ema hwatò hwa Lohwà hwa àŋgàmɛ̀nɛ̀yi lì hwɛnɛ. Hwatò hwa Lohwà wɔ̀ ndi hwa hwèlì ŋmèmba mo ama Lohwɛ̀ ndèŋgàna Lohwɛ̀ ndi à hwa ɔŋgeya. Hwatò hwa Lohwà wɔ̀ ndi hwa hwèlì ŋmèmba mo ama Lohwɛ̀ ndèŋgàna Lohwɛ̀ a hwèlì lòŋgɛ. Moŋgo ŋmèmba mo hwèlì ndi nàa lìwondi na ɛ̀ɛkɛ̀ ema hwe rzulɛ gbamù eyà ya Lohwà.

Hibrù 1:2

Ndì ò mene mèènyà me lìrzùkù rzɔ, Lohwɛ̀ à jò òhwìrzɛ̀nɛ̀ ndi lì akeyà nà è Ŋmanà wà eni. Lì akeyà nà mɔ̀ ndi Lohwɛ̀ à mà wèke è ŋmanyu yà lohwà nà rze yà mɔ̀nyɛ̀. Ndeŋgànɛ̀lɛ̀ mɔ̀ ndi Lohwɛ̀ à hvɔ̀rzì nanù ema a hwɛni ewèkèlì ya arzɛ ema Lohwɛ̀ à mà wèkɛ.

Hibrù 10:19

Ò eŋgànɛ̀lɛ̀ ìi wònyamòwè, jo òhvi e wònja o lì kpèeyà o eŋge Èki ema e Rzàŋgi lì Akà na Lìmɛ̀nì la Wòrzàŋgì.

Hibrù 10:21

Irzɔ jo òhvì e Pìlìrzì ema è olo ema e ɔ̀ŋgeya hwatò ò ndawò o ya Lohwà.

Hibrù 10:23

Inyɛ̀ i lɛmbɛ lìhvìtà là arzu kɔ̀yi-kɔ̀yi, e rzi hwɛ lì nyiŋgirzɛhwɛ, èhwanja irzɔ i lòkɛ̀yi nanù ema Lohwɛ̀ ema a ohwi à mà a gbeyà mamɛ ema a ohwa nanù ema a gbeyà a e gbeyà.

Hibrù 10:35

O èŋgànɛ̀lɛ̀ e kakè mèèmà me anyu nanù mɛnɛ èhwanja eŋge ndi e gbeyà ema Lohwɛ̀ a e ŋgbà etàŋgì ya ŋginyà.

Hibrù 11:1

Lilòkɛ̀ lì hwèlì ndi o lì ika ŋmèma mo aŋgɔ̀ nanù ema o hwɛni lì lùwa mamɛ ema o arza ndèŋgàna o e luwa. O hwi na e jɔ̀kɛ̀ nanù ema hwèèmà ema o rza ɛni hwe hwèlì aŋga.

Hibrù 3:14

I hwèlì ndi mɔ̀kɔ na Yerzù Krirztò, è hwèlì tɛ̀ ema i lɛmbi tɛ lìlòkɛ̀ ema i ma lome lì hwɛnɛ kɔ̀yi-kɔ̀yi natɛ̀ɛ na o lìrzùkù.

Hibrù 4:11

Ò èŋgànɛ̀lɛ̀ inyɛ i gbeye nanù ema, irzɔ hvɛ jò ò kpèeyà èŋge èki yà lì arzìyolɛ, aŋga nanù tɔ̀ mɔ̀kɔ wa arzu a rza o hvònda o lì kpèeyà aŋga. I rzi nɔ̀ŋgɔ̀ màtaŋgà mà hwatò ema hwa rzi hwɛ lì gbeyà na oma Lohwɛ̀ à mà ohwe nanù ema hwa gbeye.

Hibrù 4:14

Ò èŋgànɛ̀lɛ̀ rzɔ nà oma ì hwɛnì è Pìlìrzì è Kàrzàmi Ndɛnɛ, Yerzù è Ŋmanà wà ama Lohwɛ̀, ema à mà lòmɛ lì ɛndɛ ò ŋmanyu yà lohwà ò worzo wò ama Lohwɛ̀, inyɛ ì lɛ̀mbɛ lìlòkɛ̀ là arzu kɔ̀yi-kɔ̀yi.

Hibrù 4:16

Ò eŋgànɛ̀lɛ̀ rzɔ̀, inyɛ ì hwɛnɛ lìhvìtà, inyɛ je ɛndɛ o e konda ya lìkànèyà la ama Lohwɛ̀, ema e ŋgbàà e ndelì. Inyɛ̀ je ɛndɛ aŋga e rzi hwɛ tɔ̀ wɔ̀ŋgɔ̀. Inyɛ̀ i gbeye nanù aŋga nanù Lohwɛ̀ a jo uŋmɛ̀lɛ̀ ììlì, rzìi a jo ŋgbà e ndèli ya eni ema e jo oŋgowàna tɔ̀ ima hvonda ema ja arza lì oŋgowanɛ.

