Gàletìyà 6:1 - Mokpwe: Bakwery (New Testament)

¹ Ìi wònyàmòwè kòkò, e hwèlì tɛ nanù ema mɔ̀kɔ wa anyu a undi o tenì ya wòhwe, inyo ema e hwèlì lì gbeyà mamɛ ema Èlìŋgɛ̀ ya Lohwà ya arza, e àŋgàmɛ̀nɛ̀ lì mo ulɛ o tenì ya wòhwe. È mo oŋgòhwànà tɛ, e mo òŋgowane na lì àjùlɛ̀. Ndi e hwɛni lì aŋgowa inyo hwiti e rza kpa o màkèkìrzɛ̀nɛ̀ o lì gbeyà woŋgo wòhwe.

Gàletìyà 6:1 Mawu Ofanana

Matiyò 11:29

Inyɔ e hwɛni lì emeyà ò lì nɔ̀ŋgɔ i mbɔ̀ɔ ja ami ja matàŋga, ndèŋgànà e nò òkòwàna, ehwànja na hwèlì ŋmɛɛ na òhvi hvɛ ŋmèma mò ami ema mò wɔ̀wi. È jèe e luwa la arzìyòlɛ̀.

Matiyò 26:69

Nà òma Pètrò à mà lìya aŋga èwòka, rzìi mògbèèlì mɔ̀kɔ wà ŋgɔ̀ndɔ̀ wà ama è pìlìrzì è kàrzamì è mò jèeyà, rzìi à mò òhweyà nanù ema, “Ò hwèlì ndi mɔ̀kɔ hwa hwaŋga hwatò ema hwa ɛ̀ndɛ̀lɛ̀nɛ̀ nà Yerzù òŋgò munyanà wà erzòòkà yà Galìlì”

Matiyò 26:75

Pètrò rzìi à ɔ̀ŋgɛ̀lɛ̀ jòòhwì ema Yerzù à mà mò òhweyà nanù ema, “Ndèŋgànà è mòme wà wuhwà à è tòŋga, ò nò rzɔ̀rzɔ̀ ŋgelì iyàwò nanù ema ò rza nò hwi.” À mà wurza ò èwòka rzìi à eyà ije-ije.

Matiyò 9:13

Ndi e ɛ̀ndɛ e òkòwe mamɛ ene mbɔrzi e òhwa na òma e tìlahwì ò e kààtì ya Lohwà nanù ema, ‘Mamɛ ema na arzana hwatò e hwèlì ndi ììlì, ndi rzeketɛ màhwèyà.’ Imba na rza jèlì ndi ò ene rze ya mɔ̀nyɛ̀ ò lì hwɛlɛ hwatò ema hwa gbeyà hweyà ema Lohwɛ̀ arza, na jɛ̀lɛ̀lɛ̀yi ndi hwatò hwa wòhwe.”

Ròmànì 14:1

È emeyà hwatò hwa arzɛ ema lìlòkɛ̀ la awu lì ɔtɔ̀wù, e rzi keka lì tɔ̀wɔ na wɔ̀ lì hvòmɛ̀nɛ̀ hweŋge hweyà hwe arzɛ ema hwa lutelì nanù ema hwa àŋgàmɛ̀nɛ̀ lì gbeyà na hweŋge ema hwa rza àŋgàmɛ̀nɛ̀ ò lì gbeyà.

Ròmànì 15:1

Irzɔ ema jò imbami ò lìlòkɛ̀ inyɛ jò òŋgòwane e wɔ̀ ema hwa rza imbamɛ ò màlòkɛ̀ ma awu. I rza alìŋgìrzɛ irzɔ hwiti.

Ròmànì 8:6

Mòtò a ika tɛ ŋmèma mò eni ò hwema hwe e nyàmà nyò nanù òma a hwɛni lì ŋwa. Ndi mòtò a ika tɛ ŋmèma mò eni ò hweyà hwe Èlìŋgɛ̀ nanù òma Lohwɛ̀ a mò ŋgba lòŋgɛ la gbìndèyà na ɛ̀yɔ̀lɛ̀.

1 Kɔ̀rintìyà 10:12

Hwàŋga ema hwa lùteyà nanù ema hwa tɛmì ehve-ehve o lì lòkɛ̀ hwa aŋgòwè hwa rzi ja lì undeya.

1 Kɔ̀rintìyà 14:37

È hwèlì tɛ ema o hwèlì mòtò mɔ̀kɔ ema à ɔŋgɛ̀lɛ ema mɔ̀ à hwèlì ndi Mòòhwèlì wà Èlìŋgɛ̀ tɔ̀ mòtò ema a ŋgbàahwì jàhwèyà ema jo uwɛ̀lɛ̀lɛ̀yi o hwèlìŋgɛ̀, inyɛ a hwiye nanù ema, mamɛ ya arzɛ̀ ema na hwèlì na e tìleya nanù, hwe hwèlì ndi hweyà ema Rzàŋgo A ohwi ama e gbeye.

1 Kɔ̀rintìyà 2:15

È mɔ̀ ema à ohvi Èlìŋgɛ̀ yà Wòtani a tànɛyi lì rzɔ̀ŋgìtɛ̀nɛ̀ o lì hwiya hweyà hwe arzɛ. Ndi, tɔ̀ mòtò tɔ̀ mɔ̀kɔ a rza tanɛ lì hwiya mɔ̀ŋgɛ̀lɛ̀ ma eni.

1 Kɔ̀rintìyà 3:1

Ìi wònyànyàŋgo hwa ami na hwa ndomɛ hwa ami, na rzi tanɛ lì e ohwìrzɛ̀nɛ̀ na oma nà mà tànɛyi lì e ohwìrzɛ̀nɛ̀ hwatò ema hwa ohvi Èlìŋgɛ̀ yà Lohwà. Nà ma hwɛnɛ ndi lì e ohwìrzɛ̀nɛ̀ nàa hwatò ema e hwèlì o ene rze. Tɔ̀ na e hwèlì ndi jùma hwàna ema hwà mà wòteyà lì hwɛ mɔ̀kɔ nà Krirztò.

1 Kɔ̀rintìyà 4:21

Mamɛ inyɔ e hvɔ̀rzì e? Nà jelì tɛ na e kɔ̀kìrzɛ̀ èhwanja e ondi kumba, ŋga na jàne ndi e ndìŋgɛ, na èlìŋgɛ̀ ema ya arzirzɛ e?

1 Kɔ̀rintìyà 7:5

Inyɔ ema e hwàahwì, e rzìi a imànɛ̀yi mɔ̀kɔ na ɔ̀nɛyi, o lìnɔ̀ŋgɔ, e hwɛ ndi nanù ema inyɔ ya ahweyànɛlɛ nanù ema, e gbeyà ndi nanù o ŋmàna hvòkà wà hvondà, aŋga nanù ya aŋgbɛ̀ɛ inyɔ hwiti o Màkànɛ. O mburzà ya nanù, e timbe e hwɛ ndi na oma e ma lome lì hwɛ, aŋga nanù Mòkarzɛ̀ à rza e kèkirzɛ, o lì ɛ̀ndɛ o mòrzònje.

2 Kɔ̀rintìyà 10:1

Imba Pàwolò, ema na arzihwirzɛ na ŋmɛɛ nàa Krirztò, na e rzorzomeya. Lòŋgo la hwatò hwa ohwa nanù ema na hwèlì tɛ na inyɔ na oka wɔ̀ŋgɔ̀ ndèŋgàna hwa ohwa nanù ema na rza enje tɛ na inyɔ na e tìleya kààtì ema ja ambirzɛnɛ.

2 Kɔ̀rintìyà 2:7

O èŋgànɛ̀lɛ̀ rzɔ e mo làkìrzɛ̀ na lì mo ètìrzɛ̀ ŋmèma nàŋgɛ. Àŋga nanù e ndùtù ema a o hwɛnɛ e rza o mo lìteya.

2 Kɔ̀rintìyà 2:8

Nà e atɛkɛ ema e mo uŋmɛ̀lɛ̀ ema e mo lìŋgàni nanù mɛnɛ.

Gàletìyà 5:23

Èlìŋgɛ̀ yà Wòtani yɔ ndi e gbeyà mòtò a arzìirzɛ na lì alɛ̀mbɛ mo ŋmìti. O rza enje tɔ̀ mbenda lì teŋgɛ̀nɛ hwene hweyà.

Gàletìyà 6:18

Ìi wònyamòwè kòkò, inyɛ è ndèli yà ama è Rzàŋgo ya arzu Yerzù Krirztò è hwɛ nà inyɔ hwa arzɛ. Inyɛ̀ wò lìya nanù!

1 Tɛ̀rzàlonìyà 4:1

Ìi wònyamòwè kòkò, jo òhwa hvɛ nanù ema, i ma e okolɛ nɛ e àŋgàmɛ̀nɛ̀yi lì lìya o lì òkìrzɛ̀ Lohwɛ̀ mɔ̀nyɛ̀ŋgi. Ndeŋgànɛ̀lɛ̀ o jɔ̀kɛ̀ nanù ndi hwèlìyelì hwe anyu hwe hwèlì o nàŋgɛ. O nàŋgɛ nanù, je e akowana, na lì e ohweyà o lìna la ama Rzàŋgo Yerzù nanù ema, e hwɛ ndi o lì lìyàna ene nyayi ya ɛ̀ɛ̀mɛ̀.

2 Tɛ̀rzàlonìyà 3:15

Ndi e rzi mo wowa nàa mɔ̀kɔ̀yèlì. Ndi nàa ŋmanyàŋgò wa anyu mɔ̀kɔ wa ama Krirztò e mo kòkòwɛ̀lɛ̀ o lì wowa hvonda.

2 Tìmotì 2:25

O òkolɛ hwaŋga hwatò ema hwa o teŋgɛ̀nɛ, aŋga nanù wɔ̀ hwa hwiya nanù ema hweŋge hweyà ema wɔ̀ hwa ohwa lì o teŋgɛ̀nɛ hwe rza enje e jɔ̀kɛ̀. O hwa okolɛ tɛ o hwa ajùlɛ̀nɛ̀, o hwɛni lì hwɛnɛ lìhvìtà nanù ema Lohwɛ̀ a gbeyà ema hwa embɛ lùùrzè la awu aŋga nanù hwa a eŋgohwɛ̀, ndèŋgàna hwa rzɔŋgìtɛ̀nɛ̀ e jɔ̀kɛ̀ ya mamɛ ema eyà ya Lohwà e ohwa.

Hibrù 12:13

È rzɛ̀ŋgɛ̀nɛ̀ e njiya ema e hwɛnì lì akeyà, aŋga nanù e wɔ̀ ema hwa hwèlì mboko hwa lùwa etembe hwa timba hvɛ lì wɔ̀wìrzɛ̀hwɛ.

Hibrù 13:3

È ɔ̀ŋgɛlɛ hwaŋga ema hwa hwèlì o hwèwòwà nàa wà ɛ̀nɛ oma e hwèlì aŋga na wɔ̀. È ɔ̀ŋgɛ̀lɛ̀ hvɛ hwaŋga ema hwa taka o rze ya hwahvɛhvɛ hwatò, inyɛ e hwɛ nàa inyɔ hvɛ e taka ndi na wɔ̀.

Jèmìrzì 3:13

O hwèlì tɔ̀ mɔ̀kɔ wa anyu anu ema a ohvi lìhwiyè na lì rzɔ̀ŋgìtɛ̀nɛ̀ e? Mɔ̀ a àŋgàmɛ̀nɛ̀yi ndi lì àwuŋmɛ̀lɛ̀ na lòŋgɛ la eni la gbamù ema mɔ̀ à hwɛni o hweyà hwe arzɛ ema mɔ̀ à gbeyà. Inyɛ̀ mɔ̀ à gbeye nanù o lì arzìirzɛ la eni là arzɛ na o lìhwiyè la eni.

Jèmìrzì 3:2

Irzɔ hwa arzɛ i yɔ̀ki lì gbeyà màtona o jòòhwì. È mòtò ema a rza gbeyà tɔ̀ lìtona a hwèlì ndi mòtò ema a tɛmi ehve-ehve a tànɛyi hvɛ lì kànèyà e nyo ya eni ya arzɛ aŋga nanù a rza gbeyà lìtona.

1 Pètrò 3:15

È ŋgbe Krirztò èluhwe nanù ema mɔ̀ ndi à hwèlì e Rzàŋgo ya mòŋgɛ ma anyu. È awoŋgirzɛnɛ o ihvonda ja arzɛ o lì alàhwɛ̀ tɔ̀ imà mòtò ema a e ijòwa o lì ohwa lì hvomɛ̀nɛ̀ lìhvìta ema e ohvani Krirztò.

1 Yòwanìrzɛ̀ 5:16

Tɔ̀ ima mòtò ema a ɛni ŋmanyàŋgò wa eni a undi o wòhwe ema wo rza mo lìyɛlɛ o kpelì, mɔ̀ à mo kànɛ̀lɛlɛ aŋga nanù Lohwɛ̀ a mo ŋgba lòŋgɛ. Hwàto ema na ohwa nanù ema inyɔ e kànɛlɛlɛ, hwa hwèlì ndi hwatò ema wòhwe wo awu wo rza oŋwa èlìŋgɛ̀ ya awu. O hwèlì wòhwe ema wo òŋwa èlìŋgɛ̀. È hwèlì tɛ nanù ema mòtò a undi tɛ o tenì ya woŋgo wòhwe, na rza ohwa nanù ema e kànɛlɛlɛ oŋgo mòtò.