Hibrù 13:7 - Mokpwe: Bakwery (New Testament)

⁷ È ɔ̀ŋgɛ̀lɛ̀ hwàtimbèlì hwa anyu hwa kòhwà ema hwa mà e ohweyà Eyà ya Lohwà è ɔ̀ŋgɛ̀lɛ̀ nà oma hwà mà lìya mòŋgɛ ma awu, e hwa nɔŋge matàŋgà mà awu ndeŋgànɛ̀lɛ̀ e lòkɛ̀ na oma wɔ̀ hvɛ hwà mà lòkɛ̀.

Hibrù 13:7 Mawu Ofanana

Matiyò 24:45

“Njɛnɛ rzɔ a hwèlì e mògbèèlì hwa lìhwiyè na e jɔ̀kɛ̀ e? Mɔ̀ ndi rzàŋgɛ wa eni wa èwòlò a ŋgba e wònja ò lì kànèyà hwanɛ̀yi hwàgbèèlì ò lì hwa ŋgba mòlelì mò awu ò e hvònda ema e hvòmɛ̀nɛ̀.

Lukàrzɛ̀ 12:42

Rzàŋgò rzìi a alàhwɛ̀ nanù ema, “O èŋgànɛ̀lɛ̀ tɔ̀ ima mɔ̀ wa anyu à hwɛ ndi nàa mògbèèlì ema à òhvi lìhwiyè, rzìi a gbeyà mamɛ rzàŋgò wà enì wà èwòlò a òhwì ema a gbèyè. A hwèlì ndi è mògbèèlì ema rzàŋgò wa eni wa èwòlò a ŋgbèlì è wònjà lì kànèyà hwanɛ̀yi hwàgbèèlì, nà lì ɛnɛ nanù ema, tɔ̀ ima mɔ̀ wa awu a luwe e mò eni mòlelì na òma a hwɛnì lì lùwa.

Lukàrzɛ̀ 5:1

Wùnyà wɔ̀kɔ, nà òmà Yerzù a mà tɛ̀mɛ̀ ò mòkòkò mò yùlu ya Gɛ̀narzalɛ̀tì, ŋgìndì ndɛnɛ è mà mò tòŋgà ò lì òkànèyà eyà ya ama Lohwɛ̀.

Lukàrzɛ̀ 8:11

“Inyɛ̀ nà è tɛlɛlɛ mònò ŋmàna. Èŋge hvɔ̀ŋgɔ̀ è hwèlì ndi Eyà yà ama Lohwɛ̀.

Hwègbèèlì 13:46

Ndi Pàwolò na Bànàbàrzì hwà mà hwɛ ndi lì òhwa nanù mɛnɛ e rzi hwɛ lì òka wɔ̀ŋgɔ̀. Hwà mà hwɛ lì òhwa nanù ema, “Inyɔ wònyà Yudà, inyɔ ndi e ma àŋgàmɛ̀nɛ̀ lì lòma lì òhwa eyà ya ama Lohwɛ̀. Kanatɛ inyɔ ye e rzɔ̀rzi, ndèŋgànɛlɛ na òma inyɔ hvɛ e rza awòwɛ̀ nàa hwatò ema hwa àŋgàmɛ̀nɛ̀yi lì òhva lòŋgɛ la gbìndèyà, ò naŋgɛ nanù, irzɔ je e hwɛmɛ ò lì àyiŋgòwɛ̀lɛ̀lɛ̀ hwaŋga hwatò ema hwa rza enje wònyà Yudà.

Hwègbèèlì 14:23

O tɔ̀ ima ŋmèmba ema wɔ̀ hwà mà uke, wɔ̀ hwà mà hwɛ lì hvɔ̀rzɔ̀ hwatò ema hwa ò timbàa ŋmèmba mò arzɛ. È hvònda ema hwà mà kànɛ̀ na lì hwɛ ò mòkìyà njàwò, hwà mà ŋgba hwaŋga hwàtimbèlì ò màà mà ama Rzàŋgò ema wɔ̀ hwa ika lìlòkɛ̀ la awu.

Hwègbèèlì 4:31

Nà òma hwà mà kulɛ ò lì kanɛ̀, èki ema hwà mà taneya e ma nyiŋgà. Wɔ̀ hwa arzɛ hwà mà òndìrzɛ̀hwɛ na Èlìŋgɛ̀ yà Wòtani rzìi hwa wòteyà lì òhwa eyà ya Lohwà e rzi hwɛ lì òka wɔ̀ŋgɔ̀.

Ròmànì 10:17

O èŋgànɛ̀lɛ̀ rzɔ lì lòkɛ̀ lì jà ndi, ema mòtò a òkanelì tɛ ŋmɛ̀ndì, ndeŋgànɛ̀lɛ̀ hwatò hwa àŋgàmɛ̀nɛyi lì òhwa ŋmɛ̀ndì mò ama Krirztò aŋga nanù òma hwatò hwà mà mò lòkɛ̀.

1 Kɔ̀rintìyà 10:13

Tɔ̀ ima lìkèkìrzɛ ema ò lu lì hwèlì ndi maŋga ema mà nyàmɛ̀hwɛlɛ nà hwatò. Ndi Lohwɛ̀ à ika lìkàkɛ̀nɛ là eni nyàyi ema ò rza hwɛnì lì kèkìrzɛhwɛ lì akà mamɛ e ŋginyà yà àŋgɔ è rzà tanɛ̀yi lì hwanɛ̀. Ò èŋge hvonda yà lìŋgi lìkèkìrzɛ̀ à ò ŋgba ŋginyà ò lì ajùlɛ̀nɛ̀ lìŋgi lìkèkìrzɛ̀ nanù rzìi à ò lùhweyà hvèyò yà lì li àrzòlòhwɛ̀.

1 Kɔ̀rintìyà 11:1

Imba Pàwolò na ohwi nanù ema e no wowe nàa èèmbanelì na oma imba hvɛ na nɔ̀ŋgɔ hwèèmbanelì hwe ama Krirztò.

1 Kɔ̀rintìyà 4:16

O èŋgànɛ̀lɛ̀ rzɔ na e kɔ̀mɛ̀lɛ̀ nanù ema e gbeye hweyà ema imba na gbeyà.

Hvìlipìyà 3:17

Ìi wònyàmòwe kòkò, inyɛ e late e oŋgame màtaŋgà mà ami nanù mɛnɛ, ndèŋgànɛ̀lɛ̀ inyɔ e injàneyà hwatò ema hwa gbeyà na oma inyɔ e ma ɛnɛ na oma irzɔ i gbeyà.

1 Tɛ̀rzàlonìyà 1:6

Ò inyɔ è mà oŋgama ɛ̀ɛ̀mɛ̀ yà gbamù ema ì mà hwɛ̀nɛ̀ ndèŋgànɛ̀lɛ̀ inyɔ è mà oŋgama ɛ̀ɛ̀mɛ̀ yà ama è Rzàŋgo. Èlìŋgɛ̀ yà wòtani è mà è gbeyà ò lì oka mɔ̀nyɛ̀ŋgì nà oma è mà lùwè ŋmɛ̀ndì mò gbamù ema ì mà è jàneyà.

1 Tɛ̀rzàlonìyà 2:13

O hwèlì hvɛ lì hvɛhvɛ lìtiŋgà ema lì gbèyi i ŋgbàa Lohwɛ̀ jèka ihvonda ja àrzɛ. È hvonda ema i ma e jàneyà Ŋmɛ̀ndì mo ama Lohwɛ̀, e ma mo hweyà, rzìi e ma mo imànɛlɛ. Inyɔ e rzi mo imànɛlɛ ndi nàa ŋmɛ̀ndì ema mo uwɛ̀lɛ̀lɛ̀yi na mòtò wà hwènàmà ndi e ma mo emeyà ndi nàa Ŋmɛ̀ndì ema mo uwɛ̀lɛ̀lɛ̀yì o ma Lohwɛ̀ ema o jɔ̀kɛ̀ nanù ndi e hwèlì. Ndeŋgànɛ̀lɛ̀ eŋge mbɔrzi ndi Lohwɛ̀ a gbeyàna o ìtììtènì ja anyu o lì oŋgowàna inyɔ ema e lòkɛ̀.

2 Tɛ̀rzàlonìyà 3:7

Èhwànja inyɔ hwiti e hwi nanù ema e àŋgàmɛ̀nɛ̀yi lì jo embàneyà. I rzi hwɛ rzìŋga e hvonda ema i ma hwɛ na inyɔ.

2 Tɛ̀rzàlonìyà 3:9

I ma gbeyà nanù rzeketɛ ema i rzi hwɛnɛ wònjà o lì e ohweyà nanù ema e jo òŋgòwànè. Ndi i ma hwɛ lì gbeyà nanù aŋga nanù tɔ̀ ima lìtumba la eyà ema i gbèeyà, e o hwɛ ndi nàa embànelì ema inyɔ hvɛ e aŋgàmɛnɛ lì oŋgama.

1 Tìmotì 3:5

Nà ohwa ndi nanù èhwanja mòtò a rza tànɛyi tɛ o lì timba e la eni lìtumba gbamù, nɛ rzɔ mɔ̀ à tànɛyi o lì ɔŋgeya ŋmèmba mo hwatò hwa Lohwɛ̀ e?

Hibrù 13:17

È hweyàne hwatimbelì hwa anyu. È gbeye hvɛ mamɛ ema hwa ohwi nanù ema e gbeye. Èwòlò ya awu e hwèlì ndi o lì e ɔŋgeya. Wɔ̀ hvɛ ndi hwa hwɛnì lì ohweyà Lohwà nɛ hwa e ɔŋgeya. È hwa ŋgbe ehvolo ò lì gbeyà nanù na mɔ̀nyɛ̀ŋgì rzeketɛ na hwetàtò. Hwenè hweyà hwe arzɛ hwe rzà jo jàneyà tɔ̀ mɔ̀rzɛ̀ŋgì.

Hibrù 13:24

È kɔmè hwatimbelì hwa anyu hwa arzɛ, nà hwatò hwa arzɛ hwa ama Lohwà. Hwatò hwa Lohwɛ̀ ema hwa uwɛ̀lɛ̀lɛ̀yi o Itàlì wɔ̀ hvɛ hwa e omelì ikɔ̀mi.

Hibrù 6:12

Irzɔ i rza arza nanù ema inyɔ e hwɛ rzìŋgà, ndi inyɔ e hwɛ nàa hwaŋga ema hwa lòkɛ̀yi rzìi hwa ohvi la àjùlɛ̀, ndi e hwɛ nàa hwaŋga ema hwa wowa yòma ema Lohwɛ̀ à mà kàkɛ̀nɛ.

1 Pètrò 4:11

Tɔ̀ ima mòtò ema à hwi lì ohwa gbamù inyɛ à ohwe ndi nàa à ohwa ndi è mbɔrzi ema è uwɛ̀lɛ̀lɛ̀yì ò mà Lohwɛ̀ mɔ̀ ŋmìti. Tɔ̀ njɛnɛ ema à oŋgowàna hwatò, inyɛ à gbeyàne ndi è ŋginyà ema Lohwɛ̀ à mò ŋgbelì. Jèka jò ò ŋgbààhwà Lohwɛ̀ lì hvomɛ̀nɛ̀ hweyà hwe arzɛ lì akeyà nà Yerzù Krirztò. Èluhwe yà arzɛ nà è ŋginyà yà arzɛ è hwɛ nà mɔ̀ ò gbìndèyà nà ò gbìndèyà. Inyɛ̀ wò lìya nanù!

Hwèwulùwèlì 1:9

Imbà ndi nà hwèlì Yòwanìrzɛ̀ ŋmanyàŋgò wà anyu. Nà hwèlì ndi mɔ̀kɔ ema mɔ̀hvɛ à hwèlì ndi nàa inyɔ, ò lì kaka ŋmèma nà ò lì àjùlɛ̀nɛ̀ mètàke ema mè jèeyà hwatò ema hwa hwèlì ò lìkànèyà là ama Yerzù Krirztò. Hwa mà nò ika ò erzòòkà ema malìhwà ma mà toŋge ema è hwɛ̀lɛ̀hwɛ̀ Pàtìmòrzì ehwànja nà mà ohwa Eyà yà ama Lohwɛ̀ rzìi nà ohweyà hwatò lì hvomɛ̀nɛ̀ hweyà ema nà mà ɛnɛ lì e hvomɛ̀nɛ̀.

Hwèwulùwèlì 20:4

Rzìi na ɛnɛ ikonda ja màkànèyà ema hwatò ema hwà mà ji lìya wɔ̀ ndi Lohwɛ̀ à mà ŋgbe e wònja o lì kànèyà hwatò. Rzìi na ɛnɛ e mòtò wa tenì wa hwatò ema hwà mà ŋwɛɛ. Hwà mà hwa oŋwa ehwànja hwà mà hwɛ lì ohwa e jɔ̀kɛ̀ ema Yerzù à mà jàne ehwànja hwà mà hwɛ lì ohwa ŋmɛ̀ndì ema mo uwɛ̀lɛ̀lɛ̀yi o ma Lohwɛ̀. Wɔ̀ hwà mà hwa oŋwa ehwànja wɔ̀ hwa rzi kanɛ̀ eŋge nyàmà yà wòhwe tɔ̀ èlìŋgɛ̀ ya eni ehwànja wɔ̀ hwa rzì emeyà lì luwa èèmbanelì ya eni o imbɔ̀mbɔ tɔ̀ o màà mà awu. Wɔ̀ hwà mà tìmba o lòŋgɛ rzìi hwa hwɛ na Krirztò o lìkànèyà o tenì ya ikolì ja meya.

Hwèwulùwèlì 6:9

E Ŋguma ya Mɔ̀lɛ̀ŋgù rzìi e rzolowa mòjèkà ema mo ma ùkirzɛ̀ meta. Rzìi na ɔŋgɔ o rze ya ètàwo ya itùwà rzi na ɛnɛ hwèlìŋgɛ̀ hwe hwatò ema hwà mà oŋwahwa ehwànja hwà mà hwɛ o lì ohwa eyà yà Lohwà ndèŋgànɛ̀lɛ̀ hwà mà hwɛ lì ohwa hweyà hwe jɔ̀kɛ̀ lì hvomɛ̀nɛ̀ Lohwɛ̀ nyayi ema irzɔ i hwi nanù ema hwe hwèlì ndi e jɔ̀kɛ̀.