Hibrù 6:11

Irzɔ ja arza ndi nanù ema inyɔ e ɛ̀ndɛ̀nɛ̀ èwòlò e anyu o worzo na kumba, natɛ̀ɛ na o lìrzukù, aŋga nanù e luwa hweyà ema inyɔ e ambɛ̀lɛlɛyi na màhvìta.

Hibrù 6:18

Lohwɛ̀ à mà ŋgbà hwene hweyà hweahwàkɛ ema hwe rza tanɛ lì àyèŋgowɛ̀, ehwànja Lohwɛ̀ a rza kɔ̀ɔ hweyà. A ma jo ŋgba yòombò na lìkàkɛ̀nɛ. A ma gbeyà ndi nanù, aŋga nanù irzɔ ema i lɛmbi lìni lìkàkɛ̀nɛ na màyìmbi jo o rzulɛhwɛ, na o lì àhvìtɛ̀ o hwèèmà ema mɔ̀ à ohwi nanù ema a o jo ŋgba.

Hibrù 7:19

Ì hwi nanù ema è mbenda è rza è gbeyà ema eyà è hwɛ nà oma è àŋgàmɛ̀nɛ̀yi lì hwɛ. Jò ɔ̀ŋgɔ tɛ ò ɛnɛyi ehvàrzu, eyà yà gbamù è mà jà ema è jò gbèyi jò ohvi màhvìta. Ndeŋgànɛ̀lɛ̀ yɔ̀ ndi è mà jò jànà ò lì kombɛ̀nɛ̀ Lohwɛ̀.

1 Pètrò 1:8

Inyɔ e mo lìŋgàni, tɔ̀ nɛ e rzi mo ɛni. Inyɔ e mo lòkɛ̀yi tɔ̀ nɛ o naŋgɛ e rzi mo ɛni. O eŋgànɛ̀lɛ̀ rzɔ inyɔ e oke mɔ̀nyɛ̀ŋgi, na màlìŋgo ma ndɛnɛ ema mà rza ohwawa.

1 Pètrò 2:5

Inyɔ e jèe e hwɛ ndi nàa màŋyàyi ema mà hwèlì lòŋgɛ ema Lohwɛ̀ a gbeyàna o lì oŋga e ndawò ya eni ya èlìŋgɛ̀. Ndeŋgànɛlɛ o tenì ya eŋge ndawò ɔndi inyɔ e o mo gbèeyà. È o hwɛ ndi pìlìrzì ja wòtani, ema e o mo ŋgbɛ màhwèyà ma wòtani ema mɔ̀ à o emeyà lì akeyà na Yerzù Krirztò.

1 Pètrò 4:17

È hvonda e ma uka ema hwèkàyìrzèlèlì hwe hwɛni lì wòteyà ema Lohwɛ̀ a hwɛni lì wòteyà lì kàyìrzɛ̀ hwatò. Mɔ̀ a o wòteyà ndi o lì kàyìrzɛ̀ hwatò hwa eni. È hwèlì tɛ nanù ema Lohwɛ̀ a tanɛ tɛ lì jo wotàneya irzɔ ema i hwèlì hwatò hwa ama Krirztò, mamɛ e o hwɛ e mbàko ya hwaŋga hwatò ema hwa rza lòkɛ̀ɛ Ŋmɛ̀ndì mò Gbamù ema mo uwɛ̀lɛ̀lɛ̀yì o ma Lohwɛ̀ e?

Hwèwulùwèlì 2:18

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba mo Tìyatìrà nanù ema, “Mono ŋmɛ̀ndì mò uwɛ̀lɛ̀lɛ̀yi ndi ò mà è Ŋmàna wà ama Lohwɛ̀, ema mììrzɔ̀ mà eni mà tèeyà ndi nàa mùnya ema mò òŋwa, matàŋga mà eni hvɛ mà ɛneyà ndi nàa ɛ̀ɛkɛ̀ ema è hwɛ̀lɛ̀hwɛ̀ brɔ̀nrzi ema è hvànya.

Hwèwulùwèlì 2:25

Ndi tɔ̀ nanù inyɔ è ika mèèmà mè anyu nà imba natɛ̀ɛ nà ò è hvonda ema nà ò jɛ̀ɛ̀.

Hwèwulùwèlì 2:26

Hwàto ema hwa lìya lì aka hweyà hwe wòhwe, ndèŋgànɛ̀lɛ̀ ema hwa gbeyà hweyà ema imba nà hwa ohweyà ò lì gbeyà, natɛ̀ɛ nà ò lìrzùkù là lòŋgɛ là awu anu rze, nà ò hwa ŋgba è wònja yà lì kànèyà hwèkòmè hwe arzɛ hwe anu rze yà mɔ̀nyɛ̀.

Hwèwulùwèlì 3:11

Nà ò jà ŋmàna mbɔ̀, è ika ndi mèèmà mè anyu nà imba nanù mɛnɛ, aŋga nanù tɔ̀ mòtò tɔ̀ mɔ̀kɔ à rza tànɛ lì wòwa ììtàŋgi yà anyu